Að komast úr kyrrstöðu

Hvernig komumst við úr kyrrstöðu, þ.e. úr hugmyndastigi í aðgerðir?

Það eru margir þættir sem halda aftur af okkur og einn sá stærsti er óöryggi, sérstaklega ef við höfum ekki stofnað fyrirtæki áður. Það er erfitt að fara út í óvissuna þegar við skiljum ekki alveg út á hvað þetta gengur. Við þurfum að átta okkur á hvað felst í að reka fyrirtæki og besta leiðin til þess er að kíkja á námskeið hjá mér í stofnun fyrirtækja. En einnig hef ég skrifað margar greinar um þetta og hérna eru t.d. nokkrar þeirra:

Þegar hugmyndirnar eru útskýrðar fyrir fólki á mannamáli komast flestir að því að það að reka fyrirtæki er í rauninni ekkert svo flókið.

Margir eru líka í vafa um hugmyndina sína og hvort hún sé nógu góð. Hin fullkomna hugmynd er ekki til þannig að best er bara að hætta að bíða eftir henni og fara af stað með þá hugmyndi sem við höfum metnað fyrir. Það gæti komið í ljós að við hættum að vera spennt fyrir grunnhugmyndinni og það er allt í lagi, þá er bara að taka skref aftur og svo áfram eftir endurskoðun. Þetta er partur af ferlinu og þú kemst ekki að virði hugmyndarinnar nema byrja að vinna af alvöru í henni.

Til að fá trú á hugmyndinni okkar þurfum við að spegla hana í öðrum. Við þurfum að kynna hana og sjá hvernig hún hljómar í fyrir öðrum. Algengustu mistök frumkvöðla eru að liggja á hugmyndunum og þora ekki að kynna þær. Hræðslan við hugmyndastuld kæfir því margar hugmyndir áður en þær fá að líta dagsins ljós. Veljið samt rétta fólkið til að ræða hugmyndina, aðra frumkvöðla og jákvæðu týpurnar í fjölskyldunni.

  • Ræðum hugmyndina við aðra
  • Tökum ákvörðun
  • Vinnum markvisst í gegnum eina hindrun í einu

Þetta er ekki flókið en þetta krefst aga og trú á sjálfum okkur.


Tækifærin í fyrirtækjarekstri

Að vita að maður getur stofnað fyrirtæki víkkar sjóndeildarhringinn og því fylgir ákveðið öryggi, sjálfsöryggi. Við þurfum ekki öll að vinna fyrir einhvern annan og það er hvort eð er ekkert öruggt að vinna fyrir annan eins og við erum að sjá á öllu þessu fólki sem er að missa vinnuna um þessar mundir. 

Stundum getur öryggið verið fólgið í því að byggja upp þekkingu á hvernig við stofnum fyrirtæki og búum til okkar eigin tækifæri. Þau eru mjög mörg sem geta gert alveg fullt og eru troðfull af hugmyndum um alls konar. Það að kunna þessa beinagrind að fyrirtækjarekstri gæti búið til auðlindir sem enginn tekur frá manni. Að standa og falla með sjálfum sér og taka fullkomlega ábyrgð á eigin gjörðum er valdeflandi og hreinlega gott fyrir sálarlífið. 

Fyrirtækjarekstur heillar mig sérstaklega vegna þessa krafts sem ég sé hjá mínum skjólstæðingum, að sjá þá blómstra og treysta eigin hugmyndum er mjög gefandi fyrir kennara og þess vegna líður mér eins og að hreinlega allir ættu að hafa grunnskilning á fyrirtækjarekstri. Kannski þess vegna sem ég er búin að vera á kafi í þessu í hátt í 20 ár. 

En fyrirtæki er ekki bara fyrirtæki. Það eru ekki allir að reyna að verða ríkir en flestir vilja geta búið sér til lífið sem þeir vilja lifa. Ef farið er í fyrirtækjarekstur á réttum forsendum þá er nauðsynlegt að vita hvert markmiðið er. 

Hvernig viltu þína framtíð? Hvernig viltu lifa lífinu þínu? 

  • Vinna minna?
  • Vinna heima? 
  • Vinna hvar sem þú ert í heiminum? 

Fyrirtæki sem eru sköpuð á þessum forsendum eru kölluð lífstílsfyrirtæki og ganga út á einstaklingsbundna verðmætasköpun hvort sem það er að eyða meiri tíma með fjölskyldunni, auknar tekjur, frelsi eða ferðalög. Það þurfa ekki allir að búa til 100 starfsmanna fyrirtæki og mala gull með 12 tíma vinnudögum og það vilja það heldur ekki allir. 

Fyrirtækjarekstur er eins fjölbreyttur og við mannfólkið og ef þú veist hvað þú vilt þá ætti ekkert að stoppa þig í að ganga á eftir því.

Það þarf ekki að vera flókið að byggja upp rekstur, það er hægt að gera það meðfram vinnu eða námi og þú getur skapað þér lífið sem þú óskar þér.

 


Get ég stofnað fyrirtæki meðan ég er ennþá í skóla?

Já! Ef þú stofnar einkahlutafyrirtæki ertu aldrei að fara að tapa meiru en það sem þú setur í það. Þú getur alveg stofnað fyrirtæki án þess að setja allt í það og unnið í því þegar þú hefur tíma. Ég stofnaði mitt fyrsta fyrirtæki þegar ég var í viðskiptafræði, var í skólanum á morgnanna og vann í fyrirtækinu eftir hádegi. Þetta varð til þess að ég lærði miklu meira í formlega náminu vegna þess að ég var að reka fyrirtæki um leið. Ég var alltaf nemandinn með flestar spurningar því ég var að innleiða fræðin í fyrirtækið mitt jafnóðum. Þannig að ég ábyrgist það að ef þið eruð í viðskiptanámi þá fáið þið mun meira úr náminu ef þið eruð að reka fyrirtæki samhliða.

Að vita að maður getur stofnað fyrirtæki víkkar sjóndeildarhringinn. Við þurfum ekki öll að vinna fyrir einhvern annan. Það er ekkert alveg öruggt að vinna fyrir annan eins og við erum að sjá á öllum sem er að missa vinnuna. Stundum er öryggið fólgið í því að byggja upp þekkingu á hvernig við stofnum fyrirtæki og skapa eigin tækifæri.

 


Hvernig hélt ég geðheilsu í Covid-19?

Það er aukið álag að þurfa að vinna heima og sérstaklega þegar maður er með börn. Í kófinu vorum við hjónin bæði að vinna heima og ég fann fljótt að ég þurfti mjög nauðsynlega að hafa sterka rútínu.

Ég gerði mjög fastmótaða áætlun á hverjum degi frá 9-17 og hélt mig við hana.

Ég „mætti í vinnuna” og byrjaði daginn alltaf á markmiðasetningu. Hvað vildi ég klára í dag og hvað þurfti ég að gera í mínum verkefnum til að fá tilfinninguna um að dagsverki væri lokið. Þó að maður sé að sinna stórum verkefnum er mjög mikilvægt að brjóta þau niður til að geta merkt sem lokið á hverjum einasta degi.

Ég tók mér alltaf klukkutíma í hreyfingu í hádeginu. Líkamsrækt og áreynsla á miðjum vinnudegi hjálpar mér að fókusera betur á eftir. Ég uppgötva oft lausnir um leið og ég hætti að hugsa um vandamálið því ég er of upptekinn að halda jógapósunni.

Að fara út úr húsi á kvöldin sem gat bara verið stuttur göngutúr gaf mér betri svefn. Maður sefur betur þegar maður hressir sig við áður en maður fer í bólið og góður svefn skiptir öllu máli.

Þessir föstu punktar hafa haldið mér réttu megin í hausnum og ég er þakklátur fyrir að hafa möguleikann á að passa upp á sjálfan mig í þessu ástandi.

Mig langaði að fá að heyra í ykkur og vita hvernig þið hafið verið að tækla þennan tíma. Það er svo gott að vita að maður er ekki einn og það eru margir þarna úti eru að fara í gegnum erfitt tímabil. Að missa tekjulind á að því er virðist einu bretti er ógnvænlegt ástand og það er ekkert að því að finna fyrir ótta. Að verða andlega og líkamlega veikur þegar við göngum í gegnum erfiðleika er mjög eðlilegt og við ætlum að komast í gegnum þetta saman. Erfiðleikar eru partur af því að vera í rekstri og hreinlega partur af því að vera manneskja en það er fátítt að við séum svona mörg að ganga í gegnum það sama á sama tíma.


Lifandi útsendingar á Facebook

Í apríl 2020 byrjaði ég að vera með lifandi útsendingar á Facebook og ég mun deila með ykkur ýmsum góðum köflum úr þeim hér á blogginu á komandi vikum. Markmið með útsendingunum er að deila fróðleik og reynslusögum sem tengjast því að stofna og reka fyrirtæki og vonandi hjálpa ykkur sem eruð með rekstur eða stefnið á rekstur og viljið ná árangri í því.

Ég ákvað að hefja þessa þáttaröð í miðjum Covid-faraldri því mig hreinlega langaði bara að láta eitthvað gott af mér leiða. Þetta ástand í þjóðfélaginu minnti mig á hvernig við upplifðum hrunið 2008 en sá tími varð til þess að ég hélt mitt fyrsta fría námskeið í stofnun fyrirtækja meðan ég var ennþá í námi sjálfur. Það gekk vonum framar og ég hef kennt það reglulega síðan þá.

Ég var ekki alveg viss um hvort ég ætti að vera með ný námskeið og leitaði til umhverfisins og spurði einfaldlega áskrifendur póstlistans míns hvað þau vildu. Hvernig gat ég hjálpað þeim í þessu samkomubanni þar sem allir eru að verða geðveikir? Fæstir voru til í venjulegt námskeið út af ástandinu en þar kviknaði hugmyndin að vera með lifandi útsendingar á Facebook þar sem áhorfendur gætu þá sent inn athugasemdir og spurningar á meðan á útsendingu stendur.

Ef þið viljið fylgjast áfram með vikulegum útsendingum Frumkvöðlaspjallsins þá endilega "like"-ið facebook síðuna Frumkvöðlar


Hvert er rétta bókhaldskerfið fyrir þig?

Öll fyrirtæki þurfa að halda bókhald, skila inn vsk-skilum, halda utan um launagreiðslur, gefa út reikninga og sitthvað fleira. Það fer þó alveg eftir fyrirtækinu og frumkvöðlinum hversu mikið af þessum atriðum hann vill sinna sjálfur og hversu mikið hann vill útvista til bókarans síns, en ef hann ætlar að sjá um eitthvað af þessum atriðum sjálfur þá getur verið gott að hafa einhverskonar bókhaldskerfi.

Stóra spurningin er þá "hvaða bókhaldskerfi á ég að nota?" og við því er ekki til neitt einfalt svar því að það virðist vera mjög mikið smekksatriði hvaða kerfi fólk kýs að nota. Til þess að reyna fá smá yfirsýn yfir hvaða bókhaldskerfi frumkvöðlar væru helst að nota gerði ég óformlega skoðunakönnun inn á Íslenskir frumkvöðla FB grúppunni og hérna eru niðurstöðurnar úr þeirri könnun.

Ég myndi segja að þessi niðurstaða endurspeglar nokkuð vel mína reynslu af notkun bóhaldskerfa fyrir lítil fyrirtæki en ég hef á ferli mínum notað öll þessi 4 kerfi sem fengu flest atkvæði. Í framhaldi af þessari skoðanakönnun langaði mig til að skoða með ykkur aðeins betur þessi topp fjögur kerfi og sjá hvort ég gæti hjálpað ykkur til að ákveða hvaða kerfi myndi henta ykkur best.

Þegar ég fór að skoða þessi kerfi þá skráði ég mig sem notandi á öll þau kerfi sem voru með frían prufutíma til að rifja upp reynslu mína af þeim og taka nokkur skjáskot til að deila með ykkur. Lýsingarnar á kerfunum endurspegla bara mína persónulegu upplifun og reynslu af þessum kerfum og í sumum tilfellum er sú reynsla takmörkuð.

DK

Líklega er DK búið að vera eitt aðal bókhaldskerfið á Íslandi undanfarin ár enda hef ég hvað oftast heyrt það nefnt af öllum bókhaldskerfunum og mér skilst að það séu vel yfir 6.000 notendur af því í dag. Ég notaði það síðast fyrir líklega svona 5 árum síðan og á þeim tímapunkti var viðmót á því örlítið gamaldags en á sama tíma var þetta mjög öflugt kerfi sem gerði mér kleift að vera með allskonar keyrslur á reikningum og sjálfvirkni.

Það var engin frír prufutími hjá þeim og því gat ég ekki skráð mig til að prufa núverandi kerfi og taka nýjar skjámyndir. En þetta er í raun mjög öflugt kerfi með endalaust marga eiginleika en á sama tíma er það örlítið flókið og kostnaðarsamt og því held ég að það henti betur fyrir fyrirtæki sem eru komin með góða veltu og hafa raunverulega þörf á öflugum kerfum og góðum samtengingum við önnur kerfi.

Eiginleikar

  • Senda reikninga
  • Starfsmannakerfi
  • Birgðakerfi
  • Bókunarkerfi
  • Sölukerfi
  • Viðskiptamanna kerfi
  • Afgreiðslukerfi
  • o.f.l.

Verðlagning:

  • Grunnpakki: kr.9.660-/mán án vsk.

 

Regla.is

Regla fær almennt séð góða dóma frá þeim sem ég hef talað við sem nota það og margir sem líkja því við aðeins minni og ódýrari útgáfu af DK. Kerfið býður upp á flest allt það sem lítil og meðalstór fyrirtæki þurfa á að halda í svona kerfi og nokkuð sanngjarnt í verði þó það hafi verið nefnt að verðið hækkar aðeins með tímanum þegar maður er í viðskiptum við þá. Mér finnst einnig viðmótið heldur gamaldags þótt ég sé viss um að þeir sem eru búnir að vinna með það lengi finnist það fínt.

Eiginleikar

  • Fjárhagskerfi
  • Sölu- og birgðakerfi
  • Afgreiðslukerfi
  • Netverslanatenging
  • Launakerfi
  • o.f.l.

Verðlagning

  • Grunnpakki kr.2.800-/mán án vsk.

 

Konto

Konto virkar alltaf á mig sem litli gaurinn á markaðnum, en þetta hefur undanfarin ár verið einfaldasta leiðin til að senda út einstaka reikninga. Ég byrjaði fyrst að nota Konto þegar ég þurfti bara að senda út einn reikning og nennti ekki að standa í vesseninu við að skrá mig í eitthvað flókið kerfi, síðan þá hef ég sent nokkra reikninga í gegnum þetta og það er bæði einfalt og fljótlegt.

Eiginleikar:

  • Senda reikninga

Verðlagning:

  • Frítt að senda allt að 10 reikninga
  • Grunnpakkinn kr.4.490-/mán

 

Payday

Payday er mjög ungt fyrirtæki en á sama tíma eru þeir búnir að vera vaxa hratt enda eru þeir með vel hannað kerfi sem er einfalt í notkun. Með kerfinu er auðvelt að senda reikninga og vera með sjálfvirka keyrslu á launatengdum gjöldum og VSK skilum. Ég veit að það er búin að vera mikil þróunarvinna í gangi hjá þeim og ég er spenntur að fylgjast með hvernig þetta kerfi mun þróast á komandi árum.

Eiginleikar:

  • Senda reikninga
  • VSK-skil
  • Skil á launatengdum gjöldum.
  • Yfirlit

Verðlagning:

  • Frítt að senda allt að 2 reikninga per mánuð.
  • Grunnpakkinn kr.3.900-/mán

 

Vonandi hjálpar þetta þér eitthvað til að ákveða hvaða bókhaldskerfi er best fyrir þig en svo er einnig alltaf mikilvægt að tala við bókarann sinn og fá ráðleggingar frá honum/henni líka.

Og ef þú hefur reynslu af eitthvað af þessum kerfum þá endilega deilið með okkur í kommentum hver ykkar upplifun hefur verið.

 


Jólagjafir starfsmanna

Nú eru jólin á næsta leiti og ég var aðeins að skoða hvað fyrirtæki geta gert fyrir starfsmenn sína í tilefni jólanna. Samkvæmt RSK þá eru yfirleitt öll hlunnindi skattskyld en það er þó nokkrar undantekningar eins og árshátíðir, starfsmannaferðir og jólagleði. Heildarkostnaður af þessum undantekninum má vera allt að kr.130.000- á ári per starfsmann, allt umfram það er skattskylt. En það þýðir það að hægt er að gera ansi mikið fyrir starfsmenn sína á ári hverju. Hérna er tilvitnun í vefsíðu RSK:

"Ekki skal telja til tekna hlunnindi og fríðindi sem felast í ýmsum viðurgjörningi við starfsmenn og t.d. árshátíð, starfsmannaferðum, jólagleði og sambærilegum samkomum og viðburðum, enda sé að jafnaði um að ræða viðburði sem standi öllum starfsmönnum launagreiðandans til boða og árlegur kostnaður af þeim nemi ekki hærri fjárhæð en 130.000 kr. á hvern starfsmann. Hlunnindi og fríðindi af umræddum toga umfram 130.000 kr. skulu teljast starfsmanni til tekna, hvernig sem fyrirkomulagi á greiðslum launagreiðanda er háttað."

Frekari upplýsingar um þetta má lesa inn á Skattmat RSK: https://www.rsk.is/einstaklingar/tekjur-og-fradraettir/skattmat/

Ég er engin sérfræðingur í skattamálum en ég get ekki betur séð en þarna sé tilvalið tækifæri til að gera eitthvað gott fyrir starfsfólkið og frumkvöðulinn í tilefni hátíðanna. Þarna væri t.d. hægt að bjóða öllum út í jólahlaðborð og þótt svo það sé ekki beint nefnt þá hljóta jólagjafir að vera partur af jólagleðinni og því ekki úr vegi að gefa einhverja smá gjöf með.

Hvað ætlið þið að gera fyrir ykkar starfsfólk þetta árið? :)


Rekstur á eigin kennitölu

Þegar verið er að tala um að stofna fyrirtæki þá er yfirleitt átt við að stofna einkahlutafélag (ehf.) og fara þannig út í formlegan rekstur þar sem reksturinn er allur rekinn undir fyrirtækjakennitölu sem félaginu er úthlutað. Það er þó líka til sá möguleiki að reka fyrirtæki á þinni eigin persónulegu kennitölu og á þínu persónulega nafni, það oft kallað einstaklingsfyrirtæki.

Rekstur á eigin kennitölu getur verið hagkvæm og auðveld leið til að byrja á meðan það er verið að sjá hvort að hugmyndin virki og hvort rekstrargrundvöllur sé fyrir hendi. Það er engin skráningarkostnaður við einstaklingsfyrirtæki en skráning einkahlutafélags er kr.131.000- einnig þarf ekki að leggja neitt hlutafé inn í einstaklingsfyrirtæki á meðan einkahlutafélag krefst kr.500.000- í hlutafé.

Utanumhald um reksturinn er örlítið einfaldari á einstaklingsfyrirtæki þar sem það er ekki þörf á að skila inn ársreikning en það þarf þó að skila inn rekstrarskýrslu með persónulegu skattframtali einstaklingsins. Ef tekjurnar eru hærri en kr.250.000- á ári þarf viðkomandi að skrá reksturinn á launagreiðendaskrá og ef veltan er meira en kr.2.000.000- á 12 mánaða tímabili þá þarf einnig að skrá reksturinn á VSK-skila skrá.

Einstaklingurinn þarf að greiða sér laun samkvæmt viðmiðum RSK en ef viðkomandi er bara að starfa við þetta í hlutastarfi er hægt að greiða sér laun í samræmi við það vinnuhlutfall sem maður vinnur eins lengi og það er hægt að réttlæta það gagnvart RSK t.d. með launaðri vinnu annarsstaðar.

Frá skattalegu sjónarmiði er kannski helsti munurinn sá að allur tekjuafgangur þ.e.a.s. peningur sem ekki er nýttur í rekstur og launakostnað, er sjálfkrafa álitin sem laun og því þarf einstaklingurinn að greiða tekjuskatt og launatengd gjöld af þeim pening.

Mikilvægasti munurinn er á ábyrgðinni, þegar þú ert með rekstur á eigin kennitölu berð þú persónulega fulla ábyrgð á rekstrinum og öllu því sem getur komið upp á í honum. En þegar þú ert með einkahlutafélag ertu með takmarkaða ábyrgð og þannig aðgreiningu á milli ábyrgð félagsins og þín persónulega.

Samanburður

Eigin kennitala Einkahlutfélag
Stofnkostnaður kr.0- kr.131.000-
Hlutafé kr.0- kr.500.000-
Bókhald Rekstrarskýrsla Ársreikningur
Laun Viðmið RSK Viðmið RSK
Ábyrgð Full ábyrgð Takmörkuð ábyrgð
Hagnaður Skráist sem laun
með tengdum gjöldum.
20% tekjuskattur

Til þess að hefja rekstur á eigin kennitölu þá þarf í raun ekkert að gera annað en að senda reikning út á eigin kennitölu, um leið og þú gerir það ertu tæknilega séð búin að hefja rekstur á eigin kennitölu. Þegar þú ert kominn í meira en 250þús í tekjur þarftu að skrá þig á launagreiðendaskrá og svo þegar þú sérð fram á að vera með meira en 2 milljónir í tekjur þarftu að skrá þig á VSK skila skrá, flóknara er það ekki.

Það er í raun engin takmörkun á hversu miklar tekjur þú getur verið með í rekstri á eigin kennitölu en það sem ber að hafa í huga er að ef þú ert kominn með meiri tekjur en þú þarft til að standa undir almennum rekstrarkostnaði þá gæti verið tímabært að breyta rekstrinum yfir í einkahlutafélag, enda gæti það orðið mjög dýrt að greiða launatengd gjöld af öllum hagnaði félagsins. Bókarinn minn talar yfirleitt um að þegar rekstur gefur orðið meira af sér en viðkomandi þarf að hafa til að standa undir eigin heimilisrekstri þá borgar sig að fara í félag. Oftast er þetta þá um 6 miljónir í ársveltu en svo er það mjög breytilegt eftir aðstæðum.

Ég hef sjálfur persónulega aldrei farið út í rekstur á eigin kennitölu, ég hef alltaf kosið frekar að stofna einkahlutafélag. Hugsanlega var það hérna áður fyrr útaf því að mér var aldrei bent á þennan valmöguleika en í seinni tíð hef ég bara kosið að fara beint út í einkahlutafélag útaf því ég nenni ekki að standa í þessu "millistigi". Mér finnst líka skipta mjög miklu máli að aðgreina fyrirtækjarekstur frá mínum persónulegu fjármálum og ef ég er með rekstur á eigin kennitölu þá er nær engin aðgreining þar á milli. Sem dæmi ef þið eruð með reksturinn á ykkar eigin kennitölu og eitthvað óvænt kemur upp (t.d. hrun, veikindi) og þið getið ekki greitt reikningana þá geta lánadrottnar sótt á ykkur persónulega.

Fyrir marga getur þetta hugsanlega verið góður kostur enda er þetta að mörgu leiti einfaldara og ódýrara en einkahlutafélag.

Vonandi höfðuð þið gagn og gaman af þessari samantekt og endilega deilið ykkar skoðunum hér fyrir neðan, er sniðugt að vera með rekstur á eigin kennitölu eða ekki?


Algengar spurningar varðandi vefverslanir og innflutning

Eins og þið hafið kannski tekið eftir þá hef ég verið að birta myndbönd þar sem ég deili í rauntíma þrautum mínum við að fá umboð fyrir vöru, setja upp vefverslun og hefja innflutning. Þetta hefur leitt til þess að ég hef fengið mjög margar spurningar sendar frá fólki varðandi vefverslanir og mér datt til hugar að deila þeim með ykkur hér. Ég tek það fram að ég er engin sérfræðingur í vefverslunum og innflutning en ég er að læra þetta allt samhliða þeim ykkar sem fylgja blogginu mínu.

Spurning 1: Þarf ekki oft að leggja inn lágmarkspöntun frá framleiðendum t.d. 1.000 stk í senn?

Jú, sumir framleiðendur sérstaklega af ódýrum vörum eða þeir sem eru vanir að framleiða mikið magn munu setja fram kröfur um lágmarksfjölda/magn í pöntunum. Stundum er það bara ekki geranlegt að taka slíkt magn fyrir íslensk fyrirtæki einfaldlega útaf því að markaðurinn hér er of lítill en þá er oft hægt að sannfæra þá um að gera undantekningu á reglunni vegna smægðar markaðarins. En ef það er ekki hægt að taka minni pöntun og þú ert hræddur um að þú myndir ekki ráða við svo stóra pöntun þá myndi ég einfaldlega sleppa því, gætir reynt að finna annan framleiðenda sem er með lægri lágmarksfjölda eða er tilbúinn að koma til móts við þig en ekki taka inn svo stóra pöntun að þú efist um að þú getir selt hana.

Spurning 2: Hversu mikla álagninu eru fyrirtæki að leggja á vörurnar sem þau eru að flytja inn.

Varðandi álagningu þá mega innflytjendur í raun setja eins mikla álagninu og þeir vilja ofan á vöru en staðreyndin er sú að ef þeir leggja of mikið ofan á vörurnar þá er ólíklegt að þær seljist, sérstaklega núna þegar við erum ekki bara að keppa við fyrirtæki hér heima heldur út um allan heim þar sem það er orðið svo auðvelt að kaupa á netinu. Oft er það þannig að því ódýrari sem hluturinn er því meiri álagningu er sett á hann og öfugt. Það er ekkert heilagt varðandi álagningu en miðað við þá sem ég hef talað við sem eru í innflutning þá eru dýrari hlutir (50þús+) oft með 20-50% álagninu en ódýrari hlutir með 20%-300% álagningu, fer eftir svo rosalega miklu. Til dæmis með þær vörur sem ég er sjálfur að skoða að flytja inn þá fæ ég fastan afslátt frá framleiðanda og ég læt mína álagningu vera þá sömu og afslátinn sem ég fæ, þannig get ég boðið vöruna á svipuðu verði og íslendingar myndu fá hana ef þeir pöntuðu hana erlendis frá. Þannig get ég verið samkeppnishæfur ekki bara við aðra íslendinga heldur við sömu vöruna á alþjóðlegum vefverslunum.

Spurning 3: Hvernig get ég reiknað út hversu mikið ég þarf að greiða í tolla og innflutningsgjöld?

Það er fín reiknivél inn á tollur.is (https://www.tollur.is/einstaklingar/tollamal/reiknivel/), þar seturðu bara inn hverskonar vöru þú ert að flytja inn og hún reiknar út kostnaðinn.

Spurning 4: Hvernig reikna ég út sendingarkostnaðinn og hvernig reikna ég út hvaða áhrif hann mun hafa á einstaka vörur?

Sendingarkostnaður er rosalega breytilegur eftir því hvaðan þú ert að fá vöruna senda, hversu stór sendingin er og með hvaða hætti hún er send. Ég mæli alltaf með að reyna fá aðilann sem þið eruð að kaupa af til að aðstoða ykkur með þetta, hann getur heyrt í póstfyrirtækinu sem hann starfar með og fengið uppgefin verði í nokkur stykki, kassa, bretti, mörg bretti o.s.frv. og út frá því getur þú svo séð hvort það borgi sig kannski að taka heilt bretti frekar en kassa því það væri kannski bara svo miklu ódýrar í sendingarkostnað. En það er engin ein regla í þessu og þið verðið bara að leggjast yfir þetta og finna bestu lausnina í ykkar tilfelli.

En varðandi hversu mikil áhrif sendingarkostnaðurinn hefur á einstak vörur þá er það alveg undir þér komið, sumir kjósa að reyna deila kostnaðinum af sendingunni niður á hverja og eina vöru svo að það hafi ekki áhrif á álagninguna eða til að hjálpa þeim að reikna hlutina betur út. Aðrir líta bara á sendingarkostnað sem fastan kostnað sem fyrirtækið þarf að bera til að geta stundað viðskipti og tengir það því ekki beint við hverja og eina vöru. Ég er núna að taka inn mína fyrstu stóru sendinguna og í þessu tilfelli þá reikna ég bara með föstu 10% kostnaði (heildar sendingarkostnaður/heildar upphæð) ofan á hverja og eina vöru, svo þegar sendingin verður komin í hús mun ég loksins geta áttað mig á hversu góð þessi kostnaðaráætlun er og líklega mun ég endurskoða hana í næstu pöntun en mér finnst þetta fín leið til að byrja.

Spurning 5: Framleiðandi selur einungis í USA og sendir því ekki til Evrópu?

Ef þeir eru bara að selja vöruna í USA og vilja ekki senda hana alþjóðlega þá gæti það verið ástæða til að leita tli annara framleliðenda en það er möguleikinn að fá þjónustur svipaðar og shopusa sem geta tekið við pöntunum og sent þær til Íslands en þá ertu að borga fullan söluskatt(VAT) úti og meiri flutningskostnað. Í flestum tilfellum þegar þú ert að kaupa vörur erlendis frá þá sleppurðu við að greiða VAT þar og greiðir bara VSK hér heima en ef þú ferð hina leiðinia veðrurðu að greiða VAT og VSK.

Ef þið hafið frekari spurningar þá endilega deilið þeim með okkur og við sjáum hvort við getum ekki fundið svör við þeim í sameiningu.


Vika 3: Umboð fyrir vöru

Framhald af fyrri grein: Hvernig fær maður umboð fyrir vöru?

Í þessari viku fékk ég loksins öll skjölin frá framleiðendanum og ýtarlegar upplýsingar/bæklinga um vörurnar. Einnig fékk ég aðgang að bakendanum hjá þeim þar sem ég get fengið allar upplýsingar um vörurnar og pantað þær sjálfur. Svo þurfti ég að átta mig á hvað það myndi kosta mig að fá vörurnar til landsins, bæði aðflutningsgjöldin (tollar, vörugjöld og vsk) og flutningskostnað.


Hvar er hægt að nálgast fréttir um íslenska frumkvöðlaumhverfið?

Mér finnst nú almennt séð ekki vera margir miðlar á Íslandi sem hafa í gegnum árin verið með góð og regluleg skrif um íslenska frumkvöðlaumhverfið og því hefur oft verið erfitt að fylgjast með því sem er að gerast. En hérna eru nokkrir hlekkir á miðla sem ég myndi mæla með að þið mynduð kíkja á.

Facebook grúppur

Íslenskir frumkvöðlar (Þetta mín "go-to" síða til að fylgjast með því sem er að gerast hjá frumkvöðlum, en þess ber að geta að ég er ekki alveg hlutlaus þar sem ég rek þessa grúppu. 4.500 meðlimir).

Hugmyndaráðuneytið (Mér hefur fundist þessi grúppa ekki vera alveg jafn virk og hún var en engu að síður mæli ég með að fylgjast þar með. 4.300 meðlimir)

Korka - Konur í nýsköpun og sprotafyrirtækjum.​ (Ég er ekki meðlimur í þessari grúppu en virðist vera virk. 2.200 meðlimir)

Frumkvöðlar í ferðaþjónustu (Fyrir frumkvöðla í ferðaþjónustu. 300 meðlimir)

Vefsíður

North Stack (Þetta er líklega ein virkasta fréttaveitan um íslenska startup umhverfið.)

Startup Iceland (Bala Kamallakharan er um árabil búinn að vera einn öflugasti bloggarinn í íslenska startup umhverfinu)

Frumkvöðlar (Þetta er náttúrulega barnið mitt en ég hef á síðari árum farið frá því að reyna miðla fréttum og ákveðið að reyna frekar að miðla fróðleik og ýtarlegri greinum varðandi frumkvöðlastarf.)

Nýsköpunarmiðstöð (Fréttir frá nýsköpunarmiðstöð)

Þetta er nú bara stutt upptalning á svona helstu miðlum sem ég þekki og nota en hverju er ég að gleyma? og hvaða aðrar síður ættu heima á þessum lista? Bætið því við í athugsemdum hér fyrir neðan.

P.S. 10 nördastig í boði fyrir þann sem getur sagt mér hvaðan cover myndin með þessari grein kemur :)


Vika 2: Umboð fyrir vöru

Framhald af fyrri grein: Hvernig fær maður umboð fyrir vöru?

Það sem byrjaði bara sem ein stutt færsla um hvernig eigi að fá umboð fyrir vöru er svolítið búið að breytast í röð greina þar sem ég fer deili með ykkur öllu því sem ég er að fara í gegnum til að fá umboð fyrir vöru, stofna fyrirtæki í kringum það og byrja selja og markaðssetja. Vonandi hafið þið gagn og gaman af.

En í þessari viku (viku tvö) gerði ég eftirfarandi atriði:

Valdi nafn á félagið

Tekur alltaf smá tíma að finna gott nafn á félagið og ég vildi helst reyna tryggja það að lénið fyrir nafninu væri laust áður en ég stofnaði það. Það getur verið gott að kíkja inn á ISNIC og athuga þar hvort lénið sé laust.

Ég stofnaði einkahlutafélag

Sem er tiltölulega auðveldur ferill núorðið en ég fjalla meira um það í þessari grein: Að stofna fyrirtæki á 10 mínútum.

Skráði fyrirtækið á vsk-skila og launagreiðendaskrá.

Eins auðvelt og það er að stofna ehf. á netinu þá þarf maður að skrá sig á vsk-skila skrá og launagreiðendaskrá með gamla hættinum, prenta út eyðublað RSK 5.02 og skila til þeirra. Ég verð að segja að mér finnst bæði flókið og leiðinlegt að fylla út þetta eyðublað og það endaði á því að ég heyrði í bókaranum mínum áður en ég skilaði því inn einfaldlega útaf því að ég var ekki viss um hvernig best væri að fylla það út.

Stofnaði bankareikning

Ég er í LanDsbankanum og þar þurfti ég að mæta á staðinn og skrifa undir einhverja pappíra og frekar tímafrekt, hef heyrt að aðrir bankar eins og Arion bjóði upp á að stofna þá rafrænt en ég hef sjálfur ekki prufað það.

Rannsakaði betur framleiðendann

Ég hafði einungis kynnt mér framleiðendann lítilega þegar ég hafði fyrst samband en þar sem ég er að íhuga að fara í langtímasamstarf við þá fannst mér mikilvægt að þekkja þá og vöruframboð þeirra betur.

Setja efni inn á vefsíðuna

Ég henti upp Shopify síðu í síðustu viku og það var í sjálfu sér ekki alltof flókið en tímafrekasta starfið er alltaf að setja gott og ýtarlegt efni inn á vefsíðuna. Ég byrjaði aðeins á því í þessari viku.

Bjó til lógó

Ef maður er með takmarkað fjármagn þá á maður ekki að ráða dýran hönnuð til að búa til logo, ég hef frekar haft þá regluna á hlutum að búa mér bara til einfalt logo sjálfur og svo þegar félagið er farið að skila hagnaði þá ræð ég hönnuð til að gera það rétt.

Greiðslugátt hjá Valitor

Tók ákvörðun um að notast við Valitor greiðslugáttina og hafði samband við þau.

Undirbúa fyrstu pöntun.

Svo byrjaði ég að reyna raða saman vörum í fyrstu pöntun.


Að kaupa notaða kennitölu

Ég var í heimsókn hjá bókaranum mínum í síðustu viku og ég var að ræða við hana um það að ég ætlaði að fara stofna nýtt fyrirtæki þegar upp kom sú hugmynd að kaupa notaða kennitölu. Ég skoðaði það af alvöru en á endanum ákvað ég að stofna bara nýja kennitölu. Það hefur marga kosti og galla að kaupa notaðar kennitölur og það er ekki alltaf auðveld ákvörðun, ég hef því tekið saman hér nokkrar ástæður fyrir því afhverju sumir aðilar kjósa að kaupa notaðar kennitölur og vona að þetta hjálpi ykkur til að skilja betur hvort það henti ykkur betur að kaupa notaða kennitölu eða stofna nýja.

Ástæða 1: Ódýrara.

Það er engin skráð viðmið í verðum á notuðum kennitölum, almennt séð seljast þær bara á því verði sem báðir aðilar eru sáttir með en mín reynsla hefur þó verið sú að ekki sé óalgengt að kennitölur seljist á bilinu 60-120þús ef það eru engin verðmæti í þeim annað en bara kennitalan. Sú upphæð er þá aðeins lægra en skráningarkostnaðurinn hjá RSK sem er kr.131.000-.

Ástæða 2: Óþarfi að greiða hlutafé.

Þegar nýtt einkahlutafélag er skráð hjá RSK þá ber eigenda að greiða að minnsta kosti 500.000- inn á bankareikning fyrirtækisins sem upphaflegt hlutafé. Þetta er þá peningurinn sem fyrirtækið kemur til með að starfa með fyrst um sinn og notar til að byggja upp reksturinn. Sumum finnst þetta vera óþarflega há upphæð og kjósa frekar að kaupa notaða kennitölu þar sem er nú þegar búið að leggja þennan pening inn í félagið (og félagið líklega búið að eyða honum) og því óþarfi að leggja hann aftur inn.

Ástæða 3: Uppsafnað tap.

Sumar kennitölur geta verið með uppsafnað tap en það getur nýst nýja eigendanum í bókhaldinu þar sem tapið getur komið upp á móti hagnaði félagsins og þannig getur fyrirtækið sloppið við að greiða tekjuskatt af hagnaðinum. Þar sem tekjuskatturinn er 20% má í segja að sparnaðurinn við að nýta uppsafnaða tapið jafngildi 20% af heildarupphæð tapsins... en þá er með engu öll sagan sögð. Það eru afskaplega margir hlutir sem spila þarna inn í sem gera það að verkum að oft sé erfitt að nýta þetta tap. Það má einungis nota tapið gegn hagnaði í sambærilegum rekstri, þannig ef þið kaupið kennitölu sem var í heildsölurekstri þá getið þið ekki nýtt tapið í fasteignaviðskipti eða hárgreiðslustofu, um leið og tilgangi rekstursins er breytt eyðist út tapið. Svo hverfur líka tapið eftir X ár ef það er ekki nýtt, mann ekki alveg hversu mörg ár, en þið eruð því einungis bara með stuttan tíma til að nýta það. Ég hef séð fólk reyna rukka mun hærri upphæðir fyrir kennitölur með uppsafnað tap en mín reynsla hefur þó verið sú að það fæst yfirleitt ekki mikið fyrir það enda þarf ansi margt að raðast upp rétt til að nýji eigandinn geti verið fullviss um að geta nýtt tapið. Staðreyndin er sú að flest fyrirtæki eru rekin með tapi fyrstu árin svo kannski ólíklegt að svona meira tap nýtist þeim. En ef þið getið nýtt svona tap þá um að gera að nýta það.

Ástæða 4: Gömul kennitala

Hérna áður fyrr fannst fólki það mjög flott að vera með gamla kennitölu og það hljómar alveg kúl en staðreyndin er sú að það er ekki að fara gera mikið fyrir ykkur. Ég hef allavegana aldrei fundið neinn mun í mínum viðskiptum hvort sem ég er með nýja eða gamla kennitölu en ef þið hafið haft einhverja aðra reynslu af þessu þá endilega deilið því með okkur í athugasemdum hér fyrir neðan.

Gallinn

Gallinn við að kaupa notaða kennitölu er sá að maður veit aldrei hvar hún hefur verið og hvort verið sé að kaupa köttinn í sekknum. Það gætu verið einhverjar skuldir eða skuldbindingar áhvílandi og það er erfitt að vera 100% viss um að allt sé i góðu lagi. Persónulega kaupi ég aldrei notaðar kennitölur nema ég treysti seljandanum eða einhver annar sem ég þekki geti vottað hann.

Mín ákvörðun

Í mínu tilfelli þá skoðaði ég tvær notaðar kennitölur, mér alveg sama um aldur kennitölunar og ég ætlaði hvort eð er að leggja inn hlutafé svo einu ástæðurnar fyrir því að ég var að skoða að kaupa notaða kennitölur var sú að annað fyrirtækið var ódýrt og hitt var með uppsafnað tap. En mér fannst seljendurnir vera biðja um aðeins of mikið og mér lág svolítið á að klára þetta og ég nennti ekki að standa í viðræðum og samningagerð við þessa aðila, fljótlegra og þægilegra var bara að stofna nýtt ehf. og það var einmitt það sem ég gerði.

Eruð þið sammála þessum vangaveltum mínum eða ekki? Og hver er ykkar reynsla af því að kaupa og selja kennitölur? Endilega deilið skoðunum ykkar með okkur því þannig lærum við best :)


Hvernig fær maður umboð fyrir vöru?

Þetta er ein af algengari spurningunum sem ég hef verið að fá á námskeiði í stofnun fyrirtækja og því ákvað ég bara að henda í smá bloggfærslu og vidjó til að reyna svara þessu. Þetta er auðveldara en þið haldið :)

Hérna er afrit af bréfinu sem ég sendi til að reyna fá umboðið, hefði örugglega verið hægt að skrifa það miklu betur en þetta þarf ekki að vera fullkomið, þetta er bara eitthvað til að hefja samræður við framleiðandann.

Dear [fyrirtækjanafn],

I have followed your brand for a while and researched your [vara] and I think you make a great product. I would be very interested in importing and selling your products in my home country of Iceland. I therefore wanted to enquire if you are working with resellers around the world and if it would be possible for me to become a seller of your products in Iceland?

Best regards,
Haukur Gudjonsson

Ef þú hefur áhuga á að fá umboð fyrir einhverja vöru getur þú bara sent þeim póst svipaðan þeim sem ég skrifaði, mátt jafnvel afrita minn ef þú vilt, og svo er þetta bara spurning um að byrja umræðuna við þá. Umræðurnar eru misjafnar eins og fyrirtækin eru mörg en yfirleitt er þetta nokkuð einfalt, þar sem þeir deila með ykkur hvernig þeir starfa með endursöluaðilunu senda svo á ykkur samning og ýtarlegra efni.

Þegar þið eruð svo komin með velyrði fyrir umboðinu getið þið byrjað að vinna áfram í þessu og t.d. keypt .is lén inn á isnic.is, .com lén inn á godaddy.com og svo búið ykkur til vefverslun inn á shopify.

Þetta er alls ekki flókið en þetta er mikil vinna svo þið þurfið að vera tilbúinn að vera öguð og leggja á ykkur alla vinnuna sem fylgir þessu.

Gangi ykkur vel og endilega deilið með okkur hinum hvernig þetta gengur hjá ykkur :)

 


Hvaða styrkir eru í boði fyrir þig og þitt fyrirtæki?

Ég er búinn að fá nokkrar spurningar að undanförnu varðandi hvaða styrkir séu í boði fyrir fólk í fyrirtækjarekstri og ég ákvað því bara að skrifa svarið mitt í formi bloggfærslu hér á frumkvodlar.is. Ég hef áður skrifað um styrki og góð ráð til að sækja um styrki en umhverfið breytist sífellt og þeir styrkir sem voru í boði fyrir nokkrum árum eru það ekki lengur og svo er fjöldin allur af minni styrkjum sem poppa upp hér og þar en eru aðeins í boði í stutta stund. Hérna vil ég því frekar fjalla aðeins um mismunandi flokka af styrkjum, tilgang þeirra og reyna gefa ykkur smá hugmynd um hvaða styrkir gætu hugsanlega verið í boði fyrir ykkur og hvar þið gætuð byrjað að leita.

Nýsköpunarstyrkir

Þetta eru styrkir sem eru sérstaklega hugsaðir til þess að styðja þróunarstarf og rannsóknir á sviði tækniþróunar sem miða að nýsköpun í íslensku atvinnulífi. Þannig í raun mæti segja að þeir séu hugsaðir til að skapa fyrirtæki á Íslandi sem eru samkeppnishæf við það besta erlendis og eiga möguleika á að vaxa alþjóðlega. Þetta eru yfirleitt stærstu og bestu styrkirnir sem eru í boði hér á landi og Tækniþróunarsjóður(Rannís) heldur um þá flesta. Ef þitt fyrirtæki er með áherslu á nýsköpun og nýjungar og er ekki í beinni samkeppni við önnur íslensk fyrirtæki þá mæli ég hiklaust með að þið skoðið þessa styrki en ég vara ykkur þó við að þetta eru langar og strangar umsóknir og með öllu óvíst hvort þær skili einhverju svo ekki fara sækja um þessa styrki með neinu hálfkáki, gerið þetta almennilega ef þið ætlið að gera það á annað borð. Hérna er listi yfir helstu nýsköpunarstyrkina:

  • Fræ: Fræið hefur það að markmiði að styðja við hugmyndir og verkefni á frumstigi sem getur leitt af sér stærra þróunarverkefni og styrkir geta verið allt að 1,5 milljónir.
  • Sproti: Sproti er ætlaður til að styðja við verkefni á byrjunarstigi og styrkir geta numið allt að 20 milljónum.
  • Vöxtur, sprettur: Vöxtur er ætlaður til að styrkja þróunarverkefni sem eru komin af frumstigi hugmyndar. Sprettur er öndvegisstyrkur innan Vaxtar. Þessi styrkir geta numið allt að 50-70m.
  • Markaðsstyrkur: Styrkir vegna sérstaks markaðsátaks og geta numið allt að 10m.
  • Hagnýt rannsóknarverkefni: Geta numið allt að 45m.
  • Einkaleyfastyrkur: Styrkur sérstaklega hugsaður til að aðstoða við einkaleyfisferilinn, getur numið allt að 1,2m.

Atvinnusköpunarstyrkir

Það er eitt af verkefnum ríkisins að lágmarka atvinnuleysi og reyna tryggja það að nóg sé af störfum í boði fyrir landsmenn. Eitt af verkfærunum sem ríkið getur notað til að ýta undir atvinnusköpun er að styðja við og styrkja fjárhagslega þá einstaklinga sem vilja skapa sín eigin störf og störf fyrir aðra. Slíkir styrkir eru yfirleitt veitir í gegnum eitthvað af stofnunum ríkisins.

Besta dæmið um þetta eru þeir styrkirnir Frumkvæði og Starfsorka sem ríkið veitir í gegnum Vinnumálastofnun en eini tilgangur þessar styrkja er að skapa störf fyrir þá einstaklinga sem eru á atvinnuleysisbótum. Frumkvæði er hugsað fyrir einstaklinginn sjálfan og felst í fræðslu og leiðsögn sem getur hjálpað einstaklingnum að komast að því hvort hann geti búið til sitt eigið starf. Ég held að það sé ekki beint fjárhagslegur styrkur sem fylgir þessu en einstaklingnum býðst þó að vera á atvinnuleysisbótum á meðan hann tekur sín fyrstu skref í eigin rekstri sem er í sjálfu sér góður styrkur. Starfsorka er svo átaksverkefni sem hjálpar fyrirtækjaeigendum að ráða til sín fólk af atvinnuleysisskrá og fá greitt með þeim grunn atvinnuleysisbætur fyrstu mánuðina.

Svæðisbundnir styrkir

Mörg bæjarfélög og landshlutar sjá sér hag í því að styðja við fyrirtæki á sínu hagsmunasvæði til að hjálpa þeim að skapa fleiri störf og meiri tekjur fyrir alla. Þótt svo að þetta gæti fallið undir flokkin hér á undan þá er þetta yfirleitt bundið við ákveðið svæði og því takmarkar það töluvert hverjir geta sótt um það. Hérna eru einungis nokkur dæmi en það er ómögulegt að telja allt upp og því verðið þið sjálf að leita ykkur upplýsinga um ykkar landshluta, bæjarfélög o.s.frv. hugsanlega geta bæjarskrifstofur eða aðrar ríkisstofnanir á svæðinu veitt ykkur frekari upplýsingar.

Sérhæfðir styrkir

Styrkir sem eru sérstaklega hugsaðir til að styrkja ákveðnar atvinnugreinar og því mikilvægt að gúggla styrki tengda þeirri atvinnugrein sem þú tilheyrir og einnig heyra í öllum tengdum stofnunum til að spyrjast fyrir. En hérna eru nokkur dæmi um sérhæfða styrki:

Styrkir til tiltekina hópa

Þetta eru styrkir sem eru að einbeita sér að því að styðja við ákveðna hópa innan samfélagsins til að auka þáttöku þeirra í atvinnusköpun og fyrirtækjarekstri.

Styrkir veittir af fyrirtækjum

Oft veita stærri fyrirtæki einhverjar upphæðir á hverju ári til að styðja við góð verkefni sem hafa jákvæð áhrif á samfélagið, umhverfið o.s.frv. Þetta er hugsuð sem leið fyrir fyrirtækin til láta gott af leiða og ekki skemmir fyrir þeim að þetta geta oft verið góð tækifæri til að komast í fréttirnar. Það er stundum erfitt að finna þessa styrki en á móti kemur þá þýðir það oft að færri aðilar eru að sækja um þá. Nokkur dæmi:

Samstarf milli landa

Það eru í boði óhemjan öll af samstarfsstyrkjum á milli landa en það getur farið svaðalega mikill tími í því að leita og finna rétta styrkinn en besta leiðinn til að finna þá er inn á vef Rannís, Norrænt Samstarf eða Nýsköpunarmiðstöðvar. En athugið að þó að margir þessara styrkja geta verið mjög háir eða upp á tugi milljóna þá getur líka farið mikill tími í að finn þá, afla sér upplýsingar um þá, sækja um þá o.s.frv. En ef þið eruð með einhvern samstarfsaðila í öðru landi eða eruð með starfssemi í fleiri en einu landi þá er þetta hiklaust eitthvað sem þið mættuð skoða nánar.

Næstu skref?

Upptalningarnar hér að ofan af styrkjunum er einungis brotabrot af því sem er í boði og það er engin leið fyrir mig að halda uppfærðum lista yfir þá alla. Ef þú hefur áhuga á að fá styrk fyrir þína hugmynd eða þitt fyrirtæki þá þarftu að leggja út í smá rannsóknarvinnu og finna réttu styrkina fyrir þig en hérna er þó tjékklisti yfir það sem þú getur gert svona aðeins til að styðja við þig í þessum ferli.

