Ráðstefna: Frumkvöðlar eru framtíðin

18. október næstkomandi fer fram ráðstefna undir yfirskriftinni „Frumkvöðlar eru framtíðin“ í Salnum í Kópavogi. Þar koma fram margar konur sem hafa gert það gott í frumkvöðlastarfi og fjalla um stofnun og rekstur á eigin fyrirtækjum.   Á ráðstefnunni verður leitast við að svara spurningum í tengslum við alþjóðavæðingu fyrirtækja, fjárfestingarmat, nálganir og aðferðir við fjármögnun og mikilvægi tengslanetsins bæði í innlendu og erlendu samhengi svo fátt eitt sé nefnt.

Nánari upplýsingar um viðburðinn má finna á vefsíðu NMI.


Atvinnu- og nýsköpunarhelgi á Vestfjörðum

Helgina 12. til 14. október næstkomandi fer fram Atvinnu- og nýsköpunarhelgi á Vestfjörðum. Viðburðurinn er vettvangur fyrir þá sem langar að koma viðskiptahugmynd í framkvæmd eða taka þátt í uppbyggingu hugmynda annarra.

Viðburðurinn er öllum opinn og það kostar ekkert að taka þátt. Yfir helgina fá þátttakendur tækifæri til þess að ná lengra með hugmyndir sínar með aðstoð fjölmargra sérfræðinga. Eins verða flutt gagnleg erindi um uppbyggingu hugmynda og stofnun fyrirtækja. Viðburðurinn er því fyrir alla þá sem hafa hugmyndir að vöru eða þjónustu, starfandi fyrirtæki og einnig þá sem langar að aðstoða aðra við uppbyggingu hugmynda.

Innovit og Landsbankinn standa að viðburðinum í samstarfi við Atvinnuþróunarfélag Vestfjarða og sveitarfélög á Vestfjörðum.  Eins styðja fyrirtæki af svæðinu rausnarlega við viðburðinn. Viðburðurinn fer fram í Þróunarsetrinu á Ísafirði.

Atvinnu- og nýsköpunarhelgar eru að erlendri fyrirmynd, en „Startup weekend“, hafa farið sigurför um allan heim. Hér á Íslandi hafa slíkar helgar verið haldnar víða um land undanfarin ár með góðum árangri. Markmið helganna er að virkja fólk til athafna og standa viðburðirnir yfir frá föstudegi til sunnudags þar sem  þátttakendur fá tækifæri til að vinna að hugmyndum sínum og njóta leiðsagnar og innblásturs frá sérfróðum aðilum.

Þátttaka er ókeypis! Dagskrá og aðrar upplýsingar um viðburðinn má finna á anh.is

Þáttaröðin Sprotar

Í dag fór af stað áhugaverð þáttaröð hjá mbl.is sem heitir Sprotar og er þar fjallað um ferilinn sem fylgir því að framkvæma hugmyndir sínar. Í þáttunum verður fylgt eftir teymum sem er með hugmyndir í vinnslu og hvernig þau fara að. Fyrsta þáttinn má sjá hér: http://www.mbl.is/frettir/sjonvarp/75930/


Entrepreneurs 2012 ráðstefna í London

Ég var að heyra af áhugaverðri frumkvöðlaráðstefnu sem fer fram í London í Nóvember og er án vafa mjög góður vettvangur fyrir alla frumkvöðla og fyrirtækjaeigendur. Því langaði mig að deila með ykkur smá upplýsingum um hana hérna á Frumkvöðlar.is. Eftirfarandi eru upplýsingarnar sem ég fékk frá skipuleggjendum ráðstefnunar.

Undirbúningur er nú í fullum gangi fyrir Entrepreneurs-ráðstefnuna, sem verður haldin  í London dagana 13.-16. nóvember nk.

Ráðstefnan er haldin í samstarfi við Bill Clinton, fyrrum Bandaríkjaforseta, og góðgerðarsjóð hans, The William J. Clinton foundation. Sjóðurinn var stofnaður í þeim tilgangi að bæta heilsu fólks um allan heim, styrkja hagkerfi, og vernda umhverfið með því að styrkja sambönd milli fyrirtækja, stjórnvalda og almennra borgara.

Bill Clinton er heimsleiðtogi og fyrirmynd frumkvöðla um allan heim. Á Entrepreneurs 2012 mun hann deila yfirgripsmikilli reynslu sinni og þekkingu til ungra frumkvöðla og athafnafólks og veita innblástur og hvatningu.

Á ráðstefnunni koma einnig koma fram Bruce Dickinson, fyrrverandi söngvari Iron Maiden, flugmaður og frumkvöðull, Ruby Wax, grínisti og sjónvarpskona, Karren Brady, fyrrverandi framkvæmdastjóri Birmingham City-fótboltaklúbbsins og núverandi varaformaður West Ham United, ásamt fleirum.

Síðasti dagur ráðstefnunnar ber heitið „Leaders First“ en þá munu fara fram pallborðs umræður með helstu forstjórum og framkvæmdastjórum Bretlands. Þar má meðal annars nefna Asda, Walmart, Bentley Cars, Rolls Royce, Google, Paypal, Nokia, Daily Telegraph, Microsoft og Apple. Ráðstefnunni lýkur með fimm rétta gala-kvöldverði, þar sem ráðstefnugestum gefst tækifæri til að spjalla við ræðumenn, fulltrúa fyrrnefndra fyrirtækja, mynda tengsl og fá ráðgjöf í vinalegu umhverfi.

Þá fá gestir tækifæri til að taka þátt í svokölluðu „Money Can’t-Buy“-uppboði þar sem hægt er að krækja sér í heimsókn á tökustaði frægra kvikmynda og snæða kvöldverð með þekktum einstaklingi.

Forysta, markaðssetning og tengslanet.

Entrepreneurs 2012 mun vera stærsta ráðstefna sinnar tegundar sem haldin hefur verið í Bretlandi. Þátttaka í ráðstefnunni er frábært tækifæri fyrir frumkvöðla, fyrirtækjaeigendur og í  raun alla þá sem hafa hug á að hefja fyrirtækjarekstur að læra af þeim færustu á markaðnum. Málefni eins og forysta, markaðssetning og tengslanet verða rædd alla fjóra dagana, enda málefni sem snerta öll fyrirtæki óháð stærð og innkomu.

Þátttakan er einstakt tækifæri til að mynda viðskiptasambönd við fyrirtæki sem eru best á sínu sviði á heimsvísu.

 

Nokkrir  Íslendingar hafa þegar skráð sig á ráðstefnuna. Nánari upplýsingar gefur Halla Vilborg Jónsdóttir í síma 0044 1275 390503 / 0044 7954 466262 eða haleigh.jones@blakpearl.com.

http://www.entrepreneurs2012.co.uk/

 


Topp 10 facebooksíður fyrir frumkvöðla

Facebook síður virka oft vel til að miðla allskonar upplýsingum og fróðleik og þess vegna ákvað ég að taka saman topp 10 lista yfir facebook síður á Íslandi sem henta vel fyrir frumkvöðla til að fylgjast með. Sjálfur er ég með facebook síðuna Frumkvöðlar en ég mun ekki taka hana með í þennan lista þar sem ég væri þá ekki mikið hlutleysi 🙂

1. Innovit

2. Startup Reykjavík

3. Klak nýsköpunarmiðstöð

4. Nýsköpunarmiðstöð Íslands

5. Startup Iceland

6.  Seed Forum

7. V6 sprotahús

8. Frumkvöðlasetrið Ásbrú

9. Markaðssetning á Internetinu

10. Markaðsmál á mannamáli

 

Þetta er langt frá því að vera tæmandi list svo endilega skrifið athugasemdir hérna fyrir neðan ef þið munið eftir fleiri áhugaverðum íslenskum frumkvöðlasíðum á facebook.


Lokakynningar Startup Reykjavík

Nú á föstudaginn var lokadagur Startup Reykjavíkur framtaksins.

Fyrir þau ykkar sem þekkið þetta ekki þá var þetta 10 vikna verkefni þar sem 10 viðskiptahópar unnu að því að þróa áfram hugmyndir sínar. Arion banki setti 2 milljónir króna í hvert verkefni gegn 6% hlut, Klak og Innovit sáu um að halda utan um verkefnið og tugi mentora úr íslensku, og erlendu, atvinnulífi mætti á staðinn til að leiðbeina og aðstoða liðin.

Ég var þeim heiðri aðnjótandi að geta fengið að fylgjast með verkefninu frá upphafi og ég gat ekki betur séð en að afskaplega vel væri staðið að öllum þáttum verkefnisins. Hóparnir 10 voru valdir úr 180 umsóknum og aðhaldið allan tímann var mjög gott.

Á síðasta degi verkefnisins kynntu allir viðskiptahóparnir viðskiptahugmyndir sínar fyrir sal fullan af fjárfestum. Framfarirnar á þessum 10 vikum voru ótvíræðar, kynningarnar sem ég sé í upphafi verkefnisins og svo þær sem ég sá í lokin voru gjörólíkar. Allir hóparnir komu fram af mjög mikilli fagmennsku, kynntu hugmyndir sínar, lýstu áætlunum sínum og útskýrðu hvað þeir væri að leita að frá fjárfestum.

Ég hef sagt það áður og mun gera það eina ferðina aftur hér að þetta verkefni mun líklega gjörbreyta frumkvöðlaumhverfinu hér á landi. En verkefnið hvílir nú á herðum fjárfestanna, það er spurning hvort þeir standi sig og taki þátt í þessu nýja og spennandi frumkvöðlaumhverfi eða hvort þeir séu of hræddir og íhaldsamir fyrir slíkum nýjungum.

 

Ég bíð svo bara spenntur eftir Startup Reykjavík 2013 🙂


Styrkir haustið 2012

Þá er komið að þessu skemmtilega tímabili ársins sem við höfum öll svo svakalega gaman af…. jú einmitt, kominn tími á styrktarumsóknir. Flestir helstu styrkveitendur eru með umsóknarfrest í september og því er ágætt að telja hérna aðeins upp þá styrki sem eru í boði. Ef þið eruð að spá í að sækja um þá er ágætt að byrja á umsóknunum fyrr en síðar, jafnvel bara að byrja núna strax.

 

15.sept: Tækniþróunarsjóður

Tækniþróunarsjóðurinn býður upp á stærstu styrktarupphæðin sem þú getur sótt um stærstu styrkir þeira nema 30 milljónum. En styrkirnir skiptast í 3 flokka sem hver er hugsaður fyrir fyrirtæki á mismuandi stað í rekstrarferslinum. Flokkarnir eru eftirfarandi.

1. Frumherjastyrkur:
Verkefnin eru einungis styrkt til 2ja ára að hámarki 5 milljónir hvert ár. Krafist er 25% mótframlags umsækjenda.

2. Verkefnisstyrkur:
Almennir verkefnisstyrkir eru til allt að 3ja ára og að hámarki 10 milljónir króna á ári. Krafist er 50% mótframlags umsækjenda.

3. Brúarstyrkur:
Verkefnin eru einungis styrkt til eins árs að hámarki 5 milljónir. Krafist er 50% mótframlags umsækjenda.

Ef þú ert að fara að sækja um styrk hjá Tækniþróunarsjóð í fyrsta skipti þá máttu búast við miklum tíma í það. Það er ætlast til að til staðar sé fullunnin viðskiptaáætlun auk þess þarf að fylla út tímafrek excel-skjöl. Það góða við að sækja um hjá tækniþróunarsjóð er að hann gefur manni gagnrýni til baka svo maður viti hvað maður gerði vitlaust, eini sjóðurinn sem gerir það sem best sem ég veit.

Frekari upplýsingar er að finna hér: http://rannis.is/sjodir/taeknithrounarsjodur/umsokn-og-upplysingar/

 

12.sept: Nýsköpunarstyrkur Landsbankans

Þessi styrkur var fyrst veittur í fyrra og samkvæmt Landsbankanum þá verður hann veittur á hverju ári. Styrknum er ætlað að styðja við frumkvöðla til að aðstoða þá við að þróa nýja viðskiptahugmynd eða yfirfæra eldri viðskiptahugmynd yfir á nýtt markaðssvæði. Þennan styrk má nota til að kaupa efni, tæki, sérfræðiþjónustu, námskeið eða annað sem byggir upp færni sem nýtist við þróun viðskiptahugmyndar. Þessi styrkur virðist því vera nokkuð sveigjanlegri en margir aðrir.

Alls munu vera veitar 15 millljónir í styrki og skiptast styrkirnir í hærri og lægri styrki. Hærri styrkirnir miðast við 500þús – 2 milljónir og lægri styrkirnir miðast við 200-500þús.

Frekari upplýsingar má finna hér: http://www.landsbanki.is/fyrirtaekjathjonusta/nyskopun/nyskopunarstyrkir/

 

20.sept: Átak til atvinnusköpunnar (Nýsköpunarmiðstöð)

Þessi styrkur er gerður til styðja við þróun nýsköpunarhugmynda á fyrri stigum sem hlotið gætu frekari fjármögnun sjóða og fjárfesta. Styðja við undirbúning og framkvæmd markaðsaðgerða í frumkvöðla og sprotafyrirtækjum. Hámarksupphæð er 50% af kostnaði verkefnis sem sótt er um, umsækjandi þarf að fjármagna hinn helminginn sjálfur.

Frekari upplýsingar má nálgast hér: http://nmi.is/studningur/styrkir-og-studningsverkefni/atak-til-atvinnuskoepunar/

 


Samræður við sjálfan mig fyrir 10 árum.

Ég var að enda við að horfa á myndband sem ég rakst á inn á visir.is sem bar titillinn “Ræðir við sjálfan sig fyrir 20 árum“. Í þessu myndbandi hefur kvikmyndagerðamaðurinn klippt saman myndband af sjálfum sér frá því hann ver 12 ára gamall og af sjálfum sér í dag 32 ára gömlum. Myndbandið er nokkuð skondið og áhugavert og einhvern veginn kemst maður ekki hjá því að hugsa um hversu skemmtilegt það væri að eiga samræður við sjálfan sig þegar maður var yngri.

Eins og með allt annað í lífinu þessa dagana tengdi ég þetta við fyrirtækjarekstur og frumkvöðlastarf. Út frá því fór ég að hugsa um hversu áhugavert það væri að eiga samræður við sjálfan mig fyrir 10 árum síðan þegar ég var að byrja í fyrstu tilraunum mínum í viðskiptum. Einhvern veginn myndi maður halda að það væri nú nokkuð augljóst hvað maður myndi segja við sjálfan sig enda er maður búinn að bæta á sig heilum 10 árum af reynslu, upplifunum og þekkingu, en þegar ég byrjaði að hugsa þá komst ég að því að svo var ekki.

Eitt af því mikilvægasta sem ég hef lært á þessum 10 ára ferli er hreinlega ekki hægt að koma í orð og mætti best lýsa sem tilfinningu fyrir viðskiptum. Eftir öll þau fyrirtæki sem ég hef rekið og allt það brask sem ég hef reynt þá á ég auðveldara með að skynja hvaða viðskiptatækifæri eru hagkvæm og hver eru það ekki. Ég get séð tækifæri þar sem aðrir sjá ekkert nema gjaldþrot útaf því að ég hef reynsluna og veit að ef maður myndi bara gera þetta og þetta öðruvísi þá gæti þetta skilað hagnaði. Ég veit ekki hvernig ég gæti hugsanlega kennt sjálfum mér fyrir 10 árum þetta án þess að fortíðar ég þyrfti bókstaflega bara að ganga í gegnum þetta allt aftur.

En nokkur atriði sem ég gat talið upp sem ég myndi segja við sjálfan mig í fortíðinni:

 

1. Vertu alltaf heiðarlegur í viðskiptum.

Það er mjög mikilvægt að vera heiðarlegur í öllum viðskiptum og í raun í öllum samskiptum og reyna alltaf að tryggja það að allir þeir sem þú átt viðskipti við gangi frá þeim sáttir. Það dregur úr þér mikla orku að vera í eigin rekstri og mér hefur alltaf fundist það vega upp á móti löngum vinnudögum og miklu stressi að allir þeir sem ég á viðskipti við treysti mér og ég geti treyst þeim. Þetta er líka lítill heimur og það nær engin árangri til lengdar sem er óheiðarlegur í viðskiptum.

 

2. Fólk skiptir meira máli en hagnaður.

Hver þú átt viðskipti við skiptir meira máli heldur en hagnaðurinn af viðskiptunum. Ég hef í gegnum tíðina átt viðskipti við ótal marga einstaklinga og ég hef komist að því að ef ég treysti viðkomandi ekki á einhvern hátt eða er með einhverskonar óþægilega tilfinningu við að eiga viðskipti við einhvern þá borgar það sig yfirleitt að sleppa viðskiptunum. Sem dæmi um slæm viðskipti sem ég hef lent í þá t.d. lenti ég í því að skrifa undir sölusamning við kaupenda sem svo aldrei greiddi alla upphæðina og útaf lagalegum flækjum fékk ég aldrei alla þá upphæð sem mér var lofað. Þetta var mjög há upphæð og ég kom út úr þessum viðskiptum í gríðarlega tapi. Einnig hef ég leigt út fasteignir til einstaklinga sem bókstaflega rústuðu þeim og kostuðu mig hundruði þúsunda án þess að ég ætti nokkurn möguleika að fá peninginn til baka. Slík viðskipti geta bókstaflega ýtt manni út í kvíða og stress auk alls fjárhagslega kostnaðarins. Þannig veljið ekki bara samstarfsaðila vel heldur birgja og viðskiptavini líka.

 

3. Haltu áfram!

Þrautsegja skiptir öllu máli í því að reyna koma nýjum rekstri af stað enda er ekkert auðvelt við slíkan feril. Ef þú ætlar virkilega að stofna fyrirtæki og ná langt þá verðurðu bara að halda áfram sama hversu erfitt það er. Flestir frumkvöðlar sem ég þekki hafa þurft að ganga í gegnum mjög erfið tímabil og hafa á einhverjum tímapunkti hugsað með sér að það væri nú bara sniðugra að hætta þessu rugli og fá sér venjulega vinnu. Þetta er erfitt en ef þú vilt þetta virkilega, haltu þá áfram.

 

4. Þekking, lærdómur og reynsla!

Vertu stöðugt opin fyrir nýjum reynslum og hættu aldrei að læra nýja hluti. Ef þú ert að vinna á einhverju sviði reyndu þá að lesa þér til um það og sjá hvernig þeir sem hafa náð árangri gerðu það. Farðu á námskeið, ráðstefnur, horfðu á youtube myndbönd, downloadaðu heimildarmyndum, lestu bækur, lestu bækur og lestu bækur. Það er ótrúlega mikið að fróðleik þarna úti og ef þú veist hvert þú stefnir þá geturðu allt en þú verður sífellt að vera vinna í því að læra meira og prufa meira. Ef þú færð tækifæri til að prufa eitthvað spennandi sem gæti kannski hjálpað þér á einhverjum tímapunkti í lífinu stökktu þá á tækifærið. Hættan er sú að þegar þú byrjir að vinna í þínu fyrirtæki þá hafirðu ekki lengur tíma til að læra og þá byrjar fyrirtækið að staðna og á endanum byrjar það að hnigna. Haltu ávallt áfram að læra og prufa nýja hluti.

 

Mikilvægasta uppgötvunin hjá mér sjálfum við að hugsa um þessar samræður við fortíðina er líklega sú að allt það sem ég hef gengið í gegnum súrt og sárt hefur gert mig að öflugri frumkvöðli sem á auðveldara með að láta hluti skila árangri í framtíðinni. Þannig að þótt svo að þetta hafi vægast sagt verið erfiður og kvíðafullur ferill þá myndi ég ekki vilja skipta honum fyrir neitt því ég hef hlotið svo mikla reynslu og þekkingu sem ég hefði annars aldrei getað öðlast.


Startup Reykjavík er 10 vikna bisniss mössun!

Ég leit við á skrifstofu Startup Reykjavík verkefnisins í síðustu viku og fékk þar tækifæri til að spjalla aðeins við bæði skipuleggjendur verkefnisins og flesta þeirra 10 hópa sem komumst inn. En þannig var að fjöldinn allur af einstaklingum og hópum sem voru með viðskiptahugmyndir sóttu um að fá að taka þátt í þessu 10 vikna verkefni en einungis 10 hópar fengu inngöngu.

Verkefnið gengur út á það að keyra viðskiptahugmyndirnar af stað og hnoða þær til þangað til úr verður æðislegt fyrirtæki. Verkefnið er byggt á sama grunni og Techstars út í Bandaríkjunum en sú útungunarstöð frumkvöðlafyrirtækja hefur gengið frábærlega vel. Öll fyrirtækin fá vinnuaðstöðu í virkilega flottu húsnæði í Ármúla þar sem þau eru umkringd öðrum öflugum frumkvöðlum, þau fá einnig 2 milljónir króna í peningum gegn 6% hluta í fyrirtækjum þeirra og svo fá þau handleiðslu og ráðgjöf frá fjöldanum öllum af hæfum mentorum. Í lokin á þessum 10 vikum verða öll þessi fyrirtæki svo aðstoðuð við að komast í samband við fjárfesta og mentora til að tryggja það að leið þeirra verði öll upp á við í framtíðinni 🙂

Það besta við þetta verkefni finnst mér vera það að allir þessir hópar fá á meðan á þessu 10 vikna verkefni stendur aðstoð frá yfir 40 mentorum sem allir hafa ótrúlega mikla reynslu og þekkingu á bak við sig. Slík ráðgjöf mun án nokkurs vafa nýtast þessum frumkvöðlum afar vel í því að þróa áfram hugmyndir sínar og gera þær að veruleika. Ég mæli með að þið kíkjið inn á Startup Reykjavík vefsíðuna og skoðið nánar hvað er í gangi og alla þá flottu aðila sem koma að verkefninu. Ég mun fylgjast grannt með þessu og gæti vel verið að ég taki viðtal við eitthvað af þessum flottu hópum sem nú eru á fullu að þróa framtíð íslensks viðskiptalífs 🙂

Hér má sjá mynd af nokkrum af þeim mentorum sem koma til með að vera aðstoða hópana á meðan á þessu verkefni stendur.


Vendipunktur í íslensku frumkvöðlaumhverfi

Fyrir nákvæmlega viku síðan fór fram viðburðurinn Startup Iceland og ég held því fram að þessi ráðstefna hafi verið mikil vendipunktur í íslensku frumkvöðlaumhverfi. Bala Kamallakharan upphafsmaður og skipuleggjandi þessa viðburðar náði þarna einhvern veginn að koma saman heimsþekktum frumkvöðlum og fjárfestum  og sannfæra þá um að heimsækja þessa litlu þjóð í norðri. Fyrirlesararnir sem þarna komu fram voru meðal annars Brad Feld, Brad Burnham, Ted ZollerRebeca Hwang, Sarah PrevetteRebecca Kantar og Helga Valfells. Ég held einnig að Ólafur Ragnar Grímsson, forseti Íslands, eigi skilið sérstakar þakkir en hann hefur verið mikil stuðningsmaður frumkvöðlastarfs á Íslandi og hefur sjálfur mætt á marga af þessum viðburðum til að styðja við bakið á íslenskum frumkvöðlum.

Það sem kom mér mest á óvart varðandi þennan viðburð var hversu vingjarnlegir og hjálpsamir allir þessir virtu frumkvöðlar voru, ég ræddi við nokkra þeirra og þeir voru allir af vilja gerðir til að hjálpa og gefa mér ráð. Ég er farinn að halda að frumkvöðlar séu alveg sérstök manngerð sem hefur það eitt markmið að láta gott af sér í þessu lífi og hikar ekki við að hjálpa og aðstoða aðra með svipuð markmið. Þetta er að minnsta kosti jákvæðustu aðilar sem ég hef hitt. Dæmi um slíkt er t.d. það að Brad Feld bauðst til að nýta tímann í rútunni á leiðinni á viðburðinn til að svara spurningum. Inn á vef liveproject.me má sjá svör Brad Feld við spurningunum í rútunni ásamt ýmsum öðrum skemmtilegum myndum og myndböndum af viðburðinum: http://liveproject.me/event/startup-iceland/8335/

Í framhaldi af þessari ráðstefnu myndaðist mjög jákvætt hugarfar hjá þessum erlendu aðilum gagnvart Íslandi og margir þeirra lýstu yfir áhuga á að koma hingað aftur. Nú krosslegg ég bara alla fingur og vona að ráðstefnan verði endurtekin á næsta ári og að við fáum aftur eitthvað af þessum öflugu frumkvöðlum til landsins.

Að lokum vil ég þakka Bala Kamallakharan kærlega fyrir að hafa látið þessa ráðstefnu verða að veruleika.


Hvað nákvæmlega er Hackathon?

Nú fer að styttast í Iceland Startup ráðstefninu en hún fer fram 30.maí næstkomandi og ég er orðin vægast sagt spenntur fyrir þessum viðburð. Það er þó eitt varðandi ráðstefnuna sem ég var ekki alveg með á hreinu og það var hið svokallaða Hackathon sem fer fram 29.maí eða daginn fyrir ráðstefnuna. Ég vissi að þetta tengdist forritun og væri tækifæri fyrir áhugasama forritara um að hittast og keppa sín á milli en ég var þó ekki almennilega með það á hreinu hvað myndi felast í því og hvort það væri einhver ágóði fyrir mig að mæta á viðburðinn. Í raun ímyndaði ég mér þetta svolítið eins og atriðið úr kvikmyndinni “The Social Network” þar sem forritararnir kepptu í að hakka sig inn á eitthvað kerfi og sá sem vann fékk vinnu hjá Facebook.

Hackathonið sem fer fram núna 29.maí verður líklega aðeins öðruvísi eða allavegana býst ég fastlega við að þar verði sleppt öllu áfenginu sem sást í kvikmyndinni. En engu að síður er kjarnin sá sami að forrita og leysa þrautir á sem styðstum tíma umkringdur tölvum og forriturum sem allir sitja sveittir við iðju sína. Það verða mörg þekkt íslensk tæknifyrirtæki á staðnum sem koma til með að deila reynslusögum sínum auk þess sem þau koma til með að leggja fyrir þátttakendur ýmsar þrautir. Þau fyrirtæki sem verða á svæðinu eru Clara, GreenQloud, Icelandic Institute for Intelligent Machines, Microsoft og Videnti er.

Facebook eventið má finna hér: https://www.facebook.com/events/272685122823997
Eventbite skráninguna má finna hér: http://icehackathon.eventbrite.com/

Skráning á viðburðinn er opin til 25.maí og þið getið skráð ykkur á Facebook eða í gegnum Eventbite. Einnig geta þeir sem vilja frekar skrá sig með tölvupóst, sent tölvupóst á Hamid@iiim.is með fyrirsögninni “Hackathon Signup”. Þær upplýsingar sem þurfa að koma fram eru:

  • Nafn liðsins (ef fleiri en einn)
  • Fullt nafn
  • Tölvupóstur
  • Heimilisfang
  • Stofnun/skóli/annað:
  • Og hvort þú viljir keppa ein(n) eða í liði

Svo læt ég einnig fylgja hérna með nánari lýsingu á viðburðinum á ensku sem ég afritaði af kynningarblaði viðburðarins.

 

Hackathon – 2012

Hackathon is a very laid back competition for hackers and people who would liketo meet each other and work on interesting problems together. Its an opportunityto meet other hackers and also people from companies.

For whom?

  • Hackers/people who like to meet new hackers/people.
  • this event is open to students, hobbyists, professionals, anybody who likesto hack on cool code.
  • Individual with no team will be teamed up randomly with other individuals- It is not necessary for people to be in a team if you like to be alone pleaselet us know.
  • Maximum 5 people can be in a team.

Where?

This event will be hosted by The School of Computer Science at Reykjavik Uni-versity and will take place on May 29 from 9am-9pm.

Agenda

09:00 registration
10:00 – 10:30 welcome
10:30 – 12:00 companies and their challenges
12:00 – 20:00 participants time to hack problems
20:00 – 21:00 participants time to present their solutions and judging and awards

Coff ee and pizza are going to be available throughout the event – self service eating policy during the event 🙂

There will be 1000$ for the winners of Hackathon 2012!

Clara and GreenQloud are considering to hire good hackers from thisevent!

 


Ég er með hugmynd, hvað nú?

Öll höfum við fengið snilldarlega hugmynd á einhverjum tímapunkti í lífi okkar.

En við mannfólkið erum löt í eðli okkar og reynum þess vegna alltaf að finna einhverja afsökun afhverju við ættum ekki að framkvæma.

  • „Þetta er alltof mikil áhætta“
  • „Það myndi kosta milljónir að gera þetta að veruleika“
  • „Ef ég þekkti nú bara rétta fólkið“
  • „Það er alltof mikið að gera hjá mér núna“
  • „Ég er ekkert hæf(ur) til að stofna og reka fyrirtæki, veit ekkert um viðskipti“
  • „Það er örugglega einhver klárari en ég þarna úti sem er að vinna í þessu“

Örugglega væri hægt að telja upp þúsund afsakanir til viðbótar sem fólk notar til að koma sér hjá því að þurfa í alvörunni að leggja á sig vinnuna sem fylgir því að láta hugmyndina verða að veruleika. En staðreyndin er sú að allar þessar afsakanir eru ekkert annað en hræðsla og leti, því að ef við myndum ákveða að fylgja eftir hugmyndinni þá þyrftum við að yfirgefa þægindasvæði okkar og það viljum við nú alls ekki gera.

Það eru þó alltaf örfáir aðilar sem staldra aðeins lengur við og spyrja sjálfa sig “Hvernig get ég látið þessa hugmynd verða að veruleika?”. Það er ekki auðvelt að svara þessari spurningu, sérstaklega ef þið hafið aldrei áður farið í gegnum ferilinn að stofna fyrirtæki en hvernig farið þið þá að?

 

5 upphafsskref

Áður fyrr hefði ég ráðlagt ykkur að skrifa viðskiptaáætlun um hugmyndina og að mörgu leiti er sú ráðlegging góð þar sem það að skrifa viðskiptaáætlun neyðir ykkur til að hugsa út í öll smáatriðin. En viðskiptaáætlanir geta verið flóknar og mjög tímafrekar og þess vegna hef ég í seinni tíð verið minna hrifin af þeim. Þess í stað myndi ég einfaldlega ráðleggja ykkur að skilgreina ferilinn nánar og þá sérstaklega þessi 5 atriði:

  1. Skilgreina hugmynd, í hverju felst varan og hvert er hlutverk fyrirtækisins.
  2. Kostnað við að þróa og framleiða vöruna/þjónustuna. Startkostnaður.
  3. Rekstrarkostnað, hvað kostar að reka fyrirtækið (laun, skrifstofa, markaðsmál, símar, hýsing o.s.frv.)
  4. Lagaleg atriði, þurfið þið að sækja um einhver leyfi? Er hægt að fá einkaleyfi á hugmyndina? Hver ber ábyrgð ef eitthvað kemur upp á? Hvernig er bókhaldi og skattamálum háttað?
  5. Sölu- og markaðsmál, hver er markhópurinn ykkar og hvernig ætlið þið að koma vörunni til hugsanlegra viðskiptavina?

Þetta er á engan hátt tæmandi list og jafnvel þótt svo þið svarið öllum þessum atriðum þá vitið þið ekki allt sem þið þurfið að vita til að ná árangri með hugmynd ykkar. Engu að síður er þetta rosalega góður byrjunarstaður og ef þið getið skilgreint öll þessi atriði fyrir hugmynd ykkar þá eigið þið skilið hrós og klapp á bakið. Passið þó að flýta ykkur ekki of mikið í gegnum þessi atriði og takið frekar meiri tíma til að velta þeim öllum ýtarlega fyrir ykkur.

 

Góð ráð til að vinna þetta

Á meðan þið eruð að vinna í að svara ofantöldum atriðum þá er ýmislegt sem þið getið gert til að bæta skilning ykkar á hugmyndinni, umhverfinu og möguleikunum. Hérna deili ég með ykkur nokkrum góðum ráðum sem gætu nýst ykkur í þessum ferli.

  • Veltið fyrir ykkur hvað nákvæmlega verður hlutverk fyrirtækisins sem þið stofnið? Er aðal áhersla fyrirtækisins á sölumál, þróun, framleiðslu, markaðssetning, forritun eða eitthvað annað?
  • Greinið samkeppnisaðila, hverjir eru í beinni samkeppni við ykkur og hverjir eru í óbeinni samkeppni. Hvað ætlið þið að gera öðruvísi en þeir?
  • Kynnið ykkur markaðinn sem þið ætlið að fara inn á með því að tala við fólk sem hefur reynslu af honum og lesið allt sem þið mögulega getið um hann.
  • Leitið ráða hjá sérfræðingum á hverju sviði. (Lögfræðingar, endurskoðendur, verkfræðingar, forritarar o.s.frv.)
  • Setjið saman gott teymi til að vinna með að hugmyndinni, veljið fólk sem er sterkt á öðrum sviðum en þið sjálf og þið treystið.
  • Skoðið hvernig önnur sambærileg fyrirtæki hafa náð að koma sér á framfæri til hugsanlegra viðskiptavina, hvar og hvernig hafa þau verið að markaðssetja sig.
  • Kynnið ykkur hvernig það er að stofna fyrirtæki, hvaða pappíra þarf að fylla út og hvað mun það kosta ykkur.

 

Námskeið

Í hverri viku leitar til mín fólk sem er með hugmynd og er að velta fyrir sér hvernig það eigi að framkvæma hana og breyta henni í arðsamt fyrirtæki. Það er ekki auðvelt að svara slíkri spurningu og ég reyni en get því miður ekki gefið mér tíma fyrir alla sem leita til mín. Þess vegna ákvað ég að halda frekar bara námskeið til að aðstoða fólk í þessum hugleiðingum og ég fékk til liðs við mig hana Þórunni Jónsdóttur hjá Fafu. Námskeiðið fer fram 16.júní næstkomandi og ef þið hafið áhuga á að fræðast meira um þennan feril þá mæli ég með að þið kíkjið á námskeiðið hjá okkur. Þið getið lesið meira um það hér: Ég er með hugmynd, hvað nú?

 

 


Vettvangur fyrir áhugafólk um fyrirtækjarekstur

Mér hefur fundist svolítið vanta vettvang þar sem þeir sem hafa áhuga á fyrirtækjarekstri geta komið saman og spjallað saman um allt það sem þeir eru að fara í gegnum. Ég var mikið búinn að velta fyrir mér hvað gæti verið besti valmöguleikinn til að afreka þetta, fyrst datt mér til hugar að setja upp smáauglýsingasvæði hérna á frumkvöðlar.is. Hélt að þar gæti fólk óskað eftir hinu og þessu, leitað eftir skrifstofum til að leigja, finna hugsanlega samstarfsaðila eða meðstofnendur en nei, það gekk ekki alveg upp, var ekki nógu interactive. Svo datt mér til hugar að setja upp forum eða spjallsvæði hér á vefsíðunni þar sem lesendur bloggsins gætu talað um allt það sem þeim dytti til hugar varðandi fyritækjarekstur en það hefði verið tímafrekt að setja það upp og ef það er eitthvað sem ég á lítið af þessa dagana þá er það tími. Á endanum datt mér þó til hugar afskaplega einföld lausn á þessu, ég bjó einfaldlega til facebook grúppu sem hét Íslenskir frumkvöðlar og þar geta allir þeir sem hafa áhuga komið og verið með í umræðunni. Þetta tók mig einungis 5 mínútur í uppsetningu og nú þegar er síðan orðin nokkuð lífleg.

Ég vil því bjóða alla þá sem hafa  áhuga fyrirtækjarekstri og frumkvöðlastarfi velkomna í nýju grúppuna Íslenskir frumkvöðlar 🙂


Viðskiptaspeki

Í viðskiptum er að mínu mati mikilvægt að mynda sér hálfgerða lífspeki eða í raun viðskiptaspeki þar sem þú ákvarðar hvernig þú vilt stunda viðskipti. Við erum öll mismunandi með mismunandi þarfir í lífinu. Sumir fara út í viðskipti til að græða eða lifa góðu lífi og það er allt í góðu lagi, aðrir vilja skapa eitthvað, breyta heiminum eða einfaldlega skapa sér vinnu sem þeir hafa gaman af. Hver sem ástæðan er á bak við það að þú farir út í eigin rekstur þá er nauðsynlegt að þú hafir tekið þér góðan tíma til að ákveða þessa ástæðu og að þú sért sátt(ur) með hana.

Í dag er ég kominn með nokkuð vel skilgreinda viðskiptaspeki þar sem ég legg mikið upp úr því að láta gott af mér leiða. Ég vil breyta heiminum til hins betra að hverju því leiti sem ég get og vil mynda góð sambönd við þá aðila sem ég stunda viðskipti við. Ég sleppi frekar að eiga viðskipti en að eiga viðskipti við aðila sem ég ekki treysti eða finnst vera vafasamir.

Mér finnst einnig mikilvægt að hjálpa öðrum og reyni yfirleitt að vera opin fyrir því að deila því sem ég hef lært eins og þessi vefsíða sýnir kannski hvað best. En einnig hef ég verið að kenna og mentora á hinum ýmsu viðburðum. Nú síðast um helgina þegar ég mentoraði í kúrsinum „Nýsköpun og stofnun fyrirtækja” upp í HR og svo „Atvinnu- og nýsköpunarhelgi” upp á Akranesi. Það að taka þátt í slíkum viðburðum er afskaplega gefandi bæði vegna þess að ég fæ þar tækifæri til að miðla áfram reynslu minni en einnig vegna þess að það að hitta svona orkumikið fólk veitir mér innblástur og bjarta sýn á framtíð okkar.

Það sem ég er í raun að reyna segja með þessari grein er ekki bara stunda viðskipti til að stunda viðskipti. Áttið ykkur á því hvað þið viljið fá út úr þeim og þá verður allt svo miklu auðveldara og þægilegra.


Hópfjármögnun Taktabrots

 

Á undanförnum árum hefur hópfjármögnun(e.crowd funding) orðið vinsæl leið til að fjármagna ýmis verkefni og fyrirtæki. Stærstir á þessu sviði er líklega vefsíðan Kickstarter sem margir eru farnir að þekkja í dag. Það er þó örlítið erfiðara fyrir íslensk fyrirtæki til að nýta sér þá þjónustu þar sem nauðsynlegt er að vera með bandarískan bankareikning sem flækir málin örlítið. Það eru þó til dæmi um að íslensk fyritæki hafi notað Kickstarter með góðum árangri og sem dæmi um slíkt verkefni má benda á Startup Kids sem ég fjallaði um í síðustu færslu minni.

Ragnar Freyr er grafískur hönnuður sem ég deildi skristofu með í fyrra og um daginn þá heimsótti ég hann upp á gömlu skrifstofuna mína og fórum við að spjalla um nýja bók sem hann er að gefa út í samstarfi við Breakbeat. Ég varð vægast sagt spenntur að heyra meira þegar ég frétti það að þeir höfðu  fjármagnað útgáfu bókarinnar með “crowd funding”. Og ekki nóg með það heldur gerðu þeir það allt sjálfir frá grunni, þ.e.a.s. þeir settu upp einfalda og skilvirka vefsíðu þar sem allar upplýsingar um hugmyndina komu fram og áhugasamir aðilar gátu sett pening í verkefnið með millifærslu. Styrkveitendur hluti svo þakklætisgjafir fyrir framlag sitt, ef ákveðin upphæð var sett í verkefnið þá fengu þeir bók, ef þeir settu örlítið meira fengur þeir bók og miða á útgáfutónleikana o.s.frv.

Bókin heitir Taktabrot og þið getið sé vefsíðuna sem þeir notuðu til að fjármagna þetta á slóðinni http://bok.breakbeat.is/.


The Startup Kids

Í gær sá ég forsýningu á nýrri heimildarmynd um unga frumkvöðla sem starfa í „startup“ heiminum bæði í Evrópu og Bandaríkjunum. Þessi heimildarmynd var unnin af tveimur öflugum frumkvöðlum, Sesselju Vilhjálmsdóttur og Völu Halldórsdóttur. Drifnar áfram af eigin áhuga og ástríðu fyrir að skapa og framkvæma, ákváðu þær að fara út í þetta skemmtilega verkefni með það markmið að hvetja ungt fólk til að láta drauma sína verða að veruleika. Þær ferðuðust vítt og breitt og tóku viðtöl við unga frumkvöðla út um allan heim sem hver og einn hafði náð góðum árangri á sínu sviði.

Þrátt fyrir að hafa verið búinn að vita að þessi mynd væri í vinnslu í þó nokkurn tíma, enda man í glögglega eftir því þegar hún var fjármögnuð í gegnum Kickstarter,  hafði ég enga hugmynd um hvernig lokaútkoman myndi verða og var ég því vægast sagt spenntur. Myndin stóðst allar mínar væntingar og var frábærlega skemmtileg samantekt á því umhverfi sem hefur myndast í kringum „startup“ heiminn og þau tækifæri sem þar búa fyrir fólk á öllum aldri. Aldur er ekki lengur afsökun, þú ert hvorki of gamall né of ungur til að láta hugmyndir þínar verða að veruleika, það eina sem skiptir máli er að þú sért tilbúin að framkvæma og fylgja því eftir með vinnu og þrautseigju.

Maður gat ekki annað en fyllst innblástri þegar maður horfði á þessa mynd og ég þurfti að hafa mig allan við að stökkva ekki úr sætinu og hlaupa upp á skrifstofu svo ég gæti nú farið að vinna og haldið áfram að vinna í mínum hugmyndum. Ég náði þó að standast þá freistingu og mætti þess í stað ferskur á þessum ljúfa laugardegi 🙂

Ég mæli hiklaust með að þið kynnið ykkur myndina betur á vefsíðu Startup Kids eða addið þeim á twitter eða facebook.

 


Reykjavik Runway í topp 10 í Gullegginu

Ég kynntist henni Ingibjörgu Grétu Gísladóttur fyrst fyrir nokkrum árum síðan þegar hún rak Hugmyndhúsið við Grandagarð og það fór ekkert á milli mála að þar var öflug manneskja á ferðinni. Í framhaldi af því hefur hún haldið áfram að starfa í frumkvöðlaumhverfinu og stofnaði fyrirtækið Reykjavik Runway, nú þegar hefur fyrirtækið náð að verða vel sýnilegt í íslenskum tískuheimi enda skipulagði það glæsilega hönnunarkeppni sumarið 2012.

Reykjavik Runway er eitt af 10 fyrirtækjum/viðskiptahugmyndum til að komast í úrslit í Gullegginu og því fannst mér það nauðsynlegt að heyra aðeins í henni Ingibjörgu og biðja hana um að segja okkur aðeins frá fyrirtækinu og framtíðarplönum þess.

 

Stefna Ingibjargar með fyrirtækið er að reyna aðstoða íslenska fatahönnuði við að koma sér á framfæri á alþjóðavettvangi. Það kemur til með að vera gert í gegnum internetið með öflugri vefsíðu, við það bætast svo öflug áhersla á markaðsmál og tengslanet við mikilvæga aðila í tískuheiminum erlendis.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hana Ingibjörgu með tölvupósti í netfangið igg@reykjavikrunway.com.


Kasy í topp 10 í Gullegginu

Katrín Sylvía Símonardóttir er stofnandi fyrirtækisins kasy, en næstu helgi keppir það fyrirtæki til úrslita í Gullegginu sem er frumkvöðlakeppni á vegum Innovit. Viðskiptahugmynd Katrínar felst í því að framleiða sundfatnað fyrir konur með línur og er hægt að aðlaga sundfatnaðinn að aðstæðum að hverju sinni.

Ég skellti mér í smá bíltúr með henni Katrínu þar sem ég truflaði hana við akstur með allskonar skemmtilegum spurningum. Þess má líka geta að ég tók viðtalið upp á símann minn svo tæknilega séð var hún að tala í símann við aksturinn 🙂

Kasy sundfötin fara bráðlega í framleiðslu og því augljóst að kvennmenn út um allan heim þurfa ekki að bíða alltof lengi eftir því að geta fjárfest í slíkri hönnun. En fyrir þau ykkar sem getið ekki beðið þá getið þið nálgast frekari upplýsingar á facebook síðu kasy.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hana Katrínu með tölvupósti í netfangið kasydesign@gmail.com.


Karolina Fund í topp 10 í Gullegginu

Eitt af því sem fólk kvartar mest yfir þegar það er að stofna fyrirtæki er hversu erfitt það er að nálgast fjármagn. Bankar lána yfirleitt ekki til nýrra fyrirtækja nema að það sé til einhverskonar veð fyrir því og það reynist mörgum erfitt að finna fjárfesta og hvað þá áhugasama fjárfesta sem eru tilbúnir að leggja pening í fyrirtækið.

Ég hitti í gær tvo af stofnendum Karolina Fund, sem þessa dagana keppir til úrslita í Gullegginu, þá Inga Rafn og Jónmund. En Karolina Fund hefur einmitt þann tilgang að leysa ofangreint vandamál og hjálpa ungum fyrirtækjum og frumkvöðlum að nálgast fjármagn í gegnum hópfjármögnun (e. crowdfunding). Heyrum hér aðeins hvað þeir höfðu að segja:

 

Þannig að Karolina Fund kemur til með að búa til vettvang fyrir skapandi fólk til að leita sér hópfjármögnunnar fyrir verkefni sín. Með því að setja upp ýtarlegar upplýsingar um verkefnin svo sem vidjó, ýtarlegar textalýsingar, markmið, fjárþörf o.f.l. geta hugsanlegir fjárfestar fengið allar þær upplýsingar sem þeir þurfa til að taka ákvörðun um hvort þeir vilji fjárfesta. Það skemmtilega við uppsetninguna á þessu er að hver sem er getur fjárfest í þessum hugmyndum, þú þarft ekki að vera fagfjárfestir heldur einungis að eiga smá pening og þá getur þú lagt þann pening í eitthvað verkefni sem vonandi mun skapa störf og tekjur fyrir íslensku þjóðina auk þess sem þú sjálfur gætir grætt betur á því heldur en ef peningurinn sæti bara í bankanum.

Hægt er að setja upp verkefni þar sem leitað er eftir minni fjárfestum sem þá fá hugsanlega prótótýpu ef vörunni eða eitthvað annað spennandi í þakklætisskyni fyrir sitt framlag. Einnig er þó hægt að setja upp stærri verkefni þar sem fjárfestarnir fá raunverulegan hluta í fyrirtækinu og geta þá orðið meðeigendur í hugmyndinni. Þessi vettvangur ætti því að vera spennandi valmöguleiki fyrir stórar sem smáar hugmyndir í framtíðinni.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hann Inga Rafn með tölvupósti í netfangið contact@karolinafund.com.


Markaðsmál á Mannamáli í topp 10 í Gullegginu

Þóranna Kristín Jónsdóttir er mjög virk í íslenskum markaðsmálum og ég hef oft rekist á hana á ýmsum markaðs- og frumkvöðlatengdum viðburðum. Það var því gaman að sjá að hún væri nú komin í topp 10 í Gullegginu.

Fyrr í dag plataði ég Þórönnu til að hitta mig í kaffibolla á Te&kaffi á laugaveginum til að fá smá upplýsingar um viðskiptahugmynd hennar en líkt og með Viral Trade og Insidememo viðtölin mín þá ákvað ég einnig að taka þetta upp á vidjó.

 

 

Hugmyndin heitir Markaðsmál á mannamáli og gengur út á það að útbúa fræðsluefni fyrir ung fyrirtæki til að auðvelda þeim markaðssetningu fyrirtækisins. Markaðssetning fyrirtækja er eitthvað sem getur reynst mörgum ungum fyrirtækjaeigendum erfiðlega auk þess sem kostnaðurinn er oft ansi mikill. Viðskiptahugmynd Þórönnu mun vonandi auðvelda þessum fyrirtækjum fyrir og vonandi ná að lækka kostnað þeirra við markaðssetningu töluvert.

Þóranna stundar í dag markaðseinkaþjálfun og ráðgjöf og hægt er að nálgast frekari upplýsignar um hana á vefsíðunni thoranna.is eða á facebook síðu hennar.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hana Þórönnu með tölvupósti í netfangið thoranna@thoranna.is.


Insidememo í topp 10 í Gullegginu

Í framhaldi af viðtali mínu við hann Gulla hjá Viral Trade í fyrradag hef ég ákveðið að elta upp nokkra fleiri frumkvöðla sem eru komnir í úrslit hjá Gullegginu til að forvitnast um Hugmyndir þeirra.

Andrés Jónsson, Fannar Freyr Jónsson og Jón Dal eru frumkvöðlarnir sem standa á bak við viðskiptahugmyndina Insidememo. Sú hugmynd snýst um að vinna með sérhæfðar og í mörgum tilfellum staðbundnar upplýsingar og setja þær fram á auðveldan og aðgengilegan hátt. Í raun getið þið ímyndað ykkur öll þau mörgu tilfelli þegar þið eydduð heilu klukkutímunum á Google að leita eftir hinum ýmsu upplýsingum en funduð aldrei nákvæmlega það sem þið voruð að leita eftir, Insidememo er lausnin við því. Þeir koma til með að útbúa hina ýmsu lista og skjöl sem nýtast t.d. fréttamönnum, ráðgjafafyrirtækjum og erlendum viðskiptamönnum sem koma í nýtt land eða borg.

En til að fá nánari upplýsingar um þessa viðskiptahugmynd þá hafði ég upp á honum Andrési út í Bandaríkjunum þar sem hann er í viðskiptaferð og fékk hann til að segja mér nánar frá hugmyndinni í gegnum Skype.

Það skemmtilega við Insidememo er sú staðreynd að þeir eru komnir vel á leið með fyrstu útgáfu af vörunni sinni og mun hún líklega verður opnuð á næstu dögum á slóðinni www.disulistar.is. Hjá Dísulistum munuð þið t.d. geta nálgast lista eins og „Viðburðir í íslensku viðskiptalífi“, „Fjölmiðlalisti 2012“ og „Íslenskir Fjárfestar 2012“ en þann síðasta myndu ábyggilega margir lesendur þessa bloggs hafa áhuga á enda ekki sérstaklega auðvelt að nálgast upplýsingar um fjárfesta hér á landi.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hann Andrés með tölvupósti í netfangið andres@godsamskipti.is.

 


Viral Trade í topp 10 í Gullegginu

 

Í gær fékk ég mér smá göngutúr með honum Guðlaugi Lárusi Finnbogasyni en hann er stofnandi Viral Trade. En sú hugmynd er einmitt ein af 10 sem komust í úrslit í Gullegginu í ár en þetta árið voru vel yfir 200 hugmyndir sem tóku þátt. Sjálfur er ég ekki mikill tölvuleikjamaður fyrir utan kannski Angry Birds á símanum mínum og því þekkti ég þennan heim ekki sérstaklega mikið. En eftir að hafa spjallað aðeins við hann Guðlaug náði ég betri tökum á hugmynd hans og fór að skilja hversu stór og öflugur markaður þetta gæti orðið.

Hugmynd hans byggist í raun á því að í dag er áhugafólk um tölvuleiki farið að eyða afskaplega miklum tíma í tölvuleikjunum þar sem þeir byggja upp tölvuleikjapersónur og safna saman alls kyns verðmætum eins og öflugri sverðum, geimskipum og jafnvel peningum. Vegna þess hversu langan tíma það tekur að eignast þessa hluti í leiknum þá eru mikil verðmæti í þessu og margir sem spila eru tilbúnir að borga raunverulega peninga til að stytta tímann sem þarf til að eignast þessa hluti. Í nokkur ár hafa leikmenn verið að kaupa og selja slíkan varning sín á milli en sá ferill hefur ekki alltaf verið auðveldur og þar kemur Viral Trade inn í myndina. Viral Trade mun starfa sem milliliður á milli þessara leikmanna og tryggja það að allt fari vel fram og fyrir þetta mun Viral Trade taka smá prósentu af öllu því sem fer í gegnum þá.

Ef þið hafið áhuga á að vita meira um hugmyndina, hafið áhuga á einhverskonar samstarfi eða jafnvel ef þið viljið fjárfesta í henni þá getið þið haft samband við hann Guðlaug í netfangið glf@hi.is.


Kostnaður nýstofnaðra fyrirtækja

Ég átti afar skemmtilegar samræður um helgina við félaga minn sem var að spá í að fara stofna einkahlutafélag utan um rekstur sinn. Og ég fékk nokkrar spurningar sem ég fæ reglulega og ég ætla hér aðeins að reyna svara nokkrum þessara spurninga. Ef þið hafið einhverjar aðrar spurningar eða viljið koma með einhverjar athugasemdir á þessi svör mín þá endilega skrifið þau hér fyrir neðan 🙂

1. Er nauðsynlegt að vera með 500 þúsund krónur í hlutafé þegar maður stofnar fyrirtæki og er ekki bara hægt að skrá tæki og tölvur sem hlutafé til að koma í veg fyrir að maður þurfi að setja pening í þetta.

Okey ég fæ þessa spurning óhemju oft og var sjálfur sekur um að spyrja hennar þegar ég stofnaði fyrstu fyrirtækin mín. Staðreyndin er sú að það að vera með einkahlutafélag þótt svo það sé lítill sem enginn rekstur á því kostar pening. Ef þið eruð með vsk-skilda starfsemi þurfið þið að skila inn vsk-skilum annan hvern mánuð og ef þið treystið ykkur ekki í það sjálf þá þarf að greiða einhverjum til að sjá um það, sama er með launagreiðslur, ársreikinga o.f.l. Svo er árleg gjöld sem fyrirtæki þurfa að borga sem ég hreinlega veit ekki alveg hvað gera en það er einhver 15 þúsund kjall á hverju ári sem fer í útvarpsgjöld og eitthvað annað álíka. Svo farið þið að flytja alla kostnaðarliði yfir á fyrirtækið, hýsingu á vefsíðunni, leigu á skrifstofu og ýmislegt fleira sem manni finnst bara sjálfsagt að fyrirtækið eigi að borga. Það er því mikilvægt að það sé einhver peningur til inn í fyrirtækinu svo þið farið ekki á hausinn áður en þið hefið fengið fyrstu tekjurnar ykkar.

En burt séð frá þeim rökum þá er erfiður og dýr ferill sem fylgir því að láta meta tæki og búnað til að setja inn í fyrirtæki og þið þurfið líklega að ráða löggildan endurskoðenda til að sjá um slíkt fyrir ykkur. Síðast þegar ég spurði endurskoðendann minn hvað slíkt myndi kosta mig þá sagði hann um 200 þúsund, sem er aðeins of dýrt fyrir það sem þið eruð að reyna gera.

2. En ef það er ekki hægt að láta meta tækin inn sem hlutafé get ég þá ekki bara tekið peningin út með því að láta fyrirtækið kaupa af mér tölvuna mína eða bílinn eftir að ég stofna það?

Það er eitthvað sem tæknilega séð er hægt að gera en ég myndi þó ræða við endurskoðendann minn áður en ég færi að leggja út í slík viðskipti. En aftur vill ég benda á að 500þús er ekki mikill peningur þegar það kemur að fyrirtækjarekstri og því spurning hvort þið leyfið honum ekki bara að vera í fyrirtækinu, sérstaklega ef þið hafið trú á því sem þið eruð að gera.

3. Hvað kostar að stofna fyrirtæki?

Það eitt að sækja um stofnun einkahlutafélags kostar kr.130.500- (sjá gjaldskrá rsk) við það bætist svo kostnaður við að ráða endurskoðenda til að fylla út alla nauðsynlega pappíra fyrir ykkur. Ef þið hafið stofnað fyrirtæki áður þá eigið þið líklega alla pappírana til og getið hugsanlega stofnað það sjálfir, stundum er þó gott að fá fagmann til að sjá um það sérstaklega ef þið eruð margir í hóp og viljið útbúa gott hluthafasamkomulag til að tryggja rétt ykkar allra. Ég hef ekki ráðið endurskoðenda/lögfræðing til að setja upp pappírana fyrir mig í nokkur ár og veit því ekki alveg hvað það myndi kosta en gæti þó áætlað að það væri á bilinu 40-80þús fyrir utan hluthafasamkomulagið. En þið getið notað hlutaféð til að borga þennan kostnað, sem þýðir að þið verðið í raun bara með 300 þúsund í hlutafé eftir að hafa borgað fyrir þetta og því ennþá minni ástæða til að taka þann pening út úr fyrirtækinu.

4. Hvað kostar að reka einkahlutafélag í hverjum mánuði?

Það er náttúrulegu mjög breytilegt hvað hvert og eitt fyrirtæki þarf að borga en almennt séð þurfið þið að borga einhver útvarpsgjöld sem eru 15 þúsund á ári svo þurfið þið að borga einhverjum til að sjá um bókhaldsmál fyrir ykkur. Hagsýn er öflugt bókhaldsfyrirtæki sem sér um allt mitt bókhald og ég greiði þeim bara fast mánaðarlegt gjald til að sjá um öll vsk-skil, ársreikinga og allt það sem viðkemur þessu. Það hentar mér mjög vel þar sem ég hef sjálfur ekki mikinn áhuga á að sjá um bókhaldið. Kostnaður við slíka þjónustu er mjög breytilegur eftir fyrirtækjum, ég gæti trúað að það væri á bilinu 30-50þús á mánuði fyrir lítil fyrirtæki með öllu innföldu, en ég mæli bara með að þið bjallið í Svövu og Brynhildi hjá Hagsýn í síma 571-0090 til að fá frekari upplýsingar. En við þetta allt bætist svo allskonar kostnaður sem byrjar mjög fljótt að týnast til svo þið skulið alveg búast við því að þið þurfið að borga einhverja tíuþúsund kjalla í hverjum mánuði eftir að þið eruð búin að stofna fyrirtækið. Ég ætla þó ekki að reyna gefa neina fasta tölu hér þar sem það er ómögulegt.

Að lokum

Ég hef í fyrri greinum mínum um stofnun ehf. predikað mikið að ég það eigi að bíða með að stofna fyrirtækið þangað til að þróun viðskiptahugmyndarinnar er kominn á það stig að hún sé byrjuð að skila inn tekjum. Það er dýrt og kostnaðarsamt að stofna og reka fyrirtæki og því skuluð þið fara varlega út í það.

 

 

 

 


Newsjacking

Ég ætla að byrja þessa færslu á því að efna til samkeppni um bestu þýðinguna á enska orðinu “newsjacking”. Ef þú hefur ekki heyrt þetta orð áður þá er ekki seinna vænna en að þú lesir færsluna!

Ég kýs að nota orðið “fréttastuldur”, þangað til einhver kemur með eitthvað betra. Fréttastuldur hefur verið til lengi og tíðkast í öllum brönsum í heiminum. Orðið kemur samt frá David Meerman Scott, manni sem ég hef skrifað um áður. Hann hefur notað það í mikið af sínum skrifum, bæði í bókum og á blogginu sínu. Nú síðast í nóvember gaf hann út stutta rafbók sem hægt er að kaupa fyrir Kindle.

Fréttastuldur er í raun mjög einfaldur í framkvæmd. Nýttu þér fréttir til að koma sjálfum þér og/eða vörum þínum á framfæri. Þetta gengur út á að finna sjónarhorn á fréttum þar sem þú getur troðið inn á snjallan hátt og þannig “stelur” þú augnablikinu. Þetta frábær leið til fyrir fólk og fyrirtæki sem hefur lítið auglýsingabudget og vantar einhverja umfjöllun.

En hvernig nærðu þessu? Það er hægt að gera þetta klassíska, hringja í fréttamenn eða senda þeim tölvupóst og vona að þeir fjalli um þig í kjölfarið. En auðveldasta leiðin er auðvitað að nota hina svokölluðu samfélagsmiðla. Ef þú eða fyrirtæki þitt ert með blogg, Facebook síðu, Twitter aðgang eða eitthvað slíkt, þá er mjög auðvelt fyrir þig að smella þér inn í umræðuna, án mikillar áreynslu. Best er að nýta þessa miðla alla saman.

Eigum við að taka nokkur dæmi?

Joe Payne er á Twitter.

Fyrirtækið Eloqua sérhæfir sig í hugbúnaði fyrir markaðsfyrirtæki sem samhæfir vefmælingar, tölvupóstsendingar og aðrar aðgerðir á vefnum. Forstjórinn, Joe Payne (svalt nafn), varð þess áskynja að Oracle var að ganga frá kaupum á aðal samkeppnisaðilanum, Market2Lead. Það hefði verið auðvelt fyrir Joe Payne að kalla inn allt starfsfólkið á krísufund og haft áhyggjur af nýjum risa á markaðnum. Í staðinn settist hann niður, skrifaði bloggfærslu þar sem hann bauð Oracle velkomið og sagði það ánægjulegt fyrir þennan bransa að risarnir á hugbúnaðarmarkaðnum væru farnir að horfa í þennan markað.

Þessi eina bloggfærsla skilaði sér í umfjöllun í Business Week, InfoWorld, PC World og fleiri og fleiri. Á næstu vikum sprungu allir sölukanalar upp út af allri athyglinni og í kjölfarið var skrifað undir $500.000 samning við Red Hat. Payne hefur sagt að þessi litla bloggfærsla hafi fært fyrirtækinu um MILLJÓN dollara í tekjur.

Man einhver eftir stóra saltmálinu hér um daginn?

Ég sá frábært dæmi um fréttastuld þegar stóra saltmálið komst í hámæli. Þannig var mál með vexti að Ölgerðin hafði verið að selja fólki iðnaðarsalt sem var svo notað í matargerð. Þetta var rosalega hávært og leiðinlegt mál, sem ég ætla ekki að fara nánar út í. Þegar listi yfir þá viðskiptavini sem keypt höfðu saltið komst í fjölmiðla fór allt í háa loft, enda voru þar á meðal nokkrir af stærstu matvælaframleiðendum landsins.

Útiplönin hjá Eðalfisk

Daginn eftir að listinn var gerður opinber sendi fyrirtækið Eðalfiskur frá sér fréttatilkynningu, en Eðalfiskur var á listanum. Þar segir að fyrirtækið fordæmi vinnubrögð Heilbrigðiseftirlitsins þar sem gefið er í skyn að Eðalfiskur hafi notað iðnaðarsaltið til matvælaframleiðslu. Það sé rétt að Eðalfiskur keypti bretti af umræddu salti, en þegar fólk sá að það var merkt sem iðnaðarsalt var því dreift á útiplön fyrirtækisins, ekki notað í framleiðslu. Þetta fór eins og eldur í sinu um netheima, Eyjan, Visir.is, MBL.is og sjónvarpsfréttirnar tóku þetta fyrir og fyrir vikið fékk Eðalfiskur ókeypis umfjöllun sem sýndi að þar væri gæðaeftirlitið í lagi.

Þó að fréttastuldur sé mjög skemmtileg og árangursrík leið til að fá umfjöllun um fyrirtækið þitt þá er hann mjög vandmeðfarinn og getur auðveldlega sprungið í höndunum á þér.

Besta dæmið um illa heppnaðan fréttastuld er þegar tískufyrirtækið Kenneth Cole reyndi að nýta sér mótmælaöldu í Egyptalandi til að vekja athygli á útsölunni hjá sér með því að setja inn tvít merkt #Cairo.

Í stað þess að bera tilætlaðan árangur og vekja athygli á útsölunni fóru að streyma inn blogg, tvít og tölvupóstar þar sem fyrirtækið var skammað og látið heyra það. Á endanum var færslan fjarlægð og fyrirtækið baðst afsökunar.

Hvað getur þú gert?

Vertu vakandi fyrir öllum þeim fréttum sem snerta þig, þinn markað og þína samkeppnisaðila. Ef tækifærið gefst skaltu stökkva til og sjá hvernig þú getur nýtt þér það. Skrifaðu frétt á heimasíðu eða blogg fyrirtækisins og deildu henni svo á Twitter og Facebook síður fyrirtækisins og þína eigin. Ef efnið er nógu djúsí þá mun það verða gripið á lofti og tekið áfram.

Ég mæli líka með bókinni Newsjacking. Hún er stutt og þú kemst í gegn um hana á ca. klukkutíma. Eins kostar hún sáralítið og er vel peninganna virði. Ef þú lest hana og finnst hún áhugaverð mæli ég með fleira efni eftir sama höfund. David Meerman Scott er virtur markaðsgúru með mikla reynslu úr bransanum. Hann er í miklu uppáhaldi hjá mér og mun sennilega mæta oftar hingað inn í hugrenningarnar.

Endilega skjótið á mig fleiri dæmum um fréttastuld í athugasemdum!


 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 

 


Startup Weekend

 

“No Talk, All Action.
Launch a startup in 54 hours”

 

Er slagorð Startup Weekend út í Bandaríkjunum en Startup Weekend eru viðburðir sem eru búnir að slá heldur betur í gegn og eru í dag haldnir út um allan heim. Hugmyndin á bak við SW er að einstaklingar og hópar með hugmyndir komi saman og í 54 klukkustundir gera þeir ekkert annað en að vinna að hugmyndum sínum. Í lok helgarinnar reyna hóparnir svo að vera komnir með einhverskonar prótótýpu eða uppkast af vöru/vefsíðu/fyrirtæki. Hér fyrir neðan er smá myndband sem sýnir hvernig viðburðurinn gengur fyrir sig út í Bandaríkjunum.

 

 

Startup Weekend – Full from Eighteen Eighty on Vimeo.

 

Nánari upplýsingar um Startup Weekend má finna á vefsíðu þeirra http://startupweekend.org/ En eins og sést á þessu korti eru viðburðirnir sem þeir halda bókstaflega út um allan heim.

 

Þessir viðburðir hafa einnig náð til klakans og eru hér haldnir undir nafninu ANH (Atvinnu- og nýsköpunarhelgar). Þrátt fyrir að viðburðurinn beri mismunandi nafn þá er viðburðurinn sjálfur að stærstum hluta sá sami. Ég hef tvisvar sinnum tekið að mér hlutverk mentors á þessum viðburðum þar sem ég hef verið til staðar til að aðstoða unga frumkvöðla við að reyna láta hugmyndir sínar verða að veruleika. Í þetta sinn þá ákvað ég þó að taka þátt í ferlinum sem þáttakandi og mætti á Akureyri með hugmynd af nýjum vettvangi fyrir núverandi fyrirtæki mitt þ.e.a.s. ég hef verið með bókunarkerfi fyrir sumarbústaði og vildi komast að því hvort það væri hægt að færa þá hugmynd yfir á tjaldsvæði þar sem mér fannst markaðssetning íslenskra tjaldsvæða vera vægast sagt léleg. Árangur helgarinnar var í raun mun meiri en ég átti von á og komst ég að því að það er ótrúlegt hvað hægt er að afkasta á einni helgi ef maður einbeitir sér 100% að einu verkefni og er ekki að láta neitt trufla sig. Í lok helgarinnar var ég kominn upp með fyrsta uppkastið af vefsíðunni www.campalo.is auk þess sem ég setti upp lendingarsíðu fyrir alþjóðlega útgáfu af vefsíðunni www.campalo.com.

Ég mætti þarna og var búinn að búast við því að ég myndi vera einn út í horni að forrita eitthvað en svo endaði ég á því að fá frábært fólk með mér í hóp sem aðstoðaði mig við að þróa hugmyndina áfram. Ég vil því nýta þetta tækifæri til að þakka Darra, Hrafnhildi, Lilju og Njáli kærlega fyrir alla aðstoðina um helgina 🙂

Ég get hiklaust mælt með þessum viðburði fyrir alla þá sem hafa áhuga á að láta reyna fyrir sér í fyrirtækjarekstri. Þetta er alvöru stuðningsumhverfi þar sem þið getið leitað ráðleggingar og fengið spark í rassinn en eins og alltaf þá getið þið ekki búist við að aðrir vinni vinnuna ykkar. Þetta er allt undir því komið að þið séuð tilbúin í að gefa 100% af orku ykkar og tíma í viðskiptahugmyndir ykkar. Upplýsingar um næstu ANH viðburði og frekari upplýsingar má nálgast hér http://www.anh.is/ 0g svo leyfi ég líka að fylgja smá myndbrot frá nokkrum af þeim viðburðum sem hafa verið haldnir hér á landi, þið sjáið meðal annars mig bregða fyrir þarna í mentor hlutverki.

 

 

Innovit- Atvinnu og nýsköpunarhelgi from DIMMS on Vimeo.

 


Heilræði fyrir unga menn í verzlun og viðskiftum

Ég hef alltaf verið á þeirri skoðun að þunnar bækur séu betri en þykkar bækur. Að hluta til er ástæðan fyrir því sú að ég les ekki ýkja hratt og á erfitt með að finna mér tíma til að lesa, en einnig er það vegna þess að ég trúi því að ef hæfni einstaklings á ákveðnu sviði felist að miklu leiti í hversu auðvelt hann á með að einfalda verkið. Ef að rithöfundur bókar þekkir vel viðfangsefni bókarinnar þá ætti hann að geta komið því frá sér á einfaldan og hnitmiðaðan hátt í sem fæstu orðum. Þess vegna hafði ég mjög gaman af því þegar ég fékk í hendurnar litla og netta bók sem hét „Heilræði fyrri unga menn í verzlun og viðskiptum“. Bókin sem er einungis 76 blaðsíður (þar af 45 í formála) er einföld upptalning á góðum ráðum í viðskiptum sem mér virðast eiga alveg jafn vel við í dag eins og fyrir 100 árum þegar þau voru rituð.  Bókin var skrifuð af George H. F. Schrader sem var Bandarískur frumkvöðull sem var búsettur hér á landi í nokkur ár í byrjun síðustu aldar.

Mig langaði bara að taka nokkur góð ráð úr bókinni og deila með ykkur.

„Ef þú átt völ á stöðu sem gefur þér tækifæri til að læra eitthvað og komast áfram, þá er sú staða arðsamari, þó hún byrji með lágu kaupi, heldur en vel launuð staða með engum framtíðarmöguleikum“

Ég hef sjálfur reynt að lifa eftir þessum ráðum og hef oft tekið að mér illa launuð störf gegn því að ég geti lært eitthvað nýtt sem síðan hefur nýst mér betur síðar í lífinu. Þetta eru góð ráð sem allir myndu hagnast að fara eftir.

„Láttu ekki hugfallast, þó fyrstu tilraunir þínar misheppnist, reyndu aftur; fáir eru smiðir í fyrsta sinn.“

Þetta er eitthvað sem en hefur ekki tekist að kenna íslendingum nægjanlega vel, þar sem við virðumst ennþá líta á mistök sem merki um leti eða heimsku. En staðreyndin er þó sú að við lærum aldrei jafn mikið af neinu eins og við lærum af mistökum okkar og það að einstaklingur sé með mistök á baki sér getur verið merki um að viðkomandi hafi öðlast mikla þekkingu af þeim mistökum og geti betur tekist á við komandi verkefni.

„Fyrir unga verzlunarmenn er sérlega gott að lesa bækur um verzlun og verzlunarlöggjöf. En fyrir handverksmenn er mjög nytsamlegt að lesa bækur og blaðagreinar um handiðnir allskonar. Þess konar bækur má fá í hverju bókasafni.“

Í dag er orðið mun auðveldara að nálgast bækur og fræðsluefni um ýmiskonar málefni hvort sem það er á bókasöfnum eða á veraldarvefnum.. Það ætti því ekki að reynast neinum erfitt að afla sér upplýsinga um það sem hann er að vinna við og skapa sér fljót sérstöðu á sínu sviði og auka þannig möguleika á árangri.

„Bezta ráðið sem ég get gefið húsbændum, er að uppala og leiðbeina verkamönnum sínum, og skoða þá eigi sem dauð verkfæri til að græða peninga. Kennið þeim og gefið þeim kost á að læra, hvernig þeir eigi að standa á eigin fótum. Æfið þá þangað til þeir eru færir um að skipa sæti húsbóndans ef nauðsyn ber til. Með því einu móti getur starfið ætíð gengið greitt, og þér sjálfir verðið aldrei þrælar atvinnu yðar. Komið því skipulagi á vinnulið yðar, sem herfylking væri, svo að það geti gegnt starfi yðar, þó veikindi eða elli beri að höndum. Kjósið ætíð einhvern fulltrúa.“

Þetta eru ráð sem ég hef einnig lesið í mörgum nýútgefnum bókum, ráðið fólk sem er hæft og jafnvel mun hæfara en þið sjálf, þjálfið það upp og verið óhrædd við að deila með þeim af reynslu ykkar. Ef að þið sem stjórnendur þjálfið ekki upp starfsfólk ykkar til að taka einn daginn við af ykkur er hætta á að þið sjálf verðið þrælar eigin vinnu og munuð ekki geta farið að minnka við ykkur vinnuna þegar þið farið að eldast þar sem það er engin hæfur til að taka við ykkar störfum.

„Það er betra að byrja með litlu og færast í aukana en að byrja með miklu, aðeins til að fara á höfuðið“

Hann talar um að það sé aldrei gott að byrja með lánsfé og það sé þess í stað gott að reyna byrja með lítið og semja vel. Sjálfur þekki ég vel að byrja fyrirtæki með mikið lánsfé og ég myndi ekki mæla með því, það er mun betra ráð að byrja smátt án lánsfés og byggja félagið statt og stöðugt upp.

„Heiðarlegur gróði og gott mannorð er framar öllu öðru; en varist að græða fé óheiðarlega.

Viðskiptaheimurinn er mun minni en maður gæti ímyndað sér og það að hafa gott orðspor skiptir öllu. Passið ávallt að eiga heiðarleg viðskipti við alla í kringum ykkur bæði vegna þess að ykkur mun líða betur andlega en einnig vegna þess að ef þið eruð óheiðarleg þá fréttist það strax og fólk hættir að treysta ykkur og vill síður eiga viðskipti við ykkur.

Hann endar bókina á eftirfarandi orðum og ég get ekki ímyndað mér betri leið til að enda slíka bók.

„Látið yður umhugað um annað meira og hærra, en að græða fé. Peningarnir eiga aðeins að vera meðal til að ná tilgangi og látið takmark ykkar verða: áhyggjulaust líf. Ef þér þá getið og hafið vilja á að hjálpa öðrum, þá mun það baka yður meiri gleði, heldur en nokkurntíma að hjálpa yður sjálfum – þ. e. a. s. ef þér gerið það skynsamlega.“

Þetta er lítil og nett bók sem er fljótlesin en ætti þó að vera marglesin því í henni eru góð og tímalaus ráð sem þið getið nýtt bæði í viðskiptum og einkalífi ykkar. Ég hefði alveg verið til í að vitna í fleiri greinar úr bókinni en þess í stað ætla ég að mæla með að þið fjárfestið í henni og innbyrðið sjálf þessa skemmtilegu lesningu.

Að lokum vill ég þakka henni Þórunni Jónsdóttur kærlega fyrir að hafa gefið mér þessa bók.


Alþjóðleg frumkvöðlaráðstefna - Startup Iceland

Íslenska frumkvöðlaumhverfið hefur tekið miklum framförum á undanförnum árum og það hefur aldrei áður verið jafn auðvelt að nálgast upplýsingar og aðstoð við að gera hugmyndir sínar að veruleika. Engu að síður er ennþá langt í land og mikið sem ennþá á eftir að betrumbæta til að íslensk fyrirtæki geti orðið samkeppnishæf á alþjóðlegum markaði. Sem dæmi má nefna að íslensk fyrirtæki eiga oft erfiðara með að finna fjárfesta á fyrstu stigum rekstursins heldur en sambærileg fyrirtæki í erlendum frumkvöðlaumhverfum á borð við San Francisco, New York, London o.f.l. Og þrátt fyrir að Ísland sé góður tilraunamarkaður fyrir mörg fyrirtæki þá takmarkar stærð markaðarins einnig stækkunarmöguleika fyrirtækjanna. Það er því nauðsynlegt að fyrirtæki líti út fyrir landssteina en á sama tíma eru oft takmörkuð tengsl við erlenda markaði og getur reynst erfitt að mynda slík tengsl.

Þessi vandamál ásamt fleirum munu vera tekin fyrir á ráðstefnu sem nú er verið að skipuleggja og mun vera haldin í Maí á þessu ári. Viðburðurinn mun vonandi ná að lyfta umhverfi frumkvöðla- og nýsköpunarfyrirtækja upp á nýtt plan. Þessi ráðstefna leggur fyrir spurninguna “How do you build sustainable entrepreneurial ecosystem?” eða eins og það myndi heita á íslensku “Hvernig byggirðu upp sjálfbært frumkvöðlavistkerfi?”. Fengnir verða þekktir erlendir fjárfestar og frumkvöðlar á heimsmælikvarða til að deila reynslu sinni af því hvernig fyrirtæki geta best náð árangri og hvernig best er að búa til umhverfi sem hlúar að og styður við ung fyrirtæki.

 

 

Nú þegar hefur Brad Feld staðfest komu sína á viðburðinn en fyrir þau ykkar sem ekki þekkið hann þá má nálgast frekari upplýsingar um hann á bloggi hans.

 

 

Þeir sem hafa áhuga á að fylgjast betur með þessu geta skráð sig inn á http://signup.startupiceland.com/.

Ráðstefnan er skipulögð af Bala Kamallakharan fagfjárfesta sem hefur undanfarin ár verið að fjárfesta í íslenskum fyrirtækjum. Bala hefur fulla trú á því að Ísland gæti orðið góð útungunarvél fyrir öflug fyrirtæki og vill með þessari ráðstefnu styrkja við íslenskt frumkvöðlastarf. Frekari upplýsingar um Bala og ráðstefnuna er að finna á bloggsíðu hans StartupIceland.com.

Við munum svo birta frekar upplýsingar um viðburðinn þegar nær dregur.

 

 


WordPress og virði þess fyrir frumkvöðla

Á mínum unga ferli hef ég braskað ýmislegt hvað varðar vefhönnun. Mér tókst á eitthvern ótrúlegan máta að hanna síðu í Microsoft Word hér í denn en færði mig fljótt yfir í Dreamweaver. Frá Dreamweaver fór ég yfir í Notepad og frá Notepad yfir í Komodo Edit. Mig dreymdi um að læra flókin forritunartungumál og skrifa vefkerfi frá grunni. Eftir nokkrar misheppnaðar tilraunir áttaði ég mig á því að ég væri engan veginn maðurinn í slíkt og byrjaði að þróa síður í WordPress kerfinu.

Eins og margir aðrir þá hafði ég litla trú á WordPress í upphafi. Ég kannaðist við WordPress.com síður og fannst þær vera ekkert merkilegri en Blogspot. Sem betur fer hafði ég lesið á eitthverju erlendu bloggi að WordPress væri miklu meira en bloggkerfi. Núna í seinni tíð lít ég á það blogg sem ákveðin vendispunkt sem opnaði fyrir mig endalausan heim af tækifærum.

WordPress er einfaldlega með eitt öflugasta samfélag forritara og hönnuða á netinu og á nokkrum vikum las ég allt sem ég fann um WordPress. Það hefur orðið að kjarnanum af öllu sem ég hef tekið mér fyrir síðustu ár. Ég flutti út til Skotlands, lærði Audio Engineering og opnaði lítið mastering stúdíó miðað á minni útgefendur. Mig tókst að byggja upp trúverðuleika og öflugt orðspor með heimasíðu sem kostaði mig $35 og tók mig 2 daga að innleiða. Ég var í hörkusamkeppni við mikinn fjölda af þraulvönum hljóðmönnum sem að höfðu miklu flottari portfolio en ég. Engu að síður var ég kominn með flottan viðskiptamannahóp á mjög stuttum tíma. Seinna meir komst ég að því hver ástæðan var – síðan mín var að koma ofar upp í vefleit.

Og ég byrjaði að hugsa, hvernig í ósköpunum kemur mín síða upp ofar en hjá þeim sem eru búnir að vera með heimasíðu í mörg ár? Ég fór á Technorati og byrjaði að lesa mig til um “Search Engine Rankings” og grannskoðaði kóðan hjá samkeppnisaðilum. Það sem þeir klikkuðu á var allt tengt Search Engine Optimization (SEO) fyrir síðurnar sínar – ómiðaður title tag, ekkert meta description, enginn notkun á headings eða bold, italics eða underline, ekkert sitemap, enginn alt tags o.s.frv. Ég hafði ekki lagt neina sérstaka áherslu á þessi atriði en samt hafði það komist rétt til skila á minni síðu. Síðan mín var þegar leitarvélabestuð. Samvinnan milli WordPress og þemunnar sem ég hafði keypt bauð hreinilega ekki upp á annað.

Eftir þessa uppgvötun stofnaði ég fyrirtæki sem lagði áherslu á leitarvélabestun og vefsíðugerð. Kjarninn í því fyrirtæki er WordPress kerfið. WordPress er frítt í notkun, með frábært notendaviðmót, endalaust af viðbætum, þemum og auka frameworks, nær fullkomið gagnvart leitarvélum og með mjög öflugt öryggiskerfi. Fyrir frumkvöðla er kerfið ómetanlegt, því þeir geta snúið hugmynd í veruleika á mettíma og á mjög lítinn kostnað. Eins og Valur Þór bendir á þá hafa nú þegar stór hluti íslenskra nýsköpunarfyrirtækja áttað sig á kostum WordPress kerfisins og það er mín von að sú þróun haldi áfram og að WordPress hjálpi íslenskum frumkvöðlum að byggja upp sín fyrirtæki.

 


Gestabloggari:
Ragnar Fjölnisson
Framkvæmdarstjóri Cloud Engineering ehf
http://www.webengineering.is/

 

 

 


Viðskiptasmiðjan, nám fyrir frumkvöðla

Ég var að taka eftir því að nú stendur yfir skráning í Viðskiptasmiðjuna en fyrir þá sem ekki þekkja það þá er það frumkvöðlanám á vegum Klaksins. Námið er hugsað fyrir frumkvöðla á öllum stigum, allt frá þeim sem einungis hafa hugmynd og til þeirra sem eru nú þegar í fullum rekstri.

Viðskiptasmiðjan er gott stuðningsumhverfi til að rækta hugmyndir sínar, þar koma kennarar frá öllum Háskólunum og ýmsir vel tengdir aðilar úr frumkvöðlaumhverfinu til að kenna ykkur hvernig eigi að stofna og reka fyrirtæki. Þetta er einnig góður vettvangur til að byggja upp tengslanet sitt þar sem gott aðgengi er að frumkvöðlum, fjárfestum og fleiri öflugum aðilum.

Ýmsir aðilar sem ég kannast við hafa farið í gegnum Viðskiptamiðjuna og hafa haft góða hluti af henni að segja. Hérna eru nokkrar umsagnir um Viðskiptasmiðjuna.

„Þegar við byrjuðum í Viðskiptasmiðjunni vorum við fjögurra  manna fyrirtæki með einn samstarfsaðila, alltof stóra viðskiptaáætlun og alltof víðan fókus. Viðskiptasmiðjan, kennaraliðið og tengslanet hennar átti stóran þátt í að undirbúa okkur og gera okkur að þeim stjórnendum sem voru í stakk búnir að rúmlega tvöfalda starfsmannafjölda okkar, skerpa fókusinn og ná inn milljón dollurum frá erlendum fjárfestingasjóð.“

-Gunnar Hólmsteinn, framkvæmdastjóri Clara

„Ég lærði það hjá Viðskiptasmiðjunni að ég þyrfti að hafa teymi í fyrirtækinu og með því að mynda rétt teymi þá náðum við að tryggja fjárfestingu frá ekki síðri félögum en Eyri Invest og Nýsköpunarsjóði Atvinnulífsins. Ég náði meira að segja að fá Þórð Magnússon til þess að gerast viðskiptaengill í ReMake áður en Eyrir og NSA komu inn, en það var það sem ég lærði hjá Viðskiptasmiðjunni sem honum líkaði við fyrirtækið. Niðurstaða mín eru botnlausar þakkir til aðstandenda Klaksins fyrir að skapa Viðskiptasmiðjuna ásamt ráðgjöfum, kennurum og leiðbeinendum úr Viðskiptasmiðjunni. Ég veit ekki hvar ég væri án ykkar. Viðskiptasmiðjan verður að vera til staðar fyrir framtíðar frumkvöðla sem eru enn í skugga vanþekkingar sinnar á tungumáli viðskiptageirans.”

-Hilmir, framkvæmdastjóri Remake Electric

Frekari upplýsingar um Viðskiptasmiðjuna má nálgast hér: http://www.klak.is/vidskiptasmidjan/

Umsóknarfrestur fyrir vorönnina er 25.janúar og byrjar sjálft námið 30.janúar. Það er því um að gera fyrir þá sem hafa áhuga að hafa samband við Maríu hjá Viðskiptasmiðjunni í síma 490-1000 og skrá sig.

 


Úthýsing símsvörunnar

Ég er búinn að vera skoða ýmsa möguleika til að gera fyrirtækið mitt sjálfvirkara að öllu leiti og þannig reyna takmarka þá vinnu sem ég þurfi að leggja í hversdagslega hluti  til að geta nýtt tíma minn frekar í áframhaldandi þróun. Ein hugmyndin sem ég fékk var sú að úthýsa símsvörun fyrirtækisins þannig að ég þyrfti ekki að sitja við símann allan daginn sérstaklega þar sem vinnutíminn minn er oftar en ekki heldur óhefðbundinn. Fyrstu hugmyndirnar sem komu upp í hausnum á mér varðandi það var fyrsta lagi að það hlyti að vera fáranlega dýrt og öðru lagi að það hlyti nú að vera erfitt fyrir einhvern aðila út í bæ að svara spurningum um fyrirtækið mitt. Eftir að hafa leitað eftir símsvörunarþjónustu á google fann ég 3 fyrirtæki sem komu til greina, þessi fyrirtæki voru Ritari.is, Miðlun og Símaverið. Eftir að hafa talað við þessi fyrirtæki komst ég að því að þessari hugmyndir mínar um þjónustuna voru fjarri lagi þar sem það kom mér töluvert á óvart að svona þjónusta er á nokkuð hagstæðu verði sérstaklega m.v. það að ég losna við töluverða vinnu. Auk þess sannfærðu þau mig um að starfsmenn þeirra gætu aðlagað sig vel að öllum fyrirtækjum.

Ég hef því ákveðið að slá til og prufa slíka úthýsingu.

Næstu skrefin eru þau að ég mun í sameiningu við símsvörunarfyrirtækið útbúa upplýsingarit fyrir starfsmenn símsvörunnarinnar um fyrirtæki mitt svo þeir geti flétt upp ef einhverjar spurningar koma upp sem þau vita ekki. Einnig verður svo ákveðið með hvaða hætti símtöl sem ég sjálfur þarf að svara fyrir verða áframsend, hægt er að senda þau áfram í GSM síma minn eða einfaldlega taka niður upplýsingar um viðkomandi og ég fæ þær sendar með SMS eða tölvupósti. Ég er mjög spenntur að sjá hvernig þetta kemur út og mun tvímælalaust deila reynslu minni hérna á blogginu um leið og einhver reynsla er komin.