Ekki halda hugmyndinni leyndri

Frumkvöðlar með góðar viðskiptahugmyndir eru oft í þeim sporum að vita ekki hvort óhætt er að tala um hugmyndina við aðra. Hvað ef einhver stelur hugmyndinni og gerir þannig að engu drauma um ríkidæmi og heimsfrægð? Hvað ef þú ert Tesla og einhver óprúttinn Edison liggur við hlustir?

Raunin er samt að yfirleitt er sáralitil áhætta tekin með því að tala um viðskiptahugmynda oft, víða og við marga. Ávinningurinn er alla jafna mun meiri en áhættan.

- Að búa til vöru eða fyrirtæki úr hugmynd er meira en að segja það. Yfirleitt kostar það áralangt strit og miklar persónulegar fórnir að komast  í mark og uppskera árangur erfiðisins. Þetta kallar á óbilandi trú á viðskiptahugmyndina, sem er eitthvað sem fólk hefur alla jafna ekki nema það hafi fengið hugmyndina sjálft.

- Með því að tala við aðra færðu endurgjöf á hugmyndina og getur komið auga á vankanta og möguleika sem þér höfðu yfirsést. Betra að fá þessa endurgjöf fyrr en seinna.

- Þú ert líka að þjálfa söluræðuna með hverju samtali, og ert fyrir vikið betur í stakk búinn til að fá væntanlega fjárfesta og samstarfsmenn á þitt band.

- Með því að tala við aðra ertu að hvetja sjálfan þig áfram. Það er hálf-neyðarlegt að segja einhverjum frá mergjaðri hugmynd sem þú vilt gera að veruleika, hitta þennan sama einstakling ári síðar og hafa ekki færst skrefi nær markmiðinu. Hugmyndir sem haldið er leyndum rykfalla mun auðveldar ofan í skúffu.

- Ekki halda að einhvers staðar annars staðar sé ekki einhver að vinna að alveg sömu hugmynd. Góðar hugmyndir verða oft til á mörgum stöðum á sama tíma og það er framkvæmdin sem ræður úrslitum en ekki hugdettan.

- Oft ræður útfærslan meiru um árangurinn en hugmyndin sjálf. Þú hefur örugglega einstaka sýn á það hverju þú vilt áorka, og sérð fyrir þér smæstu smáatriði, hugsar um viðskiptahugmyndina þína vakinn og sofinn. Hugmyndaþjófarnir mega sín lítils gagnvart þessu. Það er eitt að framleiða snjallsíma og annað að framleiða iPhone.

- Jafnvel ef hugmyndinni er stolið, og hugmyndaþjófurinn verður ríkur af, þá verður það ekki af þér tekið að þú ert hugmyndamanneskja. Þú færð eflaust aðra og enn betri hugmynd áður en langt um líður, en hugmyndaþjófurinn verður alltaf ófrumlegur og undir meðallagi.

…svo geturðu alltaf farið Winklevoss-leiðina og staðið uppi 17 milljörðum króna ríkari.

 


4 þrep í frumkvöðlarekstri

Það að stofna frumkvöðlafyrirtæki og ná árangri er nær alltaf erfiðara og flóknara heldur en fólk gerir sér grein fyrir. Flestir virðast halda að þetta sé eitthvað sem gerist á einhverjum mánuðum en staðreyndin er sú að það að byggja upp stöðugt fyrirtæki tekur yfirleitt að lágmarki 2-3 ár af ævi þinni.

Ferlinum við að búa til stöðugt fyrirtæki má skipta upp í þessi 4 þrep.

11. Þrep: Eldmóðurinn
Þegar maður fær fyrst hugmyndina er allt svo skemmtilegt og spennandi, það virðast ekki vera nein takmörk og það er nokkuð augljóst að þessi hugmynd eigi eftir að verða milljarða króna virði í náinni framtíð. Á þessu tímabili fara sumir frumkvöðlar inn í "incubators" eða frumkvöðlasetur og vinna myrkranna á milli við hugmyndina. Þetta er tímabilið sem lætur frumkvöðalumhverfið líta út fyrir að vera töff og skemmtilegt. Þetta tímabil varir yfirleitt bara í nokkrar vikur eða mánuði.


942451_637189819644430_1875666473_n

2. Þrep: Núðlusúputímabilð
Hérna byrjar alvaran, þú ert með hugmynd sem þú ert búinn að pússa aðeins til en hún er ennþá ekki farin að skila neinum tekjum. Á þessum punkti þarftu að taka ákvörðunina hvort þú sért raunverulega tilbúinn að veðja á hugmyndina þína því næstu mánuði þarftu að vinna í fullu starfi að hugmynd sem er ekki að gefa þér neinar tekjur. Ertu tilbúin að vinna launalaust, fara út fyrir þægindasvæðið og taka áhættu? Fæstir eru tilbúnir að taka skrefið inn í þetta tímabil og af þeim sem taka skrefið gefast margir upp á meðan á þessu tímabili stendur. Þetta tímabil varir yfirleitt í 12-24 mánuði.


slouch-6363. Þrep: Ábyrgðin
Á þessu tímabili er fyrirtækið farið að vaxa og þú farinn að ráða inn starfsmenn, nú þarftu allt í einu að fara taka á þig miklu meiri ábyrgð heldur en þú hefur gert fram að þessu. Vinnutímar þínir eru langir þar sem verkefnalistinn er langur og þú hefur aldrei efni á því að ráða alla þá starfsmenn sem þarf til að sjá til þess að allt gangi vel, þú verður að sjá til þess að allt rúlli vel í fyrirtækinu og vinna frameftir ef eitthvað þarf að klárast. Þú þarft að sjá til þess að þú eigir alltaf nægar tekjur til að borga starfsmönnum þínum, þú þarft að halda utan um þá og funda með þeim reglulega til að vera viss um að þeir séu að skila sinni vinnu. Ef tekjurnar lækka eða eitthvað óvænt kemur upp á gætirðu þurft að hagræða í fyrirtækinu og reka einhvern af starfsmönnum þínum. Í þessu þrepi eru þetta allt í einu hætt að vera leikur og alvaran tekur við.


World-Domination-Summit

4. Þrep: Heimsyfirráð eða stöðnun.
Í fjórða og síðasta þrepinu kemur raunverulega í ljós hvers megnugt fyrirtækið er, nú þarftu að taka ákvörðun um hvort þú ætlir að staðna í stað eða taka áhættuna og reyna vaxa og verða stórt alþjóðlegt fyrirtæki. Ef þú þorir ekki að taka áhættuna á því að vaxa mun fyrirtækið líklega halda áfram að lifa en starfið þitt og fyrirtækið mun breytast í rútinu sem mun aldrei gera neina stórvægilega hluti en mun þó engu að síður halda áfram að bjóða starfmönnum þínum upp á störf og skapa tekjur fyrir þig. Ef þú ákveður að taka áhættuna og veðja á að fyrirtækið þitt getið vaxið með veldishraða þá áttu hættu á því að drepa fyrirtækið, en aftur á móti ef sú áætlun gengur upp eru engar takmarkanir á því hvað fyrirtæki þitt mun geta vaxið og þú munt annað hvort geta rekið stórt alþjóðlegt fyrirtæki eða selt það og exitað með nóg af pening í bankanum.

 

Í hvaða þrepi ert þú og ertu tilbúinn að fara í gegnum öll fjögur þrepin?


Sannleikurinn um að stofna fyrirtæki í öðru landi

Það eru núna 4 ár frá því að ég stofnaði Búngaló ehf. á Íslandi og fór út í það að aðstoða íslenskar fjölskyldur við að leigja út sumarhús sín í gegnum netið. Eins og með flestan fyrirtækjarekstur þá voru fyrstu tvö árin erfið en eftir það fór að ganga betur og í dag er fyrirtækið komið í stöðugan rekstur heima á Íslandi og fyrir utan sjálfan mig er ég með 3 starfsmenn sem vinna að rekstrinum hér heima.

En allt frá því að hugmyndin varð fyrst til hef ég stefnt að því að fara með það erlendis og gera það að alþjóðlegu fyrirtæki. Reyndar eru 70% af viðskiptavinum heima á Íslandi erlendir ferðamenn en það er þó langt frá því að geta talist alþjóðleg fyrirtæki og ég vildi fara skrá inn erlend sumarhús út um allan heim. Ég ætla ekki að fara út í rökræðuna í þessari grein um hvort ég hefði átt að gera þetta fyrr en ég gerði, ég ætla frekar að segja ykkur frá því hvað ég komst að þegar ég loksins lét verða af því að fara út á alþjóðlega markaðinn og stofnaði dótturfyrirtæki í Kanada.

Að "Incorporate"-a
Það er í raun ekkert flóknara að stofna fyrirtæki erlendis  heldur en það er að gera það heima. Lykillinn að því er að finna góðan lögfræðing sem hefur reynslu af því að vinna með frumkvöðlafyrirtækjum og fá hann til að sjá um alla pappírsvinnuna. Kostnaðurinn er svo í nær öllum löndum mun minni en á Íslandi og jafnvel með lögfræðikostnaðinum er hann oft minni heldur en bara skráningarkostnaðurinn hér heima á Íslandi. Sem dæmi þá kostar það um kr.40.000 að stofna fyrirtæki í Kanada (þar sem ég stofnaði dótturfyrirtæki) á meðan að það kostar 140.000- hérna á Íslandi, þannig þið eigið alveg eitthvað aflögu til að borga lögfræðingnum. Mörg lönd eins og t.d. USA eru ódýrari en Kanada.

Gjaldeyrishöftin
Það flóknasta, tímafrekasta og líklega dýrasta, við það að stofna fyrirtækið erlendis var ekki það að stofna sjálft fyrirtækið í framandi landi. Nei það voru gjaldeyrishöftin sem gerðu mér, og mörgum öðrum frumkvöðlum, mjög erfitt fyrir. Ég þurfti að ráða mér lögfræðing sem kostaði dágóðan skilding og fá hann til að senda umsókn til seðlabankans þar sem hann þurfti að sýna fram á að við yrðum að stofna fyrirtæki erlendis til að vaxa, sýna í hvað peningarnir sem við færum með úr landi myndu vera notaðir og að þetta myndi svo örugglega allt skila sér margfalt til baka til íslenska ríkisins. Sem betur fer var ég með góðan lögfræðing og ég fékk samþykki fyrir þessu á einungis 1 mánuði en ég hef heyrt dæmi um að slíkar umsóknir hafi tafist um 4-5 mánuði.

Bungalo skrifstofan út í Kanada

Back to basics
Ég verð að viðurkenna að mér var í senn skemmt og pirraður þegar ég áttaði mig á því að ferillinn úti við það að koma fyrirtæki í gang þar var í raun alveg nákvæmlega sá sami og ég hafið farið í gegnum hér heima þegar ég stofnaði fyrirtækið fyrst. Að leita að skrifstofu, setja upp síma, ráða fólk, búa til réttu tengslin og hitta tugi manna í kaffibolla og spjall, finna ráðgjafa, endurforrita mikið af kerfunum til að henta nýjum kringumstæðum og ótal margir aðrir hlutir sem ég hafði gert áður.

Tungumálið
Eitthvað sem ég hafði ekki hugsað út í var tungumálið. Ég ætlaði alltaf að stofna fyrirtæki í einu af norðurlöndunum en í dag er ég afskaplega fegin því að ég stofnaði það í Kanada því þar skil ég tungumálið.  Jú auðvitað hefðu allir á norðurlöndunum skilið ensku og getað þýtt fyrir mig en það að geta tekið virkan þátt í söluferlum, samningagerðum og fleira er mjög mikilvægt þegar þú ert í litlum fyrirtækjum og það er einungis hægt ef þú skilur móðurmálið í því landi.

Frumkvöðlar eru allstaðar eins
Ég hef haft þá strategíu þegar ég heimsækji önnur lönd að reyna alltaf að hitta þarlenda frumkvöðla og kynnast frumkvöðlaumhverfunum þar. Það sem ég hef komist að er að frumkvöðlar eru yfirleitt eins í öllum löndum, þetta eru opnir og hressir einstaklingar sem leggja metnað sinn í það sem þeir gera. Ég ákvað því að setja upp skrifstofu mína inn í frumkvöðlasetri í Kanada og það hefur gert mér auðveldara fyrir að kynnast öðrum stofnendum sem hafa svo getað ráðlagt mér með hina ýmsu hluti sem ég hefði líklega aldrei getað fundið út úr einn míns liðs.

Það að stofna fyrirtæki erlendis krefst engar rosalegrar sérþekkingar,
miklu frekar er lykillinn bara sá að hafa kjarkinn í að láta það verða af því.
Restin sem þú þarft að vita kemur svo bara með tíð og tíma...

 


Frumlegar leiðir til að markaðssetja fyrirtækið

Þegar verið er að hefja rekstur er oft lítið um fjármagn til að eyða í  markaðssetningu en það er þó engin afsökun fyrir því að markaðssetja ekki fyrirtækið. Sem frumkvöðull er það hlutverk þitt að finna frumlegar, skemmtilegar og fjárlitlar aðferðir til að láta fyrirtækið þitt ganga upp. Ég ætla því að deila hérna með ykkur nokkrum góðum leiðum sem ég hef kynnst í gegnum tíðina til að markaðssetja fyrirtæki þitt fyrir lítinn sem engan pening.

Vertu áhugaverður og komdu þér í fjölmiðla
Það að komast í fjölmiðla er ódýr og árangursrík leið til að kynna fyrirtæki þitt en til þess að fjölmiðlar vilji fjalla um fyrirtæki þitt þarf sagan að vera nógu áhugaverð. Í slíkum tilfellum er aldrei verra að vera með nóg af frumleika og hafa nægt hugrekki til að standa fyrir framan myndavélina. En það er líka mikill undirbúningur sem þarf að eiga sér stað til að fjölmiðlarnir frétti af því sem þú et að gera, þú þarft að útbúa fréttatilkynningu sem í raun er bara smá samandráttur á því sem er að gerast. Svo þarftu að safna saman upplýsingum um alla fjölmiðla sem þú telur að hefðu áhuga á sögu þinni og senda út tölvupóst á þá alla og fylgja því svo eftir með símtali daginn eftir.

Það að komast í fjölmiðla getur þannig verið næstum alveg frí leið til að markaðssetja fyrirtæki þitt en það krefst þó mikillar vinnu og undirbúnings. Svona aðeins til að kveikja í ímyndunaraflinu ykkar þá læt ég hérna fylgja með lista yfir topp 10 hluti sem Richard Branson hefur gert til að koma fyrirtækjum sínum í fjölmiðla.

Haltu fyrirlestra og deildu reynslu þinni
Allt frá því ég hóf minn fyrsta rekstur hef ég vanið mig á það að vera ófeimin við að deila reynslu minni, bæði vegna þess að ég hef lært óhemju mikið af því og vegna þess að það er góð leið til að markaðssetja vöru sína. Með því að deila með öðrum hvað þú hefur lært opnarðu fyrir bæði gagnrýni sem oftar en ekki getur verið uppbyggileg en þú færð þá líka aðra til að opna sig og deila þeirra reynslum. Það að halda fyrirlestra og kynningar út um allan bæ er líka tilvalin leið til að kynna fyrirtæki þitt. Hvort sem þú nefnir það bara á einni glæru eða notar það sem dæmisögu þá er mjög líklegt að fólk eigi eftir að muna vel eftir því og þar af leiðandi er það mjög góð markaðsssetning. Ég hef allavegana oft notað Búngaló (sáuð þið hvað ég gerði þarna) sem dæmisögu og mun halda því áfram.

Bankaðu upp á hjá viðskiptavinum þínum
Það er magnað hversu fáir fatta þetta en besta leiðin til að að selja og markaðssetja vöru þína til hugsanlegs viðskiptavinar er með því að hitta þennan viðskiptavin og segja honum frá vörunni í eigin persónu. Við erum orðin svo háð tölvunum okkar að við felum okkur á bak við samfélagsmiðla og höldum að það sé eina leiðin til að markaðssetja vörur okkar og eiga samskipti við viðskiptavini. Þegar ég stofnaði mitt fyrsta fyrirtæki þá tók ég upp á því að ganga í heilu göturnar og banka þar upp á hjá öllum fyrirtækjum sem ég fann með sölumöppuna sem ég bjó til í Word og reyndi að selja þeim vöru mína og veistu hvað... það þrælvirkaði. Svo næst þegar þú ert að kvarta yfir því hvað markaðssetning er dýr og skili litlu, prufaðu þá að standa upp frá tölvunni og hitta viðskiptavini þína í eigin persónu.

Vonandi gaf þetta ykkur einhverjar hugmyndir en endilega deilið með okkur þeim aðferðum sem hafa virkað best hjá ykkur í markaðssetningu.


Ekki láta mig hugsa

Ég var að klára bókina “Don’t Make Me Think” eftir Steve Krug. Hún er eins konar “common sense” kennslubók fyrir vefstjóra. Af hverju var ég að lesa hana? Ég er ekki tölvunarfræðingur eða vefhönnuður heldur viðskiptafræðingur (næstum því). Stór hluti af minni vinnu fer hins vegar fram á netinu. Ég er að rýna í og segja mína skoðun á lendingarsíðum, vörusíðum, forsíðunni, sölulínum á vefnum og margt fleira. Og flestir þeir sem starfa í markaðsgeiraum í dag eru að gera það nákvæmlega sama.

Steve Krug er sérfræðingur í “web usability”, eða vef nytsemi á íslensku. Fyrsta útgáfan af bókinni kom út árið 2000. Á þeim tíma var partý í gangi sem heitir “Dotcom”-bólan og allir og amma þeirra kepptust við að smíða vefsíður og veffyrirtæki og allt sem hét staðlar og samræmt úti var að verða til. Önnur útgáfa af bókinni kom út árið 2006 og þriðja útgáfa í desember á síðasta ári. Ég las aðra útgáfu, enda var sú nýjasta ekki til á Bókasafni Kópavogs. Ég bjóst fyrirfram við að ég myndi rekast á fullt af úreldum stöðlum og hugmyndum um hvernig ætti að nota vefinn en raunin var allt önnur. Vissulega eru dæmin oft frekar gömul en undirstöðuatriðin eru í grunninn þau sömu.

En það besta við bókina er að það var ekkert nýtt í þessu. Í raun var verið að segja manni frá hlutum sem flestir geta sagt sér sjálfur. Þetta er nefnilega oft “common sense”. En stundum þarf bara að benda manni á það.

Nokkur atriði sem ég greip úr bókinni:

Ekki láta mig hugsa
Samkvæmt Steve eigum við að reyna eftir fremsta megni að koma í vef fyrir að gestir á síðunni okkar þurfi að hugsa. Þeir eiga að komast að upplýsingunum sem þeir eru að leita að með sem einföldustum hætti og leiðin á áfangastað á að vera skýr. Í hvert skipti sem einhver þarf að stoppa og hugsa er hann líklegri til að gefast upp og fara eitthvað annað. Höfum hlutina einfalda og skýra.

Less is more
Við dettum rosalega oft í þá gildru að reyna að segja allt á einni síðu. Troðum öllum upplýsingum um vörurnar okkar þar inn og reynum að koma öðrum vörum þangað inn því auðvitað viljum við selja meira. Það sem þetta gerir samt er oftar en ekki að flækja málin fyrir þeim sem heimsækir síðuna. Hann er kannski að leita sér að upplýsingum um eitthvað eitt og ef það er erfitt fyrir hann að finna þær þá er hann líklegri til að loka síðunni og fara annað.

Staðlar eru af hinu góða
Ég hef tilhneigingu til að vilja gera allt upp á nýtt. Finna nýjar leiðir. Vera svo ótrúlega skapandi. En ef við skulum ekki gleyma því að ef við fáum lánaða staðla sem virka frá öðrum síðum þá erum við að gera notendum auðveldara fyrir að nota okkar síðu vegna þess að þeir þekkja leiðakerfið og veftréð, jafnvel þó þeir hafi ekki heimsótt þig áður.

Testing, testing, testing
Láttu prófa síðuna þína. Þó þú skiljir hana mjög vel þá þarf ekki endilega að vera að pabbi þinn geri það. Hann eyðir ekki öllum vinnudeginum að lesa hana og yfirfara eins og þú. Þess vegna er svo gríðarlega mikilvægt að láta prófa allt vegna þess að þú færð ómetanlega innsýn í það hvernig aðrir upplifa síðuna þína. Það er líka mikill misskilningur að prófin þurfi að vera flókin og dýr. Í raun er nóg að vera með 2 stóla, tölvu og myndavél. Tilgangurinn er einfaldlega sjá það sem notendur sjá þegar þeir nota síðuna þína.

   

“There’s no such thing as an offline business”
- Aaron Shapiro

Vefurinn er nefnilega eitt mikilvægasta markaðstólið sem við höfum. Hugsaðu þér hvernig þú sjálf/ur leitar þér að upplýsingum um vörur. Ef þú sérð auglýsingu athygli þína, til dæmis frá Intersport, er ekki það fyrsta sem þú gerir að fara á Intersport.is eða Google og skrifa Intersport til að leita þér að frekari upplýsingum.

Ég mæli með “Don’t Make Me Think” fyrir alla þá sem koma á einhvern hátt að heimasíðum. Sama hvort það sé lítið frumkvöðlafyrirtæki sem þarf bara að sýna símanúmerið sitt, flóknar vefverslanir eða bara einyrki með prjónablogg. Ég kann ekki að forrita, hef aldrei opnað InDesign og er nýbúinn að læra fyrir hvað skammstöfunin CSS stendur. Ég lærði samt heilmikið á bókinni sem ég get nýtt við í leik og starfi.

Við þurfum öll að hugsa eins og vefstjórar og þess vegna ættu sem flestir að tileinka sér fróðleik frá mönnum eins og Krug.


 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 


Ísland eða heimurinn?

Fyrir nokkrum mánuðum síðan var mér boðið að koma og tala á nýsköpunarhádegi hjá Klak-innovit um reynslu mína af því að starfa með alþjóðlegum frumkvöðlum. Ég rakst núna áðan á þetta myndband frá þeim viðburði og hafði bara nokkuð gaman af því að horfa á það og fara yfir þá punkta sem ég tók fyrir. Ég held að þetta myndband eigi afskaplega vel við alla íslenska frumkvöðla því það er svo mikilvægt fyrir okkur að skilja hvernig Ísland er samanborið við aðrar þjóðir og hversu lítil við raunverulega erum. Einnig man ég að ég hafði afskaplega gaman af því hversu mikið af spurningum við fengum og hversu líflega umræðan varð eftir þessa fyrirlestra eins og sjá má í lok myndbandsins.

Nýsköpunarhádegi Klak Innovit - Sprotaumhverfið erlendis og hérlendis from Innovit TV on Vimeo.


Engin ein rétt leið

Það sem er svo magnað við að byggja upp fyrirtæki er að það er engin ein rétt leið sem tryggir árangur. Þetta er alltaf spurning um að prufa sig áfram og finna þá leið sem virkar fyrir þetta tiltekna fyrirtæki. Það verður reyndar að viðurkennast að því oftar sem maður reynir fyrir sér í fyrirtækjarekstri því betri verður maður í því að finna góða leið að árangri en það er aldrei öruggt að maður finni þá leið.

Þetta er því alltaf spurning um að vera nógu duglegur við að vinna í þessu og prufa nýjar leiðir, stundum er maður heppinn og finnur hentuga leið til að vaxa og dafna snemma í ferlinum en stundum klárast peningarnir og orkan áður en sú leið finnst. Það eina sem ég get ráðlagt ykkur er bara að halda alltaf ótrauð áfram.

„I’m a great believer in luck, and I find the harder I work the more I have of it.“


Láttu fyrirtækið kaupa bílinn

Ég þarf nú að fara kaupa mér nýjan bíl og ein hugmynd sem ég fékk var það að láta fyrirtækið kaupa hann fyrir mig. Og þar sem ég reyni nú yfirleitt að deila öllu því sem ég tek mér fyrir hendur í rekstrinum með lesendum frumkvodlar.is þá ákvað ég að hafa þetta enga undantekningu.

Athugið að ég mæli ekki með að þið skoðið slíkt á byrjunarstigi rekstursins en þetta er þó engu að síður eitthvað sem þið getið skoðað þegar þið eruð komin með stöðugan rekstur sem greiðir ykkur regluleg laun.

Bifreiðahlunnindi
Helsta fyrirstaðan í þessari ákvörðun eru skattar sem þið þurfið að greiða ykkur af áætluðum bifreiðahlunnindum. Almennt séð þarf að skrá allt það sem gæti kallast fríðindi eða hlunnindi sem laun og greiða skatt af því. Það er svo undir ríkisskattstjóra komið að meta þessi hlunnindi til verðs svo þau geti verið skattlög. Verðlagningu Ríkisskattstjóra á bifreiðahlunnindum fyrir 2014 má finna hér: https://www.rsk.is/media/baeklingar/rsk_0603_2014.is.pdf.

Hver er kostnaðurinn?
Segjum svo sem að ég ákveði að kaupa mér Toyota Rav4 GX jeppling, bæklingurinn segjir mér að grunnverðmatið á slíkum bíl sé 6.490.000 og bifreiðahlunnindin fara svo eftir því hversu gamall hann er. Ef hann er 2012-1014 árgerð þá eru hlunnindin 26% af uppgefinni upphæð, 2009-2011 árgerð  er 21% og 2008 eða eldri er 18%. Kostnaðurinn til skattsins í hverjum mánuði við það eitt að láta fyrirtækið eiga slíkan bíl er því reiknaður með eftirfarandi hætti; Bifreiðahlunnindi per mánuð = Verðmat bifreiðar samkvæmt ríkisskattstjóra * prósent hlunninda / 12 mánuðum * 40% skattur. Útreikningarnir fyrir Toyotuna myndu líta svona út:

Þetta þýðir að ef ég kaupi t.d. 2008 árgerð af þessari týpu af bíl þá þarf ég að greiða kr.38.940- í skatt í hverjum mánuði.

Hver er sparnaðurinn?
Sparnaðurinn er tvískiptur, í fyrsta lagi þarft þú ekki að greiða tekjuskatt af upphæðinni sem þú notar til að greiða fyrir bílinn þ.e.a.s. ef þú tækir peninginn út úr fyrirtækinu fyrst þyrftirðu líklega að gera það í formi launa sem þýðir að þú þyrftir að borga 40-50% af upphæðinni í launatengd gjöld. Í öðru lagi getur fyrirtækið staðið kostnað af bensíni og viðgerðarkostnað á bílnum og þótt svo að vsk-urinn sé ekki endurgreiddur á slíkum kostnaði þá er hægt að draga kostnaðinn frá á móti hagnaði fyrirtækisins.

 

Dæmi um bílakaup

Ef þessi áðurnefndi bíll Toyota Rav4 kostar 1.5 milljónir og þú lætur fyrirtækið kaupa bílinn þá er kostnaður þinn sem eiganda fyrirtækisins nákvæmlega það 1,5 milljónir króna. En aftur á móti ef þú fyrst greiðir þér út nægan pening í formi launa til að kaupa bílinn þá myndi raunkostnaður bílsins vera 2,5 milljónir þar sem 40% af þeirri upphæð færi í skatt þ.e.a.s. það kostar fyrirtækið 2,5 milljónir að greiða þér út 1,5 milljón. Þar afleiðandi væri það 1 milljón króna dýrara fyrir þig að kaupa bílinn á þínu nafni.

Eins og nefnt var hér að ofan þá þurfum við að greiða mánaðarlegt gjald að upphæð kr.38.940- í skatt í hverjum mánuði ef við erum með bílinn á fyrirtækjakennitölunni en ef þú sem einstaklingur ert skráður fyrir bílnum þarf ekkert slíkt gjald að greiða. Segjum svo að viðgerðarkostnaður bifreiðarinnar sé kr.20.000- á mánuði og að bensínkostnaður sé kr.30.000-. Ef einstaklingur á bílinn leggst 40% kostnaður vegna launatengdra gjalda ofan á upphæðina þegar fjármunirnir er teknir úr fyrirtækinu. Heildar útreikningurinn miðað við þessar forsendur lítur svona út:

Það er því augljóst að miðað við þessar gefnu forsendur er mun hagstæðara að láta fyrirtækið kaupa bílinn heldur en að frumkvöðulinn kaupi hann á sínu eigin nafni. Upphafskostnaðurinn töluvert minni eða næstum því 1 milljón lægri og mánaðarlegur rekstrarkostnaðurinn er einungis örlítið hærri.

Það sem væri einnig hægt að taka inn í þennan reikning þótt svo ég ætli ekki að gera það í þetta sinn er það að allur rekstrarkostnaður bifreiðarinnar skráist sem kostnaður á móti tekjum fyrirtækisins sem þýðir að hagnaður fyrirtækisins lækkar um ca 1,1 milljón króna og þar af leiðandi þarf fyrirtækið að greiða lægri skatt af hagnaði sínum.

Ég tók hér sem dæmi kaup á einum tilteknum bíl en veit ekkert hvort það sama eigi við um aðrar gerðir og verðflokka af bílum. Ég mæli þó með því að þið skoðið það að láta fyrirtæki ykkar kaupa bílinn frekar en þið sjálf þar sem það lítur út fyrir að vera hagstæðari kostur.


7 spurningar sem þú verður að spyrja þig áður en þú stofnar fyrirtæki

Á síðari árum hef ég áttað mig á hversu miklu máli andlega hliðin skiptir í rekstri fyrirtækis. Það að stofna fyrirtæki er heldur auðvelt, þú fyllir bara út nokkra pappíra og greiðir smá pening en það að láta þetta sama fyrirtæki skila þér hagnaði og launum er mun erfiðari verkefni. Þótt það sé mismunandi á milli viðskiptahugmynda þá tala ég yfirleitt um að það taki 2-3 ár að sanna verðgildi hugmyndarinnar og búa til stöðugt fyrirtæki. Þessi fyrstu ár geta verið svakalega erfið þar sem þú ert bókstaflega að leggja allan tíma þinn, orku og pening í það að byggja það upp. Það skiptir því miklu máli að þú vitir afhverju þú ert að stofna fyrirtæki og hafir það að leiðarljósi á meðan þú ferð í gegnum erfiðustu tímabilin. Þess vegna hef ég sett saman eftirfarandi 7 spurningar sem ég mæli með að þú spyrjir þig áður en þú ferð út í þennan feril, ef þú ert með þær á hreinu þá muntu betur geta veitt sjálfum þér innblástur á erfiðu tímunum.

1. Afhverju ertu að stofna fyrirtæki?

Það geta verið ótal margar ástæður fyrir því að fólk fer út í eigin rekstur og engin ein ástæða er réttari en önnur. Það er þó mjög mikilvægt að þú vitir hver ástæðan ÞÍN er og sért sáttur með hana. Ástæður fyrir að vilja fara út í eigin rekstur geta t.d. fjárhagslegt öryggi, þörf til að breyta heiminum, ríkidæmi, skapa lausnir, hjálpa öðrum eða eitthvað allt annað. Það gæti jafnvel reynst þér vel að skrifa niður ástæðuna á blað sem þú gætir geymt í veskinu þínu og litið á þegar þú ert orðin útkeyrður og hættur að muna afhverju þú byrjaðir á þessu.

2. Viltu búa til lífsstílsfyrirtæki eða vaxtafyrirtæki?

Það er ekki langt síðan ég kynntist fyrst orðinu lífsstílsfyrirtæki (e. lifestyle business) en það er í raun fyrirtæki sem búið er til af stofnendanum til að hjálpa honum að lifa því lífi sem hann kýs að lifa. Dæmi um lífsstílsfyrirtæki getur t.d. verið lítil vefsíða sem skilar eigendanum nægum tekjum til að hann geti ferðast um heiminn á meðan hann vinnur í gegnum tölvuna sína. Ef draumur eigendans er að ferðast þá er þetta hið fullkomna fyrirtæki til að hjálpa honum að lifa drauma lífsstílnum sínum. En það er þó mjög takmarkað hversu mikið slík fyrirtæki geta vaxið svo þú þarft að ákveða hvort þú sért bara í þessu til að lífa þeim lífsstíl sem þú vilt lifa eða útaf því að þú vilt búa til fyrirtæki sem getur vaxið og dafnað.

3. Hversu stórt viltu að það verði?

Það er stundum smá þrýstingur frá bæði startup heiminum og viðskiptaheiminum til þess að reyna ýta öllum út í það að búa til stór og stæðileg fyrirtæki með tugi eða hundruði manna í vinnu en er það virkilega eitthvað sem þú vilt. Það eru kostir og gallar við báðar leiðir og hugsanlega mun spurning 1 hafa mikil áhrif á hvora leiðina þú vilt fara.

4. Er fyrirtæki þitt að fara selja vöru eða þjónustu?

Hvað þú ert að selja getur haft mikil áhrif á seljanleika fyrirtækisins í framtíðinni t.d. ef þú ert einungis að selja tíma þinn þá ertu að selja þjónustu og þá er takmarkaður skalanleiki þar sem eina sem þú getur gert til að auka tekjur fyrirtækisins er að auka tímakaupið þitt og það er yfirleitt alltaf eitthvað þak á því hversu hátt tímakaup er hægt að rukka. Aftur á móti ef þú ert með vöru sem getur selst í fjölda eintaka óháð því hversu marga klukkustundir þú vinnur þá ertu komin með skalanlegt fyrirtæki og fyrirtæki sem auðvelt verður að selja án þess að þú þurfir að fylgja með í kaupunum.

5. Hvernig ætlarðu að fjármagna það?

Þessi spurning snýst í raun um hvort þú ætlir að byggja upp fyrirtækið með eigin pening og vinnuframlagi eða hvort þú ætlir að leita að utanaðkomandi fjármagni sem yfirleitt myndi þýða að fá inn fjárfesta. Ef þú leitar þér utanaðkomandi fjármagns getur það bæði þýtt það að þú getir fyrr byrjað að borga þér laun og að fyrirtækið geti vaxið hraðar. Á móti kemur þó að þú munt ekki eiga fyrirtækið einn og þarft að vinna með fjárfestum þínum og vera tilbúin að taka við ráðum og gangrýni frá þeim. Hvernig fyrirtækið mun ganga mun hafa áhrif á hag fjárfestanna og því skiljanlegt að þeir vilji að einhverju leiti vera virkir í ákvörðunartöku. Aftur á móti ef þú fjármagnar fyrirtækið sjálfur með vinnu og tíma, oft kallað að "bootstrappa", þá munt þú hafa 100% vald yfir fyrirtækinu og get ákveðið hvernig það þróast.

6. Hversu lengi viltu reka það?

Ert þú frumkvöðull sem hefur einungis gaman af því að láta hugmyndir verða að veruleika og leiðist daglegur rekstur fyrirtækja eða ert þú til í að reka fyrirtækið sem þú byggir upp næstu 20 árin? Til þess að geta svarað þessari spurningu þarftu að þekkja styrkleika þína og veikleika og vita hverskonar frumkvöðull þú ert. En og aftur er ekkert rétt svar, þú getur rekið fyrirtækið í 1 ár eða 100 ár, það fer bara eftir persónuleikanum þínum og markmiðum í lífinu.

7. Viltu vinna með teymi?

Viltu fara í það mikla verkefni að stofna og reka fyrirtæki einn þ.e.a.s. verða eini stofnandinn, eða viltu fá fólk til liðs við þig og deila með þeim fyrirtækinu og öllu því góða og slæma sem fylgir því? Báðar leiðir eru erfiðar, ef þú ferð einn í þetta verkefni þá þarftu að takast á við allar hindranir sem koma upp einn þinns liðs og vera með mjög breytt bak. Aftur á móti ef þú færð aðra með þér þá deilist ábyrgðin og auðveldara getur verið að takast á við erfiðleika sem kunna að koma upp. Teymi eiga það þó til að vera stundum ósammála um hin ýmsu atriði og ég veit um afar fá dæmi um stofnenda teymi sem hafa ekki á einhverjum tímapunkti hnakkrifist og næstum því lagt fyrirtækið niður vegna þess þau gætu ekki komist að samkomulagi.

Það eru kostir og gallar við allar þessar spurningar en það mikilvægasta við þetta allt er að þú þekkjir sjálfan þig og vitir hvað þú vilt fá út úr lífinu. Fyrirtækjarekstur er að mínu mati tækifæri til að láta drauma sína verða að veruleika frekar en nokkuð annað og því betur sem þú getur skilgreint drauma þína og hvernig þú viljir nálgast þá, því meiri líkur eru á að þú munir ná árangri.

 


Afhverju fyrirtækið þitt mun ekki ganga upp

Ég ætla að koma með tilgátu um afhverju fyrirtækið þitt mun ekki ganga upp.

  • Það er ekki útaf því að varan þín er ekki nógu falleg eða útaf því að þú ert ekki með nógu flotta skrifstofu.
  • Það er ekki útaf því að þú hefur litla reynslu af þessum markaði eða útaf því að ríkið vill ekki gefa þér styrk.
  • Það er ekki útaf því að þú ert á undan þinni samtíð eða útaf því þú ert ekki ennþá komin með nafnspjöld.
  • Það er ekki útaf skort á menntun eða skort á tækifærum.

Nei það er líklega ekkert af þessu sem mun á endanum drepa fyrirtæki þitt.... en það sem ég tel að muni verða því að bana er sú einfalda staðreynd að þú ert ekki að ná að breyta vöru þinni í tekjur!

Sem frumkvöðull hefur þú líklega mikinn áhuga á að byggja upp frábæra vöru/þjónustu sem allir eiga eftir að vilja eiga/nota og jafnvel eitthvað sem gæti breytt heiminum. Slík löngun er oftar en ekki skilyrði fyrir því að þú hafir þolinmæðina og þrautseigjuna til að fylgja hugmynd þinni inn í raunveruleikann enda er það afar erfitt og tímafrekt verkefni. En þegar svo mikil áhersla er lögð á að búa til frábæra og óviðjafnanlega vöru þá eiga aðrir hlutir til með að gleymast og öll áhersla teymisins fer í það að gera vöruna sífellt betri í staðinn fyrir að koma henni til notendans í skiptum fyrir tekjur.

Af þeim hundruði startup fyrirtækja sem ég hef hitt og rætt við bæði hér heima og erlendis er eitt atriði sem nær alltaf aðgreinir þau fyrirtæki sem hafa náð árangri frá þeim sem hafa það ekki og það er hæfileikinn að breyta vörunni í tekjur. Það segir sig í raun sjálft að ef þú ert með fyrirtæki sem er ekki að skila nægum tekjum til að standa undir kostnaði þá mun það á endanum fara á hausinn.

Ég hef því sjálfur byrjað að taka upp á því ráði að þegar ég er að vinna í því að skipuleggja mig og fyrirtæki mitt þá byrja ég með tómt blað, skrifa "hér er ég" upp í vinstra hornið og svo teikna ég dollaramerki niðrí hægra hornið og þess á milli skrifa ég allt það sem ég þarf að gera. Þegar það er komið reyni ég að draga sem beinasta línu frá núverandi stað að tekjunum. Ég dreg einungis þau atriði inn í línuna sem koma mér nær tekjunum og reyni að sleppa öllum hinum ef ég get. Síðar meir þegar ég er kominn með tekjurnar get ég leyft mér að vinna í þeim atriðum sem ekki voru á tekjulínunni.

Það er freistandi að vinna bara í því sem þú ert bestur, hvort sem það er þróunarvinna, forritun, markaðssetning eða eitthvað annað en ef þú vilt tryggja það að fyrirtæki þitt nái árangri einbeittu þér þá alltaf að því að reyna skapa nægjar tekjur fyrir fyrirtækið.


Að breyta nafni á facebook síðu

Fyrir mánuði síðan ákvað ég að reyna loksins að komast að því hvort það væri í alvörunni hægt að skipta um nafn á facebook síðu. Á þeim tímapunkti hét facebook síða fyrirtækis míns Búngaló með Ú-i og Ó-i en vegna þess að ég var að fara leggja út í mun meiri markaðssetningu erlendis hafði ég tekið þá ákvörðun að notast ekki við íslensku stafina þegar ég væri að markaðssetja erlendis. Ég þurfti því að breyta nafn facebook síðunnar úr "Búngaló" í "Bungalo", kannski ekki alveg stærsta breyting í heimi en engu að síður mjög mikilvæg breyting fyrir alþjóðlega markaðssetningu. Ég var búinn að heyra mjög margar mismunandi sögur um hvort þetta væri yfir höfuð hægt og samkvæmt upplýsingum hjá facebook var bannað að breyta um nafn eftir að síðurnar fengu meira en nokkur hundruð like. Það sem ég las mér til um á netinu voru einhverjar mjög flóknar leiðir til að skipa um nafn sem snérust um það að stofna nýja vefsíðu og svo samtvinna einhvern veginn gömlu og nýju vefsíðuna svo að nýja nafnið héldist og gömlu notendurnir en ég hvorki skildi það fullkomnlega né fannst það nógu örugg leið til að taka áhættuna að missa mína 15 þúsund fylgjendur. Ég spurði alla markaðssérfræðingana á grúppunni Markaðsnördar en fékk ekkert skýrt svar þar svo ég ákvað bara að demba mér út í það að finna lausn á þessu og það vildi bara svo til að það var miklu auðveldara en ég hélt. Í framhaldi af því að ég fann út úr því fékk ég svo mörg skilaboð á facebook frá fólki sem var að biðja mig um að útskýra hvernig ég gerði það að ég ákvað að skrifa bara bloggfærslu um það.

Eins og ég var búinn að fikta lengi áður en ég fattaði þetta þá var þetta afar einfalt, þú ferð upp í hægra hornið á facebook og smellir þar á stjörnuna og velur svo "manage adverts". Þar ferðu svo inn í valmyndina fyrir auglýsingasvæðið, á vinstri hönd á skjánum eru nokkrar valmöguleikar og einn þeirra er "email support", þú smellir á það og þar opnast upp form þar sem þú útskýrir hvað þú vilt gera og sendir á facebook. Í framhaldi af því færðu svo svar frá raunverulegri persónu hjá Facebook (mjög sjaldgjæft) sem ætti að geta hjálpað þér. Þetta er nú bara ekki flóknara en svo.

En bíddu... jú þetta gæti verið örlítið flóknara!

Það liðu einungis nokkrir dagar hjá mér áður en þetta var allt gengið í gegn en svo fór fólk að hafa samband við mig og ég var að reyna aðstoða það í gegnum það sama og þá komst ég að því að "email support" takkinn var ekkert að birtast hjá öllum. Eina ástæðan sem ég gat fundið fyrir því var sú að hann birtist einungis hjá þeim aðilum sem hafa eytt miklum peninga í auglýsingar hjá Facebook, í það minnsta hef ég eytt sæmilega miklum pening hjá þeim og þetta birtist hjá mér en aðrir sem höfðu eytt minna sáu engan takka. Ég þori ekkert að fullyrða um það en ég get vel ímyndað mér að Facebook eyði einungis tíma í þá aðila sem eru tilbúnir að eyða pening í þá á móti. Ég passaði mig einnig á því að útskýra í skilaboðunum sem ég sendi á þá að ég væri að biðja þá um að breyta nafninu á síðunni svo ég gæti nú farið að markaðssetja þetta betur alþjóðlega og þar af leiðandi eytt meiri pening í auglýsingar hjá Facebook.

Facebook er þó þekkt fyrir að breyta öllu hjá sér reglulega og núna þegar einungis eru liðnar einhverjar 3 vikur frá því að ég breytti nafninu sé ég að þetta er búið að breytast aðeins frá því ég fór inn á þetta fyrst. Formið sem birtist um leið og ég ýti á "email support" er með öðru sniði en það var og ég þarf fyrst að fara í gegnum einhvern tjékklista núna áður en ég get farið að skrifa skilaboð til Facebook.

Það virðist því ekki alltaf vera auðvelt að breyta nafni á Facebook síðu en ég vona engu að síður að þessi bloggfærsla hjálpi ykkur að einhverju leiti og gefi ykkur í það minnsta dæmi um hvernig þetta gekk upp hjá mér. Ef þið stefnið að því að breyta nafninu á ykkar facebook síðu þá óska ég ykkur góðs gengis og vona að það gangi jafn vel hjá ykkur og það gerði hjá mér.


Þú getur þetta!

“Whenever you see a successful business, someone once made a courageous decision.”
― Peter F. Drucker

Það getur verið mjög erfitt að takast á við krefjandi verkefni eins og að stofna fyrirtæki, gera hugmynd sína að veruleika, koma hönnuarvöru í framleiðslu á og á markaðinn, setja upp vefsíðu, byrja blogg, skrifa fyrstu viðskiptaáætlunina, opna kaffihús/verslun eða hvað það er sem þig dreymir um að gera. Þegar maður er í þessum ferli getur það verið afskaplega yfirþyrmandi tilhugsun að gera allt það sem þarf að gera og það er oft kannski erfitt að fá stuðning frá fjölskyldu og vinum þar sem þau skilja ekki alveg ferilinn sem þú ert að fara í gegnum. Ég þekki þetta vel, enda hef ég farið í gegnum þetta oftar en ég man og langar því að deila eftirfarandi fjórum ráðum með ykkur í þeirri von að þau styðji við ykkur í verkefnum ykkar.

1. Þú getur þetta.
Alveg sama hvað þú ert að fara gera, þú getur það. Það er ótrúlegt hvað við getum gert þegar við ákveðum að það komi ekkert annað til greina en að ná því markmiði sem við setjum.

2. Hættu að kvarta og finndu lausn.
Þetta verður erfitt og þú verður að vera tilbúinn að fara út fyrir þægindasvæði þitt og veðja peningum þínum og tíma á sjálfan þig og þá staðreynd að þú getir þetta. Það segir sig ekki alltaf sjálft hvernig eigi að gera hlutina og því þarftu að vera ófeimin við að lesa þér til, spyrja fólk sem hefur reynslu, afla þér upplýsinga og hreinlega bara gera allt sem þú getur til að finna leið til að láta hlutina verða að veruleika. Allir þeir sem hafa gert eitthvað í fyrsta skipti hafa þurft að finna út úr því hvernig það er gert með einum eða öðrum hætti, þú ert engin undantekning.

3. Hættu að hika og stökktu.
Ef þú ert búinn að finna svörin við öllum spurningum þínum (eða flestum allavegana) og veist hvernig þú átt að gera þetta en ert feiminn við að framkvæma þá verðurðu bara að bretta upp ermarnar, sparka í rassinn á sjálfum/sjálfri þér og stökkva fram af klettinum og ofan í ánna. Áin mun svo vonandi leiða þig á réttan áfangastað, ef ekki þá stekkurðu bara aftur :)

4. Þú getur þetta!
Já þú getur þetta, farðu nú bara og gerðu þetta.


Er Ísland að leggja frumkvöðla í einelti?

Heimurinn hefur farið minnkandi á síðustu árum og þá sérstaklega fyrir Íslendinga með tilkomu internetsins og ódýrs flugs. Við þurfum ekki lengur að takmarka okkur við okkar litlu eyju, við getum unnið og búið hvar sem okkur dettur til hugar í þessum heimi. Á komandi árum mun þessi hugsun verða sterkari og fólk mun hætta að horfa til landamæra til að aðskilja fólk og hópa og mun þess í stað fara líta á heiminn sem eina heild.

Þessi sama þróun er líka að eiga sér stað í fyrirtækjarekstri þar sem íslenskir stofnendur hafa í raun ekki lengur neina þörf til að staðsetja fyrirtæki sitt á Íslandi. Þeir geta stofnað það hvar sem er í heiminum og í flestum tilfellum fer það bara eftir því hvar er hagstæðast fyrir þá að reka fyrirtækið og hvar þeir gætu hugsanlega búið sér til forskot á samkeppnisaðila sína. Íslenskt ríkisvald virðist þó ekki ennþá vera búið að gera sér grein fyrir þessari þróun því það virðist halda að íslenskir stofnendur muni bara stofna fyrirtæki hér á landi vegna þjóðræknis eða útaf því að þeir eru búsettir hér. Og ef ríkisvaldið fer ekki að breyta þessari hugsun sinni og fara að vinna í því að gera Ísland að samkeppnishæfara landi fyrir fyrirtæki þá er hugsanlegt að við munum á næstu árum fæla í burtu töluvert mikið af öflugum frumkvöðlum.

Ég tek stórt til orðana þegar ég spyr hvort Ísland sé að leggja frumkvöðla í einelti en skoðum aðeins íslenskt viðskiptaumhverfi samanborið við það sem gerist annarstaðar í heiminum.

Stofnun fyrirtækis skattlögð!

Flest lönd sem leggja áherslu á að styðja við nýsköpun gera sér grein fyrir því að það þurfi að vera auðvelt og ódýrt fyrir unga frumkvöðla að stofna fyrirtæki svo þeir geti nýtt orku sína og pening í að byggja upp sjálfa vöruna og reksturinn. Þess vegna hafa flest lönd gert ferilinn við að stofna fyrirtæki auðveldan og ódýran. Sem dæmi um það þá er skráningargjald á fyrirtækjum í Bandaríkjunum (Delaware) ca. kr.9.000- og í Danmörku er það alveg frítt. En á Íslandi kostar það eitt að skrá fyrirtæki kr.140.000-! Það er engin réttlætanlegur kostnaður á bak við þessa tölu frá Ríkisskattstjóra heldur var þetta einfaldlega sú tala sem var ákveðin sem sá kostnaður sem ætti að leggja á einstaklinga sem vilja stofna fyrirtæki. Ríkisvaldið er því þarna ekki að gera neitt annað en að skattleggja einstaklinga fyrir það eitt að vilja stofna fyrirtæki. Og allir þeir sem hafa farið út í eigin rekstur gera sér grein fyrir því að hver einasta króna skiptir máli þegar verið er að hefja rekstur og með þessu athæfi er verið að gera lífsmöguleika ungra fyrirtækja töluvert verri.

Hlutfé í fyrirtækjum

Þegar verið er að stofna fyrirtæki geta stofnendur þess sett inn í fyrirtækið hlutafé sem mun vera notað við rekstur fyrirtækisins. Yfirleitt þurfa fyrirtæki einhverja fjármuni til að hægt sé að reka það þangað til það nær að skapa sér nægjar tekjur til að standa undir sér. Mörg lönd hafa þó ákveðið að vera ekki með neitt lágmark á hversu mikið hlutafé sé sett inn í fyrirtækið og sem dæmi þá er ekkert lágmarks hlutafé í fyrirtæki í Bandaríkjunum og Kanada. Ísland aftur á móti er með lágmark kr.500.000- í hlutfaé í einkahlutafélög, það er reyndar hægt að starfa á eigin kennitölu án hlutafés en það eru ýmsar takmarkanir á því rekstrarformi. Norðurlöndin eru mörg með einhvert lágmark og t.d. í Danmörku er lágmarks hlutafé einhverjar 1.8 milljón svo Ísland er langt frá því að vera með hæðsta hlutafjárlágmarkið. En ég átta mig ekki alveg sjálfur á afhverju við þurfum að hafa lágmarks hlutafé í fyrirtækjum, ef önnur lönd geta komist upp með að sleppa því afhverju ættum við ekki líka að geta það? Við viljum reyna gera ungum frumkvöðlum auðvelt fyrir svo þeir skapi verðmæti fyrir þjóðina.

Skylda að greiða laun

Á Íslandi er skylda fyrir öll fyrirtæki að greiða út laun, og ég hef heyrt um mörg tilfelli þar sem nýstofnuð fyrirtæki hefur verið sagt að þau verði að greiða sér út laun jafnvel þótt svo að tekjurnar væru ekki farnar að standa undir laununum. Þetta þýðir það að eigendur byrja að búa til launaseðla fyrir lágmarkslaunum sem þau geta ekki greitt sér en verða samt að greiða alla kostnaði af þeim til ríkisins. Og eins og ég sýndi fram á í greininni Ekki greiða þér laun, þá kostar það stofnendann ca.kr.124.000- í kostnað og skatt að greiða sér útborguð laun að upphæð 220.000-. Ríkisskattsjóri er þó sjaldnast að eltast við ung fyrirtæki varðandi þennan lið og í mörgum tilfellum er alveg litið framhjá því, en ef einstaklingur hringir í Ríkisskattstjóra og spyr út í þetta er honum tilkynnt að honum beri að greiða þetta. Ég þekki sjálfur þessi nákvæmu lög ekki nægjanlega vel til að ég geti vitnað í þau en það væri gaman að heyra frá ykkur ef þið þekkið betur til þeirra eða ef þið hafið reynslu af þessu.

Gjaldeyrishöft

Svo eru það gjaldeyrishöftin með allar sínar kröfur en þau gera íslenskum fyrirtækjum mjög erfitt fyrir að starfa á alþjóðamarkaði héðan frá Íslandi og er það nær undantekningalausn að fyrirtæki verði að stofna dóttur- eða móðurfélag á erlendri grundu til að geta komist hjá öllum þeim erfiðleikum sem fylgja gjaldeyrishöftunum. Ég ætla ekki að ræða hér um hvort gjaldeyrishöftin séu nauðsynleg fyrir efnahag okkar eða ekki en staðreyndin er bara sú að þessi gjaldeyrishöft gera frumvöðlum mjög erfitt fyrir og búa til en frekari rök fyrir því að færa starfssemi sína erlendis.

Fyrirlestur 12.nóv

Ég kem til með að vera með fyrirlestur á morgun, þriðjudaginn 12. nóvember kl 12:00 upp í Innovation House á Eiðstorgi þar sem ég fjalla um Íslensk frumkvöðlaumhverfi og ber það saman við það sem ég hef kynnst á heimsóknum mínum í Bandaríkjunum og Kanada. Ég mun nefna þessi ofantöldu atriði en einnig fara í hin ýmsu atriði sem aðgreina Ísland frá umheiminum.

Sjá frekar um fyrirlesturinn hér: https://www.facebook.com/events/691467444210433/

 


Fyrsta skrefið

Ég setti fram spurningu á facebook síðu vefsíðunnar um hvað fólk myndi vilja sjá mig fjalla um hér á síðunni og eina ábendingin sem ég fékk var sú að skrifa um hvernig maður tekur sín fyrstu skref. Á síðasta ári skrifaði ég reyndar grein sem heitir "Ég er með hugmynd, hvað nú?" og ég held að sú grein hafi tekið ágætlega á þessari spurningu en kannski mætti prufa að taka aðeins öðruvísi nálgun á þetta. Þess vegna ætla ég hérna að fylgja ykkur algjörlega í gegnum ferilinn í nokkrum einföldum skrefum. Ég mun þó ekki fara yfir hvert einasta smáatriði þar sem það myndi taka nokkrar fullskrifaðar bækur til að gera það auk þess sem ferilinn er alltaf örlítið misjafn fyrir hvern og einn. En ef þú fylgir þessum skrefum þá muntu í lok þeirra eiga fyrirtæki.

1. Taktu ákvörðun um að stofna fyrirtæki.

Það þýðir því miður ekkert að vera með hálfkák í þessu, annað hvort ætlarðu að stofna fyrirtæki eða ekki, það er ekki flóknara en það. Og ef þú ákveður að stofna fyrirtæki þá þarftu að vera tilbúin að fylgja því eftir og leggja á þig þá vinnu sem þarf til að koma því á lagirnar. Ég mæli með að þú gerir ekkert annað fyrr en þú ert búin að fullvissa þig um að þetta sé eitthvað sem þú vilt og eitthvað sem þú ert tilbúin að vinna fyrir.

2. Ákveddu hvað þú ætlar að selja.

Hvað á fyrirtækið þitt að gera? Ætlarðu að flytja inn einhverja sniðuga vöru til að selja hér heima? Ætlarðu að selja sérþekkingu þína? Ætlarðu að búa til einhverja sniðuga tæknilausn? Ég mæli með að fólk reyni að velja eitthvað sem það veit eitthvað um eða hefur einhverja þekkingu á. Það auðveldar ferilinn mikið en svo er náttúrulega alltaf hægt að læra eitthvað nýtt, ekkert sem bannar það, það tekur bara lengri tíma.

3. Fáðu staðfestingu á að það sé sniðugt.

Er þetta í alvörunni eitthvað sem einhver væri til í að borga fyrir? Reyndu að leita ráða hjá einhverjum sem hefur gert eitthvað svipað og þú ert að fara gera eða einhvern sem hefur þekkingu á markaðnum sem þú ert að fara inn á. Fáðu álit þess aðila á hvort hugmyndin þín sé góð eða slæm. Þú þarft algjörlega ekki að fara eftir því sem sá aðili segjir en það getur þó gefið þér einhverja hugmynd. Reyndu svo að búa til prufutýpu af vörunni þinni og selja hana eða fá inn einhverskonar tekjur til að staðfesta að það sé eftirspurn eftir þessari þjónustu/vöru.

4. Stofnaðu fyrirtæki.

Farðu til lögfræðings eða endurskoðenda til að láta þá útbúa stofnpappírana fyrir þig og fáðu ráðlegginar frá þeim í leiðinni hvernig þú eigir að sjá um bókhald og annað slíkt. Greiddu þann 150þús kjall sem kostar að fá kennitöluna og þann kostnað sem lögfræðingurinn/endurskoðandinn rukkar þig og bimmballabúmm! Þremur til fimm virkum dögum síðar ertu komin með fyrirtæki.

Það er í raun afar einfalt að stofna fyrirtæki, það erfiða er að láta það skila hagnaði og ganga upp. En það er efni í hundruði annara greina :)


Góð ráð í markaðsmálum


Þóranna K. Jónsdóttir sem á og rekur Markaðsmál á mannamáli kíkti í heimsókn til mín niðrá skrifstofu og ég nýtti tækifærið til að taka smá viðtal við hana sem ég ætla deila hérna með ykkur. En kjarnin í máli hennar voru þessi 3 góðu ráð fyrir sprotafyrirtæki.

1. Taktu góðan tíma til að vinna undirbúningsvinnuna rétt.

2. Skilgreindu vörumerkið vel og hvað felst í því.

3. Tengdu markaðssetninguna við lífsgildi þín og viðskiptavina þinna.

Fyrir frekari upplýsingar getið þið kíkt inn á vefsíðu Markaðsmála á Mannamáli, www.mam.is.

 


Íslendingar eiga margt eftir ólært

Ég er þessa stundina staddur í New York að skoða borgina og vonandi að kynnast aðeins viðskiptaumhverfinu hér. Í morgun fór ég á smá frumkvöðlahitting og var forvitin að sjá hvernig slíkir fundir fara fram og hvort þeir væru að einhverju leiti ólíkir því sem gerist heima á Íslandi. Það hefur stundum verið sagt að íslendingar séu svolítið lokaðir og eigi stundum erfitt með að opna sig, og líklega þess vegna sem svo margir fundir heima fara fram á stöðum þar sem bjór er við hendi, en það sannaðist algjörlega fyrir mér í morgun. Bandaríkjamenn eru svo miklu öflugri í að networka að mér brá svolítið í fyrstu, ég var ekki búinn að vera þarna lengur en 5 sekúndur þegar fyrsta persónan gengur upp að mér kynnir sig fyrir mér og byrjar miklar samræður um bæði mitt og sitt fyrirtæki. Samtalið var öflugt, hnitmiðað og skemmtilegt, svo skiptumst við á nafnspjöldum og hann gengur upp á næsta aðila og um leið er annar kominn til að tala við mig. Eftir klukkutíma á þessum viðburði var ég hreinlega orðin þreyttur því ég er ekki vanur að tala svona mikið við jafn marga mismunandi aðila.

Ég held að íslendingar gætu læra margt af bandaríkjamönnum um hvernig eigi að „networka“, við verðum að læra að vera opnari og eiga auðveldara með að tjá okkur.


Andy Sernovitz

Orð af munni

Ég er búinn að vera með Word of Mouth Marketing eftir Andy Sernovitz á náttborðinu hjá mér í heilan mánuð. Það var ekki fyrr en ég hoppaði upp í bústað núna um helgina sem ég komst í að lesa hana. Og viti menn, hún var straujuð á einni helgi.

Það er talað um fyrirtækið og vörumerki, hvort sem þeim líkar betur eða verr. Fólk deilir því hvernig þjónustan á veitingastaðnum var, hvort maturinn hafi verið góður eða hvort þjónninn hafi verið í hvítum sokkum. Þannig hefur það verið frá örófi alda og mun halda áfram. Þessi bók reynir að kenna þér hvernig þú átt að nýta þetta umtal þér í hag.

Grunnhugmyndin í bókinni er semsagt, finndu rétta fólkið til að tala um þig og gefðu því eitthvað að tala um.

Sernovitz brýtur þetta niður í “T-in 5″ (The Five T’s):

  1. Talkers – Hverjir eru að tala um þig? Hverjir viltu að tali um þig?
  2. Topics – Um hvað er fólk að tala? Hvað viltu að það tali um?
  3. Tools – Hvar er fólk að tala um þig? Skapar þú einhvern vettvang fyrir þá umræðu?
  4. Taking part – Tekur þú þátt í þessari umræðu? Hvað gerir þú til að kynda undir hana?
  5. Tracking – Hversu vel mælirðu þetta umtal?

Fólk treystir umsögnum frá öðru fólki betur heldur en auglýsingum. Þess vegna viltu gefa því eitthvað til að tala um og segja frá í fjölskylduboðinu, í vinnunni eða í saumaklúbbnum. Þetta gæti orðið einn af stærri tekjustraumunum þínum. Þess vegna þarftu að gera eitthvað sem sker þig úr fjöldanum og fær fólk til þess að tala.

Andy Sernovitz
Andy Sernovitz

Að sama skapi getur það skipt öllu hver það er sem talar um þig. Leitar þú ekki til sama aðilans þegar þig vantar ráðgjöf varðandi tölvumál? Eða bílamál? Eða nýja tónlist til að hlusta á? Þú vilt ná til þeirra sem hafa áhrif á almenningsálitið. Þess vegna er mjög mikilvægt að komast að því hverjir hafa mest áhrif í þínum markhópi og svo þarftu að höfða til þeirra svo þeir vilji tala um þig.

Hljómar þetta kunnuglega? Já auðvitað, þetta er líka mjög kunnuglegt! Höfundurinn er greinilega mjög klár og kann sitt fag. En hann fær líka helling lánað frá öðrum séníum, eins og t.d. Seth Godin (t.d. Purple Cow) og Malcolm Gladwell (t.d. Tipping Point). Þessari bók er samt beint eingöngu á það málefni að fá fólk til að tala um þig og gefur þér hugmyndir um hvernig þú getur gert það.

Það ætti ekkert af þessu að vera nýtt fyrir þér. Hins vegar er alltaf gott að dýfa sér í svona léttmeti inn á milli, aðeins til að fá smá innblástur, hugmyndir nú eða bara til að hafa eitthvað til að skrifa um á bloggið þitt.

Þetta er m.a. það sem mér fannst standa upp úr:

  • Samfélagsmiðlar eru ekki umtal. Mér fannst flott hjá Andy að tækla þá umræðu. Þeir eru hins vegar mjög mikilvæg pípa í að dreifa og stuðla að umtali.
  • Það er enginn að fara að tala um þig ef þú ert leiðinleg/ur. Nema þá um hversu leiðinleg/ur þú ert. Stattu upp úr fjöldanum og finndu það sem gerir þitt fyrirtæki áhugavert.
  • Áttu aðdáendur? Hverjir elska vöruna þína eða vörumerkið? Talaðu við þá! Verðlaunaðu þá á einhvern hátt.
  • Taktu þátt í umræðunni. Þakkaðu fyrir góð ummæli. Reyndu að lagfæra ef eitthvað fór úrskeiðis.
  • Allt lifir að eilífu á Google!

Bókin er ágæt. Hún er létt og skemmtileg og þægilega upp sett. En hún fellur í sömu gryfju og langflestar svipaðar bækur gera: hún er alltof löng. Það hefði verið mjög auðvelt fyrir Andy karlinn að skrifa 70 blaðsíðna bók og hún hefði ekki verið neitt verri. En það er erfitt að selja 70 blaðsíður fyrir $10-15, og þannig er það. Ég mæli með henni fyrir alla þá sem eru að leita að innblæstri til að auglýsa sig eftir ódýrum leiðum, jafnt lítil sem stór vörumerki.


 

Gestabloggari:
Hjalti Rögnvaldsson
Bloggari og viðskiptafræðinemi
www.hjaltir.com

 

Enhanced by Zemanta

Business Model Canvas

Alexander Osterwalder, maðurinn sem skrifaði bókina um Business Model Canvas hélt fyrirlestur í hörpunni um daginn í boði Arion Banka. Hátt í 1.000 manns mættu á fyrirlesturinn og var þetta einstakt tækifæri til að sjá einn af vinsælli fyrirlesurum í startup heiminum í eigin persónu. Mér skilst að kynningin hafi gengið það vel að stefnt sé að því að endurtaka hana 30.maí kl. 9:00 í Borgartúni 19 og mæli ég með að allir þeir sem misstu af fyrri fyrirlestrinum skrái sig á þennan.

Hérna er stutt kynning á Business Model Canvas og hugmyndinni á bak við ferilinn.

 

Vefsíða Alexander Osterwalders: http://alexosterwalder.com/
BMC vefsíðan: http://www.businessmodelgeneration.com/ 
BMC Viðburðurinn hjá Arion Banka: http://www.arionbanki.is/einstaklingar/vidburdir-og-fraedsla/vidburdir/2013/05/30/Einfold-og-ahrifarik-leid-til-ad-baeta-reksturinn-fyrirlestur/

 


Kurteisi og heiðarleiki í viðskiptum

Núna ætla ég að deila með þér smá leyndarmáli.

Þetta leyndarmál mun gera meira fyrir þig heldur en nokkuð annað til að byggja upp framtíð þína og fyrirtækis þíns.

Leyndarmálið er þetta:
Vertu kurteis og heiðarlegur í viðskiptum þínum.

Okey þetta er kannski ekki stórt leyndarmál en þetta virðist þó gleymast afskaplega oft og hvergi virðist þetta vera kennt í skólakerfinu. Það er því ágætt að taka smá tíma til að hugleiða hvað þetta einfalda fyrirbæri getur gert mikið fyrir fyrirtækið þitt.

Það hitti svolítið skemmtilega á að þegar ég var að undirbúa þessa grein þá fékk ég skilaboð á Facebook frá Jóhönnu S. Hannesdóttur sem rekur fréttamiðilinn www.sunnlenska.is þar sem hún var að benda mér á að það gæti verið sniðugt að fjalla kannski aðeins um almenna kurteisi í viðskiptum. Ég leit á það sem merki um að ég yrði nú að ljúka við að skrifa þessa grein. Reynsla Jóhönnu var sú að þótt svo að flestöll fyrirtæki sem hún væri að leita út til væru kurteis þá væru alltaf einstaka aðilar sem virtust ekki kunna almenna kurteisi.  Ókurteisi í framkomu þessara örfáu aðila gerði ekki bara það að verkum að lítið yrði úr viðskiptunum heldur væri hún minna spennt fyrir að eiga viðskipti við þá í framtíðinni.

Það á að sjálfsögðu við í öllum fyrirtækjum en ég held þó að við sem erum að reka lítil fyrirtæki verðum sérstaklega að passa það að koma vel fram við alla þá sem við eigum í samskiptum við. Við erum fulltrúar fyrirtækisins á öllum tímapunktum, alltaf þegar þú svarar í símann, sendir tölvupóst eða tekur á móti hugsanlegum viðskiptavin þá verður þú að hafa það í huga að framkoma þín og hegðun mun hafa langvarandi áhrif. Enda er það ekki ólíklegt að þessi tiltekni aðili komi til með að deila reynslu sinni af þínu fyrirtæki með öðrum í kringum sig og úr því getur orðið til smá öldugangur líkt og gerist þegar dropi dettur ofan í lygnt vatn. Alveg eins og ókurteisi eða léleg þjónusta getur skemmt fyrir þér með keðjuverkandi hætti þá getur kurteisi, heiðarleiki og góð þjónustu skapað jákvæðar bylgjur sem geta flætt víða. Það er því afar mikilvægt að reyna að koma fram við alla viðskiptavini af virðingu og kurteisi og sama á við um alla aðila sem nálgast ykkur hvort sem það er beintengt vinnunni eða ekki.

Dæmi um hvernig kurteisi, heiðarleiki og góð þjónusta hefur t.d. haft áhrif á þá sem ég á viðskipti við þá hýsi ég alla vefsíðurnar mínar hjá 1984.is ekki endilega útaf því þeir eru besti hýsingaraðilinn heldur útaf því þegar ég var að byrja að forrita þá hringdi ég oft í þá með afar heimskulegar spurningar en þeir gáfu sér alltaf tíma til að reyna aðstoða mig þótt svo að það væri fyrir utan þeirra þjónustusvið. Ég fer alltaf í klippingu hjá sama hárgeiðslumanninum hjá Rauðhettu&Úlfinum útaf því þegar ég fer þangað þá tekur hann vel á móti mér, sýnir metnað í því sem hann er að gera og einbeitir sér að mér og að ég sé sáttur. Ég fæ mér yfirleitt kaffibolla hjá Te&kaffi nokkrum sinnum í viku vegna þess að starfsmennirnir þar eru kurteisir, vingjarnlegir og taka yfirleitt vel á móti manni. Svipaðar ástæður eru fyrir þeim veitingastöðum sem ég stunda, hvar ég versla fötin mín, hvaða internetþjónustur ég kaupi o.s.frv. Mest öll kauphegðun mín ræðst af því hversu vel mér líkar við viðkomandi og hvort ég telji hann vera kurteisan og heiðarlegan, ég held að það sama stýri kauphegðun flestra einstaklinga.

Það eitt að vera kurteis og heiðarlegur í viðskiptum getur skapað jákvætt umtal og búið til góðan hóp fastra viðskiptavina.

Einnig mun þér líka bara líða betur vitandi að þú sért að sýna þann metnaði í starfi að vera alltaf kurteis og heiðarlegur.

 

 

 


Aldrei gefast upp

Ég grínast oft með það að maður þurfi að vera létt klikkaður til að vera frumkvöðull og ég geri það útaf því að ferillinn við það að láta drauma sína að veruleika er afar erfiður. Staðreyndin er þó sú að maður þarf ekki að vera klikkaður heldur þarf maður að vera með brennandi þörf til að láta drauma sína verða að veruleika og andlegan aga til að halda sér við efnið. Þegar þú ert búinn að vera vinna að verkefni þínu í einhver ár án þess að vera búinn að ná því markmiði sem þú vildir auk þess sem þú ert skuldsettur upp fyrir haus og mannst ekki eftir því hvenær þú tókst síðast frí þá getur það verið mjög erfitt að halda áfram. Á slíkum tímabilum er mjög auðvelt að afsaka sig með „ég reyndi allavegana“ og gefast upp en ef þú gefst up þá veistu aldrei hversu nálægt því þú varst að ná velgengni.

Besta dæmisaga sem ég þekki um slíkt tilfelli er úr bókinni Think and Grow Rich eftir Napoleon Hill þar sem hann segir frá R.U. Darby sem eyðir mörgum árum ævi sinnar, öllum ævisparnaði sínum og láni frá ættingjum og vinum í að grafa eftir gulli. Eftir að hafa eytt miklum tíma og ekkert er að ganga gefst Darby upp og selur námuna til aðila sem hafði brennandi þörf til að verða gullnámumaður og var búinn að eyða síðustu 10 árum ævi sinnar í að kynna sér ferlana. Nýji kaupandinn af námunni gerði sér grein fyrir mikilvægi þess að fá sérfræðiráðgjöf og því ræður hann til sín sérfræðing í gullnámum sem metur námuna og tilgreinir hvar líklegast er að finna gullið. 3 fetum frá þeim stað semDarby hafði gefist upp í námunni finnur nýji eigandinn eina stærstu gullæð sem fundist hefur á svæðinu og verður einn af ríkustu mönnum Bandaríkjanna. Skiljanlega þá olli þetta Darby miklum óþægindum að vita til þess að hann hafi gefst upp svo nálægt gullæðinni og ákvað hann uppfrá þessu að gefast aldrei aftur upp á draumum sínum. Síðar meir stofnaði hann Tryggingarfélag og þetta hugarfar hans gerði honum kleyft að ná að byggja upp stórt og mikilfenglegt fyrirtæki. Lærdómurinn af þessari sögu er sá að það er mikilvægt að leita ráðgjafar frá þeim sem vita betur og að maður á aldrei að gefast upp 3 fetum frá gulli.

Í næstum 10 ár hef ég verið í ýmiskonar sjálfstæðum rekstri og hef kynnst bæði góðum og slæmum tímum. Ég er ennþá ekki búinn að ná markmiði mínu en ég er með brennandi þörf á að ná því og ég VEIT að það mun nást fyrr eða síðar. Það sem hefur veitt mér stuðning í gegnum erfiðu núðlusúputímabilin er fyrsta lagi vissa mín um að þetta muni nást og öðru lagi bækur sem hafa veitt mér innblástur og skilning á ferlinu. Ég reyni alltaf þegar á á lausa stunda að flétta í bækur sem tengjast velgengni eða þeim iðnaði sem ég er að vinna á, hljóðbækur þegar ég er að keyra eða skokka og rafbækur sem ég get lesið í símanum mínum hvenær sem er.

Anthony RobbinsEnglish: Amercian self-help writer Napoleon Hi...Robert T. Kiyosaki

 

 

 

 

 

Ef ég ætti að ráðleggja ykkur eitthvað til að halda eldmóðinum og halda áfram að berjast þá er það að vera stöðugt að auka við ykkur fróðleik og reynslusögum frá fólki sem hefur gert það sem þið eruð að gera. Lesið bækur eftir Napoleon Hill, Robert KiyosakiBrian TracyTony Robbins og bara hvern sem er sem hefur reynslu af því sem þið viljið afreka.

Enhanced by Zemanta

10 algengustu mistök frumkvöðla

Ég skrifaði fyrir nokkru síðan grein um Topp 10 mistök í fyrirtækjarekstri og augljóst var að ég hitti þar á efni sem margir voru áhugasamir um enda fékk ég mjög góð viðbrögð við þeirri grein. Í framhaldi birtist grein á mbl.is, auk þess sem ég hélt fyrirlestur upp í Ásbrú frumkvöðlasetri, fór í útvarpsviðtal í Morgunútvarpinu á Rás 2 og svo síðast var ég beðin um að halda fyrirlestur upp í Klak nýsköpunarmiðstöð. Síðasti viðburðurinn var tekin upp á vidjó og því datt mér til hugar að deila honum með ykkur hér, á eftir mínum fyrirlestri kom hún Rúna Magnúsdóttir hjá BRANDit til að ræða um mikilvægi þess fyrir frumkvöðla að byggja sér upp ímynd. Rúna kemur með marga góða punkta sem við getum öll nýtt okkur til að ná betri árangri.


Klak-1 x264 from Maria Thorgeirsdottir on Vimeo.


9 Góð ráð fyrir styrkumsóknir

Ég býst við að margir séu að kljást við styrktarumsóknirnar núna og mér datt þess vegna til hugar að deila með ykkur nokkrum góðum ráðum sem ég hef fengið þegar ég hef verið að vinna mínar umsóknir.

1. Hugsaðu út fyrir litlu eyjuna okkar.

Þegar þú ert að sækja um styrki þá er allt í lagi að hugsa stórt, við sem íslendingar eigum það oft til að afmarka okkur og viðskiptahugmyndir okkar við þessa litlu eyju sem við búum á. Reynið frekar að hugsa út fyrir landsteina og sjá fyrir ykkur hvernig hugmyndin getur þróast og stækkað til annara landa.

2. Byrjaðu smátt. 

Ekki fara fram úr þér í upphafinu, þótt svo þú sért að stefna langt með hugmyndina þá þarftu að sýna fram á það að þú sért einnig raunhæfur. Það er erfitt að koma fyrirtæki af stað og tekur tíma, ekki fara í einhverja EXCEL reikninga sem sýna að fyrirtækið skili hagnaði strax frá upphafi, sýndu frekar fram á að þetta verði erfitt í upphafi en vaxtamöguleikarnir séu góðir.

3. Nýnæmi.

Flestir styrkir sem þú ert að sækja um ganga út á nýnæmi þ.e.a.s. að þú sért að skapa eitthvað nýtt eða sért með einhverja nýja nálgun á þjónustu sem er til fyrir. Það er mikilvægt að útskýra þetta nákvæmlega, hvað ertu að gera sem samkeppnisaðilarnir eru ekki að gera, hvað aðskilur þig frá þeim? Þarna mæli ég líka með að þið komð með rök fyrir því sem þið eruð að segja ekki koma með einhverjar alhæfingar á borð við "Varan okkar er bara miklu flottari" eða "Tæknin í okkar vöru er miklu öflugri en hjá samkeppnisaðilum". Reynið frekar að eyða smá tíma í að greina samkeppnisaðila ykkar og koma svo með ýtarlega lýsingu á hvað samkeppnisaðilarnir eru að gera og hvernig þið gerið það svo öðruvísi og afhverju ykkar leið sé betri.

4. Einfaldaðu þetta.

Flestar umsóknir sem ég hef lesið yfir eru svo kaótískar að engin venjulegur maður getur almennilega skilið þær. Við eigum það til að troðfulla allar umsóknir af textum um vöruna, markaðsrannsóknir, teikningar, fylgiskjöl, meðmæli og allt það sem við getum. Stundum er minna meira.

5. Hnitmiðað.

Vertu fyrirfram búin að ákveða sölupunktinn þinn með umsókninni þ.e.a.s. hvað þú vilt koma á framfæri og skrifaðu alla umsóknina með þann punkt í huga. Ef þú gerir þetta þá verður miklu betra samhengi í umsókninni og auðveldara að lesa hana. Hafið það einnig í huga að sá sem kemur hugsanlega til með að lesa yfir umsóknina hefur kannski enga þekkingu á því sviði sem þú ert að starfa á og þarf því að útskýra allt fyrir honum á skýran og hnitmiðaðan hátt.

6. Þekktu samkeppnina.

Það er afskaplega algengt að fólk gefi sér ekki nægjan tíma í að kynna sér markaðinn sem það er að fara inn á og þá samkeppni sem er þar fyrir. Þið getið lært óhemju mikið um hvaða iðnað sem er bara með því að skoða hvernig samkeppnisaðilarnir framkvæma hlutina. Takið ykkur tíma í að skoða þetta.

7. Skilgreindu markhópinn.

Vertu viss um hvað þú ert að selja, hverjum þú ætlar að selja þetta, hvað þeir eru tilbúnir að borga fyrir það og hvort þeir séu tilbúnir að kaupa það.

8. Sjónrænt.

Góðar teikningar, ljósmyndir, uppköst eða aðrar myndir sem útskýra vöruna, þjónustuna eða fyrirtækið geta gert ótrúlega mikið bæði til að gera umsóknina skiljanlegri og einnig til að láta það líta út fyrir að hugmyndin sé kominn lengra en hún er í raun kominn.

9. Bara ein hugmynd!

Síðasta og að mínu mati mikilvægasta ráðið er að sækja bara um eina hugmynd. Það sem ég meina þar er að það er algengt vandamál hjá frumkvöðlum að vera með alltof margar hugmyndir og vilja framkvæma þær allar. Þá gerist það oft að reynt er að troða mörgum hugmyndum í sömu umsóknina eða búa til allskonar auka viðbætur við upphaflegu hugmyndina. Reynið miklu frekar að vera með eina góða hugmynd sem er vel afmörkuð og komið henni frá ykkur skýrt og greinilega.

 


Ekki greiða þér laun!

Þegar þú ert að stofna fyrirtæki þá er freistandi að láta fyrirtækið greiða þér laun fyrstu mánuðina svo þú getir nú borðað og haft eitthvað húsaskjól. EKKI GERA ÞAÐ!

Okey titillinn á greininni er kannski full dramatískur hjá mér þar sem markmiðið er að búa til rekstur sem skilar þér tekjum svo þú getir lifað góðu lífi. En á byrjunarstigum reksturisins getur það reynst mjög dýrkeypt að taka verðmætan pening úr fyrirtækinu bara svo þú getur haft smá pening á milli handanna. Ég mæli eindregið með því að fólk reyni frekar að lifa á litlu sem engu fyrstu mánuðina eða árin á meðan fyrirtækið er að komast af stað. Kostnaðurinn við að greiða laun er mun meiri heldur en flestir gera sér grein fyrir.

Ég prufaði að reikna út hversu mikið af launakostnaði fyrirtækisins væri raunverulega að skila sér í vasa "starfsmannsins" þegar launin eru greidd og það kom í ljós að einungis 51% - 81% af kostnaðinum er að skila sér í vasa launþegans. Því hærri sem launin eru því lægri er hlutfallið.

Eins og sést á myndinni hér fyrir ofan þá fór prósentutalan lækkandi eftir því sem launaupphæðin hækkar og því skilar sér stærra hlutfall peningsins í vasa launþegans (þín) eftir því sem launin eru lægri. En förum aðeins yfir þá kostnaðarliði sem fylgja því að greiða laun og tökum dæmi um starfsmann sem er með kr.300.000- á mánuði í laun.

Kostnaður starfsmanns

Heildarlaun: kr.300.000-

Skattþrep 1 (37,32%): kr.85.836-

Skattþrep 2 (40.22%): kr.28.154-

Skattafsláttur: kr. 48.485- (dregst frá skattinum)

Lífeyrissjóður (4%): kr.12.000-

Útborguð laun til starfsmanns:  kr.222.495- (74% af heildarlaunum).

 

En þar sem þú átt fyrirtækið þá þarftu líka að hugsa um þann launakostnað sem fylgir því fyrir fyritæki að greiða út laun til starfsmanns.

Kostnaður fyrirtækis

Lífeyrissjóður (8%): kr.24.000-

Tryggingargjald (7,69%): kr.23.070-

Alls kostnaður fyrirtækis: kr.47.070- (16% af heildarlaunum starfsmanns)

 

Niðurstaða

Ef við skoðum hvernig kostnaðarliðirnir skiptast hlutfallslega niður þá má sjá að skatturinn tekur ca.19% af ofangreindu dæmi, lífeyrissjóðurinn 10% og Tryggingargjaldið er 7%.

Einstaklingur sem rekur fyrirtæki og greiðir sér kr.300.000- í mánaðarlaun fær þannig einungis kr.222.495- í vasann á sama tíma og fyrirtækið þarf að borga kr.347.070. Þetta þýðir að einungis 64% af útlögðum kostnaði fyrirtækisins skilar sér í vasa launþega/eigenda. Það getur því verið gott, ef þú getur, að lágmarka greidd laun fyrstu mánuðina af fyrirtækjarekstrinum þangað til að reksturinn er farinn að skila inn nægjanlegum tekjum til að réttlæta launakostnaðinn.

 


Engan aumingjaskap, náðu markmiðum þínum fyrir 2013

Jæja nú eru liðnir 5 dagar af 2013.

Hvernig gengur ykkur að vinna að markmiðum ykkar fyrir árið?

Meirihlutin af ykkur hefur líklega ekki sett sér nein markmið eða sagt ætla gera það síðar og svo gleymt. Einhver ykkar hefur sett sér markmið en ekki skrifað þau niður og þegar vinnan og hversdagsleikinn byrjaði aftur hafið þið líklega gleymt þeim. Örfáir hérna hafa skrifað niður markmið sín og þá er spurninginn hvort þið séuð búin að vera vinna að því að ná þeim.

Ef þið ætlið að gera 2013 að frábæru ári og betrumbæta líf ykkar þá þýðir engan aumingjaskap. Þið verðið að vera öguð og vinna markvisst að því að ná markmiðum ykkar. Það er þetta "auka" sem þið leggjið á ykkur sem aðrir leggja ekki á sig sem aðskilja ykkur frá hópnum.

"The last three or four reps is what makes the muscle grow. This area of pain divides the champion from someone else who is not a champion. That's what most people lack, having the guts to go on and just say they'll go through the pain no matter what happens." - Arnold Schwarzenegger

Ég setti mér 27 markmið fyrir 2013 og skipti þessum markmiðum niður í 3 flokka, heilsu, fjármál og samskipti. Sum markmiðin eru lítil önnur eru stór en öll markmiðin er þannig að ég veit innst inni að ég get náð þeim. Til að tryggja það að ég muni standa mig í öllum flokkum hef ég ákveðið að vera með ábyrgðarmann sem ég þarf að svara til í hverjum flokki. Ég er búinn að ráða markþjálfa til að tryggja það að ég standi mig í fjármálaflokknum, ég er að hitta einkaþjálfa til að finna þann rétta sem getur tryggt það að ég nái settum markmiðum í heilsu og ég hef fengið félag minn til að vera ábyrgðamaður minn í samskiptum. Að lágmarki 1 sinni í mánuði mun ég hitta þessa 3 ábyrgðarmenn mína til að fara yfir markmið mín og sjá hvort ég sé að standa mig og hvar ég geti betrumbætt mig. Það þarf mikinn aga til að ná markmiðum sínum og ég ætla reyna mitt besta til að tryggja að svo verði í mínu tilfelli.

Ég ætla að tryggja að 2013 verði mitt besta ár fram að þessu og ég vona að þú gerir slíkt hið sama.

Það þýðir engan aumingjaskap, mössum 2013!

 


Markmið fyrir nýtt ár.

Það er nú orðin löng hefð hjá mér fyrir því að nýta áramótin til að skilgreina markmið mín fyrir komandi ár. Ég tek þessu alvarlega og ef ég get reyni ég að taka nokkra daga í þennan feril þar sem markmiðin koma til með að hvíla á öxlum mínum í heilt ár. Flestir af þekktustu rithöfunum og fyrirlesurum um persónulega velgengni eru sammála því að eitt mikilvægasta atriðið til að ná árangri sé að vera með niðurskrifuð markmið og yfirfara þau svo reglulega. Fyrir þá sem eru ekki vanir að setja sér markmið þá getur þetta verið nokkuð erfiður ferill þar sem þetta byggist ekki bara á því að skrifa niður það fyrsta sem þér dettur til hugar heldur þvert á móti þarftu að taka góðan tíma í að átta þig á því hver þú ert og hvað þú vilt fá út úr lífnu. Hjá mér er þetta alsherjar markmiðasetning þar sem ég fer bæði yfir einkalíf mitt og fyrirtækjareksturinn en það er oft þunn lína þar á milli hjá mörgum frumkvöðlum.

Eftirfarandi eru þau þrjú skref sem ég fer í gegnum um hver áramót til að skrá niður eigin markmið fyrir komandi ár, það eru margar aðrar leiðir til að gera þetta en þessi hefur reynst mér best.

1. Hver er ég og hvað vil ég fá út úr lífinu?

Ég undrast alltaf hversu fáir staldra við til að spyrja sig að þessari spurningu. Það er ekkert mikilvægara í lífinu en að þekkja sjálfan sig og vita hvað maður vill fá úr út lífinu. Þetta er á engan hátt auðveld spurning og líklega fæstir sem geta svarað henni án þess að hika eða efast en bara það að þið hafið staldrað við og velt þessu fyrir ykkur kemur ykkur nær því að lifa hamingjusömu lífi. Afhverju ertu að gera það sem þú ert að gera? Afhverju stofnaðirðu þetta fyrirtæki? Hvernig viltu lifa lífinu?

 

2. Skoða fortíðina.

Áður en farið er að skipuleggja framtíðina þarf að skoða fortíðina og sjá hvað hefur virkað þar og hvað hefur ekki virkað. Í þessu skrefi fer ég vanalega yfir fyrri áramótamarkmið og skoða hvernig ég hef staðið mig í að láta þau verða að veruleika. Ef þú hefur ekki náð að láta eitthvað markmið verða að veruleika þarftu að skoða afhverju það er? Er einhver augljós ástæða fyrir því eða viltu það einfaldlega ekki nógu mikið? Mörg gerum við þau mistök að setja okkur alltof stór markmið svo þegar við náum þeim ekki höldum við að markmiðasetning gangi ekki. Staðreyndin er sú að illa úthugsuð markmið skila engu.

 

3. Handskrifa markmiðin.

Hversu mörg markmið þið endið með getur verið breytilegt og fer algjörlega eftir ykkur sjálfum. Þetta gæti vetið eitt stórt markmið eða mörg minni. Lengi vel hafði ég það sem viðmið að reyna alltaf að skrá niður 10 markmið á hverju ári og það reyndist mjög vel og ég myndi í raun mæla með að þið mynduð miða við 10 markmið. Náið ykkur svo í blað og penna og handskrifið markmiðin, það skilar einhvern veginn svo miklu meiri tengingu við markmiðin að handskrifa þau frekar en að rita þau bara í tölvuna.

 

Síðast en ekki síst þurfið þið að yfirfara markmið

ykkar reglulega yfir árið og vinna markvisst

að því að láta þau verða að veruleika.


Topp 10 mistök í fyrirtækjarekstri

Þegar verið er að fara út í eitthvað sem maður hefur aldrei gert áður eins og að stofna fyrirtæki í fyrsta skipti þá er auðvelt að gera mistök. Sjálfur hef ég gert óhemju mikið af mistökum í þeim fyrirtækjum sem ég hef stofnað en sem betur fer hef ég lært af þessum mistökum og er orðin klárari í dag fyrir vikið. Til lengri tíma litið er það mikilvægur lærdómur sem fylgir þeim mistökum sem þú hefur gert og því skaltu aldrei skammast þín fyrir að viðurkenna mistök þín. En sama hversu mikið við lærum af þeim þá getur þó verið afskaplega erfitt að takast á við þau á meðan á þeim stendur. Ég hef því tekið sama hérna 10 algeng mistök sem ég hef sjálfur kynnst og sem ég hef kynnst hjá þeim frumkvöðlum sem ég hef verið að leiðbeina og aðstoða.

 

Mistök 1: Halda að þú verðir rík(ur) strax.

Þetta eru mjög algeng mistök þar sem einstaklingar halda að fyrirtæki þeirra muni skila þeim hagnaði strax. Ég veit um engin dæmu um það að einhver verði ríkur við það eitt að stofna fyrirtæki. Staðreyndin er sú að það að fara út í fyrirtækjarekstur þýðir yfirleitt mikla vinnu og lítil sem engin laun fyrstu árin. Ekki búast við að fara græða milljónir bara útaf því þú stofnar fyrirtæki eða útaf því þú ert með góða hugmynd. Almennt sé má áætla að það taki 2-3 ár af mikilli og erfiðri vinnu áður en fyrirtækið fer að komast á þann stað að það fari að skila hagnaði fyrir stofnendann.

 

Mistök 2: Setja of mikinn pening í fyrirtækið.

Þetta kann að hljóma nokkuð undarlega fyrir mörg ykkar þar sem það er erfitt að ímynda sér að of miklir peningar í fyrirtæki séu slæmur hlutur. Þetta er líklega ykkar eigin sparnaður sem þið eruð að setja í fyrirtækið og ef þið hafið litla reynslu af því að reka svona fyrirtæki þá er mjög auðvelta að brenna upp peninga í ekki neitt. Þegar þið eruð að stofna fyrirtæki þurfið þið að reyna sanna bæði viðskiptahugmyndina og tekjumódelið áður en þið farið að setja peningar ykkar og annara í það að fjármagna það. Þetta er ekki auðvelt að gera en ef þið getið með litlum pening sannað að það séu viðskiptavinir sem vilja kaupa vöruna ykkar þá getið þið með miklu meira öryggi sett inn meiri pening til að fylgja því svo eftir. Einnig er oft gott að vera með lítill fyrirtæki í upphafi því það er svo miklu auðveldara að hafa yfirsýn yfir öllu og breyta um stefnu ef eitthvað fer úrskeiðis.

 

Mistök 3: Ætla að gera allt.

Það er mikilvægt að vera með mjög vel skilgreinda þjónustu/vöru og vel skilgreindan markhóp. Ég hef lent í því oftar en ég get talið að heyra unga frumkvöðla og þá sérstaklega í hugbúnaðargeiranum tala um að varan þeirra ætli að sameina svo miklar upplýsingar og lausnir að það verði einhverskonar heildarlausn fyrir allt og alla. Góð vara að mínu mati leysir eitt vandamál og leysir það vel. Þegar þið ætlið að fara búa t.d. „til vefsíðu með öllum veitingastöðum í heiminum og byggja það ofan á samfélagsvef og bókunarkerfi“ þá veit ég að þið eruð á rangri leið. Það að búa til einfalda og skilvirka vöru er afskaplega erfiður og tímafrekur ferill, hvað þá ef þú ert með flókna hugmynd með endalaust mörgum lögum og snúningum. Hafðu þetta einfalt og hnitmiðað og þá er líklegra að hugmyndin nái langt.

 

Mistök 4: Halda að varan selji sig sjálf.

Þetta gerist ALDREI! Mér er alveg sama hversu frábær hönnður, forritari, verkfræðingur, skartgripassmiður eða glerblásturmaður þú ert, varan selur sig aldrei sjálf. Þú þarft alltaf að leggja mikla áherslu á sölu- og markaðsmál og koma vörunni til hugsanlegra kaupenda. Ef þú ert ekki góður sölumaður þá verðurðu bara að læra að selja. Þú ert stofnandi fyrirtækisins og þú verður að geta selt vöruna sjálfur því það getur engin gert það fyrir þig. Seinna meir þegar þú hefur náð árangri geturðu fengið aðra til að aðstoða við söluna en það er langt í það og þangað til verður þú bara að selja sama hvað. Fyrirtækið verður að fá pening inn til að geta lifað og það eina sem skilar því pening eru sölur.

 

Mistök 5: Ætla búa til fullkomna vöru.

Þegar við erum að vinna með eigin viðskiptahugmynd langar okkur að sjálfsögðu að búa til bestustu og flottustu vöru sem nokkurtímann hefur sést. Þetta er mjög skiljanlegt en á sama tíma er þetta ein helsta orsök fyrir því að hugmyndir deyji. Staðreyndin er sú að þú hefur bara X mikinn tíma til að koma vörunni þinni á markaðinn og þess vegna hefurðu því miður ekki þann lúxus að geta endalaust dúllað þér við hugmyndina. Ef þú ert með vöruhönnun komdu henni sem fyrst til framleiðenda og í sölu, ef þú ert með vefsíðu settu hana þá á netið þótt hún sé ekki alveg 100% fullkomin. Staðreyndin er sú að við verðum að setja á okkur tímamörk og vinna eftir þeim, ef við tökum of mikinn tíma í svona hluti þá byrjum við bara að tapa pening, fáum engar tekjur inn og á endanum deyr bara varan áður en hún fær tækifæri til að koma inn í heiminn.

 

Mistök 6: Spyrja hvað reksturinn mun gera fyrir þig.

Ekki hefja rekstur bara útaf því að þið haldið að þið getið grætt á vörunni. Hugsið frekar hvaða vandamál varan mun leysa og hvernig hún mun nýtast viðskiptavinum ykkar. Ef þið eruð með vöru eða þjónustu sem virkilega nýtist viðskiptavinum ykkar og skapar virði fyrir þá þá mun það einnig skapa tekjur og hagnað fyrir ykkur. Þannig þið græðið meira á því að hugsa um þarfir viðskiptavinar en ykkar eigin.

 

Mistök 7: Velja ranga meðeigendur.

Það að fara einn út í rekstur getur verið rosalega erfitt þar sem öll ábyrgðin, allt stressið og allur kvíðin hvílir á þínum öxlum. Það er ekki auðvelt og þess vegna kjósa margir að fara í rekstur með einhverjum öðrum til að minnka álagið. Veljið vel þá aðila sem þið vinnið með útaf því ef þið veljið ranga meðeigendur þá getur það verið verra en að fara í þetta einn. Einnig mæli ég alltaf með að hafa mjög vel skilgreint hvernig samstarfinu verður háttað og hvað skuli gera ef ósætti koma upp á. Þá er gott að setja upp hlutahafasamkomulag á milli eigenda.

 

Mistök 8: Leggja allt undir.

Það að hætta í vinnunni og fara vinna í fullri vinnu við fyrirtæki sitt er rosalega áhættusamt sérstaklega þar sem það er vitað að það tekur langan tíma fyrir fyrirtækið að byrja skila hagnaði og sparnaðurinn er oft fljótur að brenna upp. Þá getur maður staðið eftir með enga vinnu, engan sparnað og fyrirtæki sem gekk ekki upp. Fyrir flesta getur það verið betra að fara hægt í sakirnar og byrja bara í rekstri samhliða vinnu og starfa þannig þangað til að fyrirtækið er komið á það stig að þið getið farið að vinna í því í fullri vinnu án mikilrar áhættu.

Ég verð þó að viðurkenna að ég hef verið tvístígandi með hvort ég eigi að kalla þetta mistök þar sem ég hef sjálfur alloft lagt allt mitt undir í fyrirtækjarekstri mínum og mun halda áfram að gera það. Ég geri mér þó grein fyrir því að það sama á ekki endilega við um alla og fyrir marga þá er þetta afskaplega stórt skref sem getur haft gríðarlegar afleiðingar.

 

Mistök 9: Ísland er lítill markaður.

Þetta eru séríslensk mistök en Ísland er ROSALEGA LÍTLL markaður aðeins 300.000- manns. Þótt svo að hugmyndir gangi upp á öðrum mörkuðum með tugi milljóna aðila þá þýðir það ekki að þær geti gengið upp á litla Íslandi. Þannig hugsið virkilega hvort þið getið fengið nægar tekjur á þessum litla markhóp áður en þið farið að byggja upp heilt fyrirtæki í kringum það.

 

Mistök 10: Frestunarárátta.

Hættu að lesa þessa grein og farðu að framkvæma og vinna í þínum hugmyndum NÚNA!

 


Gerðu einn hlut og gerðu hann vel

Fyrir nokkrum árum síðan var ég líkt og svo margir aðrir ungir menn að prufa mig áfram og reyna finna leiðir til að græða pening og starfa sjálfstætt. Það var fátt sem ég prufaði ekki en meðal þess sem ég prufaði á þessum tíma var bílabrask, internetviðskipti, hlutabréfaviðskipti, franchise fyrir ýmiskonar fyrirtækjarekstur, sala DVD mynda í kolaportinu, innflutningur á hinu og þessu, fasteignaviðskipti, þjónusturekstur og sitthvað fleira. Það skemmtilega við þetta allt saman var að öll þessi viðskiptatækifæri virtust búa yfir óendanlegum möguleikum og ég var yfirleitt með 5-10 hugmyndir í gangi á hverjum tíma.

Þetta er mjög einkennandi fyrir marga frumkvöðla að þeir hafa svo gaman af því að byrja eitthvað nýtt að þeir eru, líkt og ég var, alltaf með fullt af hugmyndum í gangi. Það sem maður gerir sér svo grein fyrir eftir að hafa verið í rekstri í lengri tíma er að stundum er betra að einbeita sér bara að einum hlut og gera hann vel frekar en að vera með tugi hugmynda í gangi og framkvæma þær allar með ófullnægjandi hætti.

Það er atriði úr skemmtilegri bíómynd með Billy Crystal í aðalhlutverki sem heitir City Slickers frá 1991 og þetta atriði tekur vel saman þann fróðleik sem mér langar til að deila með ykkur. Þar er gamli kúrekinn búinn að finna tilgang lífsins, sem er mjög einfaldur, finndu þetta eina atriði sem skiptir þig máli og einbeitu þér að því. Það sama má segja um fyrirtækjarekstur, finndu eina hugmynd sem þú hefur ástríðu fyrir og einbeitu þér nær eingöngu að henni þangað til þú hefur náð góðum árangri með henni, þá fyrst geturðu farið að skoða aðrar hugmyndir ef þú svo kýst. Mín reynsla segjir mér að það þurfi yfirleitt 2-3 ár í að framkvæma hverja hugmynd og koma henni á þann stað að hún sé búinn að sanna sig.

Ég veit að það er skemmtilegt að vera alltaf að byrja nýjar og nýjar hugmyndir en ef þú vilt virkilega ná árangri þá þarftu að velja þér eina hugmynd og fylgja henni alla leið.

 


Milljón króna hugmyndin

Ertu með frábæra hugmynd?

Sem gæti skapað hundruði milljóna?

Og þarftu bara einhvern til að framkvæma hana fyrir þig?

eða kannski bara einhvern til að gefa þér fullt af pening svo þú getir framkvæmt hana?

 

Þá þykir mér leiðinlegt að láta þig vita að þú ert ekki með nein verðmæti í höndunum. Ég hef aðstoðað og leiðbeint hundruði einstaklinga sem eru að taka sín fyrstu skref í fyrirtækjarekstri og algengustu mistök sem ég sé hjá þessum einstaklingum er að þeir halda að hugmynd þeirra ein og sér sé milljóna króna virði.

Staðreyndin er sú að hugmynd án framkvæmdar er ekkert annað en draumur sem aldrei mun rætast. Ef þú ert ekki sjálf(ur) tilbúin að láta hugmyndina verða að veruleika og leggja á þig þá miklu vinnu sem því fylgir þá verður hún aldrei að veruleika. Það mun engin framkvæma hana fyrir þig, það mun engin bara gefa þér pening til að framkvæma hana, þú munt ekki fá styrk frá ríkinu eða lán (án sjálskuldarábyrgðar og veðs) hjá bankanum. Þú þarft sjálf(ur) að framkvæma hana, leggja þitt blóð, svita og tár í hana.

Ég er ekki að segja að þú eigir ekki að framkvæma hana, þvert á móti er ég að segja að ef þú vilt virkilega sjá hugmynd þína að veruleika þá verðurðu að framkvæma hana sjálf(ur). Það er ekkert auðvelt við það að búa til verðmæti úr hugmynd, það krefst mikillar vinnu og aga og hugsanlega 1-2 ár þar sem þú lifir á núðlusúpum vegna þess að þú hefur ekki efni á öðru.

En þótt svo að hugmynd sé einskis virði þá þýðir það ekki að þið getið ekki grætt á henni. Ef þið fáið góða hugmynd og framkvæmið þá gætuð þið hugsanlega skapað mikil verðmæti fyrir ykkur sjálf og samfélagið í heild.

Ég er að skrifa þessa grein ekki til að gagnrýna hugmyndir ykkar eða vera leiðinlegur heldur til að flýta all verulega fyrir ferlinum ykkar með því að segja ykkur hvað þið eigið ekki að vera eyða tíma ykkar í að hugsa um. Þannig getið þið vonandi farið beint í að vinna í uppbyggilegum hlutum og vonandi náð að gera hugmyndir ykkar að veruleika fyrr. Hérna kemur listinn yfir þær hugsanir sem ber að varast þegar verið er að vinna með hugmynd.

 

5 atriði sem bannað er að hugsa

1. „Ég sel bara einhverju stóru fyrirtæki hugmyndina“
Nema þú sért með eitthvað einkaleyfi eða einhverskonar sönnun á gæðum vörunar þá er þetta afskaplega langsótt. Ég hef allavegana aldrei á mínum ferli heyrt um neitt dæmi um að einstaklingur selji hugmynd sína á byrjunarstigi fyrir einhverja upphæð. Aftur á móti hef ég heyrt dæmi um aðila sem eyða árum í að þróa einhverskonar hugmynd, fá einkaleyfi á hugmyndin og selja hana svo til einhvers fyrirtækis en það gerist ekki yfir nóttu, það tekur langan tíma.

2. „Ég fæ bara einhvern annan til að gera þetta fyrir mig“
Verðmæti hugmyndarinnar eru ekki fólgin í því hversu góð hugmyndin er heldur hversu vel hún er framkvæmd. Ef þú finnur aðila sem er nógu hæfileikaríkur til að gera hugmynd þína að veruleika og breyta henni í pening þá væru mikil verðmæti í því fyrir þig að fá slíkan aðila til liðs við þig. Aftur á móti myndi slíkur aðili geta gert verðmæti úr flestum hugmyndum og þú hefðir því engin verðmæti fyrir hann á móti. Þú getur heldur ekki bara greitt einhverjum fyrir þetta því ferillinn á bak við það að gera hugmynd að veruleika tekur fleiri fleiri mánuði eða ár og þú getur líklega ekki verið með persónu á launaskrá í þetta langan tíma án þess að fá tekjur á móti. Þú þarft líka að vera fjölhæfur einstaklingur til að framkvæma þetta og manneskja sem er með eldmóð fyrir að láta hugmynd sína verða að veruleika er tilbúin að stíga út fyrir þægindasvæði sitt og takast á við allskonar áskoranir sem venjulegur starfsmaður myndi ekki leggja á sig.

3. „Ef ég fyndi nú bara einhvern til að fjárfesta í hugmyndinni“
Almennt séð er talað um að bara hin þrjú-F fjárfesti í hugmyndum á upphafsstigum en það eru sem sagt Family, Friends and Fools (fjölskylda, vinir og fáfróðir). Hugsanlega gætuð þið fengið vini og fjölskyldumeðlimi til að fjárfesta í hugmynd ykkar en spurning er hvort þið viljið vera taka áhættu með fjármuni fjölskyldu ykkar, enda er ekkert öruggt í slíkum fjárfestingum. Þið fáið ekki neina alvöru fjárfesta til að fjármagna hugmynd ykkar fyrr en þið eruð komin mun lengra í ferlinum, flest frumkvöðlafyrirtæki sem ég þekki til hafa fengið fjárfesta inn ca. 1-2 árum eftir að þeir hefja reksturinn og þá í flestum tilfellum þegar búið er að sanna tekjumódelið.

4. „Bankinn hlýtur að vilja lána mér fyrir þessari frábæru hugmynd“
Bankar lána þér ekki neitt nema þeir séu 100% öruggir um að fá það til baka og þess vegna munu þeir þurfa fá veð í fasteign eða sjálfskuldarábyrgð eða bæði fyrir láninu. Það lánar engin banki þér pening bara út á góða hugmynd eða flotta viðskiptaáætlun. Þú skalt einnig varast það að byrja fyrirtækjarekstur þinn í skuld, enda á reksturinn alltaf eftir að verða dýrari en þú áttir von á.

5. „Ég hlýt að geta fengið ríkið til að styrkja þetta enda styrkja þeir listir/nýsköpun/frumkvöðla/fyrirtæki“
Það eru einhverjir styrkir í boði og þið eigið einhvern möguleika á að fá þá styrki en það er tímafrekt og yfirleitt eru það lágar upphæðir. Þið megið endilega sækja um þessa styrki og láta á það reyna en reynið að forðast það að byggja hugmynd ykkar á því að þið fáið styrk. Það er oft miklu sniðugra að hugsa bara í lausnum og finna ódýrari leið til að framkvæma hugmyndina.

 

Látið hugmyndir ykkar verða að veruleika
en látið bara ekki hluti eins og skort á fjármagni
eða lítinn stuðning koma í veg fyrir að þið framkvæmið.

Það er alltaf hægt að finna leið
til að láta hugmyndir verða að veruleika
með eigin hugarafli og mikilli vinnu. 


Fyrirtækjasölur

Fyrsta skipti sem ég stofnaði fyrirtæki þá keypti ég rekstur sem var nú þegar í gangi og gat þannig fengið hlaupandi start á rekstur minn. Það voru nú þegar einhverjar tekjur í hverjum mánuði og markmiðið mitt var einfaldlega að auka þær með einhverjum snilldarlegum ráðum sem án efa myndu koma upp í huga mér. Lítandi til baka þá voru fullt af mistökum sem ég gerði t.d. það að ég þurfti að veðsetja mig til að geta tekið lán fyrir fyrirtækinu en í dag myndi ég frekar kjósa að fara „bootstrap" leiðina. Ég fékk líka ættingja til að skrifa undir sem ábyrgðarmaður en ég myndi aldrei á milljón árum gera það í dag og svo eyddi ég líka óþarflega miklum pening í að láta fyrirtækið líta vel út í staðinn fyrir það að einbeita mér að sölu. En burt séð frá þessum mistökum mínum þá getur það oft verið sniðug leið til að byrja í rekstri að kaupa fyrirtæki sem er nú þegar í rekstri. Hafið það bara í huga að fá reyndari aðila til að kíkja yfir þetta með ykkur og verið viss um að seljandinn sé traustur aðili. En hvar finnur maður svo fyrirtæki til sölu?

Það eru nokkrar vefsíður með fyrirtæki til sölu á skrá og eru þau eftirfarandi:

Fyrirtækjasalan Suðurveri

www.fyrirtaeki.is: Líklega elsta fyrirtækjasalan á landinu og einmitt þar keypti ég mitt fyrsta fyrirtæki.

Fyrirtækjasala Íslands

www.atv.is: Ég hef ekki átt viðskipti við þá en þeir eru búnir að vera til í einhvern tíma.

Fyrirtækjakaup.is

 

www.fyrirtaekjakaup.is: Þessi vefsíða var bara að opna og á vonandi eftir að gera góða hluti.

 

Annars má einnig oft finna lítil fyrirtæki til sölu hjá fasteignasölum eða bara í gegnum einhverja sameiginlega vini sem benda manni á þau. Ég er líklegast að gleyma einhverju eða hugsanlega er eitthvað þarna úti sem ég þekki ekki og því bið ég ykkur vinsamlegast um að kommenta hér fyrir neðan ef þið eruð með einhverjar fleiri vefsíður eða fyrirtæki þar sem má nálgast upplýsingar um slíkt.

Munið svo bara að fara varlega í öll viðskipti með fyrirtæki þar sem það eru margir hlutir sem þarf að huga að og þið viljið alls ekki kaupa köttinn í sekknum.


Topp 10 facebooksíður fyrir frumkvöðla

Facebook síður virka oft vel til að miðla allskonar upplýsingum og fróðleik og þess vegna ákvað ég að taka saman topp 10 lista yfir facebook síður á Íslandi sem henta vel fyrir frumkvöðla til að fylgjast með. Sjálfur er ég með facebook síðuna Frumkvöðlar en ég mun ekki taka hana með í þennan lista þar sem ég væri þá ekki mikið hlutleysi :)

1. Innovit

2. Startup Reykjavík

3. Klak nýsköpunarmiðstöð

4. Nýsköpunarmiðstöð Íslands

5. Startup Iceland

6.  Seed Forum

7. V6 sprotahús

8. Frumkvöðlasetrið Ásbrú

9. Markaðssetning á Internetinu

10. Markaðsmál á mannamáli

 

Þetta er langt frá því að vera tæmandi list svo endilega skrifið athugasemdir hérna fyrir neðan ef þið munið eftir fleiri áhugaverðum íslenskum frumkvöðlasíðum á facebook.