  1. Farðu í gegnum allar helstu upptalningar á styrkjum á netinu til að fá betri hugmynd um það sem er í boði. Þær síður sem veita góða upptalningu á styrkjum í boði eru t.d.
  2. Gúgglaðu styrki um eftirfarandi:
    • Nýsköpun, almennt og sérstaklega í kringum þá nýsköpun sem þú ert að vinn að.
    • Atvinnusköpun.
    • Þitt landssvæði
    • Þinn hrepp
    • Þitt bæjarfélag
    • Þína atvinnugrein
    • Tengdar atvinnugreinar
    • Alla þá hópa sem þú gætir hugsanlega tilheyrt
    • Finndu eins marga styrki frá fyrirtækjum eins og þú getur
    • Samstarfsverkefni á milli landa (ef það á við þitt fyrirtæki)
  3. Hafðu samband við ríkisstofnanir á þínu svæði og þinni atvinnugrein og reyndu að fá eins miklar upplýsingar og þú getur frá þeim um styrki, biddu jafnvel um fund með ráðgjafa eða einhverjar frekari hjálp frá þeim.
  4. Sæktu svo bara um allt sem þú getur sótt um og krosslegðu fingur :)

 


Þetta eina ráð mun spara þér 3 ár af erfiðri vinnu

Ég ætla að deila með þér góðu ráði sem mun hugsanlega koma í veg fyrir að þú eyðir næstu 2-3 árum af ævi þinni í að byggja upp fyrirtæki sem gerir ekkert annað en að skapa stress og leiðindi fyrir þig.

Ráðið er einfalt: vertu búin að hugsa vel út i það afhverju þú ert að fara út í fyrirtækjarekstur og hvað þú vilt fá út úr honum.

Námskeið: afhverju viltu stofna námskieð.
Smelltu hér til að horfa frítt á námskeiðið "Afhverju viltu stofna fyrirtæki"

Við höfum öll okkar ástæður fyrir því að vilja fara út í fyrirtækjarekstur, fyrir sum af okkur er það að geta stýrt betur vinnutíma okkar, fyrir aðra er það að fá meiri tekjur og einhverjir eru að þessu til að geta starfað við það sem þeim finnst skemmtilegt. En hver svo sem ástæðan er þá verður þú að vera með hana á hreinu og byggja upp fyrirtækið með það í huga.

Það tekur yfirleitt 2-3 ár í fyrirtækjarekstri að komast á þann stað að reksturinn sé farinn að vera stöðugur og skila hagnaði eða með öðrum orðum að komast út úr mesta harkinu. Á þeim tímapunkt átta margir frumkvöðlar sig á því að reksturinn sem þeir hafa byggt upp er orðin allt annar en sá sem þeir ætluðu að skapa og passar engan vegin við afhverju þeir byrjuðu reksturinn í upphafi.

Þeir sem fóru út í þetta til að stýra betur vinnutíma sínum átta sig á því að þeir þurfa nú að vinna myrkranna á milli til að halda öllu gangandi og eiga engan frítíma lengur. Þeir sem fóru út í þetta til að fá meiri tekjur átta sig á því að allar tekjur fyrirtækisins fara í rekstur fyrirtækisins og þótt svo að fyrirtækið sé að velta háum upphæðum eru þeir ekkert að fá meiri tekjur en þeir voru í gamla starfinu. Þeir sem fóru út í þetta til að starfa við það sem þeim finnst skemmtilegt átta sig á því að tími þeirra fer allur í bókhald, rekstur, starfsmannamál og í raun í allt nema það sem þeim finnst skemmtilegt.

Margir myndu flokka þetta sem lúxus vandamál, þar sem þið eruð kannski búin að byggja upp fyrirtæki sem hefur samkvæmt hefðbundnum mælikvörðum náð árangri. En við erum frumkvöðlar og við erum ekki að stofna fyrirtæki til að starfa eftir mælikvörðum annara, við erum að þessu til að skapa betra líf fyrir okkur þar sem við höfum tækifæri til að láta drauma okkar verða að veruleika. Við getum því ekki sætt okkur við það að vera föst í einhverju starfi sem okkur líkar ekki við, jafnvel þótt svo við eigum fyrirtækið.

Til þess að hjálpa þér að forðast það að lenda í þessum undarlegu aðstæðum, að byggja upp arðbært fyrirtæki sem skilar þér ekki því sem þú vilt, þá ákvað ég að deila með þér þessu stuttu 10 mínútna námskeiði sem ber titillinn "Afhverju viltu stofna fyrirtæki?". Smelltu hér til að horfa frítt á námskeiðið.

 


5 aðferðir til að markaðssetja með Facebook

Ég hef sjálfur náð nokkuð góðum árangri í gegnum tíðina þegar ég hef verið að markaðssetja vörur og þjónustu í gegnum Facebook. Þetta er líka það markaðstól sem ég mæli oftast með að frumkvöðlar noti þegar þeir eru fyrst að hefja rekstur enda eru 93% íslendinga inn á þessum miðli og því nokkuð góð leið til að ná til þjóðarinnar. En þótt svo að þetta geti verið gott markaðstól þá getur þetta líka verið algjör hausverkur og peningasuga því að flækjustigið er svo rosalega hátt. Það er þess vegna sem mig langaði til að reyna einfalda þetta aðeins og deila hérna með ykkur nokkrum einföldum leiðum sem þið getið notað til að byrja.

1. Persónuleg færsla

Einfaldasta og fljótlegasta leiðin til að markaðssetja með Facebook er einfaldlega sú að skrifa færslu undir þínum eigin persónulega aðgangi og deila með núverandi vinum þínum. Þrátt fyrir að vera auðveldasta markaðsleiðin á Facebook þá er ótrúlegt hvað margir gleyma þessu eða jafnvel sleppa þessu útaf því að þeir halda að þetta skili ekki neinu. Staðreyndin er þó sú að facebook notendur bregðast alltaf meira og betur við færslum frá vinum heldur en færslum frá einhverjum fyrirtækjum og því er mikilvægt að notfæra sér það. En passið þó að þreyta ekki vini ykkar með endalausum færslum um reksturinn ykkar, deilið frekar hápunktunum og því sem þið eruð stolt af og því sem þið vitið að vinir ykkar hefðu gaman af því að heyra um.

Dæmi: Ég deildi með vinum mínum á Facebook þegar ég byrjaði að kenna aftur námskeið í stofnun fyrirtækja og ég fékk 39 like og 7 share, það er mun meira heldur en maður fær yfirleitt frá ókostuðum færslum sem maður deilir undir fyrirtækjanafni. 

2. Búa til FB grúppu

Þetta er mjög áhugaverð leið til að markaðssetja á Facebook útaf því að þarna er maður í raun ekki að markaðssetja neitt í upphafi heldur er maður að smala saman hópi af fólki í kringum sameiginlegt áhugamál. Ég sjálfur tilheyri mörgum grúppum sem ég heimsæki reglulega til að sjá hvað sé í gangi í kringum þau áhugamál og líklega gerum við það flest. Ef þú nærð svo að búa til stóran hóp af fólki í kringum áhugamál sem tengist þínu fyrirtæki þá býður það alltaf upp á þann möguleika að þú getir búið þér til sérstöðu sem sérfræðingur á þessu sviði og yfirleitt er allt í lagi að nefna vöruna sína einstaka sinnum eða jafnvel auglýsa hana í cover mynd grúppunar. Ég hef líka sjálfur oft búið til grúppur í kringum einhver áhugamál til að sjá hvort það sé nægur áhugi hjá fólki til að réttlæta að stofna fyrirtæki í kringum það og þannig mætti líta á þetta sem leið til að sannreyna viðskiptahugmynd.

Dæmi: Ég stofnaði FB grúppu sem heitir Íslenskir frumkvöðlar fyrir nokkrum árum síðan og í dag eru þar 4.400 meðlimir sem allir hafa áhuga á frumkvöðlastarfi, þarna er ég því kominn með góðan hóp af fólki sem flestir hefðu t.d. áhuga á að lesa þær greinar sem ég skrifa um stofnun og rekstur fyrirtækja inn á frumkvöðlar.is auk þess sem ég leyfði mér að setja smá cover mynd til að kynna námskeiðið mitt í stofnun fyrirtækja.

3. Búa til FB fyrirtækjasíðu

Í sumum tilfellum getur fyrirtækjasíða á Facebook komið í staðinn fyrir vefsíður fyrirtækja eða allavegana fyrst um sinn. Þetta er leið til að deila vörumerkinu ykkar og öllum upplýsingum um félagið með almenning, það er líka orðið þannig í dag að margir notendur eru farnir að leita í Facebook frekar en google eða já.is til að finna upplýsingar um fyrirtæki s.s. opnunartíma, staðsetningu o.f.l. En FB fyrirtækjasíður eru farnar að vera miklu meiri áskorun heldur en þær voru hérna áður fyrr og það er oft mjög takmarkað hvað hægt sé að ná til margra nema maður sé tilbúinn að leggja smá pening í þetta. Facebook er meira segja búið að takmarka hversu margir af fylgjendum síðunar sjái hverja færslu og ef maður vill að allir fylgjendurnir sjá færsluna þá þarf að greiða fyrir það. Ég hef aðstoðað frumkvöðla við selja fyrstu eintökin af vörunum sínum með því einu að stofna FB síðu.

Dæmi: Ég er með FB fyrirtækjasíðu fyrir Frumkvöðlar.is og þar get ég verið ófeimnari við að tala um vöruframboðið mitt og lagt smá pening í að boost-a einstaka færslur svo þær nái til fleiri aðila. 

4. Boosta færslu

Þegar þú ert á annað borð komin með fyrirtækjasíðu þá geturðu skrifað færslu og "boost"-að hana svo. Eins og ég nefndi hér að ofan þá takmarkar Facebook hversu margir af fylgjendum þínum sjá hverja færslu á fyrirtækjasíðunni og því þarftu að bústa hana. Þú gerir það með því að smella á bláa "Boost Post" hnappinn fyrir neðan færsluna og greiða fyrir það ef þú vilt að fleiri sjái hana.

5. Kaupa auglýsingu

Hægt er að kaupa almennar auglýsingar á Facebook og hnitmiða þær á tiltekna hópa eins og eftir aldri, staðsetningu, áhugamálum og sitthvað fleira. Þetta er rosalega öflug leið til að markaðssetja en á sama tíma virðist hún sífellt verða flóknari hjá Facebook og það er nokkuð erfitt að útskýra hvernig best er að gera þetta í svona stuttri grein. En það sem ég get ráðlagt ykkur er að leggja aldrei háar upphæðir í neina markaðsherferð fyrr en þið eruð fyrst búin að prufa hana og tölfræðin staðfesti það að hún sé að virka. Auglýsingarnar eru þekktar fyrir það að brenna upp pening hjá fyrirtækjum sem kunna ekki almennilega að nota þær.

Facebook markaðssetning er mjög viðamikið umfjöllunarefni og hérna er ég einungis að nefna nokkrar leiðir til að markaðssetja með Facebook en þær eru mun fleiri og einnig væri hægt að kafa mun dýpra í hverja og eina af aðferðunum sem ég nefndi hér að ofan. En ég hefði gaman af því að heyra hvaða leiðir hafa verið að reynast ykkur best og hvaða leiðir þið eruð að nota sem voru ekki nefndar hér að ofan.


7 hættumerki hjá frumkvöðlum

Það getur verið afskaplega spennandi og skemmtilegt að vera frumkvöðull enda er fátt jafn gefandi eins og að taka einhverja hugmynd og breyta henni í arðbært fyrirtæki. Fyrirtæki sem bæði skapar störf og kannski betrumbætir heiminn á einhvern smávægilegan hátt. En það er þó langt frá því að vera dans á rósum að vera frumkvöðull, staðreyndin er sú að flestir frumkvöðlar ná illa að skapa jafnvægi á milli einkalífs og vinnu og enda á því að brenna út. En hérna eru 7 merki þess að þú sért ekki að búa til gott jafnvægi á milli vinnu og einkalífs. Ef þú þekkir þessi atriði úr eigin fari þá endileg reyndu að nýta þetta tækifæri til að bregðast við og skapa betra jafnvægi í kringum þinn fyrirtækjarekstur.

1. Vinna myrkranna á milli

Það er rosalega erfitt að koma af stað fyrirtæki og yfirleitt tala ég alltaf um að það taki 2-3 ár bara til að sanna hvort fyrirtækið eigi eftir að ganga upp eða ekki. Svo auðvitað fylgir mikil vinna svona stóru verkefni og ekkert að því að vinna langa vinnudaga fyrst um sinn en staðreyndin er sú að við erum ekki gerð til að vinna myrkranna á milli í of langan tíma. Þannig ef þú ert kominn á ár 2 eða 3 í rekstrinum þínum og þú ert ennþá að vinna 12 tíma á dag þá skaltu fara hægja á þér nema þú viljir lenda í kulnun.

2. Gleyma rækta vini og áhugamál

Eitt það mikilvægasta til að halda geðheilsunni er að eiga sér líf fyrir utan fyrirtækið og besta leiðinn til að gera það er að umgangast vini sína og eiga sér áhugamál. Ég hef sjálfur vanrækt þessa hluti í gegnum tíðina og ég mæli alls ekki með því. Þannig taktu þér frí af og til og bjóddu vinunum í mat eða skelltu þér í fjallgöngu.

3. Vinnan fer að flækjast inn í draumana

Þegar þú ert farinn að dreyma vinnuna á hverri nóttu þá þýðir það að þú verðir að fara hægja á þér. Það er ekki gott fyrir neinn að vera svo heltekin af vinnu sinni að ekkert annað komist að.

4. Allar bækur sem þú lest snúast um fyrirtækið

Það að lesa er yndislegt fyrirbæri og frábær leið til að bæta við sig fróðleik og til að fá frí frá hversdagsleikanum. En eins mikið og ég mæli með að fólk lesi bækur til að bæta þekkingu sína þá þarf líka að passa að bæta skáldsögum inn á lestrarlistann til að halda jafnvægi.

5. Stofna annað fyrirtæki í miðri kulnun

Þetta er fyrirbæri sem ég hef séð all oft hjá félögum mínum í fyrirtækjarekstri og mér sjálfum. Það er í eðli frumkvöðulsins að færast alltaf áfram, að byggja upp fyrirtæki, skapa verðmæti, búa til lausnir, takast á við nýjar áskoranir o.s.frv. En við erum ekkert sérstaklega góð í að átta okkur á því hvenær við eigum að taka skref aftur og hvíla okkur. Það er því ekki óalgengt að frumkvöðlar stofni ný fyrirtæki eða byrji að vinna að nýjum viðskiptahugmyndum þegar þeir eru orðnir leiðir á núverandi fyrirtækjum eða jafnvel orðnir svo útkeyrðir að þeir höndli ekki lengur að halda utan um núverandi rekstur. Ég mæli aldrei með því að einstaklingar séu að stofna önnur fyrirtæki eða byrja vinna í öðrum viðskiptahugmyndum fyrr en þeir eru annað hvort búnir að selja núverandi rekstur sinn eða búnir að koma honum þannig fyrir að hann reki sig að mestu sjálfur.

6. Brenna út án þess að vita það

Við erum afskaplega léleg í því að átta okkur á því hvenær við séum við það að brenna út eða jafnvel að við séum í miðju kulnunarástandi. Mín persónulega upplifun af kulnun er sú að fyrst um sinn byrjaði ég að lenda í 2-3 daga tímabilum þar sem ég var algörlega orkulaus og varð bara að liggja undir sæng þangað til ég gat jafnað mig. Hægt og rólega versnaði þetta þangað til að tímabilin voru komin upp í nokkrar vikur og ég var farinn að lenda í svimaköstum og magaverkjum. En aldrei áttaði ég mig á að þetta væru merki um kulnun enda var lítil umræða um slíkt á þeim tíma, það var ekki fyrr en ég lenti svo illa vegg að ég var frá vinnu í marga mánuði sem að ég áttaði mig á sannleikanum. Ég mæli því með að þið lærið af minni reynslu og hlustið betur á líkama ykkar og bregðist við þegar hann fer að segja við ykkur að eitthvað sé að.

7. Stress, kvíða og þunglyndi

Frumkvöðlar eru líka sérstaklega líklegir samkvæmt tölfræði til að þjást á einhverjum tímapunkti af andlegum veikindum á borð við stress, kvíða og þunglyndi. Það er ekkert til að skammast sín fyrir enda er það mjög algengt meðal frumkvöðla en ég mæli með því að þið leitið ykkur hjálpar hjá sálfræðingi eða öðrum fagaðilum þegar þið byrjið að finna fyrir einkennum þess. Raunverulegur styrkur felst í því að þekkja veikleika sína og vinna með þá frekar en að reyna bæla þá niður.

Það er afskaplega gefandi að stofna og byggja upp fyrirtæki en við sem stofnendur verðum að vera opin fyrir hættumerkjunum. Notið þennan lista sem áminningu um að sinna heilsu ykkar, bæði líkamlega og andlega.


52% ódýrara fyrir fyrirtækið en þig

Það er oft talað um að það sé ódýrara að láta fyrirtækið kaupa vörur heldur en að kaupa þær persónulega.

Þá er verið að vitna í það að þegar að fyrirtæki kaupir vörur fyrir reksturinn eins og t.d. prentara, tölvu, stól og skrifborð þá þurfi fyrirtækið ekki að greiða virðisaukaskatt af vörunni.

En er það í alvörunni satt að það sé ódýrara fyrir fyrirtækið að kaupa vöru en fyrir þig? Og ef það er satt hversu mikið ódýrara er það? Ég ákvað að gera smá reikningsdæmi til að átta mig á hver mismunurinn er í raun og veru og ákvað að taka líka inn í þetta þætti eins og tekjuskatt og launakostnað. Varan sem varð fyrir valinu er MacBook Air fartölva frá Macland sem kostar á þeim tíma sem þessi grein er skrifuð kr.219.990- út úr búð.

Endurgreiðsla á VSK

Fyrir einstakling sem er að kaupa þessa fartölvu þá er þetta ekkert flókið, verðið er bara nákvæmlega það sem er ásett á tölvuna kr.219.990-. Fyrir fyrirtækið sem ætlar að kaupa þessa tölvu þá þarf það jú líka að greiða fullt verð til búðarinnar þegar það fær tölvuna en svo fær það endurgreitt virðisaukaskattinn af tölvunni sem er 24% eða kr.42.578-.

Lækkun tekjuskatts

Ef fyrirtækið skilar hagnaði á því ári sem það kaupir tölvuna þá lækkar kostnaður tölvunnar tekjuskattinn sem fyrirtækið hefði annars þurft að borga. Í þessu dæmi borgar fyrirtækið kr.177,441- án vsk. fyrir tölvuna sem þýðir að hagnaðurinn lækkar um þá upphæð og lækkar þar með tekjuskattinn sem þarf að greiða um 20% af þessari upphæð eða kr.35.482-.

Lækkun launakostnaðar

Ef einstaklingurinn sem er að fara kaupa sér tölvuna á fyrirtæki og er að fá laun sín greidd út úr því fyrirtæki þá er fyrirtækið að greiða launakostnaðinn hans líka. Það þýðir að til þess að fá launin sín greidd sem hann síðan notar til að kaupa tölvuna þarf hann að greiða ca. 35% í staðgreiðslu. Kostnaður tölvunnar fyrir fyrirtækjaeigendann er því kr.219.990 af hans eigin peningum og kr.76.996- af peningum fyrirtækis hans vegna staðgreiðslunar sem fyrirtækið þurfti að greiða til að geta greitt honum út þessa upphæð í launum. Heildarkostnaður tölvunnar er því í raun kr.296.986-.

Niðurstaðan

Kostnaður tölvunnar fyrir einhvern einstakling út í bæ er ennþá óbreyttur eða kr.219.990- aftur á móti er kostnaður fyrirtækisins einungis kr.141.930- (219.990 - 42.578 - 35.482). ÞEtta þýðir að það er í raun 35,5% ódýrara fyrir fyrirtækið að kaupa tölvuna en einstakling út í bæ.

En aftur á móti ef við erum með fyrirtækjaeigenda sem er að reyna ákveða hvort hann eigi að kaupa tölvuna eða fyrirtæki hans þá má einnig taka inn í reikninginn kostnað fyrirtækisins af því að borga honum laun en sá kostnaður hlýtur að leggjast ofan á kaupverð tölvunnar. Það þýðir að ef fyrirtækjaeigandinn kaupir tölvuna sjálfur er kostnaður hans og fyrirtækisins alls kr.296.986- (verð tölvunar + launakostnaður fyrirtækisins). Það væri því 52% ódýrar fyrir fyrirtækjaeigandann að kaupa tölvuna í gegnum fyrirtækið heldur en að kaupa hana sem einstaklingur.

Þetta er að sjálfsögðu bara ein leið til að líta á þetta og ég er viss um að mörg ykkar erum með aðra sýna á þessu en engu að síður vona ég að þetta gefi ykkur einhverja hugmynd um hvernig það er öðruvísi að láta fyrirtæki kaupa vöru heldur en að kaupa hana sem einstaklingur. Ef þið eruð ósammála þessum útreikningum eða eruð með aðrar skoðanir á þessu þá endilega skrifið komment hér fyrir neðan, væri gaman að heyra frá ykkur :)

 

 


Að stofna fyrirtæki á 10 mínútum.

Nýlega breytti Ríkisskattstjóri ferlinum við stofnun fyrirtækja og nú er hægt fara í gegnum allan ferilinn rafrænt inn á vefsíðu RSK. Þetta er svakalega stórt skref fyrir íslenska frumkvöðlaumhverfið því nú er hægt að fara í gegnum allan ferillinn á aðeins 10 mínútum og það tekur ekki nema 1-2 sólahringa frá skráningu áður en fyrirtækið er komið með kennitölu og þið getið hafið rekstur.

Aldrei verið auðveldara að stofna fyrirtæki

Þegar ég stofnaði mitt fyrsta fyrirtæki fyrir 15 árum síðan þá man ég hvað það var mikil hausverkur að finna út úr því hvernig ætti að gera það. Ég þurfti að ráða mér lögfræðing til að aðstoða mig við að útbúa öll nauðsynleg stofnskjöl enda voru slík skjöl hvergi aðgengileg og svo flókin að maður þurfti aðstoð við að fylla þau út. Þessi lögfræðiþjónusta kostaði sitt og bætti yfirleitt nokkrum dögum við ferilinn en á þeim tíma tók það svo RSK 7-10 daga að vinna skráninguna. Ég hugsa mér að heildarkostnaður við stofnun á þessum tíma með lögfræðiþjónustu og skráningu hjá RSK hafi verið á bilinu 200-300þús og tíminn sem þetta tók að lágmarki 2 vikur.

Sjálfvirk skráning á vef RSK

En nú er öldin önnur (reyndar ennþá sama öld en þú veist...), allur ferillinn í dag er rafrænn og nú er einfaldlega hægt að fylla inn form á vefsíðu RSK og öll stofnskjölin verða útbúin sjálfkrafa og þau svo undirrituð af stofnendum með rafrænum skilríkum og 1-2 dögum síðar er komin fyrirtækjakennitala og rekstur getur hafist. Hugsanlega mynduð þið ennþá vilja fá lögfræðing í lið með ykkur ef þið þurfið að gera hluthafasamning en að öðru leiti er engin auk kostnaður eða tímafrekar flækjur. Þannig þótt svo að kostnaðurinn vð stofnun sé sá sami (en samt ennþá of hár að mínu mati) þá er þarna búið að útiloka auka lögfræðikostnað og því má segja að hann hafi lækkað um 25-50% fyrir þá sem eru að stofna í fyrsta skipti og ferillinn er núna 700% hraðari (2 dagar í stað 14).

Þetta er virkilega stórt og flott skref hjá RSK og eiga þau heiður skilið fyrir þetta framtak.

Hér má sjá vidjó frá RSK sem útskýrir aðeins ferilinn.

 


Besti aldurinn til að stofna fyrirtæki?

Ég hef oft átt samtöl við fólk sem langar til að stofna fyrirtæki en finnst það ekki alveg vera á rétta aldrinum eða rétta tímanum í lífi sínu. En ég hef líka hitt og unnið með 14 ára gömlum frumkvöðli og 60 ára gömlum frumkvöðli og allt þar á milli. Því er gaman að velta fyrir sér hvort það sé eitthvað til sem mætti kalla besti aldurinn til að stofna fyrirtæki.

Sjálfur byrjaði ég mitt fyrsta frumkvöðlaævintýri 14 ára gamall þótt svo að ég hafi svo ekki stofna mitt fyrsta formlega fyrirtæki fyrr en 23 ára gamall. Ég er í dag 37 ára og hef því farið út í ýmis frumkvöðlaævintýri á þessum 23 árum, svo ég get talað um þetta aldursbil með smá reynslu á bak við mig og ég ætla að fleygja fram smá kenningum um þau tímabil sem ég á ennþá eftir að upplifa.

Það sem ég hef tekið eftir í sjálfum mér, og endurspeglar líklega flesta, er að drifkrafturinn er öflugastur á táningsaldrinum og vel inn á þrítugsaldurinn, eftir það dvínar hann aðeins. Á sama tíma dvínar áhættusæknin og maður fer að vilja fara aðeins öruggari leiðir og þá ekki síst þegar maður fer að eignast fjölskyldu og bera ábyrgð á fleirum en sjálfum sér.

Á móti kemur að með árunum kemur ýmis viska sem getur gert ferilinn töluvert auðveldari. Þetta getur verið aukin þekking á tilteknum iðnaði, viðskiptum, tækni eða bara hvernig heimurinn virkar. Og svo lærir maður líka hvernig maður á betur að nýta tíma sinn og þannig getur maður oft afrekað mun meira á sama tíma og maður gerði a yngri árum. 

En burt séð frá drifkarfti, visku og því öllu þá held ég að það sé einn hlutur sem trompar allt annað þegar það kemur að rétta tímanum til að stofna fyrirtæki en það er þegar andagiftin kemur yfir mann. Alveg sama á hvaða aldri maður er þá er alltaf erfitt að stofna og byggja upp fyrirtæki og því mjög mikilvægt að vera með spennu og ástríðu fyrir viðskiptahugmyndinni.

Þannig jú aldur hefur eitthvað að segja um orku manns og áhættusækni en staðreyndin er sú að það er hægt að stofna fyrirtæki á öllum aldri.

 


Að losna við slæma meðeigendur

Ég ætla ekki að segja ALLIR (þótt ég hugsi það), frekar ætla ég að segja FLESTIR, já flestir þeir stofnendur sem hafa stofnað fyrirtæki með einum eða fleiri meðeigendum hafa á einhverjum tímapunkti þurft að velta fyrir sér "hvernig losna ég við þennan hrikalega meðeigenda".

Þarna er ég ekki að segja að það séu slæmir meðeigendur í öllum hópum stofnenda heldur frekar að það að stofna fyrirtæki með öðrum aðilum sé mjög erfitt og krefjandi verk og því ekki skrítið að það komi upp erfiðar stöður og ósætti manna á milli. Margir vilja líkja þessu við það að vera í hjónabandi og það er margt til í þvi en veltið nú fyrir ykkur að það tekur flesta einstaklinga mörg ár af stefnumótum og sambúð áður en þeir viti hvort viðkomandi sé sá rétti til að giftast og þrátt fyrir það endar um helmingur hjónabanda með skilnaði. Er þá ekki líklegt að stofnun fyrirtækis, sem oftar en ekki er ákveðin í núinu í þokukenndu ástandi eldmóðs á tíunda kaffibolla, sé líkleg til að enda illa? Svo má einnig færa þau rök að það sé auðveldara að losna úr hjónabandi heldur en að losna við meðeigenda enda getur meðeigandi neitað að selja og hvað gera lagsmenn þá?

Fyrirbyggjandi leiðir

Besta leiðin til að koma í veg fyrir að allt fari í háaloft þegar einn eða fleiri meðeigendur eru ósáttir er að hafa í upphafi rekstursins sett skírar línur um hvað skuli gera ef upp koma ósætti. Það er hægt að gera með skriflegu samkomulagi eða svokölluðu hluthafasamkomulagi, og notast þá við klausu sem ég hef heyrt kallað "shotgun claus" og stundum rússnesk rúlletta en sú klása tilgreina að ef upp koma ósætti getur sá ósátti óskað eftir að hinir eigendurnir geri honum tilboð í hans hlut en ef hann tekur ekki tilboðinu þá verður hann að kaupa hina eigendurnar út á sama verði. Þannig er hægt að losna við öll rifrildin og klára þetta á nokkrum dögum frekar en að hafa þetta hangandi yfir manni næstu mánuði og ár.

Skilningsríki meðeigandinn

Ef þú ert svo heppinn að semja um útgöngu við meðeigenda sem er rólegur, yfirvegaður og tilbúinn að ræða þá ertu heppin en það er engu að síður langt til lands. Nú þurfið þið að komast að samkomulagi um hversu mikils virði hans hluti er og hvernig þú ætlar að fara að því að greiða fyrir þann hluta. Verðmatið er yfirleitt sérstaklega erfitt í ungum fyrirtækjum sem eru með engar, litlar eða óreglulegar tekjur, þá eru engin viðmið í því hvernig eigi að verðmeta þetta og yfirleitt er það þá bara samkomulagsatriði.

Brjálaði meðeigandinn

Svo er það alltaf hættan á að þurfa díla við pirraðan og reiðan meðeigenda sem heimtar himinháar upphæðir fyrir sinn hluta og neitar að selja nema fá það. Ef þú ert í þessari stöðu þá finn ég til með þér og óska þér góðs gengis, í svona tilfellum getur góður sálfræðingur verið jafn mikils virði og góður lögfræðingur því svona lagað tekur mikið á andlegu hliðina. Í svona tilfellum er mikilvægt að gera sér grein fyrir hversu mikið þú ert tilbúinn að greiða fyrir fyrirtækið og vera svo tilbúinn að loka því ef hann heimtar meira en það, ef viðkomandi trúir að þú munir gera það þá er hann kannski líklegur til að samþykkja að fá eitthvað frekar en ekki neitt. Svo þarftu einnig að skoða þann möguleika að loka bara fyrirtækinu, oft er það ódýrara og minni fyrirhöfn að byrja alveg upp á nýtt heldur en að standa í endalausum rifrildum við aðila sem skortir rökhugsun.

Besti kosturinn er að sjálfsögðu sá að forðast öll rifrilid og leiðindi sem gætu orðið til þess að meðeigendur verði ósáttir en ef þið lendið einhvertímann í einhverju svona þá óska ég ykkur góðs gengis.

 


Frumkvöðlar í prenti

Flestar framfarir í íslensku frumkvöðlaumhverfi hafa átt sér stað þegar grassrótin sjálf þ.e.a.s. frumkvöðlarnir sem starfa í umhverfinu, taka sig til og setja í framkvæmd þær breytingar sem þeir vilja sjá á umhverfinu. Og þökk sé grassrótinni þá hefur umhverfið stöðugt haldið áfram að verða betra og betra. Nýjustu ummerki áframhaldandi þróunar umhverfisins má nú finna bæði í sjónvarpinu í formi þáttarins Toppstöðvarinnar og í prenti í ný útgefinni bók með sama nafn.

12239603_10153393449088515_8211711442557273461_nEf þið hafi ekki nú þegar keypt ykkur eintak af Toppstöðinni og sömuleiðis nokkur eintök til að nýta í jólagjafir fyrir áhugasama fjölskyldumeðlimi og vini, þá mæli ég með að þið gerið það. Bæði til að undirstrika það fyrir ykkur sjálfum og fyrir þeim sem ykkur þykir vænt um að allt sé hægt og líka til að styðja við þá frumkvöðla sem lögðu tíma sinn, vinnu og fjármuni í að gera þessa bók að veruleika.

 

Bókin samanstendur af greinum frá 40 íslenskum frumkvöðlum (þar á meðal mér sjálfum) sem deila í henni ýmsum góðum ráðum sem þeir hafa lært í gegnum viðskiptaævintýri sín. Það eru því margir mjög góðir fróðleiksmolar þarna sem koma frá reyndum frumkvöðlum.

Í raun vildi ég einnig skrifa þessa blogg færslu í þakklætisskyni til allra þeirra frumkvöðla sem hafa lagt hönd sína á plóginn til að gera íslenskt frumkvöðlaumhverfi betra. Vonandi veitir vinna þeirra þér innblástur til að bretta upp ermarnar ef þér finnst eitthvað mega betrumbæta í frumkvöðlaumhverfinu eða heiminum í heild.

Við erum öll saman í þessu og því betra sem frumkvöðlaumhverfið verður því betri tækifæri munum við eiga á að skapa alþjóðlega fyrirtæki sem ná velgengni.


Frumkvöðlaskattur?

Ég hef í gegnum árin stofnað nokkur fyrirtæki hér á Íslandi og að mörgu leiti er það ekki svo flókinn ferill, sérstaklega þegar maður er búinn að fara í gegnum hann einu sinni áður. Það sem hefur þó alltaf pirrað mig afskaplega mikið er sú staðreynd að kostnaðurinn við að skrá fyrirtæki hér á Íslandi er kr.130.500-.

Það er afar ólíklegt að raunkostnaður ríkisskattstjóra við það að skrá fyrirtæki hjá sér sé svo mikill enda líklega ekki svo mikil vinna fyrir starfsmenn skattstjóra. En ef raunkostnaður þeirra er ekki svo mikill þá hlýtur það að þýða að allt það sem kemur inn umfram raunkostnaðinn sé tækifæri fyrir ríkið að hagnast á framtakssemi íslenskra frumkvöðla þ.e.a.s. að í staðinn fyrir að ríkið sé að styðja við fátæka frumkvöðla, sem eru að reyna byggja upp virði og störf fyrir sjálfa sig og aðra, hefur ríkið ákveðið að reyna skattleggja framtakssemi þeirra.

Allir þeir sem hafa tekið að sér það mikla og erfiða verkefni að byggja upp eigin rekstur gera sér grein fyrir hversu rosalega erfitt það er og hversu mikilvægt það er að hver einasta króna sé nýtt á sem bestann hátt. Hundrað og þrjátíu þúsund krónur eru því yfirleitt mjög mikill peningur fyrir þessa frumkvöðla og í flestum tilfellum stærsti kostnaðarliður þeirra á upphafsstigum rekstursins. Í öllum öðrum löndum sem ég hef kynnt mér frumkvöðlastarf er skráningarkostnaðurinn mun lægri og því má með sanni segja að ríkisskattstjóri sé að veikja samkeppnisstöðu íslenskra frumkvöðlafyrirtækja á alþjóðamarkaðnum með því að skattleggja þau svona hárri upphæð strax í upphafi.

Samanburður á skráningarkostnaði fyrirtækja.

Ísland: kr.130.500-
Kanada: kr.40.000- (326% dýrara á Íslandi)
Svíþjóð: kr.33.000- (395% dýrara á Íslandi)
Danmörk: kr.16.700- (781% dýrara á Íslandi)
USA: kr.9.000- (1.450% dýrara á Íslandi)

* Ég hef einnig heyrt að það sé stundum frítt að skrá fyrirtæki á norðurlöndunum ef um er að ræða nýsköpun en ég hef ekki kynnt mér það nánar.

Lágmarkshlutafé sem þarf að leggja í fyrirtæki á Íslandi (kr.500.000-) er að mínu mati einnig alltof hátt og algjör óþarfi en ég ætla láta þá umræðu bíða betri tíma.

Ég tek það skýrt fram að ég hef ekkert á móti skattlagningu enda er það mikilvægt til að tryggja gott samfélag fyrir okkur öll en mér finnst það mjög ósanngjarnt að vera rukka svo há gjöld af fólki sem er að reyna skapa virði fyrir samfélag okkar.

Endileg deildu með okkur skoðunum þínum á þessu máli hér fyrir neðan.

 


Á að blogga á ensku?

10704014_10153576323706002_609114480533184479_n

Ég hef mikið verið að velta fyrir mér hvað ég eigi að gera við frumkvöðlar.is þar sem bloggið fer að verða meira takmarkandi fyrir mig eftir því sem ég sjálfur vex og þróast sem frumkvöðull. Í dag eru mínir mestu vaxtamöguleikar erlendis og flest öll mín samskipti eiga sér stað við erlenda aðila út um allan heim. Því meiri tíma sem ég eyði erlendis því meira geri ég mér grein fyrir því hversu mikilvægt það er að hætta að takmarka sig við eitt land og byrja hegða sér sem alþjóðlegur frumkvöðull. Eitt af skrefunum í áttina að því er það að færa meira af samskiptum sínum yfir á ensku og því hef ég ákveðið að minnka skriftir mínar hérna á frumkvöðlar.is og einbeita mér í auknu mæli að því að skrifa á ensku á hinni bloggsíðunni minni VikingEntrepreneur.com.

 


Hvað þarf til að byggja upp gott umhverfi fyrir frumkvöðla á Íslandi?

Þorsteinn B. Friðriksson stofnandi og forstjóri Plain Vanilla flutti þennan fyrirlestur á Haustráðstefnu Advania. Ég hef í raun engu við þetta að bæta hjá honum Þorsteini, frábærlega góð samantekt hjá honum og yndislega gaman að fylgjast með velgengni QuizUp.


Klífðu fjöll!!!

Ímyndaðu þér (ef það er ekki nú þegar staðreynd) að þú hafir ekki mikla reynslu af fjallgöngu, hafir kannski mesta lagi gengið upp á Esjuna en lítið annað en það. Svo einn daginn þegar þú ert að keyra um einhvern sveitaveg í fjarlægju landi kemurðu að risastóru fjalli með bratta klettaveggi og þakið í snjó, og þú segjir við sjálfan þig "Þetta er fallegt fjall, ég ætla að klífa það!". Þrátt fyrir að öll almenn skynsemi segji þér að þú hafir enga reynslu né getu til að klífa slíkt fjall þá tekur þú staðfasta ákvörðun.

Staðreyndin er að sjálfsögðu sú að ef þú myndir óundirbúinn reyna að klífa fjallið myndi líklega fara illa fyrir þér. Þú þarft fyrst að afla þér upplýsinga um fjallið, útvega rétta búnaðinn, æfa þig á minni fjöllum, fá leiðbeiningar frá reyndari fjallgöngumönnum, lesa bækur um það, kannski fara á námskeið og sitthvað fleira til að tryggja það að þú farir þér ekki að voða. En þegar það allt er komið er í raun ekkert sem kemur í veg fyrir það að þú gætir náð markmiði þínu.

Nákvæmlega það sama á við um frumkvöðlaferilinn, hann er alveg eins og að klífa risa stórt og ókunnugt fjall. Ef þú hlustar á skynsemina þá segjir hún þér að þú hafir enga reynslu af því að stofna fyrirtæki, að þú hafir enga þekkingu á því og að þú munir líklega enda sem gjaldþrota aumingi. Þú þarft að horfa fram hjá þeirri "skynsemi" sem samfélagið er búið að kenna þér og taka staðfasta ákvörðun. Ákvörðunin er alltaf fyrsta skrefið í áttina að því að klífa öll fjöll, svo tekur við undirbúningurinn, fyrr en varir ertu orðin hæfur til að takast á við verkefnið, "skynsemin" þagnar og þú klífur fjallið.

Það magnaða við það að fara út í fyrirtækjarekstur er það að þú þarft stöðugt að takast á við ný fjöll sem búa yfir nýjum hættum og erfiðleikum sem þú þarft að finna lausn á. Þegar þú stofnar fyrst fyrirtækið þarftu að finna út úr öllum lagalegu hlutunum við það að stofna fyrirtæki og horfast í augu við "skynsemina" sem segir þér að þetta fari illa. Svo þarftu að fara út fyrir þægindasvæðið þegar þú yfirgefur öruggu vinnuna þína og ferð að vinna að fullu að fyrirtækinu nýja. Svo þarftu að vaxa og gera stórar fjárfestingar, opna dótturfyrirtæki erlendis, reyna selja stórum fyrirtækjasamsteypum vöru þína, veðsetja fasteignina til að fyrirtækið geti vaxið og svo koll af kolli. Og hver einasta staðfasta ákvörðun sem þú tekur um að halda áfram felur í sér að þú þurfir að klífa nýtt fjall og eins og alltaf þegar maður stendur við fjallsræturnar virðist það vera ókljúfanlegt en ef þú leitar hjálpar frá þeim sem hafa meiri reynslu, aflar þér upplýsinga og undirbýrð ferðina vel þá muntu ná að klífa það fjall.

Það fara bráðum að vera komin 10 ár frá því ég stofnaði mitt fyrsta fyrirtæki en ég er samt reglulega að klífa ný fjöll og það er alltaf jafn erfitt þegar maður stendur við fjalsræturnar en á sama tíma alltaf jafn gefandi þegar maður kemst á toppinn. Fyrir nokkrum mánuðum síðan fólst fjallið mitt í því verkefni að stofna mitt fyrsta fyrirtæki í erlendu landi og ég stóð við fjalsræturnar, horfði upp og fannst þetta vera ómögulegt verk, ég hafði enga reynslu og vissi ekkert hvernig ég ætti að fara að. En þegar ég loksins tók staðfasta ákvörðun um að gera það þá leitaði ég mér ráðleggingar hjá reyndari aðilum, fékk aðstoð og upplýsingar og lét verða af því. Nú stend ég fyrir framan nýtt fjall sem ég er kvíðinn en afar spenntur fyrir að klífa.

Ekki láta fjallið vinna, skiptu verkefninu niður í minni hluta og sigrastu á hverjum hluta fyrir sig og þá er ekkerf fjall of stórt til að klífa.

Klífðu fjöll!!!


Breytingar hjá Frumkvöðlar.is

Frumkvöðlar.is byrjaði upphaflega bara sem persónulegt blogg en þar sem ég hef lifað og hrærst í frumkvöðlaheiminum í all langan tíma þá snérust allar greinar mínar um fyrirtækjarekstur og frumkvöðlastarf. Ég verð að viðurkenna að mér finnst hálf undarlegt að hugsa til þess að ég hafi skrifað mína fyrstu bloggfærslu á vefinn 12.maí 2010 en það þýðir að ég sé búinn að vera skrifa á þennan vef í meira en 4 ár. Ég var aldrei með nein sérstök plön varðandi vefinn og var meira bara að gera þetta sjálfum mér til gamans. Hugsanlega spilaði það einnig inn í þetta að ég hafði engan til að læra af þegar ég stofnaði mitt fyrsta fyrirtæki og fannst ég því að vissu leiti knúinn til að reyna deila reynslu minni.

Greinarnar sem ég hef skrifað á vefinn hafa verið heldur óreglulegar enda skrifa ég einungis þegar ég hef tíma og þegar ég hef frá einhverju áhugaverðu að segja. Sem dæmi þá skrifa ég yfirleitt flestar greinarnar þegar ég sjálfur er að safna mér upplýsinga um eitthvað ákveðið efni fyrir fyrirtækið mitt og deili þeim svo áfram í formi greinar. Mig er þó farið að langa núna til að breyta vefnum úr því að vera bara blogg yfir í það að verða eitthvað meira og gera í því að reyna safna raunverulegum fróðleik sem virkilega nýtist öðrum frumkvöðlum. Því miður þá hef ég ekki þann tíma sem þarf til að vera stöðugt að skrifa greinar og safna að mér efni enda er ég staddur erlendis að vinna í því að byggja upp mitt eigið fyrirtæki. En þess í stað hef ég nú ráðið nýjan ritstjóra til að halda utan um vefinn fyrir mig.

Ásgeir Ingvarsson nýr ritstjóri Frumkvöðlar.is
e150e5c07e4aa67014562034449d84bcFyrir nokkrum árum hitti ég Ásgeir þegar hann var að skrifa grein um mig fyrir Morgunblaðið og við höfum haldið góðu sambandi síðan þá. Ég vissi það að hann hefði mikinn áhuga á frumkvöðlastarfi og hann þekkti einnig vel til viðskiptaumhverfisins þar sem hann hefur skrifað mikið um það í gegnum árin. Ég ákvað því að fá hann til liðs við Frumkvöðlar.is til að aðstoða að búa til meiri stöðugleika í kringum vefsíðuna. Hann mun skrifa reglulegar greinar inn á vefsíðuna og sjá til þess að þar sé ávallt eitthvað nýtt og spennandi að finna.

Ég mun að sjálfsögðu halda áfram að skrifa greinar annað slagið eftir því sem tími gefst til og mig dreymir líka um að reyna virkja nokkra reynslubolta í frumkvöðlaheiminum og fá þá til að skrifa greinar einnig. Það er ekki ennþá ljóst hvernig vefsíðan mun halda áfram að þróast en við reynum þó að halda áfram með það markmið að fræða frumkvöðla á öllum stigum fyrirtækjaferilsins.

Það væri afskaplega gaman að heyra frá ykkur lesendunum um hvað þið mynduð vilja sjá okkur fjalla um eða hvernig þið mynduð vilja sjá vefsíðuna þróast. Einnig ef einhver ykkar er tilbúin að hjálpa okkur að einhverju leiti við að gera vefsíðuna betri þá fögnum við slíku.

Eigið frábæran dag :)


Capital Factory

Ég rakst á þetta afar skemmtilega vidjó um Capital Factory inn á TechCrunch og það minnti mig óneitanlega á það þegar ég var að ferðast um Bandaríkin á síðasta ári. En þá kom ég við í Capital Factory og tók þar smá vinnutörn eins og sjá má á sönnunargögnunum hér fyrir ofan. En það sem meira er þá sýnir þetta myndband afskaplega vel hversu mikilvægt það er að vinna í rétta umhverfinu, umkringdur rétta fólkinu og rétta hugarfarinu.

Ég hef undanfarin ár alltaf kosið að starfa í frumkvöðlasetrum þar sem mér finnst það yfirleitt vera besta umhverfið til að veita mér innblástur og til að beintengjast "stuðningshópi frumkvöðla". Reyndar fyrst þegar ég stofnaði núverandi fyrirtæki mitt starfaði ég að mestu leiti á kaffihúsum en fljótlega flutti ég svo fyrirtækið í Hugmyndahús Háskólana sem var virkilega skemmtilegt umhverfi til að vinna í fullt af mjög skapandi fólki, í raun leitt að það hafi liðið undir lok. Þaðan flutti ég svo í Kvosina sem er á frumkvöðlasetur á vegum NMI og hefur farið afskaplega vel um Bungalo þar. Svo þegar ég flutti með fyrirtæki mitt hérna út til Kanada þá kom bara til greina einn staður sem hugsanlegt skrifstofurými fyrir fyrirtækið en það er Volta sem er aðal frumkvöðlasetrið hér í Halifax og hjálpaði sú ákvörðun mér mikið við að læra fljótar inn á rekstrarumhverfið hér úti.

Heima hefur mikið breyst í þessum málum á undanförnum árum og má meðal annars nefna frumkvöðlasetrin sem NMI eru með en einnig Innovation House út á Seltjarnarnesi en síðast þegar ég leit þar við var allt iðandi í lífi þar og mörg öflug fyrirtæki. Ég hvet því sem flesta til að skoða þessi mál betur og reyna komast inn í gott umhverfi til að rækta fyrirtækin.


Þarftu að greiða þér laun?

Ég fékk skemmtilegt bréf frá frumkvöðli sem var að hefja rekstur og var að velta fyrir sér þeim undarlegu lögum sem fjalla um það að stofnandi sé skyldugur að greiða sér út laun frá og með þeim tíma sem fyrirtæki er stofnað. Þessi lög hafa oft og mörgu sinnum komið upp í samtölum á hinum ýmsu viðburðum sem ég hef farið á þar sem frumkvöðlar eru allir jafn hissa á að slík lög séu til staðar og fæstir virðast þeir hafa farið eftir þeim. Það er náttúrulega alltaf slæmt að brjóta lög en ennþá verra ef lögin eru það illa sett fram að maður geti ekki farið eftir þeim.

Á vefsíðu RSK má finna eftirfarandi:

"Maður sem starfar við eigin atvinnurekstur á að reikna sér endurgjald (laun) fyrir þá vinnu. Með þessi laun fer á sama hátt og almennar launagreiðslur til launþega, þ.e. reikna þarf af þeim staðgreiðslu opinberra gjalda, greiða tryggingagjald og iðgjald í lífeyrissjóð.

Reglan á bæði við um mann sem stundar atvinnustarfsemi í eigin nafni (eigin kennitölu) og mann sem starfar við atvinnurekstur eða starfsemi sem rekin er í sameign með öðrum, eða við atvinnurekstur lögaðila þar sem hann er ráðandi aðili vegna eignar- eða stjórnunaraðildar."

Allir þeir sem hafa farið út í það að stofna frumkvöðlafyrirtæki gera sér grein fyrir því að það er nær óhjákvæmilegt að maður þurfi að starfa við það launalaust í einhverja mánuði eða jafnvel ár áður en þau fara að skila nægum tekjum til að hægt sé að greiða sér manni sæmandi laun. Það er líka áhugavert að skoða viðmiðunarlaunin sem RSK ætlast til að maður greiði sér en ég held að fæstir frumkvöðlar séu að greiða sér út slík laun þótt svo þeir séu komnir eitthvað lengra inn í ferilinn.

Ég hef áður fjallaðu um hversu dýrt það er fyrir stofnendur að greiða sér laun og ég er ennþá á því að stofnendur eigi að reyna greiða sér út eins lítil laun og þeir geta fyrstu mánuðina og árin vegna þess kostnaðar.

Svarið sem ég gaf þessum skemmtilega frumkvöðli sem skrifaði mér var eftirfarandi:

"Ég hef sjálfur stofnað nokkuð fyrirtæki og hef oft einfaldlega sleppt því algjörlega að greiða mér laun til að byrja með og hef aldrei fengið neina athugasemd út á það. Ég hef einnig rætt við fólk innan RSK sem eru að vissu leiti sammála mér að þetta væri fáranleg regla og sú tilfinning sem ég fékk frá þeim var sú að þetta væri bara eitthvað sem væri ekki mikið farið eftir eða allavegana ekki mikið reynt að klekkja á nýsköpunarfyrirtækjum sem ekki greiða sér út laun. 

Mér skilst að ef þú ert í annari vinnu eða í námi þá gildir þessi regla ekki og þú þarft ekki að greiða þér laun. Ég hugsa líka ef fyrirtækið hafi ekki efni á að borga þér laun þá myndi engin fara að elta þig uppi fyrir að hafa ekki gert það. Ég myndi því halda að þetta væri ekki eitthvað sem þú þyrftir að hafa áhyggjur af."

Ég er að sjálfsögðu engin endurskoðandi eða lögfræðingur og ætla því ekki að þykjast vera neinn sérfræðingur í þessum málum að öðru leiti en því að ég hef farið í gegnum þennan ferill nokkrum sinnum. Ég ætla því að biðja þá sem hafa reynslu eða þekkingu á þessum málum að deila þeim með okkur hér fyrir neðan, ég hefði gaman af því að vera leiðréttur ef ég er að fara rangt með eitthvað hér.