Ekki greiða þér laun!

Þegar þú ert að stofna fyrirtæki þá er freistandi að láta fyrirtækið greiða þér laun fyrstu mánuðina svo þú getir nú borðað og haft eitthvað húsaskjól. EKKI GERA ÞAÐ!

Okey titillinn á greininni er kannski full dramatískur hjá mér þar sem markmiðið er að búa til rekstur sem skilar þér tekjum svo þú getir lifað góðu lífi. En á byrjunarstigum reksturisins getur það reynst mjög dýrkeypt að taka verðmætan pening úr fyrirtækinu bara svo þú getur haft smá pening á milli handanna. Ég mæli eindregið með því að fólk reyni frekar að lifa á litlu sem engu fyrstu mánuðina eða árin á meðan fyrirtækið er að komast af stað. Kostnaðurinn við að greiða laun er mun meiri heldur en flestir gera sér grein fyrir.

Ég prufaði að reikna út hversu mikið af launakostnaði fyrirtækisins væri raunverulega að skila sér í vasa “starfsmannsins” þegar launin eru greidd og það kom í ljós að einungis 51% – 81% af kostnaðinum er að skila sér í vasa launþegans. Því hærri sem launin eru því lægri er hlutfallið.

Eins og sést á myndinni hér fyrir ofan þá fór prósentutalan lækkandi eftir því sem launaupphæðin hækkar og því skilar sér stærra hlutfall peningsins í vasa launþegans (þín) eftir því sem launin eru lægri. En förum aðeins yfir þá kostnaðarliði sem fylgja því að greiða laun og tökum dæmi um starfsmann sem er með kr.300.000- á mánuði í laun.

Kostnaður starfsmanns

Heildarlaun: kr.300.000-

Skattþrep 1 (37,32%): kr.85.836-

Skattþrep 2 (40.22%): kr.28.154-

Skattafsláttur: kr. 48.485- (dregst frá skattinum)

Lífeyrissjóður (4%): kr.12.000-

Útborguð laun til starfsmanns:  kr.222.495- (74% af heildarlaunum).

 

En þar sem þú átt fyrirtækið þá þarftu líka að hugsa um þann launakostnað sem fylgir því fyrir fyritæki að greiða út laun til starfsmanns.

Kostnaður fyrirtækis

Lífeyrissjóður (8%): kr.24.000-

Tryggingargjald (7,69%): kr.23.070-

Alls kostnaður fyrirtækis: kr.47.070- (16% af heildarlaunum starfsmanns)

 

Niðurstaða

Ef við skoðum hvernig kostnaðarliðirnir skiptast hlutfallslega niður þá má sjá að skatturinn tekur ca.19% af ofangreindu dæmi, lífeyrissjóðurinn 10% og Tryggingargjaldið er 7%.

Einstaklingur sem rekur fyrirtæki og greiðir sér kr.300.000- í mánaðarlaun fær þannig einungis kr.222.495- í vasann á sama tíma og fyrirtækið þarf að borga kr.347.070. Þetta þýðir að einungis 64% af útlögðum kostnaði fyrirtækisins skilar sér í vasa launþega/eigenda. Það getur því verið gott, ef þú getur, að lágmarka greidd laun fyrstu mánuðina af fyrirtækjarekstrinum þangað til að reksturinn er farinn að skila inn nægjanlegum tekjum til að réttlæta launakostnaðinn.

 


Engan aumingjaskap, náðu markmiðum þínum fyrir 2013

Jæja nú eru liðnir 5 dagar af 2013.

Hvernig gengur ykkur að vinna að markmiðum ykkar fyrir árið?

Meirihlutin af ykkur hefur líklega ekki sett sér nein markmið eða sagt ætla gera það síðar og svo gleymt. Einhver ykkar hefur sett sér markmið en ekki skrifað þau niður og þegar vinnan og hversdagsleikinn byrjaði aftur hafið þið líklega gleymt þeim. Örfáir hérna hafa skrifað niður markmið sín og þá er spurninginn hvort þið séuð búin að vera vinna að því að ná þeim.

Ef þið ætlið að gera 2013 að frábæru ári og betrumbæta líf ykkar þá þýðir engan aumingjaskap. Þið verðið að vera öguð og vinna markvisst að því að ná markmiðum ykkar. Það er þetta “auka” sem þið leggjið á ykkur sem aðrir leggja ekki á sig sem aðskilja ykkur frá hópnum.

“The last three or four reps is what makes the muscle grow. This area of pain divides the champion from someone else who is not a champion. That’s what most people lack, having the guts to go on and just say they’ll go through the pain no matter what happens.” – Arnold Schwarzenegger

Ég setti mér 27 markmið fyrir 2013 og skipti þessum markmiðum niður í 3 flokka, heilsu, fjármál og samskipti. Sum markmiðin eru lítil önnur eru stór en öll markmiðin er þannig að ég veit innst inni að ég get náð þeim. Til að tryggja það að ég muni standa mig í öllum flokkum hef ég ákveðið að vera með ábyrgðarmann sem ég þarf að svara til í hverjum flokki. Ég er búinn að ráða markþjálfa til að tryggja það að ég standi mig í fjármálaflokknum, ég er að hitta einkaþjálfa til að finna þann rétta sem getur tryggt það að ég nái settum markmiðum í heilsu og ég hef fengið félag minn til að vera ábyrgðamaður minn í samskiptum. Að lágmarki 1 sinni í mánuði mun ég hitta þessa 3 ábyrgðarmenn mína til að fara yfir markmið mín og sjá hvort ég sé að standa mig og hvar ég geti betrumbætt mig. Það þarf mikinn aga til að ná markmiðum sínum og ég ætla reyna mitt besta til að tryggja að svo verði í mínu tilfelli.

Ég ætla að tryggja að 2013 verði mitt besta ár fram að þessu og ég vona að þú gerir slíkt hið sama.

Það þýðir engan aumingjaskap, mössum 2013!

 


Markmið fyrir nýtt ár.

Það er nú orðin löng hefð hjá mér fyrir því að nýta áramótin til að skilgreina markmið mín fyrir komandi ár. Ég tek þessu alvarlega og ef ég get reyni ég að taka nokkra daga í þennan feril þar sem markmiðin koma til með að hvíla á öxlum mínum í heilt ár. Flestir af þekktustu rithöfunum og fyrirlesurum um persónulega velgengni eru sammála því að eitt mikilvægasta atriðið til að ná árangri sé að vera með niðurskrifuð markmið og yfirfara þau svo reglulega. Fyrir þá sem eru ekki vanir að setja sér markmið þá getur þetta verið nokkuð erfiður ferill þar sem þetta byggist ekki bara á því að skrifa niður það fyrsta sem þér dettur til hugar heldur þvert á móti þarftu að taka góðan tíma í að átta þig á því hver þú ert og hvað þú vilt fá út úr lífnu. Hjá mér er þetta alsherjar markmiðasetning þar sem ég fer bæði yfir einkalíf mitt og fyrirtækjareksturinn en það er oft þunn lína þar á milli hjá mörgum frumkvöðlum.

Eftirfarandi eru þau þrjú skref sem ég fer í gegnum um hver áramót til að skrá niður eigin markmið fyrir komandi ár, það eru margar aðrar leiðir til að gera þetta en þessi hefur reynst mér best.

1. Hver er ég og hvað vil ég fá út úr lífinu?

Ég undrast alltaf hversu fáir staldra við til að spyrja sig að þessari spurningu. Það er ekkert mikilvægara í lífinu en að þekkja sjálfan sig og vita hvað maður vill fá úr út lífinu. Þetta er á engan hátt auðveld spurning og líklega fæstir sem geta svarað henni án þess að hika eða efast en bara það að þið hafið staldrað við og velt þessu fyrir ykkur kemur ykkur nær því að lifa hamingjusömu lífi. Afhverju ertu að gera það sem þú ert að gera? Afhverju stofnaðirðu þetta fyrirtæki? Hvernig viltu lifa lífinu?

 

2. Skoða fortíðina.

Áður en farið er að skipuleggja framtíðina þarf að skoða fortíðina og sjá hvað hefur virkað þar og hvað hefur ekki virkað. Í þessu skrefi fer ég vanalega yfir fyrri áramótamarkmið og skoða hvernig ég hef staðið mig í að láta þau verða að veruleika. Ef þú hefur ekki náð að láta eitthvað markmið verða að veruleika þarftu að skoða afhverju það er? Er einhver augljós ástæða fyrir því eða viltu það einfaldlega ekki nógu mikið? Mörg gerum við þau mistök að setja okkur alltof stór markmið svo þegar við náum þeim ekki höldum við að markmiðasetning gangi ekki. Staðreyndin er sú að illa úthugsuð markmið skila engu.

 

3. Handskrifa markmiðin.

Hversu mörg markmið þið endið með getur verið breytilegt og fer algjörlega eftir ykkur sjálfum. Þetta gæti vetið eitt stórt markmið eða mörg minni. Lengi vel hafði ég það sem viðmið að reyna alltaf að skrá niður 10 markmið á hverju ári og það reyndist mjög vel og ég myndi í raun mæla með að þið mynduð miða við 10 markmið. Náið ykkur svo í blað og penna og handskrifið markmiðin, það skilar einhvern veginn svo miklu meiri tengingu við markmiðin að handskrifa þau frekar en að rita þau bara í tölvuna.

 

Síðast en ekki síst þurfið þið að yfirfara markmið

ykkar reglulega yfir árið og vinna markvisst

að því að láta þau verða að veruleika.


Topp 10 mistök í fyrirtækjarekstri

Þegar verið er að fara út í eitthvað sem maður hefur aldrei gert áður eins og að stofna fyrirtæki í fyrsta skipti þá er auðvelt að gera mistök. Sjálfur hef ég gert óhemju mikið af mistökum í þeim fyrirtækjum sem ég hef stofnað en sem betur fer hef ég lært af þessum mistökum og er orðin klárari í dag fyrir vikið. Til lengri tíma litið er það mikilvægur lærdómur sem fylgir þeim mistökum sem þú hefur gert og því skaltu aldrei skammast þín fyrir að viðurkenna mistök þín. En sama hversu mikið við lærum af þeim þá getur þó verið afskaplega erfitt að takast á við þau á meðan á þeim stendur. Ég hef því tekið sama hérna 10 algeng mistök sem ég hef sjálfur kynnst og sem ég hef kynnst hjá þeim frumkvöðlum sem ég hef verið að leiðbeina og aðstoða.

 

Mistök 1: Halda að þú verðir rík(ur) strax.

Þetta eru mjög algeng mistök þar sem einstaklingar halda að fyrirtæki þeirra muni skila þeim hagnaði strax. Ég veit um engin dæmu um það að einhver verði ríkur við það eitt að stofna fyrirtæki. Staðreyndin er sú að það að fara út í fyrirtækjarekstur þýðir yfirleitt mikla vinnu og lítil sem engin laun fyrstu árin. Ekki búast við að fara græða milljónir bara útaf því þú stofnar fyrirtæki eða útaf því þú ert með góða hugmynd. Almennt sé má áætla að það taki 2-3 ár af mikilli og erfiðri vinnu áður en fyrirtækið fer að komast á þann stað að það fari að skila hagnaði fyrir stofnendann.

 

Mistök 2: Setja of mikinn pening í fyrirtækið.

Þetta kann að hljóma nokkuð undarlega fyrir mörg ykkar þar sem það er erfitt að ímynda sér að of miklir peningar í fyrirtæki séu slæmur hlutur. Þetta er líklega ykkar eigin sparnaður sem þið eruð að setja í fyrirtækið og ef þið hafið litla reynslu af því að reka svona fyrirtæki þá er mjög auðvelta að brenna upp peninga í ekki neitt. Þegar þið eruð að stofna fyrirtæki þurfið þið að reyna sanna bæði viðskiptahugmyndina og tekjumódelið áður en þið farið að setja peningar ykkar og annara í það að fjármagna það. Þetta er ekki auðvelt að gera en ef þið getið með litlum pening sannað að það séu viðskiptavinir sem vilja kaupa vöruna ykkar þá getið þið með miklu meira öryggi sett inn meiri pening til að fylgja því svo eftir. Einnig er oft gott að vera með lítill fyrirtæki í upphafi því það er svo miklu auðveldara að hafa yfirsýn yfir öllu og breyta um stefnu ef eitthvað fer úrskeiðis.

 

Mistök 3: Ætla að gera allt.

Það er mikilvægt að vera með mjög vel skilgreinda þjónustu/vöru og vel skilgreindan markhóp. Ég hef lent í því oftar en ég get talið að heyra unga frumkvöðla og þá sérstaklega í hugbúnaðargeiranum tala um að varan þeirra ætli að sameina svo miklar upplýsingar og lausnir að það verði einhverskonar heildarlausn fyrir allt og alla. Góð vara að mínu mati leysir eitt vandamál og leysir það vel. Þegar þið ætlið að fara búa t.d. „til vefsíðu með öllum veitingastöðum í heiminum og byggja það ofan á samfélagsvef og bókunarkerfi“ þá veit ég að þið eruð á rangri leið. Það að búa til einfalda og skilvirka vöru er afskaplega erfiður og tímafrekur ferill, hvað þá ef þú ert með flókna hugmynd með endalaust mörgum lögum og snúningum. Hafðu þetta einfalt og hnitmiðað og þá er líklegra að hugmyndin nái langt.

 

Mistök 4: Halda að varan selji sig sjálf.

Þetta gerist ALDREI! Mér er alveg sama hversu frábær hönnður, forritari, verkfræðingur, skartgripassmiður eða glerblásturmaður þú ert, varan selur sig aldrei sjálf. Þú þarft alltaf að leggja mikla áherslu á sölu- og markaðsmál og koma vörunni til hugsanlegra kaupenda. Ef þú ert ekki góður sölumaður þá verðurðu bara að læra að selja. Þú ert stofnandi fyrirtækisins og þú verður að geta selt vöruna sjálfur því það getur engin gert það fyrir þig. Seinna meir þegar þú hefur náð árangri geturðu fengið aðra til að aðstoða við söluna en það er langt í það og þangað til verður þú bara að selja sama hvað. Fyrirtækið verður að fá pening inn til að geta lifað og það eina sem skilar því pening eru sölur.

 

Mistök 5: Ætla búa til fullkomna vöru.

Þegar við erum að vinna með eigin viðskiptahugmynd langar okkur að sjálfsögðu að búa til bestustu og flottustu vöru sem nokkurtímann hefur sést. Þetta er mjög skiljanlegt en á sama tíma er þetta ein helsta orsök fyrir því að hugmyndir deyji. Staðreyndin er sú að þú hefur bara X mikinn tíma til að koma vörunni þinni á markaðinn og þess vegna hefurðu því miður ekki þann lúxus að geta endalaust dúllað þér við hugmyndina. Ef þú ert með vöruhönnun komdu henni sem fyrst til framleiðenda og í sölu, ef þú ert með vefsíðu settu hana þá á netið þótt hún sé ekki alveg 100% fullkomin. Staðreyndin er sú að við verðum að setja á okkur tímamörk og vinna eftir þeim, ef við tökum of mikinn tíma í svona hluti þá byrjum við bara að tapa pening, fáum engar tekjur inn og á endanum deyr bara varan áður en hún fær tækifæri til að koma inn í heiminn.

 

Mistök 6: Spyrja hvað reksturinn mun gera fyrir þig.

Ekki hefja rekstur bara útaf því að þið haldið að þið getið grætt á vörunni. Hugsið frekar hvaða vandamál varan mun leysa og hvernig hún mun nýtast viðskiptavinum ykkar. Ef þið eruð með vöru eða þjónustu sem virkilega nýtist viðskiptavinum ykkar og skapar virði fyrir þá þá mun það einnig skapa tekjur og hagnað fyrir ykkur. Þannig þið græðið meira á því að hugsa um þarfir viðskiptavinar en ykkar eigin.

 

Mistök 7: Velja ranga meðeigendur.

Það að fara einn út í rekstur getur verið rosalega erfitt þar sem öll ábyrgðin, allt stressið og allur kvíðin hvílir á þínum öxlum. Það er ekki auðvelt og þess vegna kjósa margir að fara í rekstur með einhverjum öðrum til að minnka álagið. Veljið vel þá aðila sem þið vinnið með útaf því ef þið veljið ranga meðeigendur þá getur það verið verra en að fara í þetta einn. Einnig mæli ég alltaf með að hafa mjög vel skilgreint hvernig samstarfinu verður háttað og hvað skuli gera ef ósætti koma upp á. Þá er gott að setja upp hlutahafasamkomulag á milli eigenda.

 

Mistök 8: Leggja allt undir.

Það að hætta í vinnunni og fara vinna í fullri vinnu við fyrirtæki sitt er rosalega áhættusamt sérstaklega þar sem það er vitað að það tekur langan tíma fyrir fyrirtækið að byrja skila hagnaði og sparnaðurinn er oft fljótur að brenna upp. Þá getur maður staðið eftir með enga vinnu, engan sparnað og fyrirtæki sem gekk ekki upp. Fyrir flesta getur það verið betra að fara hægt í sakirnar og byrja bara í rekstri samhliða vinnu og starfa þannig þangað til að fyrirtækið er komið á það stig að þið getið farið að vinna í því í fullri vinnu án mikilrar áhættu.

Ég verð þó að viðurkenna að ég hef verið tvístígandi með hvort ég eigi að kalla þetta mistök þar sem ég hef sjálfur alloft lagt allt mitt undir í fyrirtækjarekstri mínum og mun halda áfram að gera það. Ég geri mér þó grein fyrir því að það sama á ekki endilega við um alla og fyrir marga þá er þetta afskaplega stórt skref sem getur haft gríðarlegar afleiðingar.

 

Mistök 9: Ísland er lítill markaður.

Þetta eru séríslensk mistök en Ísland er ROSALEGA LÍTLL markaður aðeins 300.000- manns. Þótt svo að hugmyndir gangi upp á öðrum mörkuðum með tugi milljóna aðila þá þýðir það ekki að þær geti gengið upp á litla Íslandi. Þannig hugsið virkilega hvort þið getið fengið nægar tekjur á þessum litla markhóp áður en þið farið að byggja upp heilt fyrirtæki í kringum það.

 

Mistök 10: Frestunarárátta.

Hættu að lesa þessa grein og farðu að framkvæma og vinna í þínum hugmyndum NÚNA!

 


Gerðu einn hlut og gerðu hann vel

Fyrir nokkrum árum síðan var ég líkt og svo margir aðrir ungir menn að prufa mig áfram og reyna finna leiðir til að græða pening og starfa sjálfstætt. Það var fátt sem ég prufaði ekki en meðal þess sem ég prufaði á þessum tíma var bílabrask, internetviðskipti, hlutabréfaviðskipti, franchise fyrir ýmiskonar fyrirtækjarekstur, sala DVD mynda í kolaportinu, innflutningur á hinu og þessu, fasteignaviðskipti, þjónusturekstur og sitthvað fleira. Það skemmtilega við þetta allt saman var að öll þessi viðskiptatækifæri virtust búa yfir óendanlegum möguleikum og ég var yfirleitt með 5-10 hugmyndir í gangi á hverjum tíma.

Þetta er mjög einkennandi fyrir marga frumkvöðla að þeir hafa svo gaman af því að byrja eitthvað nýtt að þeir eru, líkt og ég var, alltaf með fullt af hugmyndum í gangi. Það sem maður gerir sér svo grein fyrir eftir að hafa verið í rekstri í lengri tíma er að stundum er betra að einbeita sér bara að einum hlut og gera hann vel frekar en að vera með tugi hugmynda í gangi og framkvæma þær allar með ófullnægjandi hætti.

Það er atriði úr skemmtilegri bíómynd með Billy Crystal í aðalhlutverki sem heitir City Slickers frá 1991 og þetta atriði tekur vel saman þann fróðleik sem mér langar til að deila með ykkur. Þar er gamli kúrekinn búinn að finna tilgang lífsins, sem er mjög einfaldur, finndu þetta eina atriði sem skiptir þig máli og einbeitu þér að því. Það sama má segja um fyrirtækjarekstur, finndu eina hugmynd sem þú hefur ástríðu fyrir og einbeitu þér nær eingöngu að henni þangað til þú hefur náð góðum árangri með henni, þá fyrst geturðu farið að skoða aðrar hugmyndir ef þú svo kýst. Mín reynsla segjir mér að það þurfi yfirleitt 2-3 ár í að framkvæma hverja hugmynd og koma henni á þann stað að hún sé búinn að sanna sig.

Ég veit að það er skemmtilegt að vera alltaf að byrja nýjar og nýjar hugmyndir en ef þú vilt virkilega ná árangri þá þarftu að velja þér eina hugmynd og fylgja henni alla leið.

 


Milljón króna hugmyndin

Ertu með frábæra hugmynd?

Sem gæti skapað hundruði milljóna?

Og þarftu bara einhvern til að framkvæma hana fyrir þig?

eða kannski bara einhvern til að gefa þér fullt af pening svo þú getir framkvæmt hana?

 

Þá þykir mér leiðinlegt að láta þig vita að þú ert ekki með nein verðmæti í höndunum. Ég hef aðstoðað og leiðbeint hundruði einstaklinga sem eru að taka sín fyrstu skref í fyrirtækjarekstri og algengustu mistök sem ég sé hjá þessum einstaklingum er að þeir halda að hugmynd þeirra ein og sér sé milljóna króna virði.

Staðreyndin er sú að hugmynd án framkvæmdar er ekkert annað en draumur sem aldrei mun rætast. Ef þú ert ekki sjálf(ur) tilbúin að láta hugmyndina verða að veruleika og leggja á þig þá miklu vinnu sem því fylgir þá verður hún aldrei að veruleika. Það mun engin framkvæma hana fyrir þig, það mun engin bara gefa þér pening til að framkvæma hana, þú munt ekki fá styrk frá ríkinu eða lán (án sjálskuldarábyrgðar og veðs) hjá bankanum. Þú þarft sjálf(ur) að framkvæma hana, leggja þitt blóð, svita og tár í hana.

Ég er ekki að segja að þú eigir ekki að framkvæma hana, þvert á móti er ég að segja að ef þú vilt virkilega sjá hugmynd þína að veruleika þá verðurðu að framkvæma hana sjálf(ur). Það er ekkert auðvelt við það að búa til verðmæti úr hugmynd, það krefst mikillar vinnu og aga og hugsanlega 1-2 ár þar sem þú lifir á núðlusúpum vegna þess að þú hefur ekki efni á öðru.

En þótt svo að hugmynd sé einskis virði þá þýðir það ekki að þið getið ekki grætt á henni. Ef þið fáið góða hugmynd og framkvæmið þá gætuð þið hugsanlega skapað mikil verðmæti fyrir ykkur sjálf og samfélagið í heild.

Ég er að skrifa þessa grein ekki til að gagnrýna hugmyndir ykkar eða vera leiðinlegur heldur til að flýta all verulega fyrir ferlinum ykkar með því að segja ykkur hvað þið eigið ekki að vera eyða tíma ykkar í að hugsa um. Þannig getið þið vonandi farið beint í að vinna í uppbyggilegum hlutum og vonandi náð að gera hugmyndir ykkar að veruleika fyrr. Hérna kemur listinn yfir þær hugsanir sem ber að varast þegar verið er að vinna með hugmynd.

 

5 atriði sem bannað er að hugsa

1. „Ég sel bara einhverju stóru fyrirtæki hugmyndina“
Nema þú sért með eitthvað einkaleyfi eða einhverskonar sönnun á gæðum vörunar þá er þetta afskaplega langsótt. Ég hef allavegana aldrei á mínum ferli heyrt um neitt dæmi um að einstaklingur selji hugmynd sína á byrjunarstigi fyrir einhverja upphæð. Aftur á móti hef ég heyrt dæmi um aðila sem eyða árum í að þróa einhverskonar hugmynd, fá einkaleyfi á hugmyndin og selja hana svo til einhvers fyrirtækis en það gerist ekki yfir nóttu, það tekur langan tíma.

2. „Ég fæ bara einhvern annan til að gera þetta fyrir mig“
Verðmæti hugmyndarinnar eru ekki fólgin í því hversu góð hugmyndin er heldur hversu vel hún er framkvæmd. Ef þú finnur aðila sem er nógu hæfileikaríkur til að gera hugmynd þína að veruleika og breyta henni í pening þá væru mikil verðmæti í því fyrir þig að fá slíkan aðila til liðs við þig. Aftur á móti myndi slíkur aðili geta gert verðmæti úr flestum hugmyndum og þú hefðir því engin verðmæti fyrir hann á móti. Þú getur heldur ekki bara greitt einhverjum fyrir þetta því ferillinn á bak við það að gera hugmynd að veruleika tekur fleiri fleiri mánuði eða ár og þú getur líklega ekki verið með persónu á launaskrá í þetta langan tíma án þess að fá tekjur á móti. Þú þarft líka að vera fjölhæfur einstaklingur til að framkvæma þetta og manneskja sem er með eldmóð fyrir að láta hugmynd sína verða að veruleika er tilbúin að stíga út fyrir þægindasvæði sitt og takast á við allskonar áskoranir sem venjulegur starfsmaður myndi ekki leggja á sig.

3. „Ef ég fyndi nú bara einhvern til að fjárfesta í hugmyndinni“
Almennt séð er talað um að bara hin þrjú-F fjárfesti í hugmyndum á upphafsstigum en það eru sem sagt Family, Friends and Fools (fjölskylda, vinir og fáfróðir). Hugsanlega gætuð þið fengið vini og fjölskyldumeðlimi til að fjárfesta í hugmynd ykkar en spurning er hvort þið viljið vera taka áhættu með fjármuni fjölskyldu ykkar, enda er ekkert öruggt í slíkum fjárfestingum. Þið fáið ekki neina alvöru fjárfesta til að fjármagna hugmynd ykkar fyrr en þið eruð komin mun lengra í ferlinum, flest frumkvöðlafyrirtæki sem ég þekki til hafa fengið fjárfesta inn ca. 1-2 árum eftir að þeir hefja reksturinn og þá í flestum tilfellum þegar búið er að sanna tekjumódelið.

4. „Bankinn hlýtur að vilja lána mér fyrir þessari frábæru hugmynd“
Bankar lána þér ekki neitt nema þeir séu 100% öruggir um að fá það til baka og þess vegna munu þeir þurfa fá veð í fasteign eða sjálfskuldarábyrgð eða bæði fyrir láninu. Það lánar engin banki þér pening bara út á góða hugmynd eða flotta viðskiptaáætlun. Þú skalt einnig varast það að byrja fyrirtækjarekstur þinn í skuld, enda á reksturinn alltaf eftir að verða dýrari en þú áttir von á.

5. „Ég hlýt að geta fengið ríkið til að styrkja þetta enda styrkja þeir listir/nýsköpun/frumkvöðla/fyrirtæki“
Það eru einhverjir styrkir í boði og þið eigið einhvern möguleika á að fá þá styrki en það er tímafrekt og yfirleitt eru það lágar upphæðir. Þið megið endilega sækja um þessa styrki og láta á það reyna en reynið að forðast það að byggja hugmynd ykkar á því að þið fáið styrk. Það er oft miklu sniðugra að hugsa bara í lausnum og finna ódýrari leið til að framkvæma hugmyndina.

 

Látið hugmyndir ykkar verða að veruleika
en látið bara ekki hluti eins og skort á fjármagni
eða lítinn stuðning koma í veg fyrir að þið framkvæmið.

Það er alltaf hægt að finna leið
til að láta hugmyndir verða að veruleika
með eigin hugarafli og mikilli vinnu. 


Fyrirtækjasölur

Fyrsta skipti sem ég stofnaði fyrirtæki þá keypti ég rekstur sem var nú þegar í gangi og gat þannig fengið hlaupandi start á rekstur minn. Það voru nú þegar einhverjar tekjur í hverjum mánuði og markmiðið mitt var einfaldlega að auka þær með einhverjum snilldarlegum ráðum sem án efa myndu koma upp í huga mér. Lítandi til baka þá voru fullt af mistökum sem ég gerði t.d. það að ég þurfti að veðsetja mig til að geta tekið lán fyrir fyrirtækinu en í dag myndi ég frekar kjósa að fara „bootstrap” leiðina. Ég fékk líka ættingja til að skrifa undir sem ábyrgðarmaður en ég myndi aldrei á milljón árum gera það í dag og svo eyddi ég líka óþarflega miklum pening í að láta fyrirtækið líta vel út í staðinn fyrir það að einbeita mér að sölu. En burt séð frá þessum mistökum mínum þá getur það oft verið sniðug leið til að byrja í rekstri að kaupa fyrirtæki sem er nú þegar í rekstri. Hafið það bara í huga að fá reyndari aðila til að kíkja yfir þetta með ykkur og verið viss um að seljandinn sé traustur aðili. En hvar finnur maður svo fyrirtæki til sölu?

Það eru nokkrar vefsíður með fyrirtæki til sölu á skrá og eru þau eftirfarandi:

Fyrirtækjasalan Suðurveri

www.fyrirtaeki.is: Líklega elsta fyrirtækjasalan á landinu og einmitt þar keypti ég mitt fyrsta fyrirtæki.

Fyrirtækjasala Íslands

www.atv.is: Ég hef ekki átt viðskipti við þá en þeir eru búnir að vera til í einhvern tíma.

Fyrirtækjakaup.is

 

www.fyrirtaekjakaup.is: Þessi vefsíða var bara að opna og á vonandi eftir að gera góða hluti.

 

Annars má einnig oft finna lítil fyrirtæki til sölu hjá fasteignasölum eða bara í gegnum einhverja sameiginlega vini sem benda manni á þau. Ég er líklegast að gleyma einhverju eða hugsanlega er eitthvað þarna úti sem ég þekki ekki og því bið ég ykkur vinsamlegast um að kommenta hér fyrir neðan ef þið eruð með einhverjar fleiri vefsíður eða fyrirtæki þar sem má nálgast upplýsingar um slíkt.

Munið svo bara að fara varlega í öll viðskipti með fyrirtæki þar sem það eru margir hlutir sem þarf að huga að og þið viljið alls ekki kaupa köttinn í sekknum.


Topp 10 facebooksíður fyrir frumkvöðla

Facebook síður virka oft vel til að miðla allskonar upplýsingum og fróðleik og þess vegna ákvað ég að taka saman topp 10 lista yfir facebook síður á Íslandi sem henta vel fyrir frumkvöðla til að fylgjast með. Sjálfur er ég með facebook síðuna Frumkvöðlar en ég mun ekki taka hana með í þennan lista þar sem ég væri þá ekki mikið hlutleysi 🙂

1. Innovit

2. Startup Reykjavík

3. Klak nýsköpunarmiðstöð

4. Nýsköpunarmiðstöð Íslands

5. Startup Iceland

6.  Seed Forum

7. V6 sprotahús

8. Frumkvöðlasetrið Ásbrú

9. Markaðssetning á Internetinu

10. Markaðsmál á mannamáli

 

Þetta er langt frá því að vera tæmandi list svo endilega skrifið athugasemdir hérna fyrir neðan ef þið munið eftir fleiri áhugaverðum íslenskum frumkvöðlasíðum á facebook.


Hvað nákvæmlega er Hackathon?

Nú fer að styttast í Iceland Startup ráðstefninu en hún fer fram 30.maí næstkomandi og ég er orðin vægast sagt spenntur fyrir þessum viðburð. Það er þó eitt varðandi ráðstefnuna sem ég var ekki alveg með á hreinu og það var hið svokallaða Hackathon sem fer fram 29.maí eða daginn fyrir ráðstefnuna. Ég vissi að þetta tengdist forritun og væri tækifæri fyrir áhugasama forritara um að hittast og keppa sín á milli en ég var þó ekki almennilega með það á hreinu hvað myndi felast í því og hvort það væri einhver ágóði fyrir mig að mæta á viðburðinn. Í raun ímyndaði ég mér þetta svolítið eins og atriðið úr kvikmyndinni “The Social Network” þar sem forritararnir kepptu í að hakka sig inn á eitthvað kerfi og sá sem vann fékk vinnu hjá Facebook.

Hackathonið sem fer fram núna 29.maí verður líklega aðeins öðruvísi eða allavegana býst ég fastlega við að þar verði sleppt öllu áfenginu sem sást í kvikmyndinni. En engu að síður er kjarnin sá sami að forrita og leysa þrautir á sem styðstum tíma umkringdur tölvum og forriturum sem allir sitja sveittir við iðju sína. Það verða mörg þekkt íslensk tæknifyrirtæki á staðnum sem koma til með að deila reynslusögum sínum auk þess sem þau koma til með að leggja fyrir þátttakendur ýmsar þrautir. Þau fyrirtæki sem verða á svæðinu eru Clara, GreenQloud, Icelandic Institute for Intelligent Machines, Microsoft og Videnti er.

Facebook eventið má finna hér: https://www.facebook.com/events/272685122823997
Eventbite skráninguna má finna hér: http://icehackathon.eventbrite.com/

Skráning á viðburðinn er opin til 25.maí og þið getið skráð ykkur á Facebook eða í gegnum Eventbite. Einnig geta þeir sem vilja frekar skrá sig með tölvupóst, sent tölvupóst á Hamid@iiim.is með fyrirsögninni “Hackathon Signup”. Þær upplýsingar sem þurfa að koma fram eru:

  • Nafn liðsins (ef fleiri en einn)
  • Fullt nafn
  • Tölvupóstur
  • Heimilisfang
  • Stofnun/skóli/annað:
  • Og hvort þú viljir keppa ein(n) eða í liði

Svo læt ég einnig fylgja hérna með nánari lýsingu á viðburðinum á ensku sem ég afritaði af kynningarblaði viðburðarins.

 

Hackathon – 2012

Hackathon is a very laid back competition for hackers and people who would liketo meet each other and work on interesting problems together. Its an opportunityto meet other hackers and also people from companies.

For whom?

  • Hackers/people who like to meet new hackers/people.
  • this event is open to students, hobbyists, professionals, anybody who likesto hack on cool code.
  • Individual with no team will be teamed up randomly with other individuals- It is not necessary for people to be in a team if you like to be alone pleaselet us know.
  • Maximum 5 people can be in a team.

Where?

This event will be hosted by The School of Computer Science at Reykjavik Uni-versity and will take place on May 29 from 9am-9pm.

Agenda

09:00 registration
10:00 – 10:30 welcome
10:30 – 12:00 companies and their challenges
12:00 – 20:00 participants time to hack problems
20:00 – 21:00 participants time to present their solutions and judging and awards

Coff ee and pizza are going to be available throughout the event – self service eating policy during the event 🙂

There will be 1000$ for the winners of Hackathon 2012!

Clara and GreenQloud are considering to hire good hackers from thisevent!

 


Ég er með hugmynd, hvað nú?

Öll höfum við fengið snilldarlega hugmynd á einhverjum tímapunkti í lífi okkar.

En við mannfólkið erum löt í eðli okkar og reynum þess vegna alltaf að finna einhverja afsökun afhverju við ættum ekki að framkvæma.

  • „Þetta er alltof mikil áhætta“
  • „Það myndi kosta milljónir að gera þetta að veruleika“
  • „Ef ég þekkti nú bara rétta fólkið“
  • „Það er alltof mikið að gera hjá mér núna“
  • „Ég er ekkert hæf(ur) til að stofna og reka fyrirtæki, veit ekkert um viðskipti“
  • „Það er örugglega einhver klárari en ég þarna úti sem er að vinna í þessu“

Örugglega væri hægt að telja upp þúsund afsakanir til viðbótar sem fólk notar til að koma sér hjá því að þurfa í alvörunni að leggja á sig vinnuna sem fylgir því að láta hugmyndina verða að veruleika. En staðreyndin er sú að allar þessar afsakanir eru ekkert annað en hræðsla og leti, því að ef við myndum ákveða að fylgja eftir hugmyndinni þá þyrftum við að yfirgefa þægindasvæði okkar og það viljum við nú alls ekki gera.

Það eru þó alltaf örfáir aðilar sem staldra aðeins lengur við og spyrja sjálfa sig “Hvernig get ég látið þessa hugmynd verða að veruleika?”. Það er ekki auðvelt að svara þessari spurningu, sérstaklega ef þið hafið aldrei áður farið í gegnum ferilinn að stofna fyrirtæki en hvernig farið þið þá að?

 

5 upphafsskref

Áður fyrr hefði ég ráðlagt ykkur að skrifa viðskiptaáætlun um hugmyndina og að mörgu leiti er sú ráðlegging góð þar sem það að skrifa viðskiptaáætlun neyðir ykkur til að hugsa út í öll smáatriðin. En viðskiptaáætlanir geta verið flóknar og mjög tímafrekar og þess vegna hef ég í seinni tíð verið minna hrifin af þeim. Þess í stað myndi ég einfaldlega ráðleggja ykkur að skilgreina ferilinn nánar og þá sérstaklega þessi 5 atriði:

  1. Skilgreina hugmynd, í hverju felst varan og hvert er hlutverk fyrirtækisins.
  2. Kostnað við að þróa og framleiða vöruna/þjónustuna. Startkostnaður.
  3. Rekstrarkostnað, hvað kostar að reka fyrirtækið (laun, skrifstofa, markaðsmál, símar, hýsing o.s.frv.)
  4. Lagaleg atriði, þurfið þið að sækja um einhver leyfi? Er hægt að fá einkaleyfi á hugmyndina? Hver ber ábyrgð ef eitthvað kemur upp á? Hvernig er bókhaldi og skattamálum háttað?
  5. Sölu- og markaðsmál, hver er markhópurinn ykkar og hvernig ætlið þið að koma vörunni til hugsanlegra viðskiptavina?

Þetta er á engan hátt tæmandi list og jafnvel þótt svo þið svarið öllum þessum atriðum þá vitið þið ekki allt sem þið þurfið að vita til að ná árangri með hugmynd ykkar. Engu að síður er þetta rosalega góður byrjunarstaður og ef þið getið skilgreint öll þessi atriði fyrir hugmynd ykkar þá eigið þið skilið hrós og klapp á bakið. Passið þó að flýta ykkur ekki of mikið í gegnum þessi atriði og takið frekar meiri tíma til að velta þeim öllum ýtarlega fyrir ykkur.

 

Góð ráð til að vinna þetta

Á meðan þið eruð að vinna í að svara ofantöldum atriðum þá er ýmislegt sem þið getið gert til að bæta skilning ykkar á hugmyndinni, umhverfinu og möguleikunum. Hérna deili ég með ykkur nokkrum góðum ráðum sem gætu nýst ykkur í þessum ferli.

  • Veltið fyrir ykkur hvað nákvæmlega verður hlutverk fyrirtækisins sem þið stofnið? Er aðal áhersla fyrirtækisins á sölumál, þróun, framleiðslu, markaðssetning, forritun eða eitthvað annað?
  • Greinið samkeppnisaðila, hverjir eru í beinni samkeppni við ykkur og hverjir eru í óbeinni samkeppni. Hvað ætlið þið að gera öðruvísi en þeir?
  • Kynnið ykkur markaðinn sem þið ætlið að fara inn á með því að tala við fólk sem hefur reynslu af honum og lesið allt sem þið mögulega getið um hann.
  • Leitið ráða hjá sérfræðingum á hverju sviði. (Lögfræðingar, endurskoðendur, verkfræðingar, forritarar o.s.frv.)
  • Setjið saman gott teymi til að vinna með að hugmyndinni, veljið fólk sem er sterkt á öðrum sviðum en þið sjálf og þið treystið.
  • Skoðið hvernig önnur sambærileg fyrirtæki hafa náð að koma sér á framfæri til hugsanlegra viðskiptavina, hvar og hvernig hafa þau verið að markaðssetja sig.
  • Kynnið ykkur hvernig það er að stofna fyrirtæki, hvaða pappíra þarf að fylla út og hvað mun það kosta ykkur.

 

Námskeið

Í hverri viku leitar til mín fólk sem er með hugmynd og er að velta fyrir sér hvernig það eigi að framkvæma hana og breyta henni í arðsamt fyrirtæki. Það er ekki auðvelt að svara slíkri spurningu og ég reyni en get því miður ekki gefið mér tíma fyrir alla sem leita til mín. Þess vegna ákvað ég að halda frekar bara námskeið til að aðstoða fólk í þessum hugleiðingum og ég fékk til liðs við mig hana Þórunni Jónsdóttur hjá Fafu. Námskeiðið fer fram 16.júní næstkomandi og ef þið hafið áhuga á að fræðast meira um þennan feril þá mæli ég með að þið kíkjið á námskeiðið hjá okkur. Þið getið lesið meira um það hér: Ég er með hugmynd, hvað nú?

 

 


Kostnaður nýstofnaðra fyrirtækja

Ég átti afar skemmtilegar samræður um helgina við félaga minn sem var að spá í að fara stofna einkahlutafélag utan um rekstur sinn. Og ég fékk nokkrar spurningar sem ég fæ reglulega og ég ætla hér aðeins að reyna svara nokkrum þessara spurninga. Ef þið hafið einhverjar aðrar spurningar eða viljið koma með einhverjar athugasemdir á þessi svör mín þá endilega skrifið þau hér fyrir neðan 🙂

1. Er nauðsynlegt að vera með 500 þúsund krónur í hlutafé þegar maður stofnar fyrirtæki og er ekki bara hægt að skrá tæki og tölvur sem hlutafé til að koma í veg fyrir að maður þurfi að setja pening í þetta.

Okey ég fæ þessa spurning óhemju oft og var sjálfur sekur um að spyrja hennar þegar ég stofnaði fyrstu fyrirtækin mín. Staðreyndin er sú að það að vera með einkahlutafélag þótt svo það sé lítill sem enginn rekstur á því kostar pening. Ef þið eruð með vsk-skilda starfsemi þurfið þið að skila inn vsk-skilum annan hvern mánuð og ef þið treystið ykkur ekki í það sjálf þá þarf að greiða einhverjum til að sjá um það, sama er með launagreiðslur, ársreikinga o.f.l. Svo er árleg gjöld sem fyrirtæki þurfa að borga sem ég hreinlega veit ekki alveg hvað gera en það er einhver 15 þúsund kjall á hverju ári sem fer í útvarpsgjöld og eitthvað annað álíka. Svo farið þið að flytja alla kostnaðarliði yfir á fyrirtækið, hýsingu á vefsíðunni, leigu á skrifstofu og ýmislegt fleira sem manni finnst bara sjálfsagt að fyrirtækið eigi að borga. Það er því mikilvægt að það sé einhver peningur til inn í fyrirtækinu svo þið farið ekki á hausinn áður en þið hefið fengið fyrstu tekjurnar ykkar.

En burt séð frá þeim rökum þá er erfiður og dýr ferill sem fylgir því að láta meta tæki og búnað til að setja inn í fyrirtæki og þið þurfið líklega að ráða löggildan endurskoðenda til að sjá um slíkt fyrir ykkur. Síðast þegar ég spurði endurskoðendann minn hvað slíkt myndi kosta mig þá sagði hann um 200 þúsund, sem er aðeins of dýrt fyrir það sem þið eruð að reyna gera.

2. En ef það er ekki hægt að láta meta tækin inn sem hlutafé get ég þá ekki bara tekið peningin út með því að láta fyrirtækið kaupa af mér tölvuna mína eða bílinn eftir að ég stofna það?

Það er eitthvað sem tæknilega séð er hægt að gera en ég myndi þó ræða við endurskoðendann minn áður en ég færi að leggja út í slík viðskipti. En aftur vill ég benda á að 500þús er ekki mikill peningur þegar það kemur að fyrirtækjarekstri og því spurning hvort þið leyfið honum ekki bara að vera í fyrirtækinu, sérstaklega ef þið hafið trú á því sem þið eruð að gera.

3. Hvað kostar að stofna fyrirtæki?

Það eitt að sækja um stofnun einkahlutafélags kostar kr.130.500- (sjá gjaldskrá rsk) við það bætist svo kostnaður við að ráða endurskoðenda til að fylla út alla nauðsynlega pappíra fyrir ykkur. Ef þið hafið stofnað fyrirtæki áður þá eigið þið líklega alla pappírana til og getið hugsanlega stofnað það sjálfir, stundum er þó gott að fá fagmann til að sjá um það sérstaklega ef þið eruð margir í hóp og viljið útbúa gott hluthafasamkomulag til að tryggja rétt ykkar allra. Ég hef ekki ráðið endurskoðenda/lögfræðing til að setja upp pappírana fyrir mig í nokkur ár og veit því ekki alveg hvað það myndi kosta en gæti þó áætlað að það væri á bilinu 40-80þús fyrir utan hluthafasamkomulagið. En þið getið notað hlutaféð til að borga þennan kostnað, sem þýðir að þið verðið í raun bara með 300 þúsund í hlutafé eftir að hafa borgað fyrir þetta og því ennþá minni ástæða til að taka þann pening út úr fyrirtækinu.

4. Hvað kostar að reka einkahlutafélag í hverjum mánuði?

Það er náttúrulegu mjög breytilegt hvað hvert og eitt fyrirtæki þarf að borga en almennt séð þurfið þið að borga einhver útvarpsgjöld sem eru 15 þúsund á ári svo þurfið þið að borga einhverjum til að sjá um bókhaldsmál fyrir ykkur. Hagsýn er öflugt bókhaldsfyrirtæki sem sér um allt mitt bókhald og ég greiði þeim bara fast mánaðarlegt gjald til að sjá um öll vsk-skil, ársreikinga og allt það sem viðkemur þessu. Það hentar mér mjög vel þar sem ég hef sjálfur ekki mikinn áhuga á að sjá um bókhaldið. Kostnaður við slíka þjónustu er mjög breytilegur eftir fyrirtækjum, ég gæti trúað að það væri á bilinu 30-50þús á mánuði fyrir lítil fyrirtæki með öllu innföldu, en ég mæli bara með að þið bjallið í Svövu og Brynhildi hjá Hagsýn í síma 571-0090 til að fá frekari upplýsingar. En við þetta allt bætist svo allskonar kostnaður sem byrjar mjög fljótt að týnast til svo þið skulið alveg búast við því að þið þurfið að borga einhverja tíuþúsund kjalla í hverjum mánuði eftir að þið eruð búin að stofna fyrirtækið. Ég ætla þó ekki að reyna gefa neina fasta tölu hér þar sem það er ómögulegt.

Að lokum

Ég hef í fyrri greinum mínum um stofnun ehf. predikað mikið að ég það eigi að bíða með að stofna fyrirtækið þangað til að þróun viðskiptahugmyndarinnar er kominn á það stig að hún sé byrjuð að skila inn tekjum. Það er dýrt og kostnaðarsamt að stofna og reka fyrirtæki og því skuluð þið fara varlega út í það.

 

 

 

 


Newsjacking

Ég ætla að byrja þessa færslu á því að efna til samkeppni um bestu þýðinguna á enska orðinu “newsjacking”. Ef þú hefur ekki heyrt þetta orð áður þá er ekki seinna vænna en að þú lesir færsluna!

Ég kýs að nota orðið “fréttastuldur”, þangað til einhver kemur með eitthvað betra. Fréttastuldur hefur verið til lengi og tíðkast í öllum brönsum í heiminum. Orðið kemur samt frá David Meerman Scott, manni sem ég hef skrifað um áður. Hann hefur notað það í mikið af sínum skrifum, bæði í bókum og á blogginu sínu. Nú síðast í nóvember gaf hann út stutta rafbók sem hægt er að kaupa fyrir Kindle.

Fréttastuldur er í raun mjög einfaldur í framkvæmd. Nýttu þér fréttir til að koma sjálfum þér og/eða vörum þínum á framfæri. Þetta gengur út á að finna sjónarhorn á fréttum þar sem þú getur troðið inn á snjallan hátt og þannig “stelur” þú augnablikinu. Þetta frábær leið til fyrir fólk og fyrirtæki sem hefur lítið auglýsingabudget og vantar einhverja umfjöllun.

En hvernig nærðu þessu? Það er hægt að gera þetta klassíska, hringja í fréttamenn eða senda þeim tölvupóst og vona að þeir fjalli um þig í kjölfarið. En auðveldasta leiðin er auðvitað að nota hina svokölluðu samfélagsmiðla. Ef þú eða fyrirtæki þitt ert með blogg, Facebook síðu, Twitter aðgang eða eitthvað slíkt, þá er mjög auðvelt fyrir þig að smella þér inn í umræðuna, án mikillar áreynslu. Best er að nýta þessa miðla alla saman.

Eigum við að taka nokkur dæmi?

Joe Payne er á Twitter.

Fyrirtækið Eloqua sérhæfir sig í hugbúnaði fyrir markaðsfyrirtæki sem samhæfir vefmælingar, tölvupóstsendingar og aðrar aðgerðir á vefnum. Forstjórinn, Joe Payne (svalt nafn), varð þess áskynja að Oracle var að ganga frá kaupum á aðal samkeppnisaðilanum, Market2Lead. Það hefði verið auðvelt fyrir Joe Payne að kalla inn allt starfsfólkið á krísufund og haft áhyggjur af nýjum risa á markaðnum. Í staðinn settist hann niður, skrifaði bloggfærslu þar sem hann bauð Oracle velkomið og sagði það ánægjulegt fyrir þennan bransa að risarnir á hugbúnaðarmarkaðnum væru farnir að horfa í þennan markað.

Þessi eina bloggfærsla skilaði sér í umfjöllun í Business Week, InfoWorld, PC World og fleiri og fleiri. Á næstu vikum sprungu allir sölukanalar upp út af allri athyglinni og í kjölfarið var skrifað undir $500.000 samning við Red Hat. Payne hefur sagt að þessi litla bloggfærsla hafi fært fyrirtækinu um MILLJÓN dollara í tekjur.

Man einhver eftir stóra saltmálinu hér um daginn?

Ég sá frábært dæmi um fréttastuld þegar stóra saltmálið komst í hámæli. Þannig var mál með vexti að Ölgerðin hafði verið að selja fólki iðnaðarsalt sem var svo notað í matargerð. Þetta var rosalega hávært og leiðinlegt mál, sem ég ætla ekki að fara nánar út í. Þegar listi yfir þá viðskiptavini sem keypt höfðu saltið komst í fjölmiðla fór allt í háa loft, enda voru þar á meðal nokkrir af stærstu matvælaframleiðendum landsins.

Útiplönin hjá Eðalfisk

Daginn eftir að listinn var gerður opinber sendi fyrirtækið Eðalfiskur frá sér fréttatilkynningu, en Eðalfiskur var á listanum. Þar segir að fyrirtækið fordæmi vinnubrögð Heilbrigðiseftirlitsins þar sem gefið er í skyn að Eðalfiskur hafi notað iðnaðarsaltið til matvælaframleiðslu. Það sé rétt að Eðalfiskur keypti bretti af umræddu salti, en þegar fólk sá að það var merkt sem iðnaðarsalt var því dreift á útiplön fyrirtækisins, ekki notað í framleiðslu. Þetta fór eins og eldur í sinu um netheima, Eyjan, Visir.is, MBL.is og sjónvarpsfréttirnar tóku þetta fyrir og fyrir vikið fékk Eðalfiskur ókeypis umfjöllun sem sýndi að þar væri gæðaeftirlitið í lagi.

Þó að fréttastuldur sé mjög skemmtileg og árangursrík leið til að fá umfjöllun um fyrirtækið þitt þá er hann mjög vandmeðfarinn og getur auðveldlega sprungið í höndunum á þér.

Besta dæmið um illa heppnaðan fréttastuld er þegar tískufyrirtækið Kenneth Cole reyndi að nýta sér mótmælaöldu í Egyptalandi til að vekja athygli á útsölunni hjá sér með því að setja inn tvít merkt #Cairo.

Í stað þess að bera tilætlaðan árangur og vekja athygli á útsölunni fóru að streyma inn blogg, tvít og tölvupóstar þar sem fyrirtækið var skammað og látið heyra það. Á endanum var færslan fjarlægð og fyrirtækið baðst afsökunar.

Hvað getur þú gert?

Vertu vakandi fyrir öllum þeim fréttum sem snerta þig, þinn markað og þína samkeppnisaðila. Ef tækifærið gefst skaltu stökkva til og sjá hvernig þú getur nýtt þér það. Skrifaðu frétt á heimasíðu eða blogg fyrirtækisins og deildu henni svo á Twitter og Facebook síður fyrirtækisins og þína eigin. Ef efnið er nógu djúsí þá mun það verða gripið á lofti og tekið áfram.

Ég mæli líka með bókinni Newsjacking. Hún er stutt og þú kemst í gegn um hana á ca. klukkutíma. Eins kostar hún sáralítið og er vel peninganna virði. Ef þú lest hana og finnst hún áhugaverð mæli ég með fleira efni eftir sama höfund. David Meerman Scott er virtur markaðsgúru með mikla reynslu úr bransanum. Hann er í miklu uppáhaldi hjá mér og mun sennilega mæta oftar hingað inn í hugrenningarnar.

Endilega skjótið á mig fleiri dæmum um fréttastuld í athugasemdum!


 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 

 


Startup Weekend

 

“No Talk, All Action.
Launch a startup in 54 hours”

 

Er slagorð Startup Weekend út í Bandaríkjunum en Startup Weekend eru viðburðir sem eru búnir að slá heldur betur í gegn og eru í dag haldnir út um allan heim. Hugmyndin á bak við SW er að einstaklingar og hópar með hugmyndir komi saman og í 54 klukkustundir gera þeir ekkert annað en að vinna að hugmyndum sínum. Í lok helgarinnar reyna hóparnir svo að vera komnir með einhverskonar prótótýpu eða uppkast af vöru/vefsíðu/fyrirtæki. Hér fyrir neðan er smá myndband sem sýnir hvernig viðburðurinn gengur fyrir sig út í Bandaríkjunum.

 

 

Startup Weekend – Full from Eighteen Eighty on Vimeo.

 

Nánari upplýsingar um Startup Weekend má finna á vefsíðu þeirra http://startupweekend.org/ En eins og sést á þessu korti eru viðburðirnir sem þeir halda bókstaflega út um allan heim.

 

Þessir viðburðir hafa einnig náð til klakans og eru hér haldnir undir nafninu ANH (Atvinnu- og nýsköpunarhelgar). Þrátt fyrir að viðburðurinn beri mismunandi nafn þá er viðburðurinn sjálfur að stærstum hluta sá sami. Ég hef tvisvar sinnum tekið að mér hlutverk mentors á þessum viðburðum þar sem ég hef verið til staðar til að aðstoða unga frumkvöðla við að reyna láta hugmyndir sínar verða að veruleika. Í þetta sinn þá ákvað ég þó að taka þátt í ferlinum sem þáttakandi og mætti á Akureyri með hugmynd af nýjum vettvangi fyrir núverandi fyrirtæki mitt þ.e.a.s. ég hef verið með bókunarkerfi fyrir sumarbústaði og vildi komast að því hvort það væri hægt að færa þá hugmynd yfir á tjaldsvæði þar sem mér fannst markaðssetning íslenskra tjaldsvæða vera vægast sagt léleg. Árangur helgarinnar var í raun mun meiri en ég átti von á og komst ég að því að það er ótrúlegt hvað hægt er að afkasta á einni helgi ef maður einbeitir sér 100% að einu verkefni og er ekki að láta neitt trufla sig. Í lok helgarinnar var ég kominn upp með fyrsta uppkastið af vefsíðunni www.campalo.is auk þess sem ég setti upp lendingarsíðu fyrir alþjóðlega útgáfu af vefsíðunni www.campalo.com.

Ég mætti þarna og var búinn að búast við því að ég myndi vera einn út í horni að forrita eitthvað en svo endaði ég á því að fá frábært fólk með mér í hóp sem aðstoðaði mig við að þróa hugmyndina áfram. Ég vil því nýta þetta tækifæri til að þakka Darra, Hrafnhildi, Lilju og Njáli kærlega fyrir alla aðstoðina um helgina 🙂

Ég get hiklaust mælt með þessum viðburði fyrir alla þá sem hafa áhuga á að láta reyna fyrir sér í fyrirtækjarekstri. Þetta er alvöru stuðningsumhverfi þar sem þið getið leitað ráðleggingar og fengið spark í rassinn en eins og alltaf þá getið þið ekki búist við að aðrir vinni vinnuna ykkar. Þetta er allt undir því komið að þið séuð tilbúin í að gefa 100% af orku ykkar og tíma í viðskiptahugmyndir ykkar. Upplýsingar um næstu ANH viðburði og frekari upplýsingar má nálgast hér http://www.anh.is/ 0g svo leyfi ég líka að fylgja smá myndbrot frá nokkrum af þeim viðburðum sem hafa verið haldnir hér á landi, þið sjáið meðal annars mig bregða fyrir þarna í mentor hlutverki.

 

 

Innovit- Atvinnu og nýsköpunarhelgi from DIMMS on Vimeo.

 


Alþjóðleg frumkvöðlaráðstefna - Startup Iceland

Íslenska frumkvöðlaumhverfið hefur tekið miklum framförum á undanförnum árum og það hefur aldrei áður verið jafn auðvelt að nálgast upplýsingar og aðstoð við að gera hugmyndir sínar að veruleika. Engu að síður er ennþá langt í land og mikið sem ennþá á eftir að betrumbæta til að íslensk fyrirtæki geti orðið samkeppnishæf á alþjóðlegum markaði. Sem dæmi má nefna að íslensk fyrirtæki eiga oft erfiðara með að finna fjárfesta á fyrstu stigum rekstursins heldur en sambærileg fyrirtæki í erlendum frumkvöðlaumhverfum á borð við San Francisco, New York, London o.f.l. Og þrátt fyrir að Ísland sé góður tilraunamarkaður fyrir mörg fyrirtæki þá takmarkar stærð markaðarins einnig stækkunarmöguleika fyrirtækjanna. Það er því nauðsynlegt að fyrirtæki líti út fyrir landssteina en á sama tíma eru oft takmörkuð tengsl við erlenda markaði og getur reynst erfitt að mynda slík tengsl.

Þessi vandamál ásamt fleirum munu vera tekin fyrir á ráðstefnu sem nú er verið að skipuleggja og mun vera haldin í Maí á þessu ári. Viðburðurinn mun vonandi ná að lyfta umhverfi frumkvöðla- og nýsköpunarfyrirtækja upp á nýtt plan. Þessi ráðstefna leggur fyrir spurninguna “How do you build sustainable entrepreneurial ecosystem?” eða eins og það myndi heita á íslensku “Hvernig byggirðu upp sjálfbært frumkvöðlavistkerfi?”. Fengnir verða þekktir erlendir fjárfestar og frumkvöðlar á heimsmælikvarða til að deila reynslu sinni af því hvernig fyrirtæki geta best náð árangri og hvernig best er að búa til umhverfi sem hlúar að og styður við ung fyrirtæki.

 

 

Nú þegar hefur Brad Feld staðfest komu sína á viðburðinn en fyrir þau ykkar sem ekki þekkið hann þá má nálgast frekari upplýsingar um hann á bloggi hans.

 

 

Þeir sem hafa áhuga á að fylgjast betur með þessu geta skráð sig inn á http://signup.startupiceland.com/.

Ráðstefnan er skipulögð af Bala Kamallakharan fagfjárfesta sem hefur undanfarin ár verið að fjárfesta í íslenskum fyrirtækjum. Bala hefur fulla trú á því að Ísland gæti orðið góð útungunarvél fyrir öflug fyrirtæki og vill með þessari ráðstefnu styrkja við íslenskt frumkvöðlastarf. Frekari upplýsingar um Bala og ráðstefnuna er að finna á bloggsíðu hans StartupIceland.com.

Við munum svo birta frekar upplýsingar um viðburðinn þegar nær dregur.

 

 


WordPress og virði þess fyrir frumkvöðla

Á mínum unga ferli hef ég braskað ýmislegt hvað varðar vefhönnun. Mér tókst á eitthvern ótrúlegan máta að hanna síðu í Microsoft Word hér í denn en færði mig fljótt yfir í Dreamweaver. Frá Dreamweaver fór ég yfir í Notepad og frá Notepad yfir í Komodo Edit. Mig dreymdi um að læra flókin forritunartungumál og skrifa vefkerfi frá grunni. Eftir nokkrar misheppnaðar tilraunir áttaði ég mig á því að ég væri engan veginn maðurinn í slíkt og byrjaði að þróa síður í WordPress kerfinu.

Eins og margir aðrir þá hafði ég litla trú á WordPress í upphafi. Ég kannaðist við WordPress.com síður og fannst þær vera ekkert merkilegri en Blogspot. Sem betur fer hafði ég lesið á eitthverju erlendu bloggi að WordPress væri miklu meira en bloggkerfi. Núna í seinni tíð lít ég á það blogg sem ákveðin vendispunkt sem opnaði fyrir mig endalausan heim af tækifærum.

WordPress er einfaldlega með eitt öflugasta samfélag forritara og hönnuða á netinu og á nokkrum vikum las ég allt sem ég fann um WordPress. Það hefur orðið að kjarnanum af öllu sem ég hef tekið mér fyrir síðustu ár. Ég flutti út til Skotlands, lærði Audio Engineering og opnaði lítið mastering stúdíó miðað á minni útgefendur. Mig tókst að byggja upp trúverðuleika og öflugt orðspor með heimasíðu sem kostaði mig $35 og tók mig 2 daga að innleiða. Ég var í hörkusamkeppni við mikinn fjölda af þraulvönum hljóðmönnum sem að höfðu miklu flottari portfolio en ég. Engu að síður var ég kominn með flottan viðskiptamannahóp á mjög stuttum tíma. Seinna meir komst ég að því hver ástæðan var – síðan mín var að koma ofar upp í vefleit.

Og ég byrjaði að hugsa, hvernig í ósköpunum kemur mín síða upp ofar en hjá þeim sem eru búnir að vera með heimasíðu í mörg ár? Ég fór á Technorati og byrjaði að lesa mig til um “Search Engine Rankings” og grannskoðaði kóðan hjá samkeppnisaðilum. Það sem þeir klikkuðu á var allt tengt Search Engine Optimization (SEO) fyrir síðurnar sínar – ómiðaður title tag, ekkert meta description, enginn notkun á headings eða bold, italics eða underline, ekkert sitemap, enginn alt tags o.s.frv. Ég hafði ekki lagt neina sérstaka áherslu á þessi atriði en samt hafði það komist rétt til skila á minni síðu. Síðan mín var þegar leitarvélabestuð. Samvinnan milli WordPress og þemunnar sem ég hafði keypt bauð hreinilega ekki upp á annað.

Eftir þessa uppgvötun stofnaði ég fyrirtæki sem lagði áherslu á leitarvélabestun og vefsíðugerð. Kjarninn í því fyrirtæki er WordPress kerfið. WordPress er frítt í notkun, með frábært notendaviðmót, endalaust af viðbætum, þemum og auka frameworks, nær fullkomið gagnvart leitarvélum og með mjög öflugt öryggiskerfi. Fyrir frumkvöðla er kerfið ómetanlegt, því þeir geta snúið hugmynd í veruleika á mettíma og á mjög lítinn kostnað. Eins og Valur Þór bendir á þá hafa nú þegar stór hluti íslenskra nýsköpunarfyrirtækja áttað sig á kostum WordPress kerfisins og það er mín von að sú þróun haldi áfram og að WordPress hjálpi íslenskum frumkvöðlum að byggja upp sín fyrirtæki.

 


Gestabloggari:
Ragnar Fjölnisson
Framkvæmdarstjóri Cloud Engineering ehf
http://www.webengineering.is/

 

 

 


The New Rules of PR and Marketing

Ég náði loksins að klára bókina The New Rules of PR and Marketing eftir David Meerman Scott í síðustu viku. Ég er búinn að vera að lesa hana síðan í haust en náði aldrei neitt áfram vegna anna. Þannig ég tók mig til yfir hátíðirnar og kláraði kvikyndið. Þetta er frábær bók fyrir þá sem vilja auglýsa sig á internetinu, sérstaklega ef þeir eru nýir inn á þann markað.

David Meerman Scott hefur áratugareynslu úr markaðsheimum. Hann hefur verið markaðsstjóri í stórum B2B fyrirtækjum, unnið sem verðbréfamiðlari en hefur núna síðustu ár unnið fyrir sér sem rithöfundur og fyrirlesari út um allan heim.

Í bókinni tekst Scott á við það sem hann kallar hefðbundna markaðssetningu og ber hana saman við nýju reglurnar sem gilda. Hann talar um mikilvægi þess að vera sýnilegur á netinu og gera það rétt. Til dæmis bara með því að hafa allar fréttatilkynningar þannig upp settar að leitarvélar eigi auðvelt með að finna þær. Annað einfalt dæmi er að vakta umræðu á samfélagsmiðlum og geta þannig brugðist við neikvæðri umfjöllun.

Hefðbundin markaðssetning er auglýsingagerð fyrir sjónvarp, dagblöð, útvarp og slíka miðla. Á meðan hún er ennþá gríðarlega mikilvæg í markaðsstarfi fyrirtækja þá er netið alltaf að koma meira og meira inn, þetta þarf ekki að segja neinum. Gallinn er bara að þeir sem eru vanir þessum hefðbundnu miðlum reyna oft að heimfæra sömu reglur yfir á internetið. Það á því miður ekki við, þar sem eðli miðilsins er bara allt annað. Þannig eru bestu markaðsherferðirnar þær sem samnýta nýmiðla og samfélagsmiðla.

Hér eru nokkur dæmi um netmarkaðssetningu upp úr bókinni sem fyrirtæki og markaðsfólk ættu að íhuga betur:

Blogg

Blogg er alltaf að verða vinsælla meðal fyrirtækja. Þar er hægt að segja frá því sem er að gerast í fyrirtækinu, útskýra vöru, auglýsa, eða segja frá. Þó verð ég að segja að mér finnst skrítið hversu lítið er um íslenskar fyrirtækjabloggsíður. Það eru helst fjarskiptafyrirtækin og sprotafyrirtæki sem eru að blogga. Ég væri til dæmis til í að sjá bílablogg frá Heklu, bjórblogg frá Ölgerðinni, eða orkublogg frá Landsvirkjun. Þá finnst mér fáránlegt hversu fáar auglýsingastofur eru að blogga. Eftir því sem ég veit er Jónson & Le’macks eina stofan.

Blogg er frábær miðill til að vinna traffík inn á síðuna hjá þér, enda ertu að vinna þér inn prik hjá Google með því að uppfæra síðuna stöðugt, og kemur þannig ofar í leitarvélaniðurstöðum. Eins er blogg mjög þægileg leið til að sýna hvað er að gerast í fyrirtækinu. Þá nota ég blogg í minni vinnu til að segja sögu af vörum sem eru nýjar. Textinn sem ég skrifa þá er kannski aðeins of langur til að komast inn á sölusíður en bloggið er einmitt frábær vettvangur til að koma með leiðbeiningar og útskýringar.

Heimasíður

Heimasíðan þín á ekki að snúast um flottheit. Það er öllum sama um hvernig heimasíðan þín lítur út ef það er erfitt að finna upplýsingar á henni. Síðan á að vera byggð fyrir um viðskiptavini þína og með það í huga að leiða þá í gegn um kaupferlið. Þetta leiðir til þess að þeir verða ánægðari fyrir vikið þar sem síðan er auðveld í notkun og upplýsingarnar sem þeir leita að eru á reiðum höndum. Þú verður ánægðari því þetta skilar þér meiri tekjum í gegn um vefinn þinn.

PR eða almannatengsl

Það er alltaf frábært að minnst á nafn fyrirtækis síns á Mbl.is, nú eða í sjónvarpsfréttunum. Það höfðar vel til hégómagirndarinnar og manni finnst maður hafa fengið góða auglýsingu. En hverjir eru að hlusta? Scott færir rök fyrir því að oft er betra að fyrirtæki þitt eða vörumerki að vera í góðu sambandi við bloggara á sínum markaði heldur en að vera getið í fréttunum. Af hverju? Nú vegna þess að ef hátt virtir bloggarar á þínum markaði eru að tala um hvað þú ert að gera góða hluti, þá er virkilega hlustað á það, af fólkinu sem þú virkilega vilt ná til. Þannig er mikilvægt að eiga í allavega jafn góðu sambandi við óháða vefpenna og hæst virta blaðamenn.
————————————————————————————————————

The New Rules of PR and Marketing hefur selst í milljónum eintaka út um allan heim, allt án þess að höfundurinn hafi eitt krónu í venjulega markaðssetningu. Daginn sem hún var tilbúin sendi hann eintak á 300 þekkta bloggara og bað þá um að lesa hana og gefa sér athugasemdir. Seth Godin tók hana og lofaði á blogginu sínu, þá fór boltinn að rúlla.

Bókin er umdeild, en hún er að fá allt frá 5 stjörnum niður í 1. Mörgum finnst hún þunn og bæta litlu við í markaðsflóruna. Ég er því ósammála. Ég var búinn að lesa mér mikið til um markaðssetningu á netinu og samfélagsmiðla þegar ég byrjaði á bókinni en mér fannst hún engu að síður bæta miklu við. Höfundurinn er með bloggsíðunawww.davidmeermanscott.com og er virkur á Twitter undir nafninu @dmscott. Ef þú vilt kynnast bókinni betur mæli ég með þessari e-book, en hún er einskonar útdráttur á PDF formi. Þú getur sótt hana hér.

Ég mæli með þessari bók fyrir alla sem eru að feta sig áfram í markaðssetningu á netinu. Hún hentar sérstaklega vel fyrir fólk í eigin rekstri sem hefur ekki endilega efni á því að nýta sér hefðbundnu miðlana. Hún er full af dæmisögum, allt frá kosningabaráttu Barack Obama niður í indý hjólreiðabúðir. Kauptu nýjustu útgáfuna, t.d. frá Amazon, þar sem internetið hefur breyst mikið frá því sú fyrsta kom út árið 2007. Lestu þessa og sjáðu hvað þú getur gert á netinu.

 

 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 


TEDx Iceland

Datt í huga að deila með ykkur nokkrum af TEDx fyrirlestrunum sem voru haldnir í Hörpunni í lok síðasta árs. En alla fyrirlestrana má svo nálgast hér http://tedxtalks.ted.com/browse/talks-by-country/iceland.

 


Losing my Virginity

Um leið og þú lest titil þessarar færslu þá veit ég að þú ert að leita eftir einhverjum djúsí endurminningum frá mér. Ég ætla að byrja á því að valda þér vonbrigðum: þetta er bókaumfjöllun. Í gegn um tíðina hef ég aldrei verið mikið fyrir endurminningar og ævisögur. Hins vegar er ég þeirrar skoðunar að maður geti lært af því hvernig aðrir hafa hagað hlutunum hjá sér, tala nú ekki um ef viðkomandi er milljarðamæringur!

Sir Richard Branson er svalasti milljarðamæringur í heimi. Hann er fæddur í Bretlandi árið 1950 og þrátt fyrir að vera lesblindur og hafa aldrei farið í háskóla er hann í dag í 254. sæti yfir ríkustu mönnum heims. Richard Branson er mikið átrúnaðargoð hjá mér, ekki af því hann er ríkur – heldur hvernig hann hefur orðið ríkur. Ekki nóg með að maðurinn eigi eyju í Karabíska hafinu, hafi flogið í loftbelg yfir Atlantshafið og hafi bjargað gíslum úr Íraksstríðinu, heldur er hann núna að fara að selja ferðir út í geim og niður í dýpstu höf. Hann á Virgin veldið en allir ættu að þekkja Virgin Atlantic flugfélagið, Virgin Music útgáfuna, Virgin Mobile farsímafélagið og svo lengi mætti telja. Ég held að Richard Branson sé efni í nokkrar færslur þannig ég mæli með að þið lesið ykkur til um hann og hvað hann er að gera á Wikipedia. Ég ætla að einblína á ævisöguna hans sem ég var að klára.

Ég keypti ævisögu Bransons á Audible og hlustaði á hana í einum rikk í vikunni. Bókin kemur út árið 1998 og er því orðin nokkuð gömul. Richard Branson skrifar hana sjálfur og les sjálfur inn á hljóðbókina sem er mjög skemmtilegt. Ég reikna með að hún sé tekin upp heima hjá honum á Necker Island en stundum má heyra fuglasöng inn á milli. Mjög heimilislegt allt saman.

Eins og áður sagði var Richard Bransson fæddur í Bretlandi árið 1950. Hann sér illa og er lesblindur en samt var hann farinn að gefa út tímaritið Student í kring um 18 ára aldurinn. Í gegn um Student datt hann inn í að selja plötur í gegn um póstlista. Þegar póstburðarmenn í Bretlandi fóru í verkfall stefndi póstlistaþjónustan í gjaldþrot. Til að bjarga litla fyrirtækinu sínu fann hann, ásamt félögum sínum, autt rými í London og setti upp búð á fimm dögum og var þar með kominn í verslunarrekstur. Veldið byggðist hægt og bítandi upp eftir því sem þeir opnuðu fleiri búðir og færðu sig svo yfir í útgáfubransann. Mike Oldfield var fyrsti alvöru tónlistarmaðurinn sem skrifaði undir hjá Virgin en eftir því sem leið á bættust við í hópinn listamenn eins og Sex Pistols, Human League, Boy George og Janet Jackson til að nefna nokkra.

Richard Branson hefur alltaf haft gaman af því að ögra sjálfum sér og öðrum. Ef þú kemur með nógu klikkaða hugmynd til hans, er hann örugglega til í að taka þátt í henni. Þannig datt hann inn í flugfélagsbransann, þrátt fyrir að hafa ekki neina reynslu af slíkum rekstri og Virgin Atlantic varð til. Í dag er Virgin Atlantic eitt þekktasta nafnið í fluggeiranum og flýgur út um allan heim.

Auk þess að segja frá viðskiptasigrum sínum hleypir Branson lesendum (og hlustendum) inn í líf sitt utan peninganna. Hann segir frá hjónabandi sínu, barneignum, hvernig honum líður eða leið og hvað hann var að hugsa á hverjum tíma. Það er mjög gaman að heyra hann segja frá Joan, konunni sinni, sem hann elskar greinilega heitt, og börnunum sínum Holly og Sam. Einnig segir hann frá því hversu nærri sér hann tekur að sjá fólk í neyð, en í fyrra Íraksstríðinu lét hann fljúga Boeing 747 vél til Bagdad til að frelsa gísla stuttu áður en borgin var lögð í rúst af flugherjum vesturveldanna. Hann segir einnig á lifandi hátt frá því þegar hann flýgur í loftbelg yfir Atlantshafið og eins þegar hann reynir að setja heimsmet í því að sigla yfir sama haf. Eins fer hann yfir hápunkta og lágpunkta á sínum ferli og það er virkilega gaman að hlusta á hann tala.

 

En hvernig var bókin?

Ég gaf bókinni 5 stjörnur af 5 mögulegum. Kannski er ég ekki hlutlaus enda var maðurinn í miklu uppáhaldi hjá mér áður en ég keypti hana. Engu að síður er hún skemmtilega skrifuð, full af kímni og einlægni. Richard Branson hefur gífurlegan húmor fyrir sjálfum sér og greinilega elskað hverja mínútu af því sem hann hefur gert, og það skín vel í gegn.

Ef það er eitthvað sem hægt er að setja út á er það að hann eyðir stórum hluta bókarinnar í að fara í rimmuna sem hann háði við British Airways í byrjun 10. áratugarins, sem á endanum var útkljáð í réttarsal. Hann fer yfir þann slag af kostgæfni og endursegir samtöl orð fyrir orð. Ég held samt að ástæðan fyrir því að hann geri það er bara til að sýna fram á hvað þolinmæði, kjarkur og baráttuvilji skilar miklu í lok dags.

Ég mæli með því fyrir alla sem hafa áhuga á viðskiptum að annað hvort lesa eða hlusta á Losing my Virginity. Einnig ætti hún að veita þeim innblástur sem hafa annað hvort áhuga á að stofna fyrirtæki eða eru með hugmynd sem virðist klikkun en langar að láta hana verða að veruleika. Hana má fá á Audible eða Amazon. Einnig er rétt að minna á nýja bók eftir Branson sem heitir Screw Business As Usual en hún kom út í haust. Að lokum er vert að minnast á bloggið hans Richards sem ég les mjög oft. Meistarinn er líka á Twitter og það er hægt að elta hann: @richardbranson.

Hér er viðtal við hann á TED 2007:

 

 

 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 

 


Afhverju ertu ekki með póstlista?

Ég er mikil aðdáandi póstlista, þetta er ótrúlega öflugt markaðstæki sem alltof fá fyrirtæki virðast nýta sér. Þess vegna langaði mér að fara aðeins yfir hvað póstlistar eru og hvernig þið getið nýtt þá til að bæði markaðssetja fyrirtæki ykkar og styrkja samband ykkar við núverandi viðskiptavini. Efni greinarinnar varð aðeins meira heldur en hentar í eina færslu og því ákvað ég að skipta þessu upp í 3 færslur sem munu dreifast yfir á næstu daga.

Þessi grein varð til út frá rannsóknarvinnu sem ég var að vinna fyrir póstlista Búngaló en ég mun einnig taka dæmi um reynslu mína af þeim póstlista til að fá meiri raunveruleikablæ yfir þessar færslur. Í þessari grein mun ég einungis vera fjalla um ræfræna póstlista eða netfangalista, það er að sjálfsögðu einnig hægt að vera með póstlista sem er prentaður og sendur út en ég hef lítið notað slíkt og ætla ekki að flækja þessa grein með slíku.

 

Hvað er póstlisti?

Póstlisti er í sinni einföldustu mynd samansafn netfanga, eigandi póstlistans getur svo sent út tölvupóst á eigendur þessara netfanga til að fræða þá um nýjungar, breytingar, fréttir og tilboð. Það góða við póstlista er að þeir eru mjög einfaldir og fljótlegir í notkun, hægt er að skrifa bréf og með einum smelli fá allir á listanum skilaboðin nær samstundis. Það kostar einnig ekkert að senda út á listann, einhver smá kostnaður getur reyndar fylgt ef notast er við sérhæfð póstlistaforrit á netinu en þá yfirleitt einungis þegar komið er upp í fleiri þúsundir skráðra netfanga.

 

Henta póslistar þér og þínu fyrirtæki?

Þú ættir ekki að þurfa velta þessari spurningu mikið fyir þér enda eru 99% líkur á að svarið við henni sé “JÁ!”. Póstlistar krefjast lágmarksvinnu og eftir upphaflega uppsetningu þarf einungis nokkrar mínútur fyrir hvern fréttapóst sem þú sendir út. Það kostar ekkert að senda út póstinn og því verður þetta líklega ódýrasta markaðssetningin hjá fyrirtækinu. Þetta er líka gott tækifæri til að byggja upp samskipti við fyrrum viðskiptavini og hugsanlega verðandi viðskiptavini. Það er því engin vafi á því að sama hvað þú ert að gera þá gætir þú nýtt þér póstlista.

 

Skráningar á póstlistann

Skráningar á póstlista geta farið fram með ýmsum mismunandi leiðum. Hvaða leið þið veljið til að fá inn skráningar hefur áhrif á hvernig lesendurnir skynja ykkur og hversu virkir þeir verða á póstlistanum.

  • Í eigin persónu: Ef þið eruð að kynna vörur/fyrirtæki ykkar á einhverjum viðburðum getið þið verið með línustrikað blað og boðið fólk að skrá sig á póstlistann til að fylgjast með nýjustu uppfærslum, fréttum og tilboðum.
  • Skráningarform: Á vefsíðunni ykkar getið þið verið með lítinn hnapp sem býður fólki að skrá sig á póstlistann ykkar. Sem dæmi um slíkt getið þið prufað að smalla á hnappinn hérna hægra megin á vefsíðunni sem segir “Skráðu þig á póstlista Frumkvöðlars.is”.
  • Notendur: Ef þið eruð með vefsíðu sem er með skráða notendur þá skráist fólk sjálfkrafa inn á póstlistann á sama tíma og þau skrá sig sem notendur. Þetta er góð leið til að hafa samskipti við notendurnar og koma til skila mikilvægum uppfærslum og breytingum á vörunni/þjónustunni.
  • Viðskiptavinir: Þegar einstaklingur kaupir eitthvað hjá þér annað hvort skráist hann sjálfkrafa eða býðst honum að skrá sig á póstlista fyrirtækisins.
  • Leikir: Hægt er að vera með leiki í gangi þar sem eina sem þarf að gera er að skrá netfang sitt og maður gæti unnið einhver glæsileg verðlaun. Þetta er mjög hraðskreið leið til að byggja upp póstlista.

Fjöldi skráðra aðila á póstlistanum er ekki það eina sem skiptir máli heldur hversu líklegir þeir eru til að nýta sér það sem þú ert að senda þeim. Aðilar sem handskrifuðu netföng sín niður eftir að hafa verið búnir að spjalla við þig í 10 mínútur á einhverjum viðburði eru miklu líklegri til að hugsa hlýlega til fréttapóstsins sem það fær frá þér heldur en aðili sem skráði sig bara til að vinna ókeypis iPhone og veit jafnvel ekkert um fyrirtæki þitt. En almennt séð má miða við að notendur sem skrá sig sjálfir af fyrra bragði séu betri lesendur þar sem þetta er meðvituð ákvörðun og þannig hafa þeir sýnt að þeir hafa í alvöru áhuga á þér, vöru þinni eða fyrirtæki.

 

Í næstu færslu mun ég fjalla um póstlistaforrit og þá sérstaklega það póstlistaforrit sem ég nota mest Mailchimp.com. –>

 

 

 


Seth Godin, Tribes

Audible fyrir Android

Ég hef aldrei hlustað á hljóðbækur. Í vor skráði ég mig samt með aðgang á Audible.com og ætlaði svo aldeilis að fara að hlusta. Nýir meðlimir fá að sækja eina bók sér að kostnaðarlausu og ég rakst á bókina Tribes: We need you to lead us eftir Seth Godin. Svo varð að sjálfsögðu ekkert af allri hlustuninni fyrr en ég fór út að hlaupa um helgina. Þá sótti ég Audible forritið í símann minn og gróf bókina upp úr einhverri möppunni.. Það er furðu þægilegt að hlusta á hljóðbækur, sérstaklega þegar maður er að hlaupa. Maður er aðallega að láta hugann líða þegar maður hleypur og þannig er mjög gott að demba í sig smá fróðleik í leiðinni.

Senor Godin

Seth Godin er nokkuð merkilegur maður. Hann er bandarískur frumkvöðull og rithöfundur. Hann ferðast um allan heim og heldur fyrirlestra auk þess sem hann heldur úti bloggsíðu. Hann setur inn færslu á hverjum einasta degi og hefur gert í yfir 10 ár sem hefur gert hann að einum vinsælasta bloggara í heimi. Hann talar aðallega um markaðsmál og vörumerki, en hann hefur líka farið inn á tengd málefni eins og stjórnun, leiðtogahæfni og sjálfshvatningu. Bækurnar hans hafa selst í milljónum eintaka, þær helstu heita Purple Cow, All marketers are liars og Permission marketing, auk Tribes að sjálfsögðu.

Tribes er bók um leiðtogahæfni. Í henni talar Seth um muninn á því að leiða (e. leading) og stjórna (e. managing). Rauði þráðurinn í bókinni er sá að fólk flykkir sér á bakvið leiðtoga og myndar þannig fylkingar (e. tribes). Leiðtogi segir pattstöðu stríð á hendur. Hann reynir að hafa áhrif á fólk og hrífur það með sér. Ef þú ert leiður á ástandinu sem þú ert í áttu að standa upp og gera breytingar. Ekki láta teyma þig í hjörð heldur taktu af skarið og myndaðu þína eigin fylkingu. Með tilkomu internetsins varð svo miklu miklu auðveldara að mynda fylkingar. Allt í einu voru til blogg þar sem hver var orðinn sinn eigin sérfræðingur því allir hafa rödd á netinu. Miðlar eins og Facebook og Twitter hafa auðveldað fylkingamyndun enn meira.

Bókin er ágæt. Hún er uppfull af dæmisögum og hún veitir sannarlega innblástur. Margt sem hann segir á fullkomlega rétt á sér, sérstaklega þegar kemur að því að segja stöðnun stríð á hendur og gera eitthvað. Ef ég á að setja út á eitthvað þá er hún með full mörgum dæmisögum. Seth kemur efninu frá sér fullkomlega í fyrstu köflunum og virðist vera að reyna að teygja lopann með því að bæta enn fleiri dæmisögum, sem er merkilegt miðað við að bókin er ekki nema 160 bls, eða tæpir 4 tímar sem hljóðbók. Ég myndi gefa 3 stjörnur af 5.

Við tilheyrum öll einhverjum fylkingum. Obama myndaði fylkingu sem skilaði honum forsetastóli. Steve Jobs myndaði fylkingu af fólki sem trúði á hann og hann gerði Apple að verðmætasta fyrirtæki í heimi. Þeir sem ganga nú til kosninga í Sjálfstæðisflokknum á næstu viku munu annað hvort fylkja sér á bakvið Hönnu Birnu eða Bjarna Ben, þau eru leiðtogar hvor í sínu horni með fylkingar á bakvið sig. Jón Gnarr var orðinn þreyttur á stöðnuninni í íslenskri pólitík þannig hann stofnaði Besta Flokkinn. Þá sögu þekkja allir. Ég tel ykkur lesendur góðir sem meðlimi í minni fylkingu.

Hér fyrir neðan er Seth Godin að tala á Ted fyrirlestri til að fylgja bókinni sinni eftir. Ef þið hafið skoðanir á honum, ekki hika við að skilja eftir athugasemdir.

 

 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 

 


14 frábær ráð gegn stressi frá 18 ógeðslega klárum vinum mínum og sjálfri mér

 

 

Eftir að hafa í fyrsta skipti í fjölda ára fundið fyrir líkamlegum streitu- og kvíðaeinkennum ákvað ég að nýta mér „crowd-sourcing“ og óska eftir ráðum og remedíum sem vinna á þessu via Facebook.

Viðbrögðin létu ekki á sér standa og hér er afraksturinn; 14 frábær ráð frá vinum.

1.       Hugleiða í að minnsta kosti 20 mínútur á dag. Hér var mælt sérstaklega með Mindfulness og þessari síðu: http://www.meditationoasis.com/

2.       Fá góðan svefn/hvíld. Fara snemma að sofa og vakna alltaf á sama tíma á morgnana.

3.       Fá sér eitt glas af viskí/rauðvíni/bjór að kvöldi erfiðs dags í vinnunni. Ekki meira en eitt glas og ekki á hverju kvöldi.

4.       Taka kvöld- og helgarfrí! Skipuleggja tímann þannig að ekki sé unnið um helgar (of oft) og ekki hugsa um fyrirtækið eftir klukkan 21.

5.       Finna sér áhugamál.

6.       Verða Íslandsmeistari í einhverju aftur og aftur (tengist nr. 5).

7.       Slaka á. Fara í fótabað, fá sér te, kveikja á kertum, lesa góða bók, fara í heitt bað. Þið vitið…rólegheit og andleg hreinsun. Sem sagt ekki fara á djammið.

8.       Taka Magnesíum og Omega 3. Ég hef upp á síðkastið tekið blómadropa sem heita Stress Relief Daytime (Valerian Hops oral drops) frá A. Vogel og finnst þeir virka ágætlega. Kannski er þetta bara andlegt, en ég ætla að leyfa mér að trúa að þeir virki.

9.       Útivera og hreyfing.

10.   Horfa á sjálfa/n sig í speglu og endurtaka: “OK, í fyrsta lagi þá er nákvæmlega engin ástæða til að stressa sig á þessu. Þú ert osom og það er bara þannig. Fuck ’em ef þeir fatta það ekki strax.” (Tóti Stefáns)

11.   Prjóna og/eða baka köku. Sennilega ekki bæði í einu því það er líklegt til að hafa stressandi áhrif.

12.   Komast að því hvað veldur stressinu. Finna svo út verstu mögulegu útkomuna úr þessum kringumstæðum. Sætta þig við hana með einhverskonar rökleiðslu, t.d. “Ég hef þó alltaf heilsuna”, “I’ll always bounce back” o.s.frv. Eftir það verða allar útkomur bónus.

13.   Stunda kynlíf (http://eyjan.is/2010/12/10/kynlif-er-heilsusamlegt-10-heilsubaetandi-ahrif-kynlifs/)

14.   Síðast en ekki síst (og það sem heldur mér á lífi) hlusta á góða tónlist!

Ef í óefni er komið og streitan hverfur ekki er aðeins eitt að gera. Fara í 5 daga frí (út á land eða erlendis). Þá meina ég fara á mánudegi og koma heim á föstudegi. Ekki hugsa um vinnuna, setja talhólfið á símann og out of office reply á tölvupóstinn. Ef þú ert með sprotafyrirtæki verður rétti tíminn til að taka frí líklega eftir 5-7 ár og ef þú ert streituhrúga er ólíklegt að þú lifir svo lengi. Lífið er ekki vinnan og vinnan er ekki lífið! 5 dagar án þess að einhver fái svar við tölvupósti drepa engan. Talandi af eigin reynslu get ég sagt að þið komið tvíefld til baka og tilbúin til að takast á við hvaða verkefni sem er.

Hér er smá hvatning:
http://www.youtube.com/watch?v=r3M04ca0RdY

 

 

 

Gestabloggari:
Þórunn Jónsdóttir
Co-Founder / COO hjá FAFU

 

 


Hluthafasamkomulag er vatn viðskiptasambandsins

Það eru engar ýkjur þegar ég segi að hluthafasamkomulag (skriflegur samningur milli hluthafa fyrirtækis) er frumkvöðlum jafn mikilvægt og vatn er líkamanum.

Ég veit vel hvernig tilfinning það er að vera að fara að stofna fyrirtæki, hugsanlega með besta vini sínum eða vinkonu og líða eins og maður sé á leið í brúðkaupsferð. Lífið er yndislegt. Það er eins með hluthafasambönd eins og ástarsambönd, þau geta farið út um þúfur og endað með látum. Til að fyrirbyggja, eða í versta falli draga úr, dramanu er nauðsynlegt að vera með ítarlegt hluthafasamkomulag sem tekur á þeim aðstæðum sem upp geta komið við ágreining hluthafa.

Segjum sem svo að tveir hluthafar séu í fyrirtækinu X ehf. og upp komi ágreiningur á milli þeirra sem ekki er hægt að leysa á farsælan hátt. Ljóst er að annar hluthafinn þarf að víkja, selja þarf fyrirtækið eða hreinlega leysa það upp. Ef skriflegt hluthafasamkomulag er fyrir hendi er tiltölulega auðveldara að leysa þetta mál þar sem fyrir liggur hvernig skuli takast á við aðstæður sem þessar. Þetta segi ég með þeim fyrirvara að það er sjaldnast eða aldrei auðvelt þegar einn eða fleiri hluthafar hætta í frumkvöðlafyrirtækjum. Ég get sagt, byggt á eigin reynslu, að það er næstum því eins erfitt að takast á við dramatísk hluthafamál eins og það er að skilja við maka. Hér eru oftast bæði peningar og tilfinningar í spilinu og eins og flestir vita getur það verið eldfim samsetning. Allavega, ef ekkert hluthafasamkomulag er fyrir hendi þarf að setjast niður og reyna að komast að samkomulagi. Ef annar aðilinn, eða báðir, eru reiðir er mjög erfitt að komast að niðurstöðu. Neikvæðar tilfinningar flækjast oft fyrir og geta jafnvel gert skynsamt fólk mjög óskynsamt. Þar fyrir utan krefst það mikillar orku að vinna þessi mál og það jafnvel þegar gott og ítarlegt hluthafasamkomulag er fyrir hendi, hvað þá þegar þarf að byrja frá grunni.

Ég hef heyrt frumkvöðla segja að þeir séu alveg á leiðinni að fara að setjast niður og gera hluthafasamkomulag, en hafi bara ekki fundið tíma til þess. Það er eins og að segja að maður sé alltaf á leiðinni að byggja grunninn að húsinu sínu, en hafi bara ekki tíma til þess og fari því bara beint í að byggja húsið. Svo kemur jarðskjálfti og fólk skilur ekkert í því að húsið hrynji með látum.

Mitt ráð til ykkar er því þetta: Þegar tekin hefur verið ákvörðun um að stofna fyrirtæki, gerið þá hluthafasamkomulag áður en þið skilið stofnpappírunum til fyrirtækjaskrár.

 

 

Gestabloggari:
Þórunn Jónsdóttir
Co-Founder / COO hjá FAFU

 

 

.


Góð ráð gegn frumkvöðlaþreytu

Það kann að hljóma mjög sexy að vera í eigin rekstri og fólk tengir það oft við frelsi og sveigjanlega vinnutíma. “Það hlýtur nú að vera gott að vera eigin yfirmaður og þurfa þá ekki að eiga samskipti við einhvern leiðinlegan yfirmann sem er alltaf að skipa manni fyrir? Það hlýtur nú að vera gott að geta bara unnið þegar manni hentar? og að geta tekið frí þegar manni dettur það til hugar?”

Nei, því miður er raunveruleikin langt frá þessum hugmyndum okkar um eigin rekstur. Það fylgir því mikil ábyrgð að reka fyrirtæki og jú í sumum tilfellum getur maður verið með aðeins sveigjanlegri vinnutíma en á sama tíma er vinnutíminn yfirleitt töluvert lengri en í hefðbundinni vinnu. Við þetta bætist svo óhemju mikil ábyrgð og stress, þar sem þú sem atvinnurekandinn berð ábyrgð á öllu því sem gerist í fyrirtækinu. Á einhverjum tímapunkti í næstum öllum fyrirtækjarekstri lendir frumkvöðulinn í því sem kallast frumkvöðlaþreyta.

Frumkvöðlaþreyta er það tímabil þegar frumkvöðulinn er bókstaflega búinn með allan eldmóðin sem fór í það að koma fyrirtækinu af stað. Allt í einu er allur hassarinn sem var í upphafi búinn og við tekur samskipti við viðskiptavini, bókhald, reikningagerð, fjármálaáætlanir og allt það sem frumkvöðulinum leiðist. Frumkvöðulinn blómstrar í sköpun, hassar, fjöri, vinnutörnum og hugarflugsfundum, en þegar fyrirtækið er komið á þann stað að starf hans verði hversdagslegt með litlum breytingum þá leggst yfir hann þreyta og eldmóðurinn hverfur.

Þetta er ástand sem flestir frumkvöðlar sem hafa verið í rekstri í nokkur ár kannast vel við og það getur verið mjög erfitt að komast aftur af stað eftir að hafa lent í frumkvöðlaþreytu.

Ég þekki frumkvöðlaþreytuna vel af eigin reynslu og ég ætla hér að reyna deila með ykkur nokkrum góðum ráðum sem hafa virkað fyrir mig í gegnum tíðina. Það væri einnig mjög gaman ef þið mynduð á móti deila með mér ykkar ráðum þegar þið lendið á þessu tímabili.

 

1. Taka frá tíma í eitthvað skemmtilegt.
Takið alltaf frá fyrirfram ákveðin hluta af deginum eða vikunni og nýtið þann tíma í eitthvað sem þið hafið gaman af. Þessi tími gæti verið nýttur í vöruþróun, forritun, hönnun, áætlanagerð eða bara hvaða verkefni sem veitir ykkur ánægju af að vinna í. Passið sérstaklega að loka fyrir allar aðrar truflanir á þessum tíma, slökkvið á símanum, lokið tölvupóstinum og forðist að umgangast truflandi fólki. Þessi klukkutími á dag eða einn dagur í viku gæti gert gæfumuninn og tryggt að þið hafið áfram gaman af því sem þið eruð að gera. Það leiðir einnig til þess að þið verðið orkumeiri restina af vikunni og getið haft meiri orku í að áorka önnur verkefni.

 

2. Losna við útrás.
Það er nauðsynlegt að losna við útrás með einhverjum hætti. Sérstaklega þegar maður er lokaður inn á skrifstofu allan daginn og þarf í sumum tilfellum að takast á við krefjandi og erfiða viðskiptavini. Ég mæli sérstaklega með að fólk fari í ræktina eða stunda einhverjar íþróttir og þá helst ekki sjaldnar en 3 sinnum í viku. Einnig eru til óhefðbundnari leiðir til að losna við útrás eins og við sáum í kvikmyndinni “office space”, þar sem þeir fengu útras fyrir reiði sinni á prentaranum. Mikilvægast er að þið finnið þá leið sem hentar ykkur best.

 

3. Vertu í fríi þegar þú ert í fríi.
Frumkvöðlar eru oft ekki alveg nógu duglegir við að taka sér frí og þegar þeir loksins taka sér frí þá taka þeir yfirleitt vinnuna með sér í fríið. Þetta geta verið eilíf símtöl í fríinu, svarandi tölvupóstum á kvöldin eða eitthvað annað vinnutengt. Ef þú ætlar að taka þér frí, taktu þér þá frí og ekki eyða því í að vinna og hugsa um vinnu, slappaðu af og njótu þess að vera í fríi.

 

4. Gerðu vinnuna skemmtilega.
Það er oft hægt að búa til leik úr vinnunni og gera hana þannig mun skemmtilegri. Breytu einföldum verkefnum í keppnir þar sem þú setur þér árangursmarkmið og ef þú nærð þeim innan ákveðina tímamarka færðu einhverskonar verðlaun. Dæmu um slíkt gæti t.d. verið “Ef ég næ að ljúka við að forrita vefsíðuna fyrir næsta sunnudag fæ ég heilan dag í frí” eða “Ef ég næ að selja 10 vörur fyrir næsta föstudag kíkji ég út á Argentínu steikhús”. Lykillinn að því að slíkt gangi er að vera agaður, með skýr markmið, skýr verðlaun og passa að standa alltaf við það sem maður lofar. Ég hef einnig gert það að vana mínum að fagna alltaf öllum góðum áföngum innan fyrirtækisins með einhverjum hætti, t.d. ef við fáum mjög góðar fréttir eða stórt verkefni klárast þá fæ ég mér stóran vindill og vískí dreitil til að fagna.

 

.


TED fyrirlestrar

Einhver besta uppspretta áhugaverðra fyrirlestra á netinu er TED (www.ted.com). TED er viðburður þar sem margir af mestu hugsuðum okkar tíma koma saman til að deila hugmyndum sínum. Einn af uppáhalds fyrirlestrum mínum á TED er fyrirlestur Ken Robinson um hvernig skólar drepa niður sköpunargáfur nemenda sinna.

Á hverju ári eru haldnir ótal margir sjálfstæðir TED viðburðir sem kallast TEDx og slíkur viðburður var haldin hér á landi 2009 en ég var því miður erlendis á þessum tíma og missti af viðburðinum. Ég var þó að finna nokkrar fyrirlestranna frá þeim viðburði á netinu og vildi deila þeim hérna með ykkur. Hér fyrir neðan eru tveir góðir TEDx fyrirlestrar en restina af Reykjavik TEDx fyrirlestrunum má finna hér http://tedxtalks.ted.com/search/?search=reykjavik

Jónas Antonsson, stofnandi Gogogic tölvuleikjafyrirtækisins. Hann er einn ef uppáhalds fyrirlesurum mínum hér á Íslandi þar sem hann fer oft yfir í mjög skemmtilegar heimspekilegar pælingar um tilvilst okkar.

Torfi G. Yngvason hjá Arctic Adventures, hann hélt einmitt fyrirlestur á viðburðinn sem ég skipulagði fyrr á þessu ári og hét Reynslusögur Íslenskra Frumkvöðla. Hann er með virkilega góða yfirsýn yfir íslenska ferðaiðnaðinn og kemur þeim upplýsingum skemmtilega frá sér.


Innovit, ráðgjöf og stuðningur

Ég heimsótti hann Kristján Freyr Kristjánsson framkvæmdastjóra Innovit og ræddi aðeins við hann um hlutverk Innovit og hvernig ungir frumkvöðlar geta leitað til þeirra til að auðvelda sín fyrstu skref. Við tókum upp viðtalið og þið getið spilað það hér fyrir ofan en hérna fyrir neðan læt ég fylgja smá samantekt um Innovit og þá viðburði sem þeir eru með í gangi.

 

Innovit

Innovit veitir ungum frumkvöðlum og sprotafyrirtækjum ýmiskonar ráðgjöfa og aðstoða. Ef þig vantar aðstoð við þína viðskiptahugmynd og langar til að sjá hvort Innovit geti hjálpað sendirðu einfaldlega tölvupóst á innovit@innovit.is.

 

Gulleggið

Á hverju ári er haldin frumkvöðlakeppni þar sem ungum frumkvöðlum gefst tækifæri til að vinna að hugmyndum sínum og koma þeim nær því að verða að veruleika. Keppnin heitir Gulleggið og er haldin af Innovit, nýsköpunar- og frumkvöðlasetri. Keppnin var haldin í fyrsta skipti 2008 og hefur færið stækkandi ár frá ári og í dag orðin einn af öflugustu upphafsstöðum fyrir unga frumkvöðla.

Sjá eldri grein okkar um Gulleggið hér.

 

 


Raunverulegt dæmi um Facebook markaðssetningu

Þið hafið líklega öll heyrt talað um hvað það sé sniðugt að nota Facebook til að markaðssetja vöru en hvað felst nákvæmlega í því að nota Facebook til að markaðssetja vöru? Er nóg bara að stofna síðu fyrir vöruna og bíða svo eftir að allir komi og líki hana? eða kannski bara að bjóða eitthvað gefins þá koma allir? Nei, ég er nú hræddur um að það sé nú ekki alveg svo einfalt.

Ég hef aðstoðað nokkur fyrirtæki við markaðssetningu á Facebook og einnig notast mikið við slíka markaðssetningu sjálfur. Sem dæmi þá notaðist ég nær eingöngu við Facebook markaðssetningu og leitarvélabestun þegar ég fór af stað með Búngaló og það kom mjög vel út.

Ég hef nú verið beðin um að astoða við Facebook markaðssetningu fyrir vöru sem ber heitið Eldhemja. Þetta er nokkuð krefjandi verk þar sem þetta er bara ein vara sem á að markaðssetja og þetta er frekar óspennandi iðnaður. Kosturinn aftur á móti með vöruna er sú að þetta er nýtt á markaðnum og nokkuð skemmtileg lausn miðað við annað sem er í boði. Hluti af ástæðunni fyrir því að ég ákvað að taka þetta að mér var sú að ég áleit þetta vera skemmtilega áskorun og ef hægt væri að skapa líf í kringum þetta þá væri hægt að gera það með flestar vörur.

Staðan á verkefninu í dag:

  • Búið að stofna FB síðu
  • Búið að búa til username (http://facebook.com/eldhemja)
  • Komnir 253 skráðir vinir á FB síðunni.
  • Það er engin vefsíða til fyrir vöruna, en eigendur eiga lénið www.eldhemja.is.

 

Undirbúningur

Áður en lengra er haldið er nauðsynlegt að staldra við og velta fyrir sér hver tilgangurinn sé með því að nota Facebook. Hvað er það sem þið viljið fá út úr ferlinu?

Dæmi um hugsanlegar ástæður fyrir herferðinni gætu t.d. verið:

  • Að auka vörumerkjavitund
  • Að auka sölur á vörunni
  • Skapa ímynd fyrir fyrirtækið
  • Skapa vettvang þar sem þið getið átt samskipti við notendur
  • Búa til tímabundna athygli fyrir ákveðna vöru
  • Koma á framfæri tilboðum
  • o.s.frv.

Það eru í raun hægt að nota Facebook á ótal vegu en eina sem þið verðið að passa er að reyna að gera ekki allt á sama tíma. Einbeitið ykkur að nokkrum tilteknum markmiðum og áttið ykkur á því hvað þið verðið að gera til að ná þeim.

Með þetta tiltekna verkefni settist ég niður með fulltrúa frá fyrirtækinu yfir góðum kaffibolla og við tókum spjall um vöruna og hver markmið fyrirtækisins væru. Þegar við vorum komnir vel á annan kaffibollann vorum við búnir að átta okkur aðeins betur á hvað við vildum fá út úr herferðinni. Aðal markmiðið yrði að skapa vörumerkjavitund þar sem þetta er ný vara og nauðsynlegt að fólk viti að hún sé til og hugsi til hennar næst þegar öryggismál á heimilinu eru endurhugsuð.

Út frá því settum við það markmið að ná 1.000 vinum/aðdáendum á Facebook fyrir þessa vöru og reyna gera upplifun þeirra eftirminnilega. Í framhaldi af því myndi fulltrúi frá fyrirtækinu taka við umsjón með síðunni og vera með reglulegar uppfærslur til að halda uppi samskiptum við þessa þúsund aðila.

Við töldum það einnig nauðsynlegt að setja upp vefsíðu fyrir vöruna þar sem góð vefsíða byggir upp traust gagnvart hugsanlegum viðskiptavinum og hugsanlega væri þá einnig hægt að setja upp smá greiðslukerfi til að þeir sem væru áhugasamir gætu pantað vöruna beint í gegnum vefsíðuna.

Þannig ef við tökum þetta saman þá eru markmið verkefnisins þessi:

  • Aukin vörumerkjavitund
  • 1.000 vinir/aðdáendur
  • Einföld en fagmannlega unnin vefsíða.

 

Fyrstu skrefin

Það allra fyrsta sem ég ætla að gera er að deila þessari FB síðu á veggnum mínum, þetta er mjög einfalt en mörgum sem yfirsést einföldu hlutina. Það eitt að deila þessu persónulega á Facebook fær boltann oft til að byrja rúlla, ef þetta hefði verið eigin verkefni þá hefði ég jafnvel hringt í nokkra vini sem ég héldi að hefðu áhuga á þessu og spurt þá hvort þeir væru til í að deila þessu á sínum FB veggjum. Þegar verið er að deila einhverju svona þá skiptir máli að þetta sé áhugaverður titill og að fólk verði forvitið og smelli á hann. Einnig er nauðsynlegt að vera heiðarlegur í öllu því sem maður lætur frá sér á Facebook og segja aldei eitthvað sem þú meinar ekki.

(Þessi status færsla skilaði 4 nýjum vinum á FB)

En þá ætla ég að segja þessum fyrsta part af nokkrum um Facebook markaðssetningu lokið en við höfum hér farið yfir nauðsynlegan undirbúning áður en farið er út í FB markaðssetningu. Ég mun á næstkomandi vikum halda áfram að skrifa um þetta verkefni samhliða því sem ég vinn í því. Ef þið viljið sjá núverandi stöðu á facebook síðunni þá má nálgast hana hér: facebook.com/eldhemja.

 

 


Nafnspjöld eru ekki bara nafnspjöld

Mér hefur fundist nokkuð vanta upp á hjá Íslendingum þegar það kemur að nafnspjöldum. Þeir hvorki kunna að deila nafnspjöldum sínum né að nýta nafnspjöld annara. Það er eins og þeir haldi að þetta sé bara einhver bréfsnifsi.

Nafnspjöld eru blanda af markaðssetningu og myndun tengslanets(e.networking). Þeir sem nota nafnspjöld á réttan hátt geta fengið ótrúlega mikið út úr því. Hérna ætla ég að gefa nokkur dæmi um hvernig þú getur nýtt nafnspjöld betur.

Nafnspjaldið þitt:

  1. Formlegur vs. óformlegur: hönnun nafnspjaldsins gefur mjög mikið til kynna hvort þú háttir samskiptum þínum við aðra á formlegan eða óformlegan hátt. Ef nafnspjaldið er sett upp eftir hefðbundna nafnspjaldaútlitinu með einungis lágmarks upplýsingum þá gefur það til kynna að þú og fyrirtæki þitt séuð formlegir í samskiptum. Andstæðan við þetta eru nafnspjöld sem notast við húmor og óhefðbundna uppsetningu.
  2. Ávallt við höndina: Það að eiga flott nafnspjald gerir ekkert fyrir þig nema þú sért með það við hendina þegar þú þarft á því að halda. Ég mæli sjálfur með því að vera með einhverskonar hulstur utan um þau, það verndar þau og lítur betur út þegar þú ert að afhenda einhverjum spjaldið. Hulstrið nýtist einnig þegar þú færð nafnspjald til baka því þá geturðu sett það á stað sem þú týnir því ekki.
  3. Enga feimni: Af einhverjum ástæðum þá eru margir feimnir við það að taka upp og deila nafnspjöldum. Það segir sig í raun sjálft að nafnspjaldið þitt gerir ekkert gagn nema einhver  taki við því á endanum. Þess vegna þarftu að vera ófeiminn við að afhenda það öllum þeim sem sýna þér og rekstri þínum áhuga.

 

Nafnspjöld frá öðrum:

  1. Hafa samband strax: Þegar þú færð afhent nafnspjald þá er það staðfesting á því að viðkomandi hafi áhuga á að vera í sambandi við þig á einhverjum tímapunkti og þar afleiðandi stækka sitt og þitt tengslanet. Það er gott að gera það að venju sinni að alltaf næsta dag eftir að maður fær nafnspjald að senda viðkomandi stuttan tölvupóst þar sem þú þakkar fyrir ánægjulegan hitting og býður viðkomandi um að vera í sambandi við þig hvenær sem er. Þetta byrjar samskipti ykkar á góðu nótunum og eykur líkurnar á því að hann hafi samband við þig á einhverjum tímapunkti í framtíðinni.
  2. Krota á bakhliðina: Það getur verið gott að skrifa niður einhverja áminningu á nafnspjaldið svo ef þú þarft einhvertímann að hafa samband aftur við viðkomandi þá hjálpar áminningin þig að muna um hvað þið töluðuð eða hvar þið hittust.
  3. Geyma nafnspjaldið: Alltaf að geyma öll nafnspjöld sem þú færð og þá er best að geyma þau öll á sama stað t.d. kaupa nafnspjaldabók og geyma þau þar svo fljótlegt sé að flétta í gegnum hana. Vera svo ófeimin við að taka þau upp og hafa samband við viðkomandi.

 

Dæmi um skemmtileg nafnspjöld:

Þetta er nafnspjald var hannað af Steinari þegar við fórum af stað með Búngaló vefsíðuna. Það eru nokkrir mjög góðir kostir við þetta nafnspjald:

  • Allir starfsmenn fyrirtækisins gátu notast við sama spjaldið þar sem nöfnin komu ekki fram á því heldur benti frekar á svæði á vefsíðunni þar sem hægt var að fá allar upplýsingar.
  • Nóg pláss á því ef við eða móttakandi vildi skrifa eitthvað á það.
  • Húmorinn sagði móttakanda að við værum óformleg í samskiptum okkar og hann gæti verið óhræddur við að hafa samband.
  • Vekur yfirleitt athygli. Þegar móttakandi les aftan á spjaldið þá bregst það yfirleitt ekki að hann brosir með sér og oftar en ekki þá myndast smá umræður út frá nafnspjaldinu.

Við höfum reyndar verið svo ánægðir með nafnspjaldið að við notumst við það ennþá daginn í dag og höfum prentað 3 upplög af því.

Þetta nafnspjald er búið til úr laser-skornum málmi, ég hef einu sinni fengið svona svipað nafnspjald (reyndar ekki frá Steve Wozinak) og þetta er alveg eins og að halda á kreditkorti. Myndi nú ekki mæla með að ný fyrirtæki væru að eyða pening í slík nafnspjöld enda held ég að stykkið kosti um 400 krónur en þetta er skemmtilegt dæmi um hvað sumir leggja í nafnspjöldin.

Ég hef orðið aðeins var við það erlendis þótt svo það virðist ekki vera mikið um það hér að fyrirtæki búa til nafnspjöld sem þjóna einhverskonar tilgangi fyrir móttakandann og gera það þá að verkum að þeir halda lengur í þau. Dæmu um slík nafnspjöld:

  • Tannstönglar: hægt er að brjóta hluta af spjaldinu af til að nota sem tannstöngul.
  • Upptakari, getur notað nafnspjaldið til að opna flösku.
  • Skóhorn.
  • Spegill.
  • USB-lykill: þá eru upplýsingarnar einfaldlega prentaðar á usb-lykil.
  • o.s.frv.

 

Ef þú veist um einhver flott íslensk nafnspjöld þá væri gaman ef þú myndir deila þeim með okkur.

 


8 góð ráð fyrir fyrirtækjavefsíður

Það verður sífellt mikilvægara fyrir fyrirtæki að vera sjáanlega á netinu en það getur þó verið mjög dýrt ef maður veit ekki hvað maður er að gera. Það að ráða til sín forritara til að sjá um að setja upp vefsíðu getur verið mjög dýrt sérstaklega fyrir lítið fyrirtæki sem er að taka sín fyrstu skref. Auk þess sem það er ekkert sem ábyrgist það að þið verðið sátt með útkomuna.

Hérna eru nokkur góð ráð fyrir alla þá sem eru að íhuga að setja upp fyrirtækjavefsíðu.

1. Ef þú veist ekki hvert þú ert að fara hvernig veistu þá hvenær þú ert komin þangað?

Vertu viss um að þú vitir hvað þú vilt fá út úr vefsíðunni, hvaða tilgangi á hún að þjóna fyrir fyrirtækið. Á hún að vera almenn kynning á fyrirtækinu þar sem hún er hugsuð til að fræða fólk um fyrirtækið? Á hún að reyna sannfæra fólk um að koma í verslunina eða á veitingastaðinn þinn? Viltu reyna selja vörurnar þínar í gegnum hana? það eru hundruði mismunandi tilgangar með vefsíðum og áður en þú gerir nokkuð annað skaltu átta þig á því hvað þín vefsíða á að gera. Ef þú hefur enga hugmynd um það þá getur verið gott ráð að bjóða einhverjum með reynslu af því að setja upp vefsíðu í kaffibolla og sjá hvort hann geti gefið þér einhver góð ráð.

2. Hvernig á hún að líta út?

Eyddu nokkrum dögum á netinu og reyndu að átta þig á því hvaða vefsíður þér líkar vel við og hvaða vefsíðum þú myndir vilja að þín vefsíða myndi líkjast. Þegar það kemur að því að setja upp vefsíðu, hvort sem þú setur hana sjálf(ur) upp eða ræður forritara til þess, þá flýtir það afskaplega mikið fyrir ef þú ert með skýrmótaðar hugmyndir um hvernig síðan eigi að líta út. Ef þú getur svo einnig bent á nokkrar síður á netinu og sagt “svona vil ég fá þetta” og “svona vil ég ekki hafa þetta” þá ertu í góðum málum.

3. Hvaða virkni þarf að vera á vefsíðunni?

Eru einhverjir sérstakir “fítusar” sem vefsíðar þarf að geta framkvæmt? Þetta er eitthvað sem tengist mjög tilgangi vefsíðunar en kafar þó aðeins dýpra ofan í hvernig hugsanlegur notandi á að nota vefsíðuna. Dæmi um fítusa:

  • Fréttasvæði á vefsíðunni: Ef þú ætlar að vera með fréttasvæði á vefsíðunni þá þarftu að uppfæra hana í hverri viku eða að minnsta kosti hverjum mánuði annars virkar vefsíðan öll sem eitthvað sem er ekki hugsað um og notendur treysta ekki jafn vel efninu á henni. Það að uppfæra eitthvað í hverri viku er mjög mikil vina og verið búin að hugsa þetta vel út.
  • Contact form: Viljið þið hafa svona innfylliform þar sem notendur geta skrifað skilaboð til ykkar? Þetta er einn af þessum hlutum sem ég hef aldrei verið hrifin af, afhverju ekki bara að skrá tölvupóstinn ykkar einhverstaðar og spara ykkur 1-2 tíma af forritunarvinnu?
  • Annað sem gæti flokkast sem fítusar: myndagallerý, spjallsvæði, tengingar við facebook og twitter, like-takkar, eiga lesendur að geta skrifa athugasemdir við greinar o.s.frv.

Mín skoðun er sú að þið eigið að reyna að fjarlæga alla fítusa nema þá sem eru nausynlegir fyrir tilgang vefsíðunar. Minna er betra og ef þið ráðið forritara þá er minna einnig ódýrara.

5. Geturðu gert þetta sjálf(ur)?

Oftar en ekki er ég að sjá fólk eyða allt frá 50þús upp í 500þús fyrir vefsíðu sem það með smá útsjónasemi hefði getað sett upp sjálf. Kannski hefði hún ekki orðið alveg jafn flott en hún hefði líklega virkað alveg jafn vel og þegar maður er að fara af stað með nýtt fyrirtæki þá telur hver einasta króna. Lítu nú yfir þá hluti sem við erum nú þegar búin að fara í gegnum hér að ofan og veltu fyrir þér hversu flókin vefsíðan er í raun og veru. Ef þetta er bara texti og nokkrar myndir sem eiga að koma fram á vefsíðunni þá geturðu líklega búið þetta til sjálf(ur). Aftur á móti ef þú sért enga leið fram hjá því að vera með alskonar auka fítusa sem gera síðuna mun flóknari þá skaltu líklega leita til forritara en mundu bara að þegar þú hittir forritarann að nefna við hann allt það sem þú gerðir í atriðum 1-4 hér að ofan. Það getur líka verið gott að fá tilboð frá fleir en einum og jafnvel fleiri en tveimur. Mín reynsla af forriturum að yfirleitt eru sjálfstætt starfandi forritarar betri kostur en hugbúnaðarfyrirtækin vegna þess að þeir gefa sér meiri tíma með þér og svara í símann þegar maður þarf að ná í þá.

6. Að búa til vefsíðu.

Jæja ég held að ég nái nú ekki að fylgja ykkur alveg í gegnum ferilinn við að búa til vefsíðu hér í þessari grein en ég ætla benda ykkuar á hver næstu skref væru fyrir ykkur. Ef þið hafi ákveðið að búa til ykkar vefsíðu þá eru nokkrar auðveldar og þægilegar leiðir til þess og flestar þessara leiða byggjast á því að notast við eitthvað af bloggkerfunum sem eru í boði. Blogg er í raun bara vefsíða þar sem mjög auðvelt er að setja inn texta og myndir. Það að breyta útlitinu til að það líkist raunverulegri fyrirtækjavefsíðu er yfirleitt mjög einfalt.

Ég myndir mæla með einu af þessum bloggkerfum til að byrja með:

WordPress: Þetta er stærsta og vinsælasta bloggkerfið og er notað af milljónum manna út um allan heim. Þetta er kerfið sem ég nota til að halda utan um Frumkvöðlar.is. Kerfið er með þúsundir tilbúna útlita sem þú getur valið um einnig geturðu alltaf seinna meir ráðið til þín forritara til að aðlaga útlitið fullkomlega að því sem þú vilt en áfram notast við þetta þægilega kerfi.

Tumblr: Mjög einfalt og þægilegt kerfi, hentar sérstaklega vel ef maður vill geta sent in margar og litlar færslur. Ég er tiltæmis með forrit í iPhone simanum mínum tengt við þetta svo ég get sent inn texta, tilvitnanir, myndir eða jafnvegl vidjóa á aðeins nokkrum sekúndum. Er aðeins erfiðara að aðlaga útlitið á kerfin og því kannski ekki alveg jafn gott fyrir alla aðila.

7. Vefverslunarkerfi

Ef þið viljið selja vörurnar ykkar í gegnum vefsíðuna þá getur það oft verið mjög dýrt og tímafrekt að setja upp vefverslunarkerfi á vefsíðuna og á sama tíma vitið þið vitið ekkert hvort þið eigið eftir að selja eitthvað í gegnum kerfið. Ég myndi því mæla með að þið mynduð lágmarka áhættu ykkar með því að notast við tilbúið vefverslunarkerfi. Það eru allskonar vefverslunarkerfi þarna úti og mörg þeirra eru sérhæfð fyrir ákveðna iðnaði, það getur því verið gott að eyða smá tíma til að leita og sjá hvað þið finnið. Svo er líka til kerfi sem eru sérstaklega gerð fyrir íslenskan markað eins og t.d. Zolon.is en það er þægilegt og gott kerfi þar sem þið greiðið bara mánaðargjald.

8. Efni umfram allt.

Útlit vefsíðunar skiptir litlu máli ef það er ekki gott efni inn á vefsíðunni. Ég myndi því mæla með að þið mynduð leggja meiri áherslu á að skrifa góðar greinar og texta inn á vefsíðun heldur en þið eruð að leggja í útlit hennar. Ef þið getið búið til virði fyrir notandann þá kemur hann aftur á vefsíðuna eða jafnvel kíkjir við í versluninni ykkar.


Kaupa/selja kennitölu

Það er nokkuð dýrt að stofna nýja kennitölu og margir hafa því frekar kosið að kaup notaða fyrirtækjakennitölu. Kostirnir við þetta eru nokkrir en á sama tíma er ýmislegt sem ber að varast.

Kostir

  • Ódýrari startkostnaður
  • Þarf ekki að leggja fram hlutafé
  • Í sumum tilfellum uppsafnað tap í bókhaldi (lækkar tekjuskatt)
  • Ákveðin virðuleiki að vera með eldri kennitölu

En það er nauðsynlegt að þekkja sögu kennitölunnar vel og fullvissa sig um að engar skuldir hvíli á því. Best er að fá að sjá ársreikninga og bókhald fyrirtækisins til að staðfesta sjálfur að ekkert sé vafasamt við kennitöluna.

Almennt gangverð á fyrirtækjakennitölum er mjög breytilegt en mín reynsla er sú að þær seljist yfirleitt á bilinu 50-130 þús og eru þá allskonar hlutir sem hafa áhrif á verðið.

Ferillinn

Það getur verið gott að skrá fyrirtækjakennitölu af vsk-skilaskrá, láta loka bankareikning og vera með allt bókhald á hreinu áður en kennitalan er seld. Fyrsta skrefið er að setja upp kaupsamning sem tilgreinir kaupanda, seljanda, kennitölu og þá skilmála sem þeir hafa sett fyrir þessum viðskiptum. Því miður hef ég ekki fundið neitt staðlað skjal fyrir slíkan kaupsamning og því gott að reyna nálgast það hjá einhverjum sem hefur gert slík kaup áður eða að leita til lögfræðings. Svo þarf að fylla út eftirfarandi pappíra og skila til fyrirtækjaskrár.

RSK 17.42 – Tilkynning um breytingu á stjórn

RSK 17.43 – Tilkynning um breytingu á framkvæmdastjórn og prókúru ehf./hf.

Einnig mælum við með að kaupandi breyti nafni og tilgangi fyrirtækis til að aðlaga það að þeirri starfsemi sem hann ætlar að vera með.

RSK 17.41 – Tilkynning um breytingu á nafni ehf/hf.

RSK 17.47 – Tilkynning um breyttan tilgang/starfsemi ehf/hf.

Í raun er þetta ekki mjög flókin ferill en það er nauðsynlegt að búið sé að ganga frá öllum lausum endum svo það komi ekki í bakið á þér, hvort sem þú ert seljandi eða kaupandi. Einnig mæli ég með því að reyna eiga viðskipti við aðila sem þú treystir.


Styrkir fyrir frumkvöðla

Ef þú ert að stofna fyrirtæki eða vinna í viðskiptahugmynd þá eru fjölmargir styrkir sem þú getur sótt um til að fá fjárhagslegan stuðning við verkefni þitt. Það eru mismunandi styrkir til fyrir mismunandi verkefni og einnig mismunandi eftir því á hvaða stigi hugmyndin þín er. Almennt séð er þó nauðsynlegt að vera kominn með viðskiptaáætlun og vel mótaða hugmynd áður en hægt er að sækja um styrki. Það er mikil vinna sem fer í það að sækja um styrki og oftar en ekki þarf að sækja um þá oftar en einu sinni áður en maður fær samþykki fyrir þeim.

Af einhverjum ástæðum þá eru fleiri styrkir fyrir þau fyrirtæki sem eru staðsett á landsbyggðinni en á höfuðborgarsvæðinu. Þannig ef þitt fyrirtæki er staðsett fyrir utan höfuðborgarsvæðið gætir þú haft um ýmislegt að velja en þar sem mín reynsla er af rekstri á höfuðborgarsvæðinu mun ég einungis fjalla ýtarlega um þá styrki. Ég mun þó reyna að telja upp eitthvað af hinum styrkjunum einnig.

Helstu styrktaraðilar eru Rannís og Nýsköpunarmiðstöð(IMPRA) þótt svo að fullt af mismunandi styrktaraðilum eru þarna úti og oft nauðsynlegt að eyða smá tíma í að finna þá alla. Hér koma nokkrir helstu styrkirnir sem þú getur sótt um.

IMPRA styrkir

Átak til atvinnusköpunar veitir styrki til smærri viðfangsefna og vegna snjallra nýsköpunarhugmynda frumkvöðla og lítilla fyrirtækja á öllu landinu.

Starfsorka er nýtt átaksverkefni með það markmið að auðvelda fyrirtækjum að ráða fólk í atvinnuleit. Verkefnið er samstarfsverkefni Vinnumálastofnunar og Impru á Nýsköpunarmiðstöð Íslands.

Einungis fyrir landsbyggðina:

Framtak: Styrkupphæð allt að kr.3.000.000.
Styrkur til þróunar á þjónustu eða vöru í starfandi fyrirtækjum á landsbyggðinni.

Skrefi framar: Styrkupphæð allt að kr. 600.000.
Styrkur til að kaupa á ráðgjöf til nýsköpunar og umbóta í rekstri fyrir fyrirtæki á landsbyggðinni.

Frumkvöðlastuðningur: Styrkupphæð allt að kr. 600.000.
Veitir frumkvöðlum og litlum fyrirtækjum á landsbyggðinni styrki til að þróa viðskiptahugmyndir.

Klasar: Styrkupphæð allt að kr.3.000.000. Veittir eru styrkir til undirbúnings að klasasamstarfi og til einstakra verkefna innan klasa á landsbyggðinni.

Krásir: Styrkupphæð allt að kr. 750.000. Verkefnið er fræðslu- og þróunarverkefni í svæðisbundinni matargerð fyrir fyrirtæki og einstaklinga á landsbyggðinni.

Vaxtarsprotar eru samstarfsverkefni Impru og Framleiðnisjóðs landbúnaðarins sem hefur það að markmiði að hvetja til fjölbreyttrar atvinnusköpunar í sveitum.

Norðursprotar: Veittir eru styrkir til gerðar viðskiptaáætlunar, eða til frekari þróunar viðskiptaáætlunar, fyrir nýsköpun á Norðausturlandi. Verkefnið er hægt að vinna í samstarfi við starfandi fyrirtæki á svæðinu. Styrkupphæð er allt að 400.000.

Rannís styrkir

Helsti sjóður Rannís er Tækniþróunarsjóðurinn en hann skiptist niður í þrjá hluta, frumherja-, verkafna- og brúarstyrkir. Styrkirnir geta verið allt að 30 milljónir og skiptist hámarksupphæðin eftir hvaða styrk er sótt um. Þeir sem hljóta styrkin fá hann þó ekki allan greiddan út samstundis heldur skiptist hann niður á nokkura ára tímabil og þarf að skila inn áfangaskýrslum til Rannís til að sýna fram á framgang með verkefnið. Skilafrestir fyrir Tækniþróunarsjóð eru tvisvar á ári og nauðsynlegt að byrja vinna í honum snemma þar sem þetta er veigamikil umsókn sem tekur mikinn tíma.

Aðrir sjóðir hjá Rannís